Utu udidiisha ku mesa kayi?
“Kanuena mua kuabanyangana ku ‘mesa a Yehowa’ ne ku mesa a ba-demon popamue.”—1 KOLINTO 10:21, NW.
1. Mmesa kayi adi matutekela kumpala, ne ndidimuija kayi didi mupostolo Paulo ufila pa bidi bitangila mesa aa?
MÊYI aa mafunda kudi mupostolo Paulo ku buenzeji bua spiritu wa Nzambi adi aleja se: mesa abidi a mu tshimfuanyi mmateka kumpala kua bukua-bantu. Amue mmadisunguluje ku makuabu ku biakudia bia mu tshimfuanyi bidi bitekapu, ne yonso wa kutudi udi udia ku amue a ku mesa aa. Kadi, bituajinga kulengelela Nzambi, katuena ne bua kudidiisha ku mesa ende ne kutamfunya ku menu ku mesa a ba-demon popamue. Mupostolo Paulo wakadimuija ne: “Bintu bidi matunga alambula adi abilambuila ba-demon, kadi ki nNzambi to; ne tshiena musue bua nulue babanyanganyi ne ba-demon. Kanuena mua kunua dikopo dia Yehowa ne dikopo dia ba-demon popamue; kanuena mua kuabanyangana ku ‘mesa a Yehowa’ ne ku mesa a ba-demon popamue.”—1 Kolinto 10:20, 21, NW.
2. (a) Mmesa kayi a Yehowa avuaku mu matuku a Izalele wa kale, ne mbanganyi bavua babanyangana milambu ya buobume? (b) Kuabanyangana ku mesa a Yehowa kudi kumvuija tshinyi lelu’eu?
2 Mêyi a Paulo adi atuvuluija milambo ya buobumue [peshi ya ditalala] ivua bena Izalele wa kale balambula tshikondo tshitshivuabo muinshi mua Mikenji ya Yehowa. Tshilambuilu tshia Nzambi tshivua tshibikidibua se: mesa, ne bavua bamba bua eu yonso uvua utuala nyama wa kulambula se: uvua mu buobumue ne Yehowa ne bakuidi kabidi. Mmushindu kayi? Tshia kumpala, Yehowa uvua upeta tshimue tshitupa ku mulambo bualu bavua bamiamina mashi pa tshilambuilu tshiende ne mafuta avua alunguka ne kapia. Tshibidi, muakuidi uvua upeta tshiende tshitupa mu ngumvuilu wa se: uvua udia (pamue ne dîku diende) munyinyi wa kabewu muosha ne wa tshibelu tshia dia balume wa nyama mulambula. Ne tshisatu, mutuadi wa mulambu uvua upeta pende tshitupa pa kudia bionso bivua bishala ku nyama eu. (Lewitiki 7:11-36) Lelu’eu, diabanyangana ku mesa a Yehowa didi diumvuija se: tudi tumukumbajila ntendelelu udiye ulomba, pa kulonda tshilejilu tshishiya kudi Yezu ne bapostolo bende. Ke bualu kayi, tudi ne bua kudidiisha ne biakudia bia mu nyuma bidi Yehowa ufila bua bualu buetu ku diambuluisha dia Dîyi diende ne dia bulongolodi buende. Bu muvua bena Izalele mu buobumue bua pa buabu ne Yehowa, uvua mubakandike bua kulambula ba-demon milambo ku mesa abo. Bena Izalele ba mu nyuma ne benzejanganyi nabu ba mudimu, “mikoko mikuabu,” badi pabu muinshi mua mukandu eu wa Nzambi.—Yone 10:16.
