“Nuvuluke matuku a diambedi”​—Bua tshinyi?

“NUVULUKE matuku a diambedi.” Didimuija edi dia mupostolo Paulo, difunda bu mu 61 B.B., divua ditangija kudi bena nkristo bena Ebelu ba mu Yudeya. (Ebelu 10:32) Ntshinyi tshiakasonsola dimanyisha edi? Bua tshinyi kuvua dikengela bua batendeledi abu ba Yehowa ba mu siekele wa kumpala bua kubengabu kupua muoyo matuku a kale? Tudiku mua kubabidila pa kuteya ntema ku divuluija dia muomumue lelu’eu anyi?

Mu bungi bua siekele, bafundi ba Bible mbadimuije misangu ne misangu bua dibenga kuteya ntema peshi dikala ne ditanaji ku matuku a kale. Matuku a diambedi ne malu akenzeka avua ne bua kulamibua mu lungenyi ne kukonkononyibua. Nansha Yehowa wakamba ne: “Nuvuluke malu akadiku diambedi, bua meme ndi Nzambi, ne kakuena mukuabo; meme ndi Nzambi ne kakuena mukuabo bu meme.” (Yeshaya 46:9) Tukonkononayi tubingila tukole tusatu bua diteya ntema ku didimuija edi.

Disakibua ne dikankamija

Tshia kumpala: didi mua kuikala mpokolo munene wa disakibua ne dikankamija. Pavua Paulo mufundile tshisumbu tshia bena Ebelu mukanda wende eu, uvua ufundila bena nkristo nende bàvuà dituku dionso ne ditabuja diabu diteka mu diteta dia buluishi bua kudi bena Yuda. Mu dijingulula dia dikengela dia kukolesha ditantamena, Paulo wakamba ne: “Nuvuluke matuku a diambedi munkatshi muau munuakatantamana mu diluangana dikole dia mu makenga, [p]anuakamana kutokeshibua mu munya.” (Ebelu 10:32) Divuluka diabu dia bienzedi bia kale bia bulamatshi ku mikenji mu diluangana dia mu nyuma divua ne bua kuambuluisha bua kubapesha muoyo mukole udi ukengedibua bua kufikisha lubilu ku ndekelu. Bia muomumue, muprofete Yeshaya wakafunda ne: “Nuvuluke bualu ebu, nubujadike.” (Yeshaya 46:8) Bivua ne buenzeji buimpe bua muomumue mu lungenyi, bu muakambila Yezu Kristo tshisumbu tshia mu Efeso ne: “Nunku, uvuluke kuwaku[p]ona [dinanga diebe dia kumudilu], ukudimune mutshima webe, ne enza midimu ya kumudilu.”​—Buakabuluibua 2:4, 5.

Dilomba bua ‘kuvuluka matuku a diambedi, kuelangana meji a bidimu ne bikondo bia bungi’ divua tshiena-bualu tshivua mu miyuki yakafila Mozese kudi Izalele, anu bu pavuaye usengelela tshisamba bua kulejatshi bulamatshi bukena buôwa kudi Yehowa. (Dutelonome 32:7) Bambisha mêyi ende aa, mafunda mu Dutelonome 7:18 ne: ‘Kanubatshinyi [bena Kanana]: nuvuluke malu akenzela Yehowa, Nzambi wenu, Faraone ne bena Ejipitu bonso.’ Divuluka dia bienzedi bia Yehowa bia disungila tshisamba tshiende divua ne bua kuikala bukole busaki ku ditungunuka diabu ne dishimata ku mikenji ya Nzambi ne lulamatu luonso.​—Dutelonome 5:15; 15:15.

Diakabi, bena Izalele misangu ne misangu bakapona mu mpekatu wa tshipua-muoyo. Ne bipeta kayi? ‘E, [“misangu ne misangu,” NW] bakateta Nzambi, bakatatshisha wa Tshijila wa bena Izalele. Kabakavuluka bukole bua tshianza tshiende, anyi dituku diakabapikulaye mu bianza bia muena lukuna.’ (Musambu wa 78:41, 42) Ndekelu wa bionso, tshipua-muoyo tshiabu tshia mêyi-matuma a Yehowa tshiakafikisha ku dibengibua diabu kudiye.​—Matayo 21:42, 43.

Tshilejilu tshimpe tshivua tshifila kudi mufundi wa misambu wakafunda ne: “Nentele bienzedi bia Yehowa, bualu bua nemvuluke malu ebe a kukema awakenza kale. Nengelangane meji a mudimu webe wonso, nengelangane meji munda muanyi a bienzedi biebe.” (Musambu wa 77:11, 12) Divuluka dia dieleela meji bu edi pa mudimu wa bulamatshi ne pa bienzedi bia dinanga bia Yehowa bia kale neditupeteshe disakibua, dikankamija, ne dianyisha bidi bikengedibua. Kabidi, ‘divuluka matuku a diambedi’ didi mua kuambuluisha bua kujimija dipungi ne didi mua kutusaka ku dienza bionso bitudi mua kuenza ne ku ditantamena dia lulamatu.

Dilongela ku bilema bia kale

Tshibidi: dibenga kupua muoyo didi mua kuikala mushindu wa dilongela ku ntupakanyi ya kale ne ku bipeta biayi. Mulame bualu ebu mu lungenyi, Mozese wakabela bena Izalele ne: ‘Vulukayi, kanupu muoyo bu munuakafuisha Yehowa, Nzambi wenu, tshiji mu tshipela; ku dituku dinuakapatuka mu buloba bua Ejipitu too ne panuakafika ku muaba eu, nuakapidia Yehowa.’ (Dutelonome 9:7) Tshipeta tshia bupidia bu ebu bua bena Izalele tshivua anu bu muakaleja Mozese, ne: ‘Yehowa, Nzambi wabu wakabalombola bidimu makumi anayi mu tshipela.’ Bua tshinyi bavua bakankamijibue bua kuvuluka bualu ebu? Bivua bua kubapuekesha ne bu dinyoka bua njila yabu ya buntomboji, bua buobu kumona mua ‘kutumikila mikenji ya Yehowa, Nzambi wabu kuenda mu njila yende, ne kumutshina.’ (Dutelonome 8:2-6) Bavua ne bua kulonga mu ngumvuilu wa dibenga kuenzulula bilema biabu bia kale.

