“Dibaka dinemekibue kudi buonso”

“Dibaka dinemekibue kudi buonso, ne bulalu bua dibaka kabunyanguki.”​—EBELU 13:4.

1. Mmalu kayi avua bantu bavule balonge pa bidi bitangila mabaka adi alubuluka?

MILIYO ya bantu lelu’eu, nansha mu tshikondo etshi tshia dishipa mabaka, badi ne mabaka a disanka ne mashindame. Mbapete mushindu wa kulubuluka nansha mudiku dishilangana dia bumuntu ne dia nkoleshilu. Mabaka a mushindu’eu adi munkatshi mua Bantemu ba Yehowa. Bavule ba ku bena mabaka aa badi banyisha se: bakapeta abo masanka ne yabo ntatu, nansha didiabakena bua ngikadilu wa umue ne mukuabo. Kadi, bakalonga mua kutantamena ntatu mikese ya mu dibaka ne kulama buatu buabo bua dibaka mu njila muimpe. Ngamue malu kayi avua mabambuluishe bua kutungunuka nunku?​—Kolosai 3:13.

2. (a) Mmalu kayi adi mua kukolesha dibaka? (b) Mmalu kayi adi mua kubutula dibaka? (Tangila kazubu mu dibeji dia 14.)

² Mumvuija mafila kudi bamue bena nkristo badi ne mabaka a disanka ne mashindame adi asokolola malu kampanda. Mulume kampanda udi ne bidimu 16 mu dibaka wakamba ne: “Musangu wonso udi bualu bupatuka, tudi tuditatshisha muetu muonso bua kuteleja tshidi yonso wa kutudi wamba.” Ebi bidi bileja bumue bua ku malu adi akolesha mabaka​—diyukilangana dia patoke ne muoyo mujima. Mukaji kampanda udi ne bidimu 31 mu dibaka wakamba ne: “Kukuatangana ku tshianza ne kuenza malu adi mua kusekesha bua kulama dinanga munkatshi muetu ke malu atudi tuteka pa muaba wa kumpala.” Atshi ke mukuabo mushindu wa diyukilangana. Bena dibaka bakuabo, baselangane kukadi bidimu bitue ku 40, bakashindamena pa mushinga wa kusankishangana, kumanya mua kudiseka ne mua kusekesha mukuabo. Bakamba kabidi ne: dikuabo diambuluisha ndia kumona ngikadilu mipite buimpe ne mipite bubi ya mukuabo eku bikale ne bukole bua kuleja dinanga dilamatshi dia mikenji. Mulume utuatedi kulu eku wakavuluija ne: bivua bikengela kuikala badiakaje bua kuitaba bilema ne kulomba dilekelela. Padiku lungenyi lua kubenga kutshintamana, dibaka didi mua kunanyika pamutu pa kukoseka.​—Filipoi 2:1-4; 4:5, Traduction interlinéaire du Royaume (angl.).

Dishintuluka dia nsombelu

3, 4. Mmashintuluka kayi adi menzeke pa bidi bitangila lulamatu mu dibaka? Udi mua kufila bilejilu anyi?

³ Munkatshi mua bidimu makumi biashadi ebi, pa buloba bujima, mmuenenu pa bidi bitangila lulamatu mu dibaka mmishintuluke. Bamue bantu badi bela meji se: ki mbibi bua kuikala ne mukaji wa ndumba, nangananga pikala muena dibaka mumanye ne muanyishe.

⁴ Mutangidi kampanda muena nkristo wakumvuija nsombelu eu mu mêyi aa: “Bena mu bulongolodi ebu mbamane kulekela dilonda dia mikenji. Ngikadilu mukezuke mmuangatshibue mpindieu bu tshintu tshikulukulu.” Banene ba mu politike ne banayi ba manaya bende lumu badi bashipa mikenji ya mu Bible pa bidi bitangila bikadilu bilenga, ne bantu ba mushindu’eu badi batungunuka ne kuangatshibua bu bantu ba mushinga mukole. Kakuena difuisha bundu nansha kakese dia bantu badi ne ngikadilu mubi nansha wa mushindu kayi. Bu-kamama ne muoyo mutoke mbiangatshibue ne mushinga mukese mu bantu badibo babikila se: ke bashidimuke. Pashishe, pa kushindamena pa dîyi-diludiki dia se: bualu budi bantu bashidimuke benza ke budibo balonda kudi bantu bashadile, nenku badi banyisha bidi Nzambi ukandika. Bidi anu muakabiamba Paulo bua se: “Bu mudibo kabatshiyi bamanye tshidi tshimpe, mbadifile mu ngikadilu munyanguke bua kuenza bibi bia mishindu yonso ne lukuka.”​—Efeso 4:19; Nsumuinu 17:15; Lomo 1:24-28; 1 Kolinto 5:11.