3. Mmunyi mudi muntu mua kupia tshibawu tshia diabanyangana ku mesa a ba-demon lelu’eu?
3 Mmunyi mudi muntu mua kudivuija muena tshibawu tshia diabanyangana ku mesa a ba-demon mu matuku etu aa? Pa kusadila bua kulubuluja bipatshila bia tshintu tshionso tshidi mu buluishi ne Yehowa. Mesa a ba-demon mmakongoloje midimu yonso ya ba-demon ya dimuangalaja ngenyi idi ikumbaja kipatshila ka kutudinga ne kutupambuisha kule ne Yehowa. Nnganyi udi mua kuanyisha bua kudiisha mutshima wende pamue ne tshieledi tshiende tshia lungenyi ne mulúngu wa mushindu’eu? Bena nkristo balelela badi babenga bua kubuelakana mu dilambula milambu idi bantu bavule lelu’eu bafila kudi banzambi ba mvita ne ba mabanji.—Matayi 6:24.
Tuepuke kuseesela “mesa a ba-demon”
4. Buonso buetu tudi ne bua kuandamuna ku lukonko kayi, ne bua tshinyi katuena ne bua kuabanyangana ne dishindika dionso ku mesa a ba-demon?
4 Buonso buetu tudi ne bua kuandamuna ku lukonko elu: Ntu ndidiisha ku mesa kayi? Nansha kabiyi ku budisuile, bushuwa tudi tudia ku mesa amue peshi ku makuabu. (Fuanyikija ne Matayi 12:30.) Katuena basue kuabanyangana ne dishindika dionso ku mesa a ba-demon nansha. Kuenza nunku nekutujimijile dianyishibua kudi Nzambi umuepele mulelela udi ne muoyo, Yehowa. Ku lukuabu luseke, kuabanyangana anu biakudia bidi bifidibua ku mesa a Yehowa kudi kutufikisha ku dipeta muoyo wa kashidi mu disanka! (Yone 17:3) Mêyi kampanda adi amanyisha se: ku ndiilu wende, muntu udi uvudija peshi ujimija bukole buende bua mubidi. Nunku, muntu yonso udi musue kuikala ne makanda mempe a mubidi peshi a tshieledi tshia lungenyi udi ne bua kutabalela ndiilu wende. Anu bu bimue biakudia bidi biumvuika bisheme bua bishemeshi bienza ne manga mu biapu, kadi kabiyi biambuluisha ku diibakibua dia mubidi, ke mudi kampanye ka bena bulongolodi ebu, kajingila ne ngenyi ya ba-demon, kadi bu biakudia bibipe, mu ngakuilu wa mu tshimfuanyi, bidi binyanga bieledi bietu bia lungenyi.
5. Mmunyi mutudi mua kuepuka bua kudidiisha ne malongesha a ba-demon lelu’eu?
5 Mupostolo Paulo wakamanyisha ne: mu matuku a ku nshikidilu, bantu nebapambuishibue ne “malongesha a ba-demon.” (1 Timote 4:1, NW) Malongesha aa a ba-demon kaena asanganyibua anu mu mitabuja a dishima a bukua-bitendelelu, apo adi kabidi amuangalajibua ku mishindu mikuabu. Tshilejilu, tudi ne bua kukenketa ne kupima mikanda ne bikandakanda bitudi tubala, tuetu ne bana betu, programme wa televizion utudi tutangila, manaya ne bindidimbi bitudi tubandila. (Nsumuinu 14:15) Bituasua kubala mukanda wa mianu peshi mianda misuikakaja mu lungenyi mu tshikondo tshia dijikija lutetuku, bidimu bidi bizangika tshikisu, tshindumba peshi midimu ya ditendelela ba-demon anyi? Bituabala mukanda wa malongesha, muine eu udi wadija filozofi peshi nsombelu bidi “kabiyi mu diumvuangana ne Kristo” anyi? (Kolosai 2:8, NW) Udi uzangika ngenyi mikondakane, peshi udi usaka mubadi ku ditua malongolodi a bena bulongolodi ebu nyama ku mukolo? Udi ukankamija dilua mubanji munene anyi? (1 Timote 6:9) Mmukanda udi ufila muinshi-muinshi malongesha matapuludianganyi adi kaayi mu diumvuangana ne Kristo anyi? Bikalabi nanku ne bituikala batungunuke ne kubala ne kutangila bintu bia mushindu’eu, tudi tudibueja mu njiwu ya kudidiisha ku mesa a ba-demon. Lelu’eu, kudi mikanda binunu nkama idi izangika filozofi ya bena bulongolodi ebu, mine filozofi idi yangatshibua bu ya meji ne yanyishibua kudi bavule. (Muambi 12:12) Kadi, kakuena tshipiatshipia bushuwa mu kampanye aka; nansha umue wa kutudi kakakumutuadila disanka ne diakajibua dia nsombelu, anu bu muvua mêyi a budimu avua Satana muambile Eva kaayi makaje nsombelu wende nansha kakese.—2 Kolinto 11:3.
