Bamanyishi ba Bukalenge badi balonda

Dîyi dia Nzambi didi ne bukole

“DÎYI dia Nzambi didi ne muoyo ne didi ne bukole.” (Ebelu 4:12, NW) Miaku eyi mmidileje milelela misangu mivule padi bantu bavua badingibua kudi tshitendelelu tshia mafi batutakena ne malelela a mu Bible. Anu bu mudibi bileja mu bualu bumona budi bulonda ebu bua mu République Dominicaine, bukole bua Bible budi mua kushintulula nsombelu ya bantu ne kubapa ditekemena.

Bantemu ba Yehowa bakakumbula mukaji kampanda mumanyike bikole bu muena Katolike uvua ufuma ku dijimija bana bakese babidi mu lufu. Uvua mukuatshike kanyinganyinga ne uvua udilakana dituku dionso bua tshinyongopelu tshiende. Bantemu bakamuleja tshidi Bible wamba mu Yone 5:28, 29 pa ditekemena dia dibiishibua. Kunyima kua mayukidilangana a pamutu ne Bantemu, kavua amu mupete disansamunyibua mu ditekemena dia dibiishibua to, kadi wakajingulula ne: balombodi ba ekleziya wende wa Katolike bavua bamudinga.

Kakajimija dîba bua kukosoloka ne ekleziya wa Katolike nansha, ne wakitaba dilonga dia Bible dia pa tshibidilu ne Bantemu ba Yehowa. Kadi, bayende kavua muitabije mmuenenu yende to. Bu muvuaye pende muena Katolike mumanyike bikole, wakenza bua bena tshididi bamanyike bimpe ne balunda ba mu Ekleziya bakumbule mukajende bua kuteta mua kumutekesha mu njila wende ne kumupingajilula mu Katolike. Kunyima wakamukanyina bua kushipa dibaka, kufika too ne ku dimanyisha balela ne bena mu ekleziya nende ne: uvua ne bua kushipa dibaka.

Kadi lungenyi luende kaluakakuata mudimu nansha. Bibengangane, mukaji wakapangadija bikole bua kutungunuka ne malonga ende a Bible. Bua ditantamuka diende mu nyuma ne dikolesha ngikadilu milenga ya buena-nkristo, mulume wakapangadija bua kushala nende pamutu pa kukeba bua kushipa dibaka. Dimue dituku wakitaba bua kukonkonona mikanda miumvuiji ya Bible ivua mukaji ulonga​—kadi ku dilomba dimue. Uvua musue kutumika anu ne Bible wende nkayende wa nkudimuinu wa Katolike.

Wakakema pa kumona se: ku diambuluisha dia mikanda ya Bantemu ba Yehowa, wakabanga kulonga malu mapiamapia buludi mu Bible wende nkayende. Wakamona ne: mukajende uvua musungule njila muakane, ne katupa kîpi kunyima wakadiakaja bua kulonda tshilejilu tshiende. Bushuwa, wakamona dikengedibua dia kuenza mashintuluka mu nsombelu wende nkayende. Lutatu lumue lua kukolela luvua lua kulekela tshibidilu tshiende tshia kunua makanya. Kunyima kua mumane kubala tshibejibeji tshia Réveillez-vous! wa mu dia 8 Kabalashipu 1989, tshivua ne mutu wa bualu ne: “Disumbisha dia lufu​—Mishindu dikumi bua kulekela dinua makanya,” wakapangadija bua kulekela tshibidilu etshi tshikandika mu Mifundu. Pamutu pa mu mpaya wende kuikalamu misangu mivule anu dibuki dia makanya, wakabanga kuelamu nimero wa Réveillez-vous! awu. Dîba dionso divuaye ne dijinga dikole dia kunua makanya, uvua ubala biena-bualu pa dinua makanya. Ngenzelu eu wakapatula bipeta bimpe! Kunyima kua mumane kubala biena-bualu ebi misangu mivule, wakafika ku dilekela dinua makanya.

Lelu’eu, mulume ne mukaji, bubidi buabo badi basadila Yehowa bu ba-ministre babatijibue. Padi tshikondo tshipeteka, mulume udi utumika bu ministre wa ku dîba ne ku dîba, ufila dîba diende dia bungi mu dimanyisha lumu luimpe lua Bukalenge bua Nzambi, ne udi utumika bu musadidi wa mudimu mu tshisumbu tshia Bantemu ba Yehowa tshia muaba awu. Yeye ne mukajende mbateke mêsu abo ku dibiishibua pikalabo mua kuakidila bana babo bikala kabidi ne muoyo mu bulongolodi bupiabupia. Eyowa, Dîyi dia Nzambi, didi ne muoyo ne didi ne bukole!