Bakenza disua dia Yehowa

Muoyo-mutoke wa Yobo udi ufutshibua

YOBO uvua muena luse, mulumbuluidi wa bakamba, bana ba nshiya ne bakengi. (Yobo 29:12-17; 31:16-21) Pashishe, mu tshimpitshimpi, dikenga dikole diakamukuata, kujimijaye bubanji buende, bana bende ne makanda ende a mubidi. Bia dibungama, muntu eu muende lumu uvua muikale tshipanda tshia kueyemena kudi bantu bavua bakengeshibua wakapeta diambuluisha dikese mu diende dîba dia dikenga. Nansha mukajende wakamuambila bua ‘kudiula Nzambi ne kufua!’ Ne “balunda” bende Elifaza, Biledada ne Sofâ kabakamupetesha busambi. Kadi, bakamba babubika ne: Yobo uvua muenze mpekatu ne pa nanku uvua muakanyine dikenga diende.​—Yobo 2:9; 4:7, 8; 8:5, 6; 11:13-15.

Nansha muvuaye ne dikenga dikole, Yobo wakashala ne lulamatu. Bua bualu ebu, ndekelu wa bionso Yehowa wakamuleja luse ne wakamubenesha. Muyuki wa muvuaye muenze nunku udi ufila kudi basadidi bonso ba Nzambi balami ba muoyo-mutoke dishindika dia se: ndekelu wa bionso buobu pabu nebafutshibue.

Dibingishibua ne disanguluka

Tshia kumpala: Yehowa wakanyoka Elifaza, Biledada ne Sofâ. Wakambila Elifaza, eu uvua mumueneke bu mukulumpe ku bonso ne: ‘Tshiji tshianyi tshidi tshitema kuudi ne kudi balunda bebe babidi. Bualu bua kanuakamba mêyi malelela bua bualu buanyi, bu mudi muntu wanyi Yobo wamba. Nunku nudiangatshile balume ba ngombe muanda-mutekete ne bimpanga muanda-mutekete, nuye nabi kudi muntu wanyi Yobo. Nubifile bu milambu ya kuosha bua bualu buenu; ne muntu wanyi Yobo neanulombele.’ (Yobo 42:7, 8) Ela meji bua tshivua muanda eu umvuija!

Yehowa wakalomba mulambu wa mushinga kudi Elifaza, Biledada ne Sofâ, pamu’apa bua kubaleja bunene bua mpekatu wabu. Bushuwa, nansha buobu bamanye anyi kabayi bamanye, bavua bakule mêyi mabi pa bivua bitangila Nzambi pa kuamba ne: ‘kêna weyemena badi bamukuatshila mudimu’ ne se: bushuwa kabivua ne bualu kudiye bikala Yobo uvua muena lulamatu anyi kavua muena lulamatu. Elifaza wakamba mene se: Yobo kavua ne munga mushinga ku mêsu kua Nzambi anu bu tshibeyibeyi! (Yobo 4:18, 19; 22:2, 3) Kabiena bikemesha muakamba Yehowa ne: ‘Kanuakamba mêyi malelela bua bualu buanyi’!

Kadi ki nkujike to. Elifaza, Biledada ne Sofâ bakenzela kabidi Yobo nkayende mpekatu pa kumuambila ne: yeye nkayende ke uvua mudikebele ntatu. Mabanda abu kaayi nshindamenu ne dipanga kuditeka pa muaba wa bakuabu biakashiya Yobo ne tshiji ne dibungama, kumufikishabi ku didila ne: ‘Musangu bule munyi nenunyingalaje mutshima wanyi, nenuntshibule bitupa bitupa ne mêyi enu?’ (Yobo 10:1; 19:2) Ela meji bimuenekelu bia bundu pa mpala ya balume aba basatu pavuabu mpindieu ne bua kuleja Yobo mulambu bua mpekatu yabu!

Kadi Yobo kavua ne bua kumvua disanka bua dipuekeshibua milongo diabu. Bushuwa, Yehowa wakalomba bua asambidile bamubandi bende. Yobo wakenza anu muvuabu bamulombe, ne bakamubenesha bua muanda eu. Tshia kumpala, Yehowa wakondopa disama diende dikuate buôwa. Pashishe, bana babu ne Yobo ba balume ne ba bakaji ne bavua bamutantshila kale bakalua kumusamba, “muntu yonso wa kudibo kumupesha [“mpalata umue,” NW] ne kakanu ka ku munu ka tshiamu tshia mpawungi.”a Kusakidila apu, Yobo “kupeta mikoko binunu dikumi ne binayi, tumelu binunu bisambombo, ngombe binunu bibidi ne mpunda mikaji tshinunu.”b Ne kakuyi mpata mukaji wa Yobo wakaluja nende malanda. Panyima, bakabenesha Yobo ne bana ba balume muanda-mutekete ne ba bakaji basatu, ne wakashala ne muoyo bua kumona bipungu binayi bia ndelanganyi yende.​—Yobe 42:10-17, MMM.

Malongesha buetu tuetu

Yobo wakashiya tshilejilu tshia pa buatshi bua basadidi ba Nzambi ba mu tshikondo tshietu etshi. Uvua muntu ‘mujalame ne muakane,’ muntu uvua Yehowa ubikila ne disankishibua dionso ne: “musadidi wanyi.” (Yobe 1:8; 42:7, 8, MMM) Kadi ebi kabiena biumvuija ne: Yobo uvua mupuangane. Munga musangu mu mateta ende, wakela meji mu mushindu mubi ne: Nzambi ke uvua mukebeshi wa dikenga diende. Wakatobolola mene mushindu udi Nzambi wenzela bantu malu. (Yobo 27:2; 30:20, 21) Ne wakadibingisha nkayende pamutu pa kubingisha Nzambi. (Yobo 32:2) Kadi Yobo wakabenga bua kuela Mufuki nyima, ne wakitaba dimulongamija dia kudi Nzambi ne budipuekeshi buonso. ‘Ngakamba malu andi tshiyi mujingulule bimpe,’ ke muakitabaye. ‘Ndi mudipishe, ndi nkudimuna mutshima wanyi, ndi nsomba mu lupuishi ne mu butu.’​—Yobo 42:3, 6.

Patudi mu mateta tudi petu mua kuela meji, kuakula anyi kuenza malu mu mushindu udi kauyi muakanyine. (Fuanyikija ne Muambi 7:7.) Nansha nanku, bikala dinanga dietu bua Nzambi diondoke, katuakumutombokela anyi kumufiikila munda bualu mmutulekele tupeta ntatu. Pamutu pa nanku, netulame muoyo-mutoke wetu ne nenku kunowa dibenesha dinene ndekelu wa bionso. Mufundi wa misambu wakamba bua Yehowa ne: “Kudi muntu muena bulamatshi newenze malu mu bulamatshi.”​—Musambu 18:25, NW.

Kumpala kua Yobo kupetululaye makanda a mubidi, Yehowa wakalomba bua kusambidilaye aba bavua bamuenzele bibi. Ntshilejilu kayipu tshilenga buetu tuetu! Yehowa udi ulomba bua tubuikidile aba badi batuenzela mpekatu kumpala kua tuetu kupeta dibuikidila bua yetu mpekatu. (Matayo 6:12; Efeso 4:32) Bituikala katuyi badiakaje bua kubuikidila bakuabu padiku nshindamenu muimpe wa kuenza nanku, bushuwa tudi mua kutekemena bua Yehowa kutufuilaye luse anyi?​—Matayo 18:21-35.

Buonso buetu tutu tupeta mateta ku musangu ne ku mukuabu. (2 Timote 3:12) Kadi, tudi mua kulama muoyo-mutoke bu Yobo. Mu dienza nunku, netupete difutu dinene. Yakobo wakafunda ne: “Monayi! tudi tuamba aba badi batantamane se: mba diakalenga. Nudi bumvue bua ditantamana dia Yobo ne bamone tshipeta tshiakafila Yehowa, bua se: Yehowa udi mûle tente ne dinanga ne luse.”​—Yakobo 5:11, NW.

[Mêyi adi kuinshi]