Dishintulula muaba wa mudimu ne bidimu 80
BU MUDIBI BILONDA KUDI GWENDOLINE MATTHEWS
Pangakakumbaja bidimu 80, meme ne bayanyi tuakapangadija bua kupaya bintu bietu bionso mu mashinyi mafutshila ne kumbuka mu Angleterre batangile ku ditunga dia Espagne. Katuvua tuakula tshiena-Espagne, ne tuvua tuya ku Sud-Ouest kua Espagne, mutantshi mule ne miaba mikumbulakumbula kudi ba musua-luendu badi bakula Anglais. Balunda betu ba bungi bakela meji ne: tuvua babule lungenyi, kadi ne disanka dionso ngakavuluka ne: Abrahama uvua ne bidimu 75 pakumbukaye ku Ure.
ANU muakamuenekabi, bidimu bietu mu Espagne katshia tuafikamu mu Tshisanga 1992 bidi bikale bimue bia ku bidimu bidi bitamba kusankisha mu nsombelu wetu. Kadi bangabanga ne meme kumvuija tshituvua bamuangele, lekelayi nnulondele mudi matuku etu a muoyo mu mudimu wa Yehowa matufikishe ku diangata dipangadika dinene bu edi.
Bulelela bua mu Bible budi bushintulula nsombelu wetu
Mvua mukoleshila mu dîku ditendeledi ku Sud-Ouest kua Londres, mu Angleterre. Mamu uvua ne tshibidilu tshia kuya netu meme ne yayanyi mu miaba mishilangane ya ntendelelu pavuaye wenda ukeba disankishibua dia mu nyuma. Tatu, uvua usama misangu yonso disama dia tshiadi, kavua uya netu. Kadi uvua mubadi wa Bible wa kalanda musenga, ne uvua welamu mishonyi misangu yonso ivuaye upeta mvese uvua umupesha butoke. Tshimue tshia ku bintu bianyi bianyisha bikole tshivua Bible au mutumikatumika nende uvua ne mushinga wa bungi kudiye.
Mu 1925, pamvua ne bidimu 14, bavua bele trakte muinshi mua tshiibi tshietu uvua utubikila ku muyuki wa patoke mu nzubu wa mbulamatadi mu tshijengu tshia West Ham. Mamu ne muena mutumba kampanda bakapangadija bua kuteleja muyuki au, ne meme ne muakunyanyi wa bakaji tuakaya nabu. Muyuki au, “Bantu miliyo mivule badi ne muoyo mpindieu kabakufua nansha,” wakakuna ntete ya bulelela bua mu Bible mu mutshima wa Mamu.
Ngondo mikese pashishe, Tatu wakafua ne bidimu 38. Lufu luende luvua muanda wakatukengesha, bualu luakatushiya ne mitshima misunsuke ne katuyi kantu ku bianza. Mu misa ya tshivulukidi, mienza mu Ekleziya wa Angleterre, biakasama Mamu ku muoyo bua kumvua nsaserdose wamba ne: anyima wa Tatu uvua mu diulu. Uvua mumanyine mu Bible ne: bafue mbalale mu nkita, ne uvua witaba ne dishindika dionso ne: dimue dituku Tatu neabiishibue bua kupetaye muoyo wa kashidi pa buloba. (Musambu 37:9-11, 29; 146:3, 4; Muambi 9:5; Bienzedi 24:15; Buakabuluibua 21:3, 4) Mutuishibue ne: uvua ne bua kudisangisha ne bantu bavua balongesha Dîyi dia Nzambi, wakapangadija bua kumanyangana ne Balongi ba Bible ba pa Buloba bujima, bu muvuabu babikila Bantemu ba Yehowa tshikondo atshi.
Bu mutuvua katuyi ne mfranga ya njila, lumingu luonso tuvua tuenda mêba abidi kumbukila kumbelu batangile mu bisangilu bia Bantemu ba Yehowa. Pashishe, tuvua tuenda mêba makuabu abidi batangile kumbelu. Kadi tuvua tuanyisha bisangilu abi bikole, ne katuvuaku banji kupangila tshisangilu nansha tshimue, nansha pavua mabungi mende lumu mu Londres abuikila tshimenga. Katupa kîpi Mamu wakangata dipangadika dia kulambula muoyo wende kudi Yehowa ne kutambula, ne mu 1927, meme panyi ngakatambula.