5. (a) Mmuenenu wa Nzambi pa bidi bitangila masandi a basele udi munyi? (b) Muaku “tshiendenda” mutela mu Bible udi ne diumvuija kayi?

⁵ Mikenji ya Nzambi kayena mishintuluke to. Mmuenenu wende udi wa se: kusomba ne muntu kakuyi dibaka nkuenda masandi. Kushala ne mukuabo muntu udi kayi muena dibaka, nkuenda kua masandi.a Mupostolo Paulo wakamba patoke ne: “Mmunyi! Kanuena bamanye ne: bantu bapange buakane kabena bapiana bukalenge bua Nzambi anyi? Kanudingibu. Bena tshiendenda, anyi batendeledi ba mpingu, anyi bena masandi, anyi balume badi benza tshidi katshiyi tshilele tshia bantu, anyi balume badi balala ne balume nabo . . . kabena bapiana bukalenge bua Nzambi. Pabi, ke muvua bamue ba kunudi. Kadi, nuakuoweshibua mâyi, kadi nuakabingishibua, nuakabadibua bu bantu bakane mu dîna dia Mukalenge wetu Yezu Kristo ne pamue ne spiritu wa Nzambi wetu.”​—1 Kolinto 6:9-11.

6. Ndikankamija kayi ditudi mua kupeta mu miaku ya Paulo mifunda mu 1 Kolinto 6:9-11?

⁶ Kudi bualu budi bukankamija mu mvese eu, ke miaku ya Paulo ya se: “Pabi, ke muvua bamue ba kunudi. Kadi, nuakuoweshibua mâyi.” Eyowa, bavule bakendela mu “nkoka wa bukoya bua tshiendenda” tshia bulongolodi ebu bakapeta meji, kuanyishabo Kristo ne mulambu wende, ne bakuoweshibua mâyi. Bakasungula bua kusankisha Nzambi pa kuikala ne nsombelu wa bikadilu bilenga ne bakapeta disanka.​—1 Petelo 4:3, 4.

7. Ndifuilakana kayi didi pankatshi pa ngumvuilu wa muaku “tshiendenda,” ne mmuenenu wa mu Bible udi munyi?

⁷ Ku lukuabo luseke, diumvuija didi bena mu bulongolodi ebu bafila pa tshiendenda ndishilangane ne mmuenenu wa Nzambi. Nkonga-miaku kampanda udi umvuija “tshiendenda” bu “tshintu tshidi tshibengangane ne nsombelu udi muanyishibue.” Lelu’eu, “nsombelu udi muanyishibue” udi ulengulula dishala pamue ne balume anyi ne bakaji kumpala kua dibaka ne kushala pamue ne muntu udi kayi muena dibaka ne dishala pamue dia mulume ne mulume anyi dia mukaji ne mukaji ke bidi Bible ubipisha ne ubibikila ne: tshiendenda. Bushuwa, bilondeshile mmuenenu wa mu Bible, tshiendenda nkunyangakaja kua patoke kua mikenji ya Nzambi.​—Ekesode 20:14, 17; 1 Kolinto 6:18.

