Úvuá mua kuikala mujingulule Masiya anyi?

YEZU KRISTO wakapitshisha bidimu bisatu ne tshitupa mu diyisha Dîyi dia Nzambi munkatshi mua bena Izalele. Kadi tshikondo tshiakalua mudimu wende wa pa buloba kutua ku ndekelu bavule ba ku bena tshikondo tshiende bakamubenga bu Masiya, peshi “Muela manyi” mulaya kudi Nzambi. Bua tshinyi?

Bible udi utuambuluisha bua kujadika tubingila tuvule tuvua bena Yuda ba mu siekele wa kumpala babengele kuitaba Yezu bu Masiya. Tusatu tua ku tubingila etu tudi tupangisha bavule mua kuitaba muanzu udi nawu Yezu lelu bu Mukalenge Masiya mukokeshi.

“Tudi basue kutangila tshimanyinu”

Kamue kabingila kavua bena Yuda ba mu siekele wa kumpala babengele kujingulula Masiya kavua dibenga diabu bua kuitaba bimanyinu bia mu Mifundu bivua bijadika bu-Masiya buende. Imue misangu, bantu bàvuà bateleja Yezu bavua bamulomba bua enze tshimanyinu bua kujadika se: uvua mufumine kudi Nzambi. Tshilejilu, Matayo 12:38 udi wamba ne: bamue ba ku baskribe ne Bafarizeyi bakamba ne: “Muyishi, tudi basue kutangila tshimanyinu tshia bualu buebe.” Yezu kavuaku muanji kubaleja bimanyinu anyi? Bushuwa, ukavua mubaleje.

Tshikondo atshi Yezu ukavua mumane kuenza bishima bikumbane. Ukavua mushintulule mâyi malue mvinyo, muondape muana kampanda ukavua pa kufua, mujikije kusama kua mamuende muenu wa Petelo, musanguluje muena nsudi, muendeshishe tshibombo, mupingajilule bukole bua mubidi kudi mubèdì musame munkatshi mua bidimu 38, mupingajilule tshianza tshiuminyine tshia muntu kampanda muatshi mua kale, mujikijile bantu bavule masama abu makole, muondape mupika wa mfumu wa masalayi, mubiishe muana wa mukàmbà ku bafue, mutabeje mufofo ne muakuishishe kamama. Bishima ebi bivua bienzeke ku Kana, Kapernaume, Yeruzaleme, ne Naine. Kupit’apu, lumu lua bishima ebi luakatangalaka mu Yudeya ne mu matunga a pa mpenga.​—Yone 2:1-12; 4:46-54; Matayo 8:14-17; 8:1-4; 9:1-8; Yone 5:1-9; Matayo 12:9-14; Mâko 3:7-12; Luka 7:1-10; 7:11-17; Matayo 12:22.

Mbimueneke patoke se: kakuvua dipangika dia bimanyinu bìvuà bileja ne: Yezu uvua Masiya. Nansha muakenzaye bimanyinu bungi nunku ku mêsu kua bantu, kabakamuitabuja. Aba bakamona tshijadiki tshia se: Yezu uvua mutuma kudi Nzambi kadi kubenga kumuitaba bu Masiya bavua bafofo mu nyuma. Mitshima yabu ivua mikole ne kayiyi ibueja bulelela.​—Yone 12:37-41.

Bidi munyi lelu’eu? Bantu bakuabu batu bamba ne: “Ndi ngitaba amu tshindi ndimuenena ne mêsu.” Kadi bushuwa au nnjila wa meji wa kulonda anyi? Mulayi wa mu Bible udi uleja ne: Yezu ukadi mumana kusombesha mu nkuasa wa bumfumu bu Mukalenge wa mu diulu wa Bukalenge bua Masiya. Bu mudiye kayi umueneka, tudi tujinga bua tshimanyinu kampanda tshituambuluishe bua kujingulula bukokeshi buende, buakashindika mbangilu wa matuku a nshikidilu a ndongoluelu mubi eu wa malu. Udi mumanye tshimanyinu etshi anyi?​—Matayo 24:3.

Bilondeshile Bible, mbangilu wa bukokeshi bua Kristo bu Mukalenge Masiya uvua ne bua kujadikibua kudi mvita, bikumina, biyole bia nzala, ne bipupu bia masama mu mushindu utubi kabiyi bianji kuenzeka. Mu ‘matuku a ku nshikidilu,’ malanda a bantu avua ne bua kuikala muujibue ne budinangi, lukuka, ne dipanga dia didikanda. (2 Timote 3:1-5; Matayo 24:6, 7; Luka 21:10, 11) Pa kumbusha bijadiki ebi bia ku dilondangana dia bidimu, bimanyinu bia matuku a ku nshikidilu bishilangane bipite pa 20 bidi bifunkuna ntuadijilu wa bumfumu bua Masiya mu 1914.​—Tangila Tshibumba tshia Nsentedi tshia mu dia 1 Luabanya 1993, dibeji 5.

