Kampanye ka bipeta kenza ne Ngumu ya Bukalenge

“BUA tshinyi muoyo mmuwule ne ntatu nunku?​—Mparadizu ukena ntatu udi mua kuenzeka anyi?” Etshi ke tshivua tshiena-bualu tshia trakte wa Ngumu ya Bukalenge No. 34, trakte wa mabeji anayi uvua muabanya pa buloba bujima mu miakulu 139 mu Tshisanga ne Lumungulu tshidimu tshishale. “Bumue bua ku malu a dîna a tshidimu” ke mushindu uvua Bantemu mu Jamaïque bumvuije mudimu eu wa kampanye. “Mpokolo munene wa disanka bua bana betu,” ke muvua Bantemu mu Belgique baubikile. Mu République Tchèque, bivua musangu wa kumpala uvua Bantemu ba Yehowa bapete mushindu wa kudifila mu diabanya dia trakte wa Ngumu ya Bukalenge. Filiale udi ufila luapolo elu: “Kampanye aku kakatuala mmuenenu wa mitalu ne musangelu.” Mmuenenu wa muomumue uvua mumvua kumbukila ku matunga makuabu.

Trakte wa Ngumu ya Bukalenge No. 34 uvua ne mukenji wa pa buawu bua aba badi batua mikemu ne badilakana bua malu makuate muendi menza mu dîna dia tshitendelelu. (Yehezekele 9:4) Uvua ne disambibua bua aba badi ne nsombelu misaluja bua “bikondo bia njiwu ne bikole mua kupita nabi” bidibu kabayi bakokesha. (2 Timote 3:1, NW) Pa kukoka ntema ku Bible, trakte eu wakaleja ne: ntatu ya mu nsombelu neyijandudibue mu katupa kîpi emu. Mparadizu ukena ntatu mbualu bulelela. (Luka 23:43) Bavule bavua babale trakte wa Ngumu ya Bukalenge bakatuishibua kudi mukenji wende. Muntu mulume kampanda mu Togo wakambila Ntemu kansanga ne: “Tshinudi bambe katshiena mua kuedibua mpata.”

Kabiyi mpata, diabanya dia trakte eu wa Ngumu ya Bukalenge divua dikoka ntema ikena ya pa tshibidilu. Mu Danemark muena nzubu kampanda wakandamuna Ntemu kansanga uvua uleja trakte eu ne: “Ndi mfuma ku dipingana ku États-Unis. Katupa kîpi kumpala kua diumbuka dianyi, muntu kampanda wakampesha trakte wenu eu. Mpindieu ntshifikilapu munemu, ne diakamue trakte umue umue eu udi wenda wabanyibua mu tshiena-Danemark!”

Dikuatshisha dia musangelu bua kampanye

Bantemu ba Yehowa pa buloba bujima bakaditua ne musangelu mu mudimu wa diabanya trakte eu. Autriche, El Salvador, Haïti, Hongrie, Italie, Nouvelle-Calédonie, avua anu amue a ku matunga mavule adi bilondeshile luapolo mapete bungi bubandile bua katshia ne katshia bua bamanyishi mu ngondo ivua trakte wa Ngumu ya Bukalenge wabanyibua.

Ku Zambie mutangidi kampanda wa tshijengu uvua muibidije muanende wa bakaji wa bidimu bisatu, Deborah, bua kufila mikanda ku nzubu ne ku nzubu. Munkatshi mua kampanye kenza ne trakte wa Ngumu ya Bukalenge No. 34, Deborah wakafila trakte mipite pa 45. Mamuende wakatuadija malonga a Bible ne bamue bavua bangate trakte wa Ngumu ya Bukalenge kudi Deborah.

Mu Afrike du Sud nsongakaji kampanda wakafila trakte kudi muena kalasa nende muena dîna dia Cashia. Cashia wakabala trakte eu ne kuamba ne: “Ebu mbualu bua mpatshi​—dikala ne muoyo bua kashidi pa buloba bua mparadizu! Bua tshinyi kabavua bangambile bualu ebu kuonso aku?” Dilonga dia Bible diakatuadijibua. Kunyima kua lumingu lumue Cashia wakapeta trakte mukuabu. Trakte eu muibidi uvua mufumine kudi mumufundidi wende wa mikanda muena Ekleziya Katolike wa Roma, udi musombele mu Chypre. Mumufundidi wa mikanda eu wakumvuija Cashia bua tshinyi malongesha a Ekleziya Katolike wa Roma adi a dishima ne kumuambilaye ne: uvua wipatshila bua kulonga Bible ne Bantemu ba Yehowa. Bushuwa, biakakankamija bikole dipangadika dia Cashia bua kutungunuka ne dilonga diende.