Buenzeji mu tshisumbu tshia bena nkristo

8. Mbuenzeji kayi budi tshiendenda mua kuikala nabo mu tshisumbu tshia bena nkristo?

⁸ Tshiendenda ntshimuangalake lelu’eu bikole ne tshidi mua kutatshisha nansha aba badi mu tshisumbu. Tshidi mua kubambulukila ku diambuluisha dia programme ya TV, vidéo, ne mikanda ya bimfuanyi bia bantu butaka. Nansha mudi bena nkristo badi bapona bikale anu bakese, tudi ne bua kuanyisha se: bungi buvule bua ku Bantemu ba Yehowa badi bipatshibua bua ngikadilu wa kupanga kunyingalala bua ngikadilu udi kayi muakanyine muena nkristo bavua babuelakane mu tshiendenda tshia mushindu kampanda anyi kansanga. Ku lukuabo luseke kudi kumueneka bualu buimpe bua se: bantu bipata bavule badi bitaba bilema biabo ne batuadija kuikala ne nsombelu mukezuke, ne pashishe badi bapingajibua mu tshisumbu.​—Fuanyikija ne Luka 15:11-32.

9. Mmunyi mudi Satana mua kudingakaja eu udi kayi ne budimu?

⁹ Kabiyi mpata, Satana udi utambakana bu nyama wa ntambue wenda ukungula, bua kudia eu udi kayi mudimuke. Bidingishilu biende peshi “mateyi ende,” adi akuata bena nkristo badi kabayi badimuke ku tshidimu tshionso. Mmuenenu wa bena mu bulongolodi ebu udi wa buiminyi, wa dikeba masanka, ne wa tshiendenda. Udi usankisha majinga a mubidi. Udi wimansha didikanda.​—Efeso 2:1, 2; 6:11, 12, Traduction du monde nouveau, nkudimuinu wa anglais, note kuinshi kua dibeji; 1 Petelo 5:8.

10. Mbanganyi badi mua kutetshibua, ne mbua tshinyi?

¹⁰ Mu tshisamba tshia Nzambi, nnganyi udi mua kutetshibua ku tshiendenda? Mbena nkristo bavule, nansha bikale bakulu mu tshisumbu kampanda, batangidi bena-ngendu, bena dîku dia Betele, bampanda-njila badi bapitshisha mêba mavule mu buambi ku ngondo yonso, baledi badi ne bivule bia kuenza bua kukolesha dîku peshi nsongalume ne nsongakaji badi ku buenzeji bua balunda babo. Bantu buonso badi batetshibua ku mubidi. Ke bua tshinyi Paulo wakafunda ne: “Eu udi wela meji se: mmuimane kulu, adimuke bua kavu kupona. Kakuena ditetshibua nansha dimue didi dinuluile kadiyi mumue ne dia balume buonso [ne dia bakaji buonso].” Bidi bitonda pa kumona bena nkristo bomekela majitu [mu tshisumbu] bapona mu bilobeshi bia tshiendenda tshia masandi.​—1 Kolinto 10:12, 13.

Bakokibue ne basesuishibue

11-13. Tela imue nsombelu ivua mifikishe bamue ku tshiendenda?

¹¹ Mmatetshibua kayi ne nnsombelu kayi bivua bifikishe bamue ku tshienzedi tshia bupote tshia masandi a babake ne bajike? Bidi mua kuikala bikodiakane ne bishilangane bilondeshile matunga anyi bilele bia bantu. Kadi, kudi nsombelu mikuabo idi mifuanangane mu matunga mavule. Tshilejilu, bakatufundila se: bamue badi benzeja mafesto mudi maluvu makole mikale a bungi ne afidibua kakuyi didikanda. Bamue mbanange mijiki ne maja bidi bijula majinga mabi a masandi bia bena mu bulongolodi ebu. Mu amue matunga a mu Afrike, bena kantu ku bianza​—bakena bena kuitabuja—​badi ne bakaji ba bungi; bamue bakaji mbatetshibue bua kukeba nsombelu mushindame pa kuikala mukaji muibidi anyi muisatu nansha biobi bikengela kuenda masandi. Mu amue matunga, balume bena nkristo badi bashiya mêku abo bua kuya mu dikeba dia nsombelu wa nsongo mu biina bia mbongo anyi miaba mikuabo. Nenku, bulamatshi buabo bua mikenji budi butetshibua mu mushindu uvuabi kabiyi mua kuenzeka bu bobo ku mabo.

