Tumika bimpe menemene ne muoyo webe

TATU uvua mu nzubu, pa bulalu, ufua disama dia kansere. Muanende wa balume uvua mu ditanda, ulongolola bia-mudimu bivua tatuende wenza nabi mabaya. Pavuaye ulongolola bia-mudimu ebi, wakela meji bua bintu bilenga bivua tatuende muenze ku diambuluisha diabi. Nansha muvua ditanda dikale kumpenga kua nzubu, uvua mumanye se: tatuende kavua mua kubuelamu kabidi, kavua mua kukuata kabidi bia-mudimu ebi bivuaye mumanye bua kutumika nabi bimpe. Tshikondo atshi tshikavua tshimane kupita.

Muana eu wakela meji bua mufundu udi mu Muambi 9:10 wa ne: “Malu onso audi wenza wenze ne bukole buebe buonso; bualu bua kakuena mudimu, kakuena kulongolola kua malu, kakuena lungenyi anyi meji ku Muaba wa Bafue [lukita] kûdi uya.” Uvua mumanye mufundu au bimpe. Uvua mutumike nawu misangu ya bungi pavuaye ulongesha bantu bakuabu bulelela bua mu Bible bua se: lufu ndipanga mua kuenza bualu nansha bumue. Mpindieu bukole bua mêyi a Solomo buakalenga mutshima wende​—tudi ne bua kuikala ne nsombelu wa tshishiki ne kusanka mu matuku etu a muoyo patutshidi ne mushindu, bualu tshikondo netshilue tshituikala katuyi kabidi mua kuenza nenku.

Sanka mu matuku ebe a muoyo

Mu mukanda wa Muambi, Solomo Mukalenge wa meji udi ubela babadi bua bapete disankishibua mu matuku abu a muoyo. Tshilejilu nshapita 3 udi wamba ne: ‘Ndi mumanye ne: kakuena bualu buimpe bu kusanka ne kuenza malu mimpe matuku onso patshidi muntu ne muoyo. Muntu yonso adie biende, anue biende, asanke biende mu midimu yende yonso, bua eku nkupa kua Nzambi.’​—Muambi 3:12, 13.

Nzambi uvua mupudije Solomo bua ambulule lungenyi elu: ‘Monayi, bualu bundi mmona buimpe ne bukumbanyine muntu: adie biende, anue biende ne asanke mu midimu yende yonso idiye wenza muinshi mua dîba, matuku onso a muoyo wende adi Nzambi mumupe; edi ndifutu diende.’​—Muambi 5:18.

Udi ubela bansonga mu mushindu wa muomumue ne: ‘Wewe nsongalume, usanke mu bunsongalume buebe, mutshima webe ukusankishe mu matuku a bunsongalume [anyi bunsongakaji] buebe; wende mu njila yonso idi mutshima webe musue ne idi mimpe ku mêsu kuebe.’ (Muambi 11:9a) Mmunyipu mudibi bilenga bua kusanka tshishiki ne bukole ne makanda bia mu bunsonga!​—Nsumuinu 20:29.

“Uvuluke Mufuki webe”

Bushuwa, Solomo kêna usua kumvuija ne: mbia meji bua kuipatshila bintu bionso bidi mua kusankisha mutshima anyi mêsu etu. (Fuanyikija ne 1 Yone 2:16.) Bualu ebu mbutoke mu bidiye ufunda pashishe: ‘Kadi umanye biebe ne: Nzambi neakulumbuluishe bua malu au [bipatshila bidi mua kusankisha nkuka yebe] onso.’ (Muambi 11:9b) Nansha tuetu ne bidimu bungi munyi, tudi ne bua kuvuluka ne: Nzambi mmumone bitudi tuenza ne matuku etu a muoyo ne kabidi neatulumbuluishe bilondeshile malu au.

Mmunyipu mudibi dipanga lungenyi bua kuela meji ne: tudi mua kuikala ne nsombelu wa budinangi ne kuindija bulamate kudi Nzambi too ne mu bidimu bietu bia ndekelu! Muoyo wetu udi mua kushikila dîba kayi dionso. Nansha kauyi mushikile, kabitu bipepele bua kusadila Nzambi ku bukulakaje to. Muitabe bualu ebu, Solomo udi ufunda ne: “Nenku, uvuluke Mufuki webe Munene mu matuku a bunsongalume buebe, kumpala kua matuku a makenga kutuadijawu kulua, peshi bidimu kufikabi pawamba ne: ‘Tshiena nabi milowo.’”​—Muambi 12:1, NW.

Bukulakaje budi ne yabu ntatu. Mu mêyi a mu tshimfuanyi Solomo udi umvuija pashishe bipeta bia bukulakaje. Bianza ne maboko bidi bizakala, mikolo iteketa ne mênu akepela. Nsuki itoka ne ituka. Tulu tudi tutamba kulua tua lutatu mu mushindu wa se: muadi wa nyunyi udi utabuluja muntu ku tulu. Bitupa bia biumvuilu​—dimona, diumvua, dilenga, dinunkila ne dilabula—​bionso bidi bijimija bukole ku kakese ku kakese. Diteketa dia mubidi didi difila buôwa bua didishinda ne “malu a buôwa” makuabu adi mu njila minene. Ndekelu wa bionso muntu udi ufua.​—Muambi 12:2-7, NW.

Bukulakaje ntshikondo tshia makenga nangananga bua aba badi bapangile bua ‘kuvuluka Mufuki wabu’ mu bunsonga buabu. Bua ditumika bibi ne matuku ende a muoyo, muntu wa nunku ‘kêna ne milowo’ mu bidimu biende bia ndekelu to. Nsombelu udi kayi wa ditshina Nzambi udi kabidi mua kukolesha ntatu ne makenga bia ku bukulakaje. (Nsumuinu 5:3-11) Bia dibungama, padi bantu aba batangila kumpala, kabena bamona tshintu tshikuabu, kadi badi bamona anu lukita.

Tusanke ku bukulakaje

Ebi kabiena bisua kumvuija ne: bakulakaje kabena mua kusanka bua dikala ne muoyo. Mu Bible, ‘dilepa dia matuku ne bidimu bia muoyo’ mbisuikakaja kabidi ne dibenesha dia Nzambi. (Nsumuinu 3:1, 2) Yehowa wakambila mulunda wende Abrahama ne: “Kadi wewe . . . neujikibue muntu mununu.” (Genese 15:15) Nansha