Muana wa balume kampanda wa bidimu dikumi mu Suisse wakaditua ne mamuende mu diabanya dia trakte eu. Wakafila trakte umue kudi nsongakaji kampanda ne kumukankamija bua kumubala ne ntema. Nsongakaji e kuebeja muana wa balume eu né uvua bushuwa witabuja tshivua tshimfuanyi pa tshizubu tshiende tshileja​—muoyo ukena ndekelu pa buloba. Diandamuna dia muana wa balume? “Oh, eyowa, ndi ne dishindika menemene.” Mukaji eu kushisha kusokolola ne: uvua ukeba ditabuja dilelela bualu kuvua divilangana dia malu dipite bungi mu ekleziya wende nkayende. Ku dikumbulula, dilonga dia Bible diakatuadija.

Ngandamuinu ya buludiludi

Imue misangu trakte wa Ngumu ya Bukalenge uvua usonsola ngandamuinu wa buludiludi kudi aba bavua bamubala. Panyima pa dibala trakte eu, muana wa bakaji kampanda wa bidimu 11 mu Belgique wakatonda kudi umue wa ku Bantemu ba Yehowa ne: uvua wiba ku biadijilu bia bintu bia disumbisha. Mamuende wa muana wa bakaji eu uvua usua kupuwija muanda eu, kadi kuondo ka muoyo ka muana wa bakaji eu kavua kasaka kudi tshivuaye mubale, ne wakafiatutuka bua kuya kumona mulombodi wa muaba wa nzubu ya bungenda. Mamu eu e kuitaba ndekelu wa bionso bua muanende apingane ku muaba wa nzubu ya dienda mushinga ne Ntemu. Mulombodi eu wakakema bikole pa kumona ditonda diende. Pakamanyaye ne: trakte wa Ngumu ya Bukalenge ke uvua mumusake ku dienza malu mushindu’eu, wakangata umue bua kudimuenena nkayende tshivua muomu tshivua ne bukole buvule nunku. Muana wa bakaji eu udi wenda wenza dilonga dia Bible didi dilubuluka.

Ntemu kampanda mu Cameroun wakapesha mulume kansanga trakte wa Ngumu ya Bukalenge udi ulonda ne: “Patuakapinganuna, tuakasangana se: ukavua mumuele tushonyi ne uvua ne bungi kampanda bua nkonko. Panyima pa dipeta mandamuna matuishi, wakatonda ne: ‘Kakuyi mpata bidi bilelela se: bitendelelu mbikebele bukua-bantu dipanga dia disanka. Trakte wenu mmungambuluishe bua kujingulula bivule, kadi ndi musue kumanya malu makuabu a pa mutu.’” Udi mpindieu wenza dilonga dia pa tshibidilu dia Bible.

Ntemu kampanda uvua wenza makumbula ku nzubu ne ku nzubu mu Uruguay wakapesha mulume kansanga trakte umue. Ntemu eu wakatungunuka ne mudimu wende wa buambi bua ku nzubu ne ku nzubu ne kutumika pa kunyunguluka nzubu too ne pakafikaye ku tshiibi tshia kumfundu kua nzubu wa mulume eu. Wakakema pa kusangana mulume eu mumuindile, trakte ku bianza. Ukavua mumane kumubala ne uvua usua bua kupeta mamanyisha a pa mutu. Dilonga dia Bible diakatuadijibua diakamue.

Bantu badi bambuluisha mu diabanya

Ku Japon nsonga kampanda Ntemu wakasemena pabuipi ne muntu mulume kansanga wa bidimu 50 ne bia mu njila ne kumuleja trakte eu. Mulume eu e kuebeja ne: “Ntshinyi tshiudi wenza ne kakanda aku paudi upetangana ne bantu bakena bamona?” Ntemu eu wakatonda ne: kavua mumanye. Mulume eu wakamulomba bua kuindila mutantshi kampanda ne kupinganaye mu nzubu muende. Wakapatuka ne trakte wa Ngumu ya Bukalenge ne kuamba ne: “Nkadi mumane kupeta kakanda aku. Ngakamona se: munda muaku muvua mamanyisha adi akoka ntema ne a mushinga, nunku mvua mukatentulule mu mfundilu wa bafofo. Bu wewe musue tumika naku bua bantu badi bafofo.” Mulume eu wakapitshisha mêba a bungi bua kutentulula trakte wa Ngumu ya Bukalenge mu mfundilu wa bafofo bua se: bafofo kababudi tshivua tshifundamu.

Ku Slovaquie muntu mulume kampanda wakananga bikole trakte eu e kumufikishabi too ne ku dienza kopi 20, ne kuabanya kopi eyi ya dikala difiike ne ditoke yeye nkayende. Mumanyishi kampanda mu Suisse wakafila trakte wa Ngumu ya Bukalenge umue kudi dîku kansanga ne kutungunuka ne kutumika ku bibambalu bia kuulu bia nzubu wa bisasa bivule muvua dîku edi disombele. Pa kupueka tshiakabidi panshi, wakapetangana ne muana wa balume kampanda muena dîku edi, wakalomba trakte mikuabu 19. Mu tshilongelu muvua muana wa balume eu, bavua balombe balongi bua kufunda pa bidi bitangila ntatu ne dikeba dia majandula. Wakalomba trakte wa Ngumu ya Bukalenge bua yonso wa ku bena kalasa nende.