¹² Mu matunga mashidimuke, bamue bakapona mu buteyi bua Satana pa kuikala misangu mivule pabuipi ne mulume anyi mukaji ne kabayi ne muntu muisatu​—tshilejilu pa kuikala pa tshibidilu babidi mu vwatire bua kulongeshangana mua kuendesha.b Bakulu badi benza makumbula a bulami badi kabidi bakengela kuikala badimuke bua kabikadi nkayabo ne muanetu wa bakaji padibo bamupesha mibelu. Diyukilangana didi mua kubakoka umue kudi mukuabo ne kupatula tshipeta tshidi mua kubenza bundu bubidi buabo.​—Fuanyikija ne Mako 6:7; Bienzedi 15:40.

¹³ Nsombelu ituatedi apa ikadi mifikishe bamue ku ditekesha budimu buabo ne kupona mu tshiendenda tshia masandi. Anu muakenzekabi mu siekele wa kumpala, bakadilekelela bua ‘kutetshibua ne kulobeshibua kudi majinga abo a mubidi,’ ke tshiakabafikisha ku mpekatu.​—Yakobo 1:14, 15; 1 Kolinto 5:1; Galatia 5:19-21.

14. Bua tshinyi tudi mua kuamba ne: buiminyi mmuji wa masandi a babake?

¹⁴ Dikonkonona diondoke dia nsombelu wa bantu bipata mu tshisumbu didi dileja ne: ku muji wa tshiendenda tshia masandi kudi amue malu adi mafuanangane. Kudi buiminyi bua mushindu kampanda, pa tshibidilu. Bua tshinyi tudi tuamba nanku? Bualu, padi muntu wenda masandi, kudi anu muntu umue anyi ba bungi badi bakengeshibua. Bidi mua kuikala bua muena dibaka mulume anyi mukaji. Nebikale kabidi nanku bua bana, pikalabo nabo, bualu masandi atu ashikila ne dishipa dia dibaka, nenku, bu mudibo dijinga ne bukubi budi bumueneka mu dîku didi mu buobumue, bana badi mua kukenga bipitshidile. Muendi wa masandi udi wela meji diambedi ku disanka diende nkayende. Ebi bidi buiminyi.​—Filipoi 2:1-4.

15. Ntshinyi tshidi mua kufikisha muntu kampanda ku dienda masandi?

¹⁵ Pa tshibidilu, masandi ki ntshintu tshia butekete bua mu mpukapuka to. Kudi ne bua kuikala diteketa dia dibaka diodi nkayadi dia ku kakese ku kakese, nansha kadiyi dimueneka ne mesu. Imue misangu diyukidilangana didi’anu dia mumuemumue ne kadiyi dia musangelu. Imue misangu, kudi dikankamijangana dikese. Peshi, umue mmupangile mua kuleja dianyisha bua bivua mukuabo wenza. Bena dibaka badi mua kupangila kusankishangana pa kushala pamue mu tshikondo kampanda. Bushuwa, masandi adi enzeka bualu malanda pamue ne Nzambi akavua kabidi mamane kuteketa. Yehowa katshiena kabidi wangatshibua bu Nzambi wa muoyo udi mumanye ngenyi yetu ne bienzedi bietu bionso. Imue misangu, mu meji a muendi wa masandi, “Nzambi” mmulue anu muaku wa patupu, bualu bua mu meji kabuyi bulelela budi kabuyi ne buenzeji pa nsombelu wa ku dituku ne ku dituku. Pashishe, bidi bilua bipepele bua kuenzela Nzambi mpekatu.​—Musambu wa 51:3, 4; 1 Kolinto 7:3-5; Ebelu 4:13; 11:27.

