Bakenza disua dia Yehowa

Tatu udi mudiakaje bua kufua luse

MBAUBIKILE ne: muyuki mutambe bunene muenza ne bantu bakese utubu kabayi banji kufunda wa kabingila kimpe. Mufuanu wa Yezu wa dinanga dia tatu kampanda kudi muanende mujimine udi bu disoso ditudi tumuenena luse lua Nzambi bua benji ba mpekatu badi banyingalala.

Mujimine, e kumuenekaye

Muntu mukuabu uvua ne bana ba balume babidi. Muakunyi wakamuambila ne: ‘Ndi nkeba buanyi bumpianyi mpindieu, pamutu pa kuindila too ne pawafua.’ Tatu e kuitaba, pamu’apa kumupeshaye tshia-bisatu tshia bionso bivuaye nabi​—tshitupa tshia muana muakunyi wa ku babidi aba bilondeshile mikenji. (Dutelonome 21:17) Ne lukasa luonso nsongalume eu wakasangisha bubanji buende ne kuenzaye luendu mutangile ku ditunga dia kule kuakatulaye makuta ende onso mu nsombelu wa buenzavi.​—Luka 15:11-13.

Pashishe nzala wa kavuambu e kulua. Kayi tshia kuenza, nsongalume eu wakitaba mudimu wa musaki wa ngulube​—mudimu uvua muena Yuda upepeja. (Lewitiki 11:7, 8) Biakudia biakakepa bikole mu mushindu wa se: wakabanga kujinga biakudia bia ngulube! Ndekelu wa bionso, nsongalume lungenyi e kumuvuila. Kudiambilaye mundamunda ne: ‘Bena mudimu ba tatu wanyi badi badia bimpe kumpita meme. Nempingane kumbelu, nentonde mpekatu yanyi, ne nendombe bua kulua nansha bu umue wa ku bena mudimu ba mposo ba tatu wanyi.’a​—Luka 15:14-19.

Nsongalume wakamata mu njila mutangile kumbelu. Kakuyi mpata, tshimuenekelu tshiende tshivua tshishintuluke bikole. Kadi, tatuende wakamumanya anu ‘patshivuaye kuakua.’ Muikale ne luse, wakaya lubilu kudi muanende, kumuela tshitupa ku nshingu, ne “wakamutuatua mishiku.”​—Luka 15:20.

Disekelela edi dia musangelu diakenzeja ne: nsongalume eu adiumvue musulakane. Wakamba ne: “‘Tatu, ndi muenzele [“diulu,” NW] bibi ne wewe kabidi, tshiena muakanyine bua umbikile kabidi muanebe. [“Ungangate bu bena mudimu bebe bakuabu ba mposo,” NW].’ Ke tatu kuambila [“bapika,” NW] bende ne: ‘Ndayi lukasa, nuvue ne tshilamba tshimpe, numuvuadike, numuele kakanu ku munu ne bisabata ku makasa. Nuvue kabidi ne muana wa ngombe wa manyi, numushipe, tudie, tusanke. Bualu muananyi ewu uvua mufue, mmubike ku lufu; uvua mujimine, mmumueneke!’”​—Lukase 15:21-24, MMM.

Difesto dilongolola diakatuadija, ne misambu ne maja. Muana mukulumpe kumvuaye mutoyi pavuaye ufuma ku budimi. Pakamanyaye se: muanabu uvua mulue kumbelu ne se: etshi ke tshivua tshienzeje difesto, wakafiika munda. ‘Ndi mukukuatshile mudimu bidimu bia bungi, ne tshitu muanji kubenga kukutumikila. Kadi kuena muanji kumpesha kana ka mbuji ka meme kusanka naku ne balunda banyi,’ ke muakanyingalelaye tatuende. ‘Kadi mpindieu padi muanebe eu upingana, yeye udi mubutule bubanji buebe, udi umuenzejila difesto.’ Tatuende kuandamuna ne dinanga dionso ne: ‘Muananyi, wewe udi nanyi matuku onso; bintu bionso bindi nabi mbiebe. Kadi tuvua anu mua kusanka, bualu muanenu ewu uvua mufue, mmubike ku lufu. Uvua mujimine, ne nenku mmumueneke.’​—Luka 15:25-32.