6. Ngandamuinu wetu udi ne bua kuikala tshinyi padi Satana utulobesha bua kulabula biakudia bibipe bia ba-demon?
6 Nunku, padi Satana utulobesha bua kulabula biakudia biende bibipe bia ba-demon, ngandamuinu wetu udi ne bua kuikala tshinyi? Tuenze muakenza Yezu pakamuteta Satana bua kukudimuna mabue pa kuavuija mampa. Yezu wakandamuna ne: “Mbafunde ne: ‘Muntu neikale ne muoyo, ki mbua diampa nkayadi, apo bua dîyi dionso didi dipatuka mukana mua Yehowa.’” Kabidi, Diabolo pakalayaye bua kupesha Yezu “makalenge wonso a mu bulongolodi ebu ne butumbi buawu” bu yeye mua kuinamina ne kukumbaja tshienzedi tshia ditendelela Satana, Yezu wakandamuna ne: “Umuka, Satana! Bualu mbafunde ne: ‘Yehowa Nzambi webe ke uudi ne bua kutendelela, amu yeye nkayende ke uudi ne bua kusadila ne mudimu munsantu.’”—Matayi 4:3, 4, 8-10, NW.
7. Bua tshinyi nebikale kudishima bituela meji se: kakuena diakabi bituadidiisha ku mesa a Yehowa ne ku mesa a ba-demon popamue?
7 Mesa a Yehowa ne mesa adibo bakaja kudi bena lukuna bende ba-demon kaena mua kupungibua pamue nansha kakese! Ee, bushuwa, bamue bakateta kuenza nunku ku kale. Tuvuluke bena Izalele bavua ne muoyo mu matuku a Eliya. Tshisamba tshiakamba muvuatshi tshitendelela Yehowa, kadi tshiakela meji se: nzambi mikuabu, bu mudi Baala, uvua mua kubapetesha nsombelu wa dilubuluka. Eliya wakasemena kudi tshisamba ne kuamba ne: “Nudi nuenda nuzobela hankatshi ha nseke ibidi musangu bule munyi? Bikala Yehowa Nzambi, numulonde; kadi bikala Bâla Nzambi, numulonde.” Kabiyi mpata, bena Izalele bavua benda batebuka “bambika dimue dikasa eku ne bapingaja dikuabu kuaka.” (1 Bakalenge 18:21) Eliya wakela bakuidi ba Baala munu mukana bua kujadikabo bunzambi bua nzambi wabu. Nzambi wapuekesha kapia kafume mu diulu pa mulambo ke wadisokolola bu Nzambi mulelela. Nansha muakenzabo madikolela muabu muonso, bakuidi ba Baala bakapangila. Ke Eliya kusambila anu mu mêyi aa: “O Yehowa, ungandamune, bua tshisamba etshi tshimanye ne: wewe, Yehowa, udi Nzambi mulelela.” Diakamue kapia ka Yehowa e kupueka kafume mu diulu ne kuvingutula nyama wa mulambu mubolesha ne mâyi. Ku buenzeji bua dileja edi dia dikema dia bunzambi bua Yehowa, tshisamba tshiakatumikila Eliya ne kushipabo baprofete ba Baala 450. (1 Bakalenge 18:24-40, NW) Bia muomumue lelu’eu, tudi ne bua kuitaba se: Yehowa udi Nzambi mulelela ne kuangata dipangadika ne muoyo umue bua kudidiisha ku mesa ende, bituikala katuyi banji kuenza nunku.