Mushindu wa kutantamena

16. Mmunyi mudi muena nkristo mua kutantamena ditetshibua dia kupanga lulamatu?

¹⁶ Pikala muena nkristo kampanda mulume anyi mukaji mua kudisangana mu njila wa ditetshibua dia kupona mu dipanga lulamatu, mmalu kayi adiye ne bua kukonkonona? Tshia kumpala, udi ne bua kuela meji bua kusunguluja diumvuija dia dinanga dia buena nkristo, didi diashila pa tshishimikidi tshikole tshia mêyi-maludiki a mu Bible. Nansha kakese, kêna ne bua kulekela dijinga dia ku mubidi anyi dia kushala pamue dimutshimuna ne dimuponesha mu buiminyi pa kukebela bakuabo dikenga. Kadi, udi ne bua kumona muanda eu mushindu udi Yehowa uwumona. Udi ne bua kutangila muanda eu, kumona tshisumbu tshijima ne bundu budi ngikadilu wende mubi mua kutshifuisha ne bua dîna dia Yehowa. (Musambu wa 101:3) Kudi mushindu wa kuepuka njiwu pa kuikala ne meji a Kristo pa bualu ebu ne pa kuenza tshidi tshikengedibua. Nuvuluke se: dinanga dia buena nkristo kadiyi bua tshia-kasombele kadiena mua kupita nansha kakese.​—Nsumuinu 6:32, 33; Matayi 22:37-40; 1 Kolinto 13:5, 8.

17. Mbilejilu kayi bia lulamatu bitudi nabi bidi bikolesha mu nyuma?

¹⁷ Mukuabo mushindu wa kutantamena ditetshibua ng’wa kukolesha ditabuja ne kumona kuetu mu lungenyi kua ditekemena ditutekela kumpala. Ebi bidi biumvuija kulama ku muoyo bilejilu bia butoke bua mutshima biakashiyabo kudi balume ne bakaji ba ku kale, kusangisha ne Yezu nkayende. Bua bualu ebu, Paulo wakafunda ne: “Nenku, bu mutudi ne divuba bunene nenku dia bantemu badi batunyunguluke, tumushayi kabidi bujitu buonso ne mpekatu udi utupumbisha, ne tunyemayi ne dinanukila lubilu ludi lututekela kumpala, batangile ne ntema kudi Yezu, Ntunga-mulongo ne Mubangishi wa ditabuja dietu, udi udifikisha ku bupuangane. Bua disanka divuabo bamutekele kumpala, wakananukila mutshi wa tshinyongopelu, kupetula bundu, e kusomba ku dia balume dia nkuasa wa bumfumu wa Nzambi. Eyowa, tangilayi ne ntema eu wakananukila miaku ya lukuna kudi bena mpekatu, tshivua katshiyi bua diakalenga diabo, bua kanupungidi ne kanuteketshi mu anyima yenu.” (Ebelu 12:1-3) Pamutu pa kuina buatu bua dibaka, muena meji neakebe mishindu ya kulongolola tshilema tshionso bua kufululula dibaka, ne kumona mua kuepuka mateyi a butungidianganyi ne mpala ibidi.​—Yobo 24:15.

18. (a) Bua tshinyi muaku “kutungilangana” kawena mupite bukole bua kuleja masandi a babake? (b) Mmuenenu wa Nzambi udi tshinyi pa dienza dia mitshipu?

¹⁸ “Kutungilangana,” mmuaku mukole kupita pa bidi bitangila tshiendenda tshia masandi anyi? Kutungilangana kudi kumvuija kunyanga ditekemena diteka kudi muntu kampanda. Bushuwa, mutshipu wa dibaka udi umvuija dieyemenyibua ne dilaya dia kunanga ne kusua, nansha mu bikondo bimpe ne bibi. Udi umvuija tshintu tshidi bavule bangata bu tshilele tshia kale, mu tshikondo tshitudi etshi​—mbuena kuamba ne: dîyi dipatula mukana didibo bamba bu mutshipu wa dibaka. Muntu udi unyanga dieyemena edi udi wenza bualu kampanda bua ditungila muena dibaka nende. Mmuenenu wa Nzambi pa bidi bitangila mitshipu mmumvuija bimpe bitambe mu Bible bua se: “Pawudi wenza mutshipu kudi Nzambi, kuelakanyi bua kuukumbaja, bualu bapote kabena bamulengelela. Mutshipu uwakenza, uwukumbaje.”​—Muambi 5:4.

