Batismo ntshinyi?
Diandamuna dia mu Bible
Batismo nkuina muntu mujima mu mâyi.a Bible mmuakule bua bantu ba bungi bavuabu babatize nanku. (Bienzedi 2:41) Mu bantu abu mudi Yezu uvuabu babatize, bamuine mujima mu musulu wa Yadene. (Matayi 3:13, 16) Bidimu bia bungi pashishe, bakabatiza muena Etshiopi mu “dijiba dia mâyi” divua pabuipi ne njila uvuaye uyila.—Bienzedi 8:36-40.
Yezu wakalongesha ne: bua muntu kulua muyidi wende, udi ne bua kubatijibua. (Matayi 28:19, 20) Ke bualu buakalua mupostolo Petelo pende kulongesha.—1 Petelo 3:21.
Netuakule bua malu aa:
Batismo ntshinyi?
Muntu udi ubatijibua bua kuleja bakuabu ne: mmunyingalale bua mpekatu yende, mmuditshipe kudi Nzambi bua kuenza anu disua diende nansha bia kumona lufu; tuambe ne: neikale anu utumikila Nzambi ne Yezu mu malu ende onso. Bantu badi babatijibua badi batuadija kuenza malu adi Nzambi ulomba, malu abapetesha muoyo wa tshiendelele.
Kuina muntu mujima mu mâyi ntshimanyinu tshitambe buimpe tshidi tshileja ne: mmulekele malu mabi. Bidi nanku bualu Bible udi ufuanyikija batismo ne dijiikibua. (Lomo 6:4; Kolosayi 2:12) Kuina muntu mu mâyi kudi kuleja ne: mmufue ku malu mabi avuaye wenza. Padiye ujuuka mu mâyi, bidi bileja ne: mmutuadije nsombelu mupiamupia udi nende bena Kristo badi badilambule kudi Nzambi.
Ntshinyi tshidi Bible wamba bua dibatiza bana ba pambidi anyi tshilele tshia dibavuija bena mu tshitendelelu?
Bible katu wakula bua “dibatiza bana ba pambidi” to.b Katu nansha wamba ne: badi ne bua kubatijibua to.
Dibatiza bana ba pambidi kadiena dipetangana ne malu adi Bible wamba to. Bible utu ulongesha ne: muntu udi musue kubatijibua udi ne bua kukumbaja amue malu. Tshilejilu, mbimpe amanye nansha malongesha a nshindamenu a mu Dîyi dia Nzambi ne ikale uatumikila. Ikale munyingalale bua mpekatu yende. Ikale musambile, mudilambule kudi Nzambi. (Bienzedi 2:38, 41; 8:12) Bana ba pambidi kabena mua kuenza malu au to.
Kubatijibua mu dîna dia Tatu, dia Muana, ne dia nyuma muimpe kudi kumvuija tshinyi?
Yezu wakatumina bayidi bende dîyi ne: “Nuvuije . . . bantu bayidi, nubabatiza mu dîna dia Tatu, dia Muana, ne dia nyuma muimpe, nubalongesha mua kutumikila malu onso andi munuambile.” (Matayi 28:19, 20) Kubatijibua “mu dîna dia Tatu” kudi kumvuija ne: muntu udi mubatijibue mmumanye bukokeshi budi nabu Tatu ne budi nabu Muana; mmumanye mudimu udibu benza, ne mmumanye mudimu udi nawu nyuma muimpe wa Nzambi. Bua kumvua bualu ebu bimpe, mupostolo Petelo wakambila muntu uvua muledibue mulema ne: “Mu dîna dia Yezu Kristo muena Nazaleta, enda!” (Bienzedi 3:6) Mbimueneke patoke ne: Petelo uvua mumanye bukokeshi budi nabu Kristo ne mubuitabe; ke bualu kayi wakenza tshishima atshi mu dîna diende.
“Tatu” n’Yehowac Nzambi. Bu mudiye Mufuki wetu, Mutupeshi wa muoyo, ne Nzambi Wa Bukole Buonso, bukokeshi buende kabuena ne mikalu to.—Genese 17:1; Buakabuluibua 4:11.
“Muana” n’Yezu Kristo uvua mutufuile. (Lomo 6:23) Tuetu katuyi bamanye ne: Yezu ke udi Nzambi muteke bua kukumbaja malu adiye mulongolole ne katuyi bitabe bualu abu, katuakupeta muoyo wa tshiendelele to.—Yone 14:6; 20:31; Bienzedi 4:8-12.