“Banange biuma”

Dinanga dia bintu bia ku mubidi divua kakuabu kabingila kavua bena Yuda babengele Yezu bu Masiya. Ditua mushinga mupitshidile ku bintu bia ku mubidi diakapangisha bavule bua kulonda Yezu. Tshilejilu, Bafarizeyi bavua bamanyike muvuabu “banange biuma.” (Lukase 16:14, MMM) Tangila muanda wa mfumu nsonga mubanji kampanda wakasemena kudi Yezu ne kumuebeja muvuaye mua kupeta muoyo wa kashidi. “Ulame meyi,” ke muakandamuna Yezu. “Meyi onso awo ndi mualame. Tshidi tshinshadile ntshinyi?” ke muakebeja nsongalume eu, bimueneka se: wakajingulula dikengela dia kuenza bipitshidile pa kulama anu imue mikenji. “Uye kupana biudi nabio, ubipeshe bapele, nanku neupete biuma mu diulu; kunyima ulue, undonde,” ke muakamuambila Yezu. Ndiakalenga kayipu​—kuikala muyidi wa Masiya! Kadi mubanji wakakudimuka e kuyaye mubungame. Bua tshinyi? Bualu buende yeye biuma bia pa buloba bivua ne mushinga kupita bia mu diulu.​—Matewuse 19:16-22, MMM.

Nsombelu ki mmushintuluke nansha. Kulua mulondi mulelela wa Mukalenge Masiya nkutabalela malu a mu nyuma kumpala kua bintu bikuabu bionso, nansha mpetu ya pa buloba. Bua yonso udi munange bintu bia ku mubidi, mbualu bukole. Tshilejilu, bena dibaka babidi ba-misionere ba ku ditunga kampanda dia ku Est bakayukila ne mukaji kansanga pa malu a mu Bible. Pa kuela meji ne: uvua mua kusua kumanya bivule pa bidi bitangila Yehowa Nzambi ne Muanende, Yezu Kristo, bena dibaka aba bakamupesha Tshibumba tshia Nsentedi ne Réveillez-vous! Mmunyi muakandamunaye? “Bibejibeji ebi nebingambuluishe bua kupeta mfranga mivule anyi?” ke muakebejaye. Mukaji eu uvua utabalela bintu bia ku mubidi kupita bia mu nyuma.

Bena dibaka bamuebamue aba bavua balonga Bible ne nsongalume kampanda wakatuadija kubuela mu bisangilu ku Nzubu wa Bukalenge. “Udi ujimija dîba,” ke muakamuambila baledi bende. “Uvua mua kukeba mudimu muibidi ku dilolo bua kupeta mfranga mipitshidile.” Mmunyipu mudibi bia dibungama padi baledi bakankamija bana babu bua kuteka bintu bia ku mubidi kumpala kua dilonga malu adi atangila Mukalenge Masiya! “Nansha ne bubanji buende buonso mfumu kêna mene mua kusumba bidimu binunu dikumi bia muoyo,” ke mudi kasumuinu ka bena Chine kamba.

Bavule lelu’eu mbafike ku dijingulula se: dilonga pa bidi bitangila Mukalenge Masiya ne dimulonda kadiena dishiila dinanga dia mfranga muaba. Ntemu wa Yehowa kampanda uvua ngenda-mushinga wa bubanji buvule, wakamba ne: “Dikala ne mfranga mivule didi disankisha bikole kadi ki ntshintu tshia kukengela. Mfranga ki nyitu ipetesha muntu diakalenga.” Udi mpindieu muena mu dîku dia Betele mu filiale kampanda wa Société Watch Tower ku Mputu.

“Batshina bena Yuda”

Ditshina bantu divua padi kabingila kakuabu kavua kapangishe bena Yuda bua kuitaba Yezu bu Masiya. Kuitaba bu-Masiya buende patoke kuvua kuteka lumu luabu mu njiwu. Bua bamue mushinga au uvua mupite bukole. Tangila Nikodeme, muena mu kabadi kanene ka bena Yuda kabikila ne: Sanhedrin. Mukemeshibue kudi bimanyinu ne malongesha bia Yezu, wakitaba ne: ‘Rabi, tudi bamanye ne: wewe udi muyishi mufume kudi Nzambi, bualu bua kakuena muntu udi mumanye mua kuenza bimanyinu ebi biudi wenza, bikala Nzambi kayi nende.’ Pabi, Nikodeme wakakumbula Yezu butuku, pamu’apa bua kuepuka mpukapuka ya kumanyika kudi bena Yuda bakuabu.​—Yone 3:1, 2.

Bua bavule bakumvua Yezu wakula, dianyisha dia kudi bantu divua ne mushinga mupite dia kudi Nzambi. (Yone 5:44) Pavua Yezu mu Yeruzaleme bua Difesto dia Mitàndà mu 32 B.B., “bantu ba bungi bavua banungana bikole bualu buende.” Muntu nansha umue kakakula patoke bua Yezu “bualu bavua batshina bena Yuda.” (Yowanese 7:10-13, MMM) Nansha baledi ba muntu uvua Yezu muondape bufofo kabavua pabu basue kuitaba tshishima etshi bu tshifumine kudi muleji-mpala wa Nzambi. Buobu pabu bavua “batshina bena Yuda.”​—Yowanese 9:13-23, MMM.