19. Satana udi usanka padi Ntemu upangila lulamatu bishilangane ne banganyi?

¹⁹ Kakuikadi mpata nansha mikese pa bualu ebu. Anu mudiku disanka dinene mu diulu bua lupandu lua muena mpekatu umue, bia muomumue, kudi disanka dinene pa buloba munkatshi mua misumba ya Satana, idi imueneka ne mesu ne ikena-imueneka ne mesu, padi umue wa ku Bantemu ba lulamatu upangila kulama butoke buende bua mutshima.​—Luka 15:7; Buakabuluibua 12:12.

Matetshibua adi mua kufikila buonso

20. Mmunyi mutudi mua kutantamena ditetshibua? (2 Petelo 2:9, 10)

²⁰ Tshiendenda ntshintu tshidi muntu kayi mua kutantamena mu nsombelu mikuabo anyi? Bukole bua mubidi ne bua Satana bidi mua kutamba bena nkristo ne kubapangisha mua kulama butoke buabo bua mutshima anyi? Paulo udi ufila dikankamija mu miaku eyi: “Nzambi mmuena lulamatu, ne kakuanyisha bua nutetshibue ne matetshibua manupite bukole, kadi ne ditetshibua neanulongoluele njila bua numone mua kuditantamena.” Mu bulongolodi bua malu budiku lelu’eu, katuena mua kuepuka kutetshibua kua mishindu ne mishindu, kadi pa kukudimuka kudi Nzambi mu masambila, tudi bushuwa mua kunanukila ne kutshimuna ditetshibua dionso.​—1 Kolinto 10:13.

21. Nnkonko kayi ituandamuna mu dilonga didi dilonda?

²¹ Ntshinyi tshidi Nzambi utulaya bituikala mua kunanukila mu matetshibua ne kulua batshimunyi? Ntshinyi tshitudi tukengela muntu ku muntu bua kulama mabaka etu, mêku etu, ne lumu lua dîna dia Yehowa ne lua tshisumbu? Tshiena-bualu tshietu tshidi tshilonda netshikonkonone nkonko eyi.

[Mêyi adi kuinshi]

Udi muvuluke anyi?

◻ Ngamue malu kayi adi mua kuambuluisha bua kukolesha dibaka?

◻ Bua tshinyi tudi ne bua kuepuka mmuenenu wa bena bulongolodi ebu pa tshiendenda tshia masandi?

◻ Ng’amue matetshibua kayi ne nsombelu kayi bidi mua kufikisha ku tshiendenda?

◻ Bua kutantamena mpekatu, nnsapi kayi idi mua kuambuluisha?

◻ Mmunyi mudi Nzambi utuambuluisha mu tshikondo tshia matetshibua?

[Kazubu mu dibeji 14]

MALU ADI AMUENEKA MU MABAKA MASHINDAME

◻ Kulamata kukole ku mêyi-maludiki a mu Bible

◻ Bena dibaka bubidi buabo badi ne malanda makole ne Yehowa

◻ Mulume udi unemeka mukajende, majinga ende, ne mmuenenu yende

◻ Ditelejangana dilenga ku dituku dionso

◻ Badi bakeba kusankishangana umue ne mukuabo

◻ Kumanya mua kusekeshangana; kumanya mua kudiseka

◻ Kuanyisha bilema kakuyi lutatu; kumanya mua kufuilangana luse

◻ Kunanga mubidi wa mukuabo

◻ Kuikala mu buobumue mu dikolesha ne dinyoka bana

◻ Kuikala mu buobumue mu disambila kudi Yehowa pa tshibidilu

MALU ADI ABUTULA DIBAKA

◻ Buiminyi ne mutu mukole

◻ Kupanga kuenza malu pamue

◻ Kakuena ditelejangana

◻ Kupanga kua diebejangana tshia kuenza munkatshi mua bena dibaka

◻ Tshitulatula tshia mfranga ya dîku

◻ Dishilangana dia ngenzelu mu nkoleshilu wa bana, nansha ba mulume anyi ba mukaji

◻ Mulume udi wenza mudimu too ne dîba dibi peshi udi ulengulula dîku diende bua kuenza mikuabo midimu

◻ Kupanga kukumbaja majinga a mu nyuma a dîku

[Tshimfuanyi mu dibeji 15]

Dibaka didi dinemekibue didi dipetesha diakalenga dia musangu mule