Nansha umue kakabula

Aba bavua badifile mu kampanye bakateta bikole bua se: muntu nansha umue kabudi. Mu Nouvelle-Calédonie Bantemu babidi bavua benza luendu batangile ku teritware wa tshisa kampanda tshiditole bua kuabanya trakte wa Ngumu ya Bukalenge. Mu njila, bakamona kajila kampanda kavua kamueneka bu kadi bantu kabayi bendela, kadi bakapangadika bua kutangila né kuvua muntu kampanda uvua musombele ku ndekelu kuaku. Kunyima kua dishiya mashinyi, bakenza luendu mu kajila aku, pa kupitshila ne lutatu mu mâyi too ne pakapetabu ndekelu wa bionso nzubu kampanda. Bena dibaka babidi bavua katshia kabayi banji kumvua bualu bua Bantemu ba Yehowa bavua basombele muaba au, ne bakitaba trakte wa Ngumu ya Bukalenge. Kunyima bamanyishi aba bakenza dikumbulula ne bualu bua dikema: bakapeta bena dibaka babidi aba bamane kulongolola njila ne bilamba bivule bua se: Bantemu bamone mua kuendesha mashinyi abu too ne ku nzubu. Dilonga dia Bible dia pa tshibidilu diakatuadija.

Ku Pologne Ntemu kampanda uvua ne bua kupita muaba kansanga wa diibaka bua kufila trakte wa Ngumu ya Bukalenge kudi muena nzubu kankenge. Bena mudimu bavua bamutangila pavuaye upita mumane kushiya muaba wa diibaka panyima. Ndekelu wa bionso, umue wa ku bena mudimu wakamubikila, pa kumulomba bua kàbàpù muoyo. Pakayaye kudibu, bakanji kuimanyika mudimu ne kuteleja ne ntema yonso dilejibua dia trakte. Bakitaba kopi ya trakte wa Ngumu ya Bukalenge pamue ne bibejibeji ne pashishe, mu dikumbulula, mikanda.

Nkama ya miliyo ya trakte wa Ngumu ya Bukalenge No. 34 ivua miabanya mu miakulu ya bungi. Mukenji wende mmumane kuikala ne buenzeji bukole. Bavule mbalonge ne: mparadizu ukena ntatu udi mua kuenzeka. Tudi tusambila bua se: bena mutshima mululame batungunuke ne kuandamuna biakane ne ndekelu wa bionso bafike ku dikala munkatshi mua “bena bupuekele” ‘bapiana buloba, . . . basanka mu ditalala divulavulayi.’​—Musambu wa 37:11, NW.

[Kazubu mu dibeji 31]

Tungunuka ne kuabanya bibejibeji!

Mu Tshisanga ne Lumungulu 1995 muvua muenzeke kampanye kakapatula bipeta bia bungi ka diabanya Ngumu ya Bukalenge No. 34. Mu ngondo ayi ibidi, kuvua kabidi diabanya dia dikema dia bibejibeji bia Tshibumba tshia Nsentedi ne Réveillez-vous! Tshilejilu, muanetu kampanda wa balume mu République Tchèque, udi ufila luapolo ne: mu Tshisanga uvua mufile kopi 250 ya trakte wa Ngumu ya Bukalenge ne bibejibeji 750. Mu Guadeloupe, Disambombo dia 15 Tshisanga, diakasungudibua bu dituku dia pa buadi dia bibejibeji. Pabuipi ne mumanyishi yonso mu ditunga edi wakadifila mu mudimu dituku adi! Slovaquie uvua mupete bungi bubandile bupiabupia bua diabanya dia bibejibeji mu Tshisanga. Luapolo ya muomumue yakafumina ku matunga makuabu mavule.

Nunku bua tshinyi kubenga kuangata Tshisanga ne Lumungulu 1996 bu ngondo ya pa buayi bua diabanya dia bibejibeji? Bisumbu bidi mua kulongolola matuku a pa buawu mu diabanya dia bibejibeji. Bantu badi mua kudifila mu mudimu wa bumpanda-njila buambuluishi. Mu mishindu yonso, diabanya dia bibejibeji didi mua kukankamijibua, ne mukenji wa mushinga mukole mumanyisha mu Ngumu ya Bukalenge No. 34 neutungunuke ne kutangalajibua. Nunku, anu bu muvuabi bienzeke tshidimu tshishale, kakuyi mpata Yehowa neabeneshe mmuenenu wa mitalu utudi tuleja.​—2 Timote 4:22.