Mufundi mukuabu wakabambisha ne: “Muntu mutabuluke mu lungenyi udi ulongela ku dimonamona malu diende, muena meji yeye ku dimonamona malu dia bakuabu.” Pavua Mozese muvuluije tshisamba tshia Izalele bua kubabidila pa kutangila bilema biabu buobu bine bia kale, mupostolo Paulo wakabela bakuabu​—tshisumbu tshia bena Kolinto tshia mu siekele wa kumpala, pa kualabaja, ne tuetu petu—​bua kupetela dilongesha ku muyuki umue umue mufunda. Wakafunda ne: “Malu aa akatungunuka ne kubavuila [bena Izalele] bu bilejilu, ne akafundibua bu didimuija kutudi tuetu bàdì nshikidilu ya ndongoluelu ya malu mifikile.”(1 Kolinto 10:11, NW) Yezu Kristo uvua kabidi mulame mu lungenyi muanda mukuabu wa kale wa mu Bible ne dikengela dia kulongelaku pakambaye ne: ‘Vulukayi pa mukaji wa Lota.’ (Luka 17:32; Genese 19:1-26) Mufundi wa tusala ne muena nkindi wa bena Angleterre Samuel Taylor Coleridge wakafunda ne: “Bu bantu mua kulongela ku malu a kale, mmalongesha kayipu avuawu ne bua kutulongesha!”

Budipope ne dianyisha

Tshisatu: divuluka didi mua kulela munda muetu ngikadilu misankishi ya Nzambi ya budipope ne dianyisha. Bu mutudi tusankila mu bitupa bivule bia mparadizu wetu wa mu nyuma wa pa buloba bujima, katupu muoyo nansha kakese bua se: mmuashila pa bimue bishimikidi bikole bia luibaku. Ebi bidi bikonga bulamatshi ku mikenji, dinanga, didilambula, dikima kumpala kua buluishi, ditantamena, muoyo mule ne ditabuja​—ngikadilu mileja kudi bana betu bena nkristo balume ne bakaji bakunzulula tshiibi tshia mudimu mu bitupa kabukabu bia buloba kukadi makumi a bidimu. Mu dikomesha luapolo luende pa muyuki wa tshisamba tshia Nzambi tshia matuku etu aa mu Mexique, Annuaire des Témoins de Jéhovah 1995 wakamba ne: “Bua bantu badi bafuminaku ku didisangisha ne Bantemu ba Yehowa mu matuku aa, mateta mapeta kudi aba bakenza tshiabu tshitupa mu diunzulula mudimu mu Mexique adi mua kumueneka bu bualu bua dikema. Mbibidilangane ne mparadizu wa mu nyuma, muaba udi diondoloka dia biakudia bia mu nyuma, muaba udi nkama ya binunu bia bena dietu batshinyi ba Nzambi, ne muaba udi mudimu wa Nzambi ukumbajibua mu mushindu mulongolola bimpe.”

Bashimiki ba kumpala aba misangu ne misangu bavua batumika nkayabu peshi mu tusumbu tukese tuditole. Bakakama bunkaya, dipangila dia bintu, ne makuabu mateta a muoyo-mutoke bu muakananukilabu mu dimanyisha mukenji wa Bukalenge. Nansha mudi bavule ba ku basadidi aba ba mu bikondo bia kale bafue, mmunyipu mudibi bisanguluja mutshima pa kumanya se: Yehowa udi uvuluka mudimu wabu wa lulamatu! Mupostolo Paulo wakashindika bualu ebu, pakafundaye ne: ‘Bualu bua Nzambi kêna upanga buakane bua kupueye muoyo mudimu wenu ne wa dinanga dinuakaleja bua dîna diende.’ (Ebelu 6:10) Bikala Yehowa ne dianyisha dionso uvuluka, katuenaku mua kuenza bia muomumue mu lungenyi lua dianyisha anyi?

Aba bàdì bafuminaku ku dimanya bulelela badi mua kupeta didimuija edi dia mu miyuki ku diambuluisha dia mukanda wa Les Témoins de Jéhovah​—Prédicateurs du Royaume de Dieu.a Pashishe, bituikale ne muabi wa kuikala mu dîku kampanda peshi mu tshisumbu tshia Buena-nkristo tshidi ne benatshi bikale bana betu ba balume ne ba bakaji badi basadile mutantshi mule, tudi basengelela kudi mêyi a mu Dutelonome 32:7 bua ‘kuvuluka matuku a diambedi, kuelangana meji a bidimu ne bikondo bia bungi; kuebeja batatuetu, ne buobu nebatuleje; ne bakulu betu, buobu nebatuambile.’

Eyowa, divuluka bienzedi bia kale bia bulamate kudi Nzambi didi mua kutusaka bua kutungunuka ne kutantamena ne disanka mu mudimu wetu wa Buena-nkristo. Kabidi, malu a kale adi ne malongesha atudi ne bua kulonga. Ne dieleela meji pa mparadizu wetu wa mu nyuma mubenesha kudi Nzambi didi dilela ngikadilu mikumbane ya budipope ne dianyisha. Bushuwa, “nuvuluke matuku a diambedi.”

[Mêyi adi kuinshi]