‘Mupika wa lulamatu’ udi uwuja mesa a Yehowa
8. Mmupika kayi uvua Yezu mumanyishe se: neatumike nende bua kufila biakudia bia mu nyuma kudi balongi bende mu tshikondo tshia dikalaku diende, ne mupika eu nnganyi?
8 Mukalenge Yezu Kristo wakamanyisha ne: mu tshikondo tshia dikalaku diende, “mupika wa lulamatu ne wa budimu” neafile biakudia bia mu nyuma kudi balongi bende: “Wa diakalenga mmupika au pikala mfumuende mu difika diende, kumusangana wenza nanku. Bulelela, ndi nnuambila ne: Neamuteke ku mutu kua bintu biende bionso.” (Matayi 24:45-47, NW) Mupika eu wakadileja muikale, ki mmuntu umuepele, apo kasumbu kenza ne bena nkristo baditshipe [kudi Yehowa] ne bela manyi a spiritu. Kasumbu aka nkateke pa mesa a Yehowa biakudia bilenga bitambe bua bashadile bela manyi ne bua “musumba munene.” Mupite mpindieu pa miliyo inayi, musumba munene mmuditeke ku luseke lumue ne bashadile bela manyi bua [dibingishibua dia] bumfumu bukena mikalu bua Yehowa Nzambi pa bukua-bifukibua bionso ne bua Bukalenge buende buatumikaye nabu bua kutumbishisha dîna diende dinsantu.—Buakabuluibua 7:9-17, NW.
9. Ntshiamu kayi tshidi kasumbu ka mupika katumika natshi bua kufila biakudia bia mu nyuma kudi Bantemu ba Yehowa, ne difesto diabu ndiumvuija mu mêyi kayi a mulayi?
9 Kasumbu aka ka mupika wa lulamatu nkatumike ne Watch Tower Bible and Tract Society bua kufila biakudia bia mu nyuma kudi Bantemu buonso ba Yehowa. Padi bukua-buena-nkristo ne bakuabu bena bulongolodi ebu bua malu bafiatuka ne nzala bua dipangika dia biakudia bia mu nyuma bifidi bia muoyo, tshisamba tshia Yehowa tshidi tshitua tshianga. (Amosa 8:11) Ebi bidi bikumbaja mulayi wa Yeshayi 25:6: “Mu mukuna eu Yehowa wa misumba nealongoluele bantu bonso bidia bia disanka bia manyi, bidia bia disanka bia nvinyo muladike ndala, bia kudia bia manyi bisangisha ne buongo bua mu mifuba, bia nvinyo muladike ndala mulengeshibue bimpe.” Anu mudi mvese wa 7 ne wa 8 ibileja, difesto edi neditungunuke tshiendelele. Ndibeneshibua kayipu edi lelu’eu bua aba buonso bena mu bulongolodi bua Yehowa budi bumueneka, ne ndibeneshibua kayipu bu muatungunuka difesto edi mu matuku atshilualua!
Nudilame ku biakudia bia mulúngu bidi ku mesa a ba-demon
10. (a) Kasumbu ka mupika mubi kadi kafila biakudia bia mushindu kayi, ne kadi ne kipatshila kayi? (b) Mmalu kayi adi kasumbu ka mupika mubi kenzela bena mudimu naku ba bupika ba kale?