“Nyuma muimpe” mbukole buenzeji bua Nzambi, tuambe ne: bukole butuye wenza nabu malu.d Mona malu avuaye muenze ne nyuma wende muimpe eu: wakafuka bintu, kupesha bantu muoyo, kumanyisha baprofete bende ne bantu bakuabu malu, ne kupeshaye batendeledi bende bukole bua kuenza disua diende. (Genese 1:2; Yobo 33:4; Lomo 15:18, 19) Nzambi wakapesha kabidi bafundi ba Bible nyuma wende muimpe, bobu kufundamu ngenyi yende.—2 Petelo 1:21.
Kubatijibua tshiakabidi mmpekatu anyi?
Bantu ba bungi batu bumbuka mu tshitendelelu tshivuabu baya kubuela mu tshikuabu. Muntu ukavua mubatijibue mu tshitendelelu tshivuaye kumpala yeye mubatijibue kabidi mu tshikadiye mpindieu mmuenze mpekatu anyi? Bamue badi bandamuna ne: eyowa, pamuapa bua tshidi Efeso 4:5 wamba tshia ne: “Mukalenge umue, ditabuja dimue, dibatiza dimue.” Pende mvese au kena uleja ne: muntu kena mua kubatijibua tshiakabidi to. Mona tshitudi tuambidila nanku.
Malu adi Efeso 4:5 wakuila. Mvese eu udi wakula bua bualu bua mushinga buvua mupostolo Paulo muleje bua ne: bena Kristo balelela badi ne bua kuleja mudibu mu buobumue, bikale ne malongesha a muomumue. (Efeso 4:1-3, 16) Bavua mua kushala mu buobumue nanku anu pavuabu balonda Mukalenge umue Yezu Kristo, bikale ne ditabuja, anyi diumvuija dia muomumue dia malongesha adi mu Bible, ne balonda malu a muomumue adi Bible ulomba bua kubatijibua.
Mupostolo Paulo wakakankamija bantu bakavua babatijibue bua babatijibue tshiakabidi. Bua tshinyi? Bualu bavua babatijibue kabayi bumvue bimpe menemene malongesha a Kristo to.—Bienzedi 19:1-5.
Tshimpe tshia kuenza bua kubatijibua. Bua Nzambi kuanyisha batismo wa muntu, muntu au udi ne bua kuikala ne dimanya dijalame dia malongesha a mu Bible. (1 Timote 2:3, 4) Yeye mubatijibue muikale ne dimanya dia malongesha a bitendelelu adi abengangana ne Bible, Nzambi kakuanyisha batismo wende to. (Yone 4:23, 24) Nansha biobi ne: uvua pamuapa mubatijibue ne muoyo mujima, ki mmubatijibue “mbilondeshile dimanya dijalame to.” (Lomo 10:2) Yeye musue bua Nzambi amuanyishe, udi ne bua kulonga bulelela budi mu Bible, kubutumikila, kudilambula kudi Nzambi, ne kubatijibua tshiakabidi. Dîba adi, dibatijibua diende tshiakabidi ki mmpekatu to. Mu kuamba kuimpe, ke tshitambe buimpe tshidiye ne bua kuenza atshi.
Batismo mikuabu idi Bible utela
Bible udi wakula bua batismo mikuabu idi ne diumvuija dishilangane ne dia batismo wa bina muntu mujima mu mâyi bua kulua muyidi wa Kristo. Tumonayi imue ya kudiyi.
Bantu bavua Yone Mubatiji mubatize.e Bena Yuda ne bantu bavua bitabuje buena Yuda bakabatijibua kudi Yone bua kuleja muvuabu banyingalale bua mpekatu wabu wa kubenga kutumikila Mikenji ya Mose ivua Nzambi muelele bena Isalele ku butuangaji bua Mose. Pavua Yone ubatiza bantu bivua bibambuluisha bua balue kumanya Yezu wa ku Nazaleta uvua Masiya ne bamuitabuje.—Luka 1:13-17; 3:2, 3; Bienzedi 19:4.
Dibatijibua dia Yezu. Batismo uvua Yezu muangate kudi Yone mmushilangane ne batismo yonso. Yezu uvua mupuangane, kavua muenze mpekatu to. (1 Petelo 2:21, 22) Nunku batismo wende kavua uleja dinyingalala bua mpekatu anyi “dilomba Nzambi kondo ka muoyo kimpe” to. (1 Petelo 3:21) Uvua uleja muvuaye mudifile kudi Nzambi bua kuenza disua diende, bu mudi kutufuila, bualu uvua Masiya mulaya anyi Kristo.—Ebelu 10:7-10.
