Nkonko ya babadi

Ntshinyi tshivua muyidi Yakobo usua kumvuija pakambaye ne: “Bavule ba kunudi kabena ne bua kulua balongeshi, bana betu, bu munudi bamanye se: netupete dilumbuluisha ditambe bunene”?​—Yakobo 3:1, NW.

Bushuwa Yakobo kavua utekesha bena nkristo mu mikolo bua kabalongeshi bakuabu bulelela. Mu Matayo 28:19, 20 (NW), Yezu wakatumina bayidi bende dîyi bua ‘kuvuija bantu ba mu matunga wonso bayidi, . . . pa kubalongesha mua kutumikila mêyi wonso amvua munutumine.’ Nunku, bena nkristo buonso badi ne bua kuikala balongeshi. Mupostolo Paulo wakabela bena nkristo bena Ebelu bualu kabavua banji kulua balongeshi. Wakafunda ne: “Katshia kuonso aku nuvua mua kuikala bamane kuvua balongeshi, kadi nutshidi nukengela tshiakabidi bua muntu kampanda anulongeshe, biangatshile ku ntuadijilu, malu a diambedi a mêyi mansantu a Nzambi.”​—Ebelu 5:12, NW.

Nunku, Yakobo uvua wakula pa bualu kayi? Uvua wakula bua aba bavua ne masanka a mudimu a pa buawu a dilongesha mu tshisumbu. Mu Bena Efeze 4:11 (MMM), tudi tubala ne: “Yeye [Yezu Kristo, Mfumu wa tshisumbu] kabidi ke uvua mupeshe bamue mapa a kuikalabo batumibue, banga bua kuikalabo bambi, bakuabo pabo bua kuikalabo bamuangalaji ba Mukenji Mulenga, balami nansha balongeshi.” Kuvua midimu ya pa buayi ya dilongesha munkatshi mua bisumbu bia mu siekele wa kumpala amu bu mudibi lelu’eu. Tshilejilu, Kasumbu Kaludiki nkaleji-mpala ka “mupika wa lulamatu ne wa budimu” ne kadi ne bujitu bua pa buabu bua kutangila dilongesha dia tshisumbu tshia pa buloba bujima. (Matayo 24:45, NW) Batangidi bena ngendu ne bakulu mu bisumbu badi pabu ne majitu a dilongesha a pa buawu.

Yakobo uvua wambila balume bena nkristo bakumbane tshishiki bua se: kabavua ne bua kuitaba mudimu wa bulongeshi bua kutshina dilumbuluisha ditambe bunene dia Nzambi anyi? Nansha kakese. Mudimu wa bukulu ndisanka dia mudimu dinene, bu mudibi bileja mu 1 Timote 3:1 (NW), udi wamba ne: “Pikala muntu wipatshila mudimu wa mutangidi, udi ujinga mudimu mulenga.” Bumue bua ku malu malomba bua kutekibua mukulu mu tshisumbu mbua se: muntu mulume kampanda ikale “mukumbane tshishiki bua kulongesha.” (1 Timote 3:2, NW) Yakobo kakakula bishilangane ne mêyi a Paulo mafundisha ku spiritu.

Kadi, mbimueneke se: mu siekele wa kumpala B.B., bamue bavua badiamba balongeshi nkayabu, nansha muvuabu kabayi bakumbane tshishiki ne kabayi batekibue. Pamu’apa, bavua bumvua se: kuvua bunême kampanda mu mudimu au, ne bavua bajinga butumbi buabu nkayabu. (Fuanyikija ne Mâko 12:38-40; 1 Timote 5:17.) Mupostolo Yone wakatela Diotrefe, uvua ‘musue bua kuikala pa muaba wa kumpala, kadi uvua kayi wakidila bualu nansha bumue bua kudi Yone ne kanemu.’ (3 Yone 9, NW) Timote wa kumudilu 1:7 (NW) udi wakula bua bamue bavua ‘basue kuikala balongeshi ba mikenji kadi bavua kabayi bajingulula malu avuabu bamba anyi malu avuabu bafidila bijadiki bikole.’ Mêyi a Yakobo 3:1 mmakumbanyine nangananga balume badi bajinga kuikala balongeshi kadi badi ne tshipatshila tshibi. Bantu ba nunku badi mua kuenzela tshisumbu tshia mikoko bibi kakuyi bilele ne bua nunku nebapete dilumbuluisha ditambe bunene.​—Lomo 2:17-21; 14:12.

Yakobo 3:1 udi kabidi divuluija dimpe bua aba badi bakumbane tshishiki ne badi basadila bu balongeshi. Bu mudibu babeyeka bia bungi, nebabalombe bia bungi. (Luka 12:48) Yezu wakamba ne: “Muaku wonso wa tshianana wikala bantu bakula, nebaupile tshilumbu dituku dia Tshilumbuluilu.” (Matewuse 12:36, MMM) Ebi bidi nangananga bilelela bua aba bena miaku idi ne buenzeji bukole, bakulu batekibue.

Bakulu nebalumbulule bua mushindu udibu bendesha mikoko ya Yehowa. (Ebelu 13:17) Bidibu bamba bidi ne buenzeji pa nsombelu ya bantu. Nunku, mukulu udi ne bua kuikala ne ntema bua kazangiki mmuenenu yende nkayende anyi kakengeshi mikoko bu muakenza Bafarizeyi. Udi ne bua kuenza madikolela bua kuleja dinanga diondoke dia mumue ne edi divua Yezu muleje. Mu nsombelu kayi yonso wa dilongesha, ne nangananga padiye mu malu a dilumbuluisha, mukulu udi ne bua kupima mêyi ende, kayi utumika ne biambilu bikena bilongolola anyi uleja amu ngenyi yende nkayende. Pa kueyemena bikole Yehowa, Dîyi diende, ne buludiki buende ku butuangaji bua bulongolodi buende, mulami neapete dibenesha divule dia Nzambi, ki “ndilumbuluisha ditambe bunene” nansha.