Nkonko ya babadi

Tshibumba tshia Nsentedi tshia dia 15 Tshimungu 1996, tshiakamba ne: “Mu tshitupa tshia ndekelu tshia dikenga, ‘mubidi’ wikala munyemene ku luseke lua Yehowa newupandishibue.” Abi bidi bifila lungenyi lua se: panyima pa tshitupa tshia kumpala tshia dikenga dinene, bantu bavule bapiabapia nebalue kabidi ku luseke lua Nzambi anyi?

Atshi ki ntshivua tshiambibua nansha.

Mêyi a Yezu adi mu Matayo 24:22 neakumbajibue diambedi mu matuku atshilualua ku dipanduka mu tshitupa tshia kumpala tshia dikenga dinene ditshilualua, dibundibua dia bitendelelu. Tshiena-bualu atshi tshiakamba ne: “Vuluka se: ‘mubidi,’ wa bashadile bela manyi ne wa ‘musumba munene,’ newikale mumane kupandishibua padi Babilone Munene ukuluka diakamue ne bua kashidi mu tshitupa tshia kumpala tshia dikenga.”

Bena lulamatu ba nunku kabakuikala mu njiwu padi Yezu ne tshiluilu tshiende tshia mu diulu batumika mu tshitupa tshia ndekelu tshia dikenga. Kadi nnganyi wapanduka nunku ku tshitupa atshi tshia dikenga? Buakabuluibua 7:9, 14 udi uleja ne: musumba munene ùdì ne ditekemena dia pa buloba neupanduke. Mmunyi bua bena nkristo bela manyi a spiritu? Tshitupa tshia “Nkonko ya babadi” mu Tshibumba tshia Nsentedi tshia dia 15 Tshimungu 1990, tshiakaleja bua tshinyi katuena mua kuikala bakamikianganyi pa bidi bitangila tshikondo tshiangatshibua bashadile bela manyi mu diulu. Nenku tshiena-bualu tshia matuku adi panshi aa (15 Tshimungu 1996) tshiakashiya muanda eu mububika, pa kufila diumvuija dikena disunguluke ne: “Mbimueneke se: mu tshitupa tshia ndekelu tshia dikenga, ‘mubidi’ wikala munyemene ku luseke lua Yehowa newupandishibue.”

Bua bidi bitangila bikala bamue bapiabapia mua kupeta mushindu wa kulonga bulelela ne kulua kabidi ku luseke lua Nzambi panyima pa dikenga dinene dimane kubanga, bambisha mêyi a Yezu mafunda mu Matayo 24:29-31. Panyima pa dibudika dia dikenga, tshimanyinu tshia Muana wa muntu netshimueneke. Yezu wakamba ne: bisamba bionso bia pa buloba nebidikume biobi bine ne nebidile. Kakamba bualu nansha bumue bua bantu badi batabuluka bua nsombelu’eu, banyingalala, biimana ku luseke lua Nzambi, ne balua bayidi balelela.

Bia muomumue, mu mufuanu wa mikoko ne mbuji, Muana wa muntu udi umueneka ne utapulula bantu mu bunzuji pa bishimikidi bia malu avuabu benze peshi kabayi benze mu matuku a kale. Yezu kakamba tshintu nansha tshimue bua bantu bakaleja kale bimanyinu bia bàdì bu mbuji bakudimuka diakamue ne balua bu mikoko. Udi ulua kulumbuluisha pa bishimikidi bia tshivua bantu bamane kudileja.​—Matayo 25:31-46.

Kadi, apa kabidi, kakuena kabingila ka kuikala bakamikianganyi pa tshilumbu etshi. Bantu ba Nzambi, bela manyi pamue ne musumba munene, mbamanye tshidibu ne bua kuenza mpindieu​—kuyisha ne kuenza bayidi. (Matayo 28:19, 20; Mâko 13:10) Kubangila anu ku mpindieu ke tshikondo tshia tuetu kuangata ne mushinga mubelu eu: ‘Tuetu, benji ba mudimu ne Nzambi, tudi tunusengelela kabidi ne: Kanuangatshi [“bulenga bukena butuakanyine,” NW] bua Nzambi bu bualu bua patupu; bua yeye udi wamba ne: Ngakakumvuila mu tshikondo tshimpe, mu dituku dia lupandu ngakakukuatshisha; monayi, katataka ntshikondo tshimpe, monayi, katataka ndituku dia lupandu.’​—2 Kolinto 6:1, 2.