Dibatiza ne nyuma muimpe. Yone Mubatiji ne Yezu Kristo bakakula bua dibatiza muntu ne nyuma muimpe. (Matayi 3:11; Luka 3:16; Bienzedi 1:1-5) Dibatiza muntu ne nyuma muimpe ndishilangane ne dimubatiza mu dîna dia nyuma muimpe. (Matayi 28:19) Bua tshinyi?
Anu bayidi bakese ba Yezu ke badibu babatiza ne nyuma muimpe. Mbela manyi a nyuma muimpe bualu mbasungula bua kueleshangana diboko ne Kristo mu diulu mu mudimu wa kukokesha bantu bu bakalenge ne bakuidi pa buloba.f (1 Petelo 1:3, 4; Buakabuluibua 5:9, 10) Nebakokeshe bayidi ba Yezu miliyo ne miliyo bapeta muoyo wa tshiendelele mu Mparadizu pa buloba.—Matayi 5:5; Luka 23:43.
Dibatiza mu Kristo Yezu ne mu lufu luende. Bantu badi babatijibua ne nyuma muimpe badi kabidi ‘babatijibua mu Kristo Yezu.’ (Lomo 6:3) Eu batismo udi utangila anu bayidi ba Yezu bela manyi bakokesha nende mu diulu. Padibu bababatiza mu Yezu, badi balua bena mu tshisumbu tshiende tshia bela manyi. Yezu ke Mutu wa tshisumbu atshi, bobu badi benza mubidi watshi.—1 Kolinto 12:12, 13, 27; Kolosayi 1:18.
Bena Kristo bela manyi badi kabidi ‘babatijibua mu lufu [lua Yezu.]’ (Lomo 6:3, 4) Badi bidikija Yezu, batumikila Nzambi pamutu pa kuenza malu adi abasankisha bobu; mbamanye ne: wabu muoyo wa tshiendelele kabakuwupetela pa buloba apa to. Batismo wabu wa mu tshimfuanyi au udi ujika padibu bafua ne babishibua bikale bifukibua bia mu nyuma bua bapete muoyo mu diulu.—Lomo 6:5; 1 Kolinto 15:42-44.
Dibatiza ne kapia. Yone Mubatiji wakamba ne: “Yeye au [tuambe ne: Yezu] neanubatize ne nyuma muimpe ne kapia. Tshikasu tshiende tshia kushipula natshi tshidi mu tshianza tshiende, ne yeye neatokeshe muaba wende wa kushipuila bimpe menemene ne neasangishe ntete yende ya blé mu diyeba, kadi neoshe bisote mu kapia kadibu kabayi mua kujima.” (Matayi 3:11, 12) Kudi dishilangana pankatshi pa kubatijibua ne kapia ne kubatijibua ne nyuma muimpe. Tshivua Yone muambe etshi tshidi tshiumvuija tshinyi?
Blé udi uleja bantu badi bateleja Yezu ne bamutumikila. Mbakumbane bua kubatijibua ne nyuma muimpe. Bisote biobi bidi bileja bantu badi babenga kuteleja Yezu. Nebababatize ne kapia, mmumue ne: nebababutule bua kashidi.—Matayi 3:7-12; Luka 3:16, 17.
a Nkonga miaku mukuabu udi wamba ne: muaku wa mu tshiena Greke udibu bakudimune ne: “batismo” udi umvuija “kubuela mu mâyi, kuikala mubuikila mujima kudi mâyi, ne pashishe kupatuka mu mâyi.”—Vine’s Complete Expository Dictionary of Old and New Testament Words.
b “Divuija bana ba pambidi bena mu tshitendelelu” ntshilele tshitu tshienzeka mu imue ntendelelu tshia binyika muana wa pambidi dîna, pashishe “bamubatiza,” bamumiamina mâyi mu mutu anyi bamuelawu pa mutu.
c Yehowa ndîna menemene dia Nzambi. (Misambu 83:18) Tangila tshiena-bualu tshia “Yehowa nnganyi?”
d Tangila tshiena-bualu tshia “Nyuma muimpe ntshinyi?”
e Tangila tshiena-bualu tshia “Yone Mubatiji uvua nganyi?”
f Tangila tshiena-bualu tshia “Mbanganyi badi baya mu diulu?”
g Mbatele kabidi muaku “batismo” mu Bible bua kuakula bua disukula bimue bintu bilondeshile mikenji, bu mudi kuina malongo mu mâyi. (Mâko 7:4; Ebelu 9:10) Kadi bualu ebu mbushilangane ne muvuabu bine Yezu mu mâyi ne mudibu ne bua kuina bayidi bende padibu bababatiza.