Bavua badisangishe bu basamunyi bena disanka
BANTU ba Yehowa Nzambi ba kale bavua babatumina dîyi bua ‘kuikalabu anu ne disanka dilelela’ pavuabu badisangisha bua ntendelelu. (Diyi Dielulula 16:15, MMM) Mpuilu ya distrike ya 1995/96 ya: “Basamunyi bena disanka” ivua bushuwa mipeteshe Bantemu ba Yehowa tubingila tuimpe bua disanka.
Katshia mulongolongo eu wa mpuilu watuadija, mmibake ditabuja. Mmileje kabidi mushindu wa kupeta disanka mu bulongolodi bukena disanka. Tuanjibi kukonkonona mpuilu eu dituku dimue ku dimue.
‘Samunayi Yehowa, . . . Ikalayi ne disanka!’
Tshiena-bualu tshidi kuulu etshi tshia dituku dia kumpala dia mpuilu eu tshivua tshishindamene pa Musambu wa 149:1, 2. Muyuki wa: “Tudi ne kabingila ka kuela mbila ya disanka” wakakonkonona dikumbana dia mulayi udi mu Yeshaya nshapita wa 35. Wakakumbana mu Izalele wa kale ne nangananga mu matuku etu aa ne dipingajibua dia batendeledi ba Yehowa ku dilubuluka ne makanda mu mparadizu wa mu nyuma. Nunku, babuedi ba mu mpuilu eu bavua ne kabingila ka kuela mbila ya disanka bua tshidi Nzambi mulongoluele tshisamba tshiende mu mparadizu wa mu nyuma ne mu Mparadizu muena dîna utshilualua ukadi pabuipi bikole.
Muyuki wa nshindamenu wa: “Batekibue ku luseke bu basamunyi bena disanka pa buloba bujima,” wakandamuna ku lukonko elu: Ntshinyi tshidi tshituabuluja ne bulongolodi ebu? Mbuobumue bua ntendelelu wetu wa Yehowa. Bantemu ba Yehowa nansha basombele muaba kayi pa buloba ebu, badi bakula ne balongesha mu diumvuangana. Badi kabidi basanka mu dilongolola dia mpatshi dia Yehowa bua kusantuisha dîna diende dia tshijila ne bua kubingisha bumfumu buende butambe bunene ku diambuluisha dia Bukalenge buende. Kadi, mmunyi mudi Yehowa utuambuluisha bua kupeta muaba kampanda mu dilongolola diende? Mmutupeshe bulelela bua Dîyi diende dinsantu. Nzambi mmutupeshe spiritu munsantu wende. Mmutubeneshe ne buena-muntu bua pa buloba bujima ne ndongoluelu bua ntendelelu mukezuke. Dîku dietu dia pa buloba bujima didi dituambuluisha bua kusadila Yehowa ne disanka dinene dia mutshima.
“Tushale badiabulule ne bulongolodi ebu katuyi ne katoba kabu” wakazangika dikengedibua dia kuepuka tutoba tua kansungasunga ne matapuluka a milongo. (Yakobo 2:5-9) Bamue badi mua kudia bulunda anu ne bena mulongo nabu anyi bena kantu ku bianza nabu, pa kulengulula bena nkristo nabu badi bapele anyi bakengi. Bakuabu badi mua kuinyikibua ku dikeba dianyishibua dia kudi aba badi ne majitu mu tshisumbu. Badi bapua muoyo ne: muabi mupite yonso bunene ùdì muntu mua kupeta ng’wa dikala Ntemu wa Yehowa. Nunku, katuena ne bua kushiila minyikibua a bulongolodi ebu mpunga bua kututobakajawu ne kunyanga ditalala dia tshisumbu.—2 Petelo 3:14.
Muyuki wa: “Ndiku mudilongolole bua kubuela mu dibaka anyi?” wakazangika ne: bavule badi babuela mu dibaka ne lukasa lukasa. Bamue badi basela bua kuepuka nsombelu kampanda mukole kumbelu anyi bualu bena mulongo nabu badi benda basela. Kadi, tubingila tuimpe bua dibaka tudi tukonga dijinga didi babangila buonso babidi nadi bua kuipatshila bipatshila bia teokrasi, dinanga dilelela, dikengedibua dia bulunda ne bukubi, ne dijinga dia kukolesha bana. Dibidijibua dia mu nyuma didi dikengedibua mu didilongolola bua dibaka. Tshilejilu, kudi dikengedibua dia kudima ngikadilu mimpe pa kuvuala bumuntu bupiabupia. Bidi kabidi bia meji bua kujadika bikala uudi musue kuselangana nende ufila tshijadiki tshia se: udi ne malanda malelela ne Yehowa ne udi ne kanemu mu malanda ende ne bakuabu. Bidi kabidi bia meji bua kukeba mibelu kudi bena nkristo bapie.—Nsumuinu 11:14.