Lelu’eu, bamue mbajingulule se: Yezu udi mpindieu ukokesha mu diulu bu Mukalenge Masiya, kadi badi batshina kujadika nunku patoke. Buabu buobu mushinga wa dijimija lumu ku mêsu kua bakuabu mmupite bukole. Tshilejilu, Ntemu wa Yehowa kampanda mu Allemagne, wakayukila ne muntu kansanga wakitaba ne: “Binudi nuenu Bantemu nuyisha pa Bible mbilelela. Kadi bingalua Ntemu lelu, makelela bonso nebamanye bualu ebu. Nebele meji kayi ku mudimu, ku mutumba, ne mu kasumbu mutudi dîku dianyi ne meme? Tshiena mua kutantamena bualu ebu to.”

Tshidi tshitshinyisha bantu ntshinyi? Diditambisha, dinanga dia kuikala ne lumu munkatshi mua bena dîku ne balunda, buôwa bua kusekibua ne difuishibua bundu, disumpakana dia kuikala mushilangane ne tshi-bungi tshia bantu. Nyanji bu nunku nditeta dilelela nangananga bua aba batshidi batuadija kulonga Bible ne Bantemu ba Yehowa. Tshilejilu, nsongakaji kampanda uvua mulengibue ku mutshima pa kulonga malu adi atangila Mparadizu wikala Bukalenge bua Masiya ne bua kuasa pa buloba ku bukokeshi bua Yezu Kristo. Kadi uvua munangi wa tshisumi wa disco, ne ditshina dia bantu divua dimupangisha mua kumanyisha bakuabu ditekemena edi. Ndekelu wa bionso, wakapeta dikima bua kuakula patoke pa bidi bitangila Bible. Balunda bende ba mu disco bakamubenga, kadi bayende ne baledi bende bakaleja dianyisha. Ndekelu wa bionso Mukaji eu ne mamuende bakatambula, ne bayende ne tatuende bakatuadija kulonga Bible. Ndifutu kayipu pa kutshimuna ditshina dia bantu!

Udi mujingulule bushuwa Masiya anyi?

Pakavua Yezu ufua pa mutshi wa tshinyongopelu, bamue ba ku bayidi bende bavuapu. Bakavua bamujingulule bu Masiya mudianjila kumanyisha. Bamfumu bena Yuda pabu bavuapu ne, mu ngakuilu wa mu tshimfuanyi, batshivua amu balomba tshimanyinu. ‘Adisungile bikalaye Kristo [peshi Masiya] wa Nzambi musungula kudiye.’ (Luka 23:35) Kabavuaku ne bua kulekela dilomba tshimanyinu anyi? Yezu ukavua muenze bishima mulongolongo. Kusakidila apu, diledibua diende, mudimu, dilumbuluishibua, dishipibua ne dibiishibua biende biakakumbaja milayi mivule ya mu Mifundu ya tshiena-Ebelu.​—Tangila “Toute Écriture est inspirée de Dieu et utile,” mabeji 338-340, mupatula kudi Watchtower Bible and Tract Society of New York, Inc.

Bapitshi ba mu njila bakapenda Yezu, bamane kuvila bujadiki bua bu-Masiya buende. (Matayo 27:39, 40) Basalayi bakabanyangana bilamba bia Yezu ne luzuku luonso, bela nshobo bua tshikowelu tshiende. (Yone 19:23, 24) Ditshina dia bantu divua ne wadi mudimu mu malu makuabu. Tshilejilu, tangila Yozefe wa mu Arimatiya, muena mu Sanhedrin. ‘Uvua muyidi wa Yezu mu musokoko bualu uvua utshina bena Yuda.’ Kunyima kua lufu lua Masiya, Yozefe ne Nikodeme bakalama mubidi wa Yezu. Nunku Yozefe wakatshimuna ditshina diende dia bantu.​—Yone 19:38-40.

Bu wewe muikaleku mu siekele wa kumpala, úvuá mua kuikala mujingulule Yezu bu Masiya anyi? Dienza nunku divua kukulomba bua witabe bujadiki bua Mifundu, ulekele dinanga dia bintu bia ku mubidi, bua kuponyi mu ditshina dia bantu nansha. Mu matuku aa a ku nshikidilu, yonso wa kutudi udi ne bua kudiebeja ne: ‘Ndi njingulula Yezu mpindieu bu Mukalenge Masiya wa mu diulu anyi?’ Mu katupa kîpi emu neakokeshe buloba. Penzeka bine ebi, newikale munkatshi mua bàdì bajingulule Yezu Kristo bushuwa bu Masiya mulaya anyi?

[Bimfuanyi mu dibeji 28]

Kulenguludi nansha kakese bujadiki bua se: Yezu udi Mukalenge Masiya

[Tshimfuanyi mu dibeji 31]

Dilonga pa bidi bitangila Masiya didi misangu mivule diumvuija ditshimuna ditshina dia bidi bakuabu mua kuamba