10 Biakudia bidi ku mesa a ba-demon bidi mulúngu. Tshilejilu, anjibi kutangija lungenyi ku biakudia bia mupika mubi ne bia batontolodi. Kabiena bidiisha peshi biibaka; ki mbia mankenda. Kabiena mua kukumbaja mudimu muimpe, bualu batontolodi bakalekela kudidiisha ku mesa a Yehowa. Bu tshipeta, bionso bivuabo bakune bua kukolesha bumuntu bupiabupia biakajimina. Ki mbasakibue kudi spiritu munsantu, apo kudi kanyinganyinga kakole. Mbakokesha kudi kipatshila kamue kabi—kututa benzejanganyi nabu ba mudimu ba kale, anu muvua Yezu mubimanyishe.—Matayi 24:48, 49.
11. C. T. Russell wakafunda tshinyi pa bidi bitangila disungula dia biakudia bia mu nyuma dienza kudi bamue bantu, ne ndiumvuija kayi diakafilaye bua aba bakela mesa a Yehowa nyima?
11 Tshilejilu, kukadi bidimu bivule, mu 1909, muludiki wa Société Watch Tower, C. T. Russell, wakafunda pa bidi bitangila aba bakela mesa a Yehowa nyima ne kutuadija kusuyakaja bapika nabu ba kale. Tshibumba tshia Nsentedi tshia mu dia 1 Kasuamansense 1909 tshivua tshiamba ne: “Aba badi bakosa malanda ne Société pamue ne mudimu wende, pamutu pa kuenzabo malubuluka peshi kuibaka bakuabu mu ditabuja ne mu dikolesha mamuma a spiritu, badi bamueneka benza malu mushindu mutapuluke—bateta kukeba diakabi dia Tshipatshila tshivuabo basadila ku kale, kabidi, ku diyoyo dipite bukole anyi dishadile, badi benda badiina mu tshipua-muoyo, badienzela bibi buobu nkayabu pamue ne aba badi ne lungenyi lua diela mpata. . . . Biela muntu kampanda meji se: udi mua kupeta bintu bikuabu bimpe peshi bipite buimpe ku mesa makuabu, anyi se: buobu bine badi mua kupatula bintu ebi bimpe peshi bipite buimpe—balonde biabu yabu njila. . . . Kadi tudi tushila bakuabu muaba bua kuya kuonso kudi kubalengelela bua kukeba biakudia ne butoke bua kudisankishabo, kadi bidi bikemesha pa kumona aba badi bavua baluishi betu kabayi benza pabu bu tuetu. Pamutu pa kuamba bu bena bulongolodi ebu ne: ‘Ngapetshi tshintu tshidi tshitamba kundengelela; nuashala bimpe!’ badi buobu baleja tshiji, muoyo mubi, lukinu, bajula ndululu, ‘midimu ya mubidi ne ya diabolo’ mibi kupita bitutu katuyi banji kumona bantu bena bulongolodi ebu benza. Badi bamueneka buwule tente ne dipaala, buôwa bua bushuwa bua diepuka mâyi [tshimanyinu tshia mukupa] bua Satana. Bamue ba kudibo badi batukuma ne bela meji se: tuetu mbadi babatuta. Mbadiakaje bua kuamba ne kufunda dishima, ne mbapite kunyanguka anu bua kuenza malu a bulembakane.”
12. (a) Mmunyi mudi batontolodi batuta bena mudimu nabu ba bupika ba kale? (b) Bua tshinyi bidi njiwu bua kudidiisha ne mifundu ya batontolodi anu bua dijinga dia kutua munu kulabula?