Muyuki mushidimunyi eu uvua mulonda kudi muyuki udi ne tshiena-bualu tshia: “Baledi badi bapeta disanka mu bana babu.” Diledibua dia muana ditu pa tshibidilu tshikondo tshia disanka dinene. Kadi, kulela bana kudi kabidi kutuala bujitu bunene. (Musambu wa 127:3) Nunku, bidi bia mushinga bua bana kulongeshibuabu bua kunanga Yehowa. Baledi badi mua kuenza nunku pa kuakula pa tshibidilu ne bana babu pa bidi bitangila Yehowa ne pa kutumikila mêyi-maludiki a mu Dîyi diende mu dîku.
Dituku dia kumpala dia mpuilu diakajika ne bualu bukena butekemena—dipatuka dia broshire mupiamupia wa: Les Témoins de Jéhovah et l’instruction. Udi umvuija patoke ne: Bantemu “batu bakankamija bansonga babu bua kutumika bikole ne kuangata ne mushinga midimu mibapa mu kalasa.” Mukanda eu udi kabidi umvuija bipeta bisunguluke bia tulasa tua dilonga kufunda ne kubala tudi Bantemu balombole bidimu bivule mu Nigeria, Mexique, ne matunga makuabu. Broshire eu neambuluishe balongeshi bua kumona se: tudi tuangata dimanya-mukanda ne mushinga.
“Tufilefile kudi Nzambi mulambu wa kumutumbisha nawo”
Tshiena-bualu tshidi kuulu etshi tshia dituku dibidi tshivua tshishindamene pa Ebelu 13:15. Programe wa mu dinda uvua muyuki mukuatakane wa: “Tuandamunayi ku dibikila dia kusamuna Yehowa.” Bungi bua bidimu kabuena tshipumbishi bua kuandamuna ku dibikila edi. Musambu wa 148:12, 13 udi ubela bansongalume, bansongakaji, ne bakulakaje, ne bana ba balume bua kusamuna Yehowa. Basadidi bena disanka bavule ba Yehowa mbapete mushindu wa kuvudija disamuna diabu. Pa buloba bujima, bantu bapite pa 600 000 mbaditue mu mudimu wa buambi wa ku dîba ne ku dîba, anyi mu mudimu wa bumpanda-njila. Bantu bapite pa 15 000 mbadifile mu mudimu wa bumpanda-njila bua pa buabu, ne bantu bapite pa 15 000 badi mu mudimu wa ku Betele.
“Tusadilayi ne bulamatshi ku mikenji pamue ne bulongolodi bua Yehowa” uvua muyuki wakaleja ne: bulamatshi ku mikenji budi ne mushinga bua basadidi ba Nzambi. Kuikala ne bulamatshi kudi Yehowa kudi kumvuija kumushimata ne budiambiki bukole buenza musombele budimbu bukole. Bulamatshi ku mikenji budi bulomba bua tuetu kuepuka ditupa ne budisuile ku mêyi-matuma a mu Bible, padi bakuabu batumona anyi kabayi batumona. Tudi kabidi balombibue bua kusanyika ne bulamatshi malongesha a mu Bible adi asanganyibua mu bibejibeji bia Tshibumba tshia Nsentedi ne Réveillez-vous! pamue ne biakudia bikuabu bionso bia mu nyuma bipetesha kudi Société Watch Tower. Muyuki eu uvua mulondibue kudi muyuki wa batismo. Ndisanka kayipu pavua balumbidi ba batismo baleje patoke diditshipa diabu kudi Yehowa!
Miaku ya Hoshea 4:1-3 yakafila tshitembelu bua muyuki wa mu musendamu wa: “Ngikadilu milenga peshi mibi—Ng’yepi yudi wipatshila?” Nansha mudi mmuenenu wa bulongolodi ebu wa ngikadilu milenga munyanguke, bena nkristo badi ne bua “kuenza muabu muonso” bua kuipatshila malu a tshitembu. (2 Petelo 1:5, NW) Ebi bidi bituadija ne mushindu udi muntu wela meji. Bikala ngenyi yende mimpe, neakule mêyi makezuke, mimpe, ne miibaki ne neenze madikolela bua kuikala muena bululame mu malanda ende ne bakuabu. Kuipatshila ngikadilu milenga kudi kabidi kukonga dienza madikolela bua kuikala ne diumvuilangana ne luse bua muena nkristo netu udi utatshishibua kudi dibungama anyi tunyinganyinga tukole.—1 Tesalonike 5:14.
Muyuki mukuabu, “Dilamayi ku mateyi a Diabolo,” wakadimuija bena nkristo ku didianyika buobu bine ku buenzeji bua ba-demon. Mu malu adi atangila diondapa dia bubedi, bidi bikengela bua bena nkristo badimukile ngenzelu, bu mudi dipumbakajangana, didi dileja lungenyi lua majimbu lua mu musokoko. Nansha nanku, tshidi bantu benza bua kukuba makanda abu a mubidi mbualu bua muntu pa nkayende.