Malongesha buetu tuetu

Tatu wa mu mufuanu wa Yezu udi uleja Nzambi wetu wa luse, Yehowa. Anu bu muana mujimine, bamue bantu badi bumbuka mu bukubi bua mu nzubu wa Nzambi bua tshikondo kampanda kadi bapingana pashishe. Mmunyi mudi Yehowa wangata bantu ba nunku? Tudi mua kujadikila aba badi bapingana kudi Yehowa ne dinyingalala dia muoyo mujima ne: “kakusonguelangana bikondo bionso, nansha kulaminangana njiya too ne bikondo kabiyi bijadika.” (Musambu 103:9, NW) Mu mufuanu eu, tatu wakaya lubilu bua kuakidila muanende. Bia muomumue, Yehowa kêna anu mudiakaje, kadi udi ne dijinga dikole dia kufuila benji ba mpekatu badi banyingalala luse. ‘Mmusue kubuikidila bantu mibi yabu,’ ne udi wenza nenku “mu mushindu mualabale.”​—Musambu 86:5; Yeshaya 55:7, NW; Zekâya 1:3.

Mu mufuanu wa Yezu, dinanga dia bushuwa dia tatu diakenzeja bua muana eu kupeta bukole bua kupingana. Kadi elaku meji: Ntshinyi tshivua mua kuikala tshienzeke bu tatu mubenge nsongalume eu anyi mu tshiji tshikole muikale mumuambile bua kadiatshi kabidi kumbelu? Mmuenenu bu eu uvua mua kupamisha kashidi muana eu.​—Fuanyikija ne 2 Kolinto 2:6, 7.

Nenku, mu ngumvuilu kampanda, tatu eu wakalongolola njila bua dipingana dia muanende kubangila anu dîba diakayaye. Imue misangu, lelu’eu bakulu bena nkristo badi ne bua kumbusha mu tshisumbu benji ba mpekatu badi kabayi banyingalala. (1 Kolinto 5:11, 13) Mu dienza nenku, badi mua kubanga kulongolola njila bua dipingana dia muenji wa mpekatu pa kumuleja patoke ne dinanga dionso bidia bidiye mua kuela bua dimupingaja diende dia matuku atshilualua. Divuluka dia dilomba dienza ne muoyo mujima dia nunku ndekelu wa bionso ndisake bantu bavule bavua bajimine mu nyuma ku dinyingalala ne ku dipingana mu nzubu wa Nzambi.​—2 Timote 4:2.

Tatu eu wakaleja kabidi luse pakapingana muanende. Kabiakalomba tshikondo tshile bua yeye kumvua dinyingalala dia nsongalume eu dienza ne muoyo mujima. Nenku, pamutu pa kusuminyina ne dikebulula kanungu konso ka mapanga a muanende, tshivuaye natshi bualu tshivua tshia kumuakidila, ne wakaleja disanka dinene mu dienza nenku. Bena nkristo badi mua kuidikija tshilejilu etshi. Badi ne bua kusanka bua mudi muntu mujimine mumueneke.​—Luka 15:10.

Ngikadilu wa tatu wakaleja patoke muvuaye muindile kuonso aku dipingana dia muanende mutomboke. Bushuwa, dindila adi didi anu mundidimbi wa dijinga dikole didi nadi Yehowa bua aba bonso badi bumbuke mu nzubu wende. “Kêna ujinga bua muntu nansha umue abutuke, kadi udi ujinga bua bonso bafike ku dinyingalala.” (2 Petelo 3:9, NW) Pa nanku tudi mua kujadikila aba badi banyingalala bua mpekatu yabu ne: nebabeneshibue ne ‘bikondo bia kubakankamija bifume ku mêsu kua Mukalenge.’​—Bienzedi 3:19.

[Mêyi adi kuinshi]