12 Eyowa, batontolodi badi bapatula mikanda idi ikondakaja mianda, imanyisha anu tshiabibidi tshia malu malelela ne dishima ku budisuile. Badi bafika too ne ku diimana miaba idi Bantemu benzela mpuilu yabu bua kukuata mu buteyi aba badi kabayi badimuke. Nunku, nebikale njiwu bua kudidiisha ne mifundu ya mushindu au peshi kuteleja ngakuilu wabu mubole, anu bua kusankisha dijinga dia kutua munu kulabula! Nansha bituela meji mudibi kabiyi mua kutuenzela bualu bubi, mpukapuka idi anu kuoku. Mbua tshinyi? Mbua kabingila aka: imue mifundu ya batontolodi idi yadija dishima ku “mêyi mashemakaja“ ne “mêyi a budimu.” (Lomo 16:17, 18; 2 Petelo 2:3, NW) Tudiku mua kutekemena tshintu tshishilangane ku mesa a ba-demon anyi? Nansha bienzekabi bua batontolodi kuleja amue malu majadika, bushuwa pa tshibidilu batu balekela ngumvuilu wawu mulelela mu kabujima ne kipatshila ka kupambuisha bakuabu kule ne mesa a Yehowa. Mifundu yabu yonso idi anu bua kubipisha ne kushimbula! Kakuena tshidi tshiibaka nansha tshimue.
13, 14. Mmamuma kayi adibo bapatule kudi batontolodi ne kampanye kabu?
13 Yezu wakamba ne: “Nenubamanyine ku mamuma abo.” (Matayi 7:16, NW) Kadi, mbinganyi bidi bisunguluja mamuma a batontolodi ne mikanda yabu? Bimanyinu binayi bidi bisunguluja kampanye kabo. (1) Buzanzamuke bua lungenyi. Efeso 4:14 udi wakula bua “budimu buabu bua dibuejangana mu ntupakanyi.” (2) Diadija dia bumanyi bua mianda. (3) Dipanga dinanga. (4) Dipanga bululame mu mishindu kabukabu. Bine ebi ke bishemeshi bia biakudia bidi biadija pa mesa a ba-demon, bidibo basadila bua kuelela ditabuja dia tshisamba tshia Yehowa mateyi.
14 Kudi tshintu tshikuabu. Batontolodi mbapingane ku tshinyi? Bua bavule, mbaye kudibueja tshiakabidi mu mîdima ya bukua-buena-nkristo ne malongesha abu a nshindamenu, bu mudi ditabuja dia diya mu diulu dia bena nkristo buonso. Kupita apu, bavule badi balekela kulonda mmuenenu muleja mu Bible pa mashi, ngikadilu wa ndubidilu ne dikengedibua dia kufila bumanyishi budi butangila Bukalenge bua Nzambi. Kadi buetu tuetu, bamane kunyema mîdima ya Babilone Munene, katuena basue kualukila kudiyi nansha kakese. (Buakabuluibua 18:2, 4) Bu mutudi basadidi ba Yehowa balamatshi ba mikenji, bua tshinyi kukeba mua kutapa dîsu ku midimu eyi idibo bamuangalaja kudi batolodi aba ba mesa a Yehowa badi batuta mpindieu ku ngakuilu wabu aba badi batuambuluisha bua kupuita “mêyi a lupandu”?—2 Timote 1:13.
15. Ndîyi-diludiki kayi dia mu Bible didi dituambuluisha bua kuandamuna ne meji ku matumpi a batontolodi?
15 Bamue badi mua kuteta bua kupima tubingila tua matumpi a batontolodi. Kadi tudi ne bua kuvuluka dîyi-diludiki difila mu Dutelonome 12:30, 31. Apa, ku butuangaji bua Mozese, Yehowa wakadimuija bena Izalele bua kudilamabo ku amue malu mabi kunyima kua dipata bampagano bavua basombe mu Buloba bulaya. “Nudimuke, kanukuatshibu kudi mateyi abo bua kubalonda, habajimishabo ku mesu kuenu; kanukonkanganyi bua nzambi yabo ne, Bisamba ebi bidi bitendelela nzambi yabo munyi? Tuetu nkayetu tudi basue kuenza nunku kabidi. Kanuenzedi Yehowa, Nzambi wenu nunku.” Eyowa, Yehowa Nzambi mmumanye lutangidilu peshi dijinga dia kutua munu kulabula dia muntu. Anjibi kuvuluka bua Eve, kabidi ne bua mukaji wa Lota! (Luka 17:32; 1 Timote 2:14) Katuteleji nansha kakese bidibo bamba ne benza kudi batontolodi. Kadi, tudifile bikole mu mudimu wa diibaka bantu netu ne tudidiishe ne bulamatshi ku mikenji ku mesa a Yehowa!
Anu mesa a Yehowa ke ashala kashidi
16. (a) Mu katupa kîpi emu ntshinyi tshiafikila Satana, ba-demon bende, ne mesa a mu tshimfuanyi adi matunga a mu bulongolodi ebu adidiishilaku? (b) Ntshinyi tshiafikila bantu buonso batshidi batungunuke ne kudidiisha ku mesa a ba-demon?
16 Mu katupa kîpi, dikenga dinene nedibudike, diakamue nedifike ku nkomenu wadi ne “mvita ya dituku dinene dia Nzambi Wa-Bukole-Buonso.” (Buakabuluibua 16:14, 16, NW) Nkomenu wadi eu neafike pabutula Yehowa bulongolodi ebu bua malu ne mesa a mu tshimfuanyi kudi matunga adidiishila. Yehowa neatonkole kabidi mu ka-bujima kabu bulongolodi bukena-bumueneka bua Satana Diabolo, pamue ne misumba ya ba-demon bende. Aba bikala batungunuke ne kudidiisha ku mesa a mu nyuma a Satana, mesa a ba-demon, nebenzejibue bua kuikala bamue ba ku didia diena-dîna, kadi ki mbu babanyanganyi ba biakudia, tòo, apo bu biakudia bine—bua kubutudibua kuabu!—Tangila Yehezekele 39:4; Buakabuluibua 19:17, 18.
17. Mmabenesha kayi alabulabo kudi aba badi badidiisha anu ku mesa a Yehowa?
17 Anu mesa a Yehowa ke ashala kashidi. Aba badi badidiishaku pa kuleja dianyisha nebapandishibue ne nebalabule disanka dia kudidiishaku bua kashidi. Nansha kakese kabakubuela kabidi mu lutatu lua dikepela dia biakudia lua mushindu kayi wonso. (Musambu 67:6; 72:16) Ne makanda a mubidi mapuangane, nebasadile Yehowa Nzambi mu Mparadizu! Ndekelu wa bionso, mêyi a dikema adi mu Buakabuluibua 21:4 [NW] neakumbane mu bulengele buawu buonso: “Neakupule tshinsonji tshionso ku mesu kuabo, ne lufu kaluena luikalaku kabidi, nansha madilu nansha mbila, nansha bisama kabiena bikalaku kabidi. Malu a diambedi akujimina.” Bu muajimina buluishi buonso, bumfumu bukena-mikalu bua Yehowa pa bukua-bifukibua nebujadikibue miaba yonso tshiendelele ne buimpe bua Nzambi kabuyi ndekelu nebumuangalajibue pa bukua-bantu basumba bapiana Mparadizu pa buloba. Bua kupeta difutu edi, buonso buetu tuangate dipangadika dikole dia kuabanyangana anu ku mesa a Yehowa, adi muwule tente ne biakudia bilenga bia mu nyuma!
Mmunyi mu wandamuna?
◻ Mmunyi mutudi mua kuepuka bua kupambushibua kudi malongesha a ba-demon?
◻ Bua tshinyi katuakupeta diakalenga bituadidiisha ku mesa a Yehowa ne ku mesa a ba-demon popamue?
◻ Mbiakudia bia mushindu kayi bidi batontolodi bafila?
◻ Bua tshinyi bidi njiwu bua kusankisha dijinga dia kutua munu kulabula mu matumpi a batontolodi?
◻ Mmamuma kayi adibo bapatule kudi batontolodi?
[Tshimfuanyi mu dibeji 10]
Mesa a Yehowa mmuwule tente ne biakudia bia mu nyuma bipite bulenga