Dituku dibidi diakajika ne bualu bua disanka bukena butekemena—dipatuka dia mukanda wa bunene bua mpaya mufunda bua kuambuluisha bantu bena mitshima milulame bua kulubuluka ne lukasa ku diditshipa ne batismo. Mukanda mupiamupia eu wa mabeji 192 udi ne tshiena-bualu tshia Dimanya didi difikisha ku muoyo wa kashidi. Mukanda wa Dimanya udi uleja bulelela mu mushindu udi wibaka. Kawena ushindamena pa dipiisha dia malongesha a dishima. Butoke bua ngakuilu ne dilondangana diakane dia ngenyi bidi ne bua kupepeja ditumika ne mukanda eu bua kulombola malonga a Bible ne kuambuluisha bantu bua kupeta dijingulula dia dimanya dia Nzambi didi disanguluja muoyo.
“Tshionkomokayi, ne ikalayi ne disanka bua kashidi”
Mêyi aa mangata mu Yeshaya 65:18 avua tshiena-bualu tshia dituku disatu dia mpuilu. Dikumbana dia milayi ya mu Bible didi difunkuna 1914 bu tshidimu tshiakabuela ndongoluelu eu mubi mu matuku ende a nshikidilu. Nunku, miyuki mikuatakane idi ne tshiena-bualu tshia: “Basamunyi bena disanka mu matuku a nkomenu wa bulongolodi ebu” wakakoka ntema yonso ya bateleji. Bangamba-malu bakaleja mudi mmuenenu wa lukuka ne tshikisu bia bulongolodi ebu ne buenzeji bukole pa miliyare ya bantu. Pakumbana tshikondo, nebalumbuluishibue bu bena mu bulongolodi ebu mudi Satana mfumu. Nunku, mpindieu tudi mu tshikondo tshia kuenza disungula. Tudi basue bua kuikala ku luseke kayi? Tudi basue bua kutendelela Yehowa ne kubingisha bumfumu buende butambe bunene, anyi netushiile Satana mpunga bua kuikalaye mfumu wetu pa kuenza malu adi amusankisha? Tuetu buonso tudi ne bua kupangadija bua kuditeka ku luseke lua Yehowa kakuyi dielakana.
Muyuki wa patoke wa mpuilu wa: “Samunayi Mukalenge wa tshiendelele!” wakasaka bateleji buonso ku diela meji. Nansha mudi lungenyi lua tshiendelele luikale lupitshidile lumvu lua bantu bena butekete, Yehowa udi yeye ulumvua luonso nkong. “Yehowa udi Mukalenge bua tshikondo tshikena tshijadika, bua kashidi mene,” ke muakimba mufundi wa misambu. (Musambu wa 10:16, NW) Mukalenge eu wa tshiendelele mmunzuluile bukua-bantu njila bua kulabulabu muoyo wa kashidi ku butuangaji bua Muanende, Yezu Kristo. (Yone 17:3) “Eyowa, tuetu bantu bena mpekatu tudi mua kufika ku dipeta muoyo wa kashidi ku butuangaji bua malongesha a Nzambi ne ditabuja mu mulambu wa tshia-bupikudi wa Yezu,” ke muakamba ngamba-malu.
Pavua mpuilu eu wenda utua ku tshibungubungu, bateleji bavua bibakibue kudi muyuki wa ndekelu, uvua ne tshiena-bualu tshia: “Samunayi Yehowa ne disanka ku dituku ne ku dituku.” Bivua bilenga ku muoyo bua kupeta ngumu ya dilubuluka dia mudimu wa dienza bayidi pa buloba bujima. Ne babuedi ba mu mpuilu bavua basakibue bua ‘kubenesha Yehowa ku dituku ne ku dituku ne kusamuna dîna diende.’—Musambu wa 145:2.
Bienzedi bibiabibi bikena bia bumuntu bidi biba disanka dia bulongolodi ebu. Nansha nanku, bantu badi ne ditabuja dijima kudi Yehowa badi mua kuikala ne disanka dia buena Nzambi. Bu buena-muntu bua pa buloba bujima, Bantemu ba Yehowa badi nunku mua kuambulula mêyi adi alonda aa a Musambu wa 35:27, 28: “Badi basanka bua bualu buanyi buakane bele mbila ne bikale ne disanka. E, bambe biabo matuku onso ne, Yehowa atumbishibue, yeye mene udi usanka mu diakalengele dia muntu udi umukuatshila mudimu. Ka ludimi luanyi neluambile bantu bua buakane buebe ne bua butumbi buebe dinda tô ne ku dilolo.”
[Bimfuanyi mu dibeji 7]
Mêku neapetele masanka ku broshire wa: “Les Témoins de Jéhovah et l’instruction”
[Bimfuanyi mu mabeji 8, 9]
Mukanda mupiamupia wa: “Dimanya didi difikisha ku muoyo wa kashidi,” udi uleja malelela a mu Bible mu mushindu udi wibaka
[Tshimfuanyi mu dibeji 9]
Bavule bavua batambuishibue bu tshimanyinu tshia diditshipa diabu kudi Yehowa
[Tshimfuanyi mu dibeji 9]
Babuedi ba mu mpuilu bavua balengibue bikole ku muoyo kudi drama wa: “Tunemekayi aba badi bakanyine mu bidimu biabo bia bukulakaje”