Nansha mutuvua ne ntatu ya malu a mpetu, misangu yonso Mamu uvua undongesha mushinga wa malu a mu nyuma adi kumpala kua malu onso. Matayo 6:33 uvua umue wa ku mvese yende ya pa muoyo, ne uvua bushuwa ‘ukeba diambedi bukalenge.’ Pakafuaye kumpala kua dîba disama dia kansere mu 1935, uvua udilongolola bua kuandamuna ku dibikila dia ba-ministre ba ku dîba ne ku dîba bavua mua kuya kusadila mu France.
Bilejilu biakatukolesha
Mu bidimu abi bia ntuadijilu, bamue bantu bavua babuela mu bisangilu mu Londres bavua basue kumanyisha ngenyi yabu nkayabu, ne bantu aba bakajula matandu ne biji bikole. Kadi, misangu yonso Mamu uvua wamba ne: nebikale dipanga bulamatshi bua kulekela bulongolodi bua Yehowa panyima pa bionso bitukavua balongemu. Makumbula menza kudi Joseph F. Rutherford, eu uvua mulombodi wa Société Watch Tower tshikondo atshi, akatusaka bua kutungunuka ne kusadila ne bulamatshi buonso.
Ndi mvuluka Muanetu Rutherford bu muntu muimpe ne wa kukuatshila bualu. Pantshivua nsongakaji, Tshisumbu tshia mu Londres tshiakaya mu diendakana, yeye pende uvuamu. Wakammona—bu nsongakaji muena bundu—ne tshiamu tshia foto e kukonkaye né mvua mua kuanyisha bua kumukuata foto. Foto au wakalua tshivulukidi tshinanga bikole.
Panyima, bualu kampanda bumona buakandeja, dishilangana pankatshi pa aba bavua balombola mu tshisumbu tshia bena nkristo ne bantu bende lumu ba mu bulongolodi ebu. Mvua ngenza mudimu bu mufidi wa biakudia ku mesa mu nzubu munene wa mu Londres, muvuabu babikile Franz von Papen, umue wa ku batumibue ba Hitler, bua didia dia mundamunya. Wakabenga bua kumbusha muele wende wa mvita uvua ku mikaba yende pavuaye udia, ne ngakadikumaku e kupumuna nsupu umvua muambule. Ne tshiji tshionso wakamba ne: mu ditunga dia Allemagne ditanaji bu edi divua mua kufikisha ku dingasa tshingoma. Tshivua nsemena kabidi pabuipi nende mu didia divua dishale!
Mpungilu kampanda wa mushinga mukole, mumvua mumvue Muanetu Rutherford wakula, uvua muenzekele mu Alexandra Palace mu 1931. Muine amu tuakangata ne musangelu wonso dîna dietu dipiadipia dia Bantemu ba Yehowa. (Yeshaya 43:10, 12) Bidimu bibidi pashishe, mu 1933, ngakabuela mu mudimu wa bumpanda-njila, bu mudibu babikila mudimu wa ku dîba ne ku dîba. Dibenesha dikuabu dindi mvuluka dia mu bidimu abi divua dia kudisangisha ne bansongalume bimpe bakalua pashishe ba-misionere mu bitupa bia buloba bia kulekule. Munkatshi muabu muvua Claude Goodman, Harold King, John Cooke ne Edwin Skinner. Bilejilu ebi bia lulamatu biakampesha dijinga dia kusadila mu budimi bua ku ba bende.
Dienza bumpanda-njila ku East Anglia
Muaba wanyi wa dienzela bumpanda-njila uvua ku East Anglia (Angleterre wa ku Est), ne bua kuyishaku bivua bilomba musangelu ne lukunukunu. Bua kukumbula kumana teritware wetu mualabale, tuvua tuenza ngendu ne dikalu ku tshimenga ne ku tshimenga ne ku musoko ne ku musoko ne tuvua tufutshila nzubu. Mu tshitupa atshi kamuvua tshisumbu nansha tshimue, nenku tuetu nkayetu, meme ne muenzejanganyi nanyi wa mudimu tuvua tuyukila pamue pa bitupa bionso bia mu bisangilu bia pa tshibidilu bia ku lumingu. Mu mudimu wetu, tuakafila nkama ne nkama ya mikanda ne tukanda tukese bivua biumvuija malongolola a Nzambi.
Dikumbula dimue dikena kupua muoyo ndituakenza ku nzubu wa badiambike kutuvua bayukile ne nsaserdose mfumu wa Ekleziya wa Angleterre. Mu bitupa bia bungi, tuvua tuindija bua kukumbula nsaserdose muena Anglikane too ne ku dikumbula dia ndekelu bualu misangu mivule uvua utukebela ntatu pavuaye umvua ne: tuvua tuyisha lumu luimpe mu tshitupa atshi. Kadi mu eu musoko muntu yonso uvua ukosela nsaserdose eu katshi. Uvua ukumbula babedi, usombesha bavua banange dibala mikanda, ne uvua mene ukumbula bena parwase wende kumbelu bua kubumvuija Bible.
Bushuwa, patuvua bamukumbule, uvua muena bulunda menemene, ne wakitaba ndambu wa mikanda. Wakatushindikila kabidi ne: bikala muntu wa mu musoko au musue kupeta imue ya ku mikanda yetu kadi kayi ne mushindu, yeye uvua mua kumusumbila. Tuakumvua ne: malu makuate buôwa avuaye mumone mu Mvita ya Kumpala ya Buloba bujima avua mamupeshe dipangadika dia kulubuluja ditalala ne muoyo muimpe mu parwase wende. Kumpala kua tuetu kumbuka wakatupesha dibenesha diende ne wakatukankamija bua kutungunuka ne mudimu wetu muimpe. Mêyi ende a ditulaya nawu avua a mu Nomba 6:24: “Mukalenge anubeneshe ne anulame.”—King James Version.
Mamu wakafua bidimu bibidi panyima pa meme mumane kubanga bumpanda-njila, ne ngakalukila mu Londres tshiyi mfranga ne tshiyi dîku. Ntemu kampanda musuibue wa mu Écosse wakangangata kuende, wakangambuluisha mua kupita ne lufu lua Mamu, ne wakankankamija bua kutungunuka mu mudimu wa ku dîba ne ku dîba. Nenku ngakapingana ku East Anglia ne Julia Fairfax, mpanda-njila mupiamupia muenzejanganyi nanyi wa mudimu. Tuakalongolola tshisasa tshia kale tshiela ntenta (dikadika) bua kuikalatshi bu nzubu wa dienda nende; tuvua tutumika ne katumba anyi mashinyi bua kukoka dikadika edi ku muaba umue ne ku mukuabu. Pamue ne bena dibaka bakulakaje, Albert ne Ethel Abbott, bavua pabu ne kasasa kakese, tuakatungunuka ne kuyisha. Albert ne Ethel bakalua bu baledi kundi.
Patuvua tuenza bumpanda-njila mu Cambridge, ngakapetangana ne John Matthews, muanetu wa balume muimpe ne muena nkristo ukavua muleje muoyo-mutoke wende kudi Yehowa mu nsombelu mikole. Tuakaselangana mu 1940, katupa kakese panyima pa dituadija dia mvita mibidi ya buloba bujima.
Tshikondo tshia mvita ne dîku
Patutshivua tufuma ku diselangana, nzubu wetu uvua kasasa katambe bukese ka bunene bua ka-tshikuku kakese, ne tuvua tunyunguluka mu mudimu wetu pa katukutuku ka kutekela muoyo. Tshidimu tshimue panyima pa tuetu bamane kuselangana, bakakosela John tshibawu tshia kutumika bu muena mudimu ku ferme pakabengaye bua kuenza mudimu wa busalayi bua mitabuja ende mashila pa Bible. (Yeshaya 2:4) Nansha muvua muanda eu umvuija ndekelu wa bumpanda-njila buetu, tshibawu tshia John tshiakamueneka bu dikasa dimpe bualu mvua ne difu ne uvua mua kuikala ne mushindu wa kutukuatshisha ne mfranga.
Mu bidimu bia mvita, tuakanyisha bisangilu bia pa buabi bivua bienzeke nansha muvuaku ntatu. Mu 1941 katukutuku ketu kakatuambula meme, muikale ne difu, ne John ne muanetu wa kumpala, batangile mu tshimenga tshia Manchester, mutantshi wa kilometre 300. Mu njila, tuakapita bimenga bivule bisunsula kudi bombe, ne tuvua tudiebeja bikala tshisangilu mua kuenzeka mu nsombelu ya mushindu’au. Tshiakenzeka. Nzubu udibu babikila ne: Free Trade Hall munkatshinkatshi mua Manchester uvua mûle tente ne Bantemu ba Yehowa ba mu bitupa bivule bia Angleterre, ne bakenza bionso bivua mu ndongamu.
Mu nkomenu wa muyuki wende, ngamba-malu wa ndekelu mu mpungilu au wakambila bateleji ne: bavua ne bua kumbuka diakamue mu nzubu au, bualu ndeke ivua pabuipi ne kuela bombe. Bavua bafile didimuija edi pa dîba diakanyine. Katuyi banji kushiya nzubu au mutantshi mule tuakumvua mpungi ne bingoma biashi bia ndeke. Tutangila panyima, e kumona muvua ndeke mivule imatshisha bombe munkatshi mua tshimenga. Pa bule tuakamona nzubu mutuvua basombe mutantshi kawanji kulepa ukadi munkatshi mua midilu ne mîshi; uvua mubutuke yonso nkong! Diakalenga, kabavua bashipe muntu nansha umue wa ku bana betu balume ne bakaji bena nkristo.
Patuvua tukolesha bana betu, katuvua ne mushindu wa kuenza bumpanda-njila, kadi tuakateka nzubu wetu bua batangidi bena ngendu ne bampanda-njila bavua kabayi ne miaba ya kusombela. Munga musangu, bampanda-njila basambombo bakashala mu nzubu muetu munkatshi mua ngondo mikese. Bushuwa bulunda ne bantu ba mushindu’eu ke tshintu tshimue tshiakenza bua muanetu wa bakaji Eunice kusungulaye bua kutuadija bumpanda-njila mu 1961 mutshikale ne bidimu 15 patupu. Bia dibungama bua kuamba, pakakola muanetu wa balume, David, kakatungunuka ne kusadila Yehowa, ne muanetu mukuabu wa bakaji, Linda, wakafua mu nsombelu mubi mu mvita.
Dipangadika dietu dia kuya ku Espagne
Tshilejilu ne dikankamija bia Mamu bivua binjule dijinga dia kuikala misionere, ne tshivuaku mupue tshipatshila atshi muoyo. Nenku, mu 1973 tuvua ne disanka pakumbuka Eunice mu Angleterre mutangile ku Espagne muaba uvua dikengela dinene dia bamanyishi ba Bukalenge. Bushuwa, tuvua ne dibungama bua kumumona umbuka, kadi tuvua kabidi tutunka bua muvuaye musue kusadila mu ditunga dia ku ba bende.
Tuvua tukumbula Eunice munkatshi mua bidimu bivule, ne tuakafika ku dimanya Espagne bimpe. Bushuwa, tuakamukumbula meme ne John mu miaba yende ya mudimu mishilangane inayi. Pashishe, bu muvua bidimu bienda bipita, bukole buetu buakatuadija kukepela. John uvua mudiele tshibula tshiakatatshisha bikole mubidi wende, ne meme panyi mvua muyobesha kudi disama dia mioyo ne dia bia pa muminu. Kusakidila apu, bubidi buetu tuvua ne binyoka. Nansha mutuvua bushuwa tukengela diambuluisha dia Eunice, katuvua basue bua umbuke mu muaba wende wa mudimu bua bualu buetu.
Tuakayukila ne Eunice pa masungula etu, ne tuakasambila bua kupeta buludiki. Uvua mudiakaje bua kulua kutukuatshisha kumbelu, kadi tuakapangadija ne: dijandula ditambe buimpe divua dia se: meme ne John tuye kusomba nende mu Espagne. Bu mumvua meme muine tshiyi mua kuikala misionere, mvua nansha mua kukuatshisha muananyi wa bakaji ne balunda bende babidi bampanda-njila mu mudimu wa ku dîba ne ku dîba. Pa nanku, meme ne John tuvua tuangata Nuria ne Ana, bampanda-njila babidi benzejanganyi ba mudimu ne Eunice ba bidimu bu 15, bu bana betu ba bakaji balela. Ne bavua ne disanka bua kusomba netu muaba wonso uvuabu mua kubatuma.
Katshia tuangata dipangadika adi kukadi kupite bidimu bisambombo. Makanda etu a mubidi ki mmanyanguke kabidi, ne bushuwa nsombelu wetu mmulue kuikala usankisha bikole. Ndi ngakula tshiena-Espagne kakese, kadi kabiena bimpangisha bua kuyisha. Meme ne John tudi basombe bimpe mu tshisumbu tshietu tshikese tshia mu Extremadura mu Espagne wa ku Sud.
Disombela mu Espagne ndindongeshe bia bungi pa ngikadilu wa mudimu wetu wa diyisha Bukalenge pa buloba bujima, ne mpindieu ndi njingulula bimpe menemene mushindu udi, anu muakamba Yezu Kristo, ‘budimi buikale bantu ba pa buloba.’—Matayo 13:38.
[Bimfuanyi mu dibeji 28]
Dienza bumpanda-njila mu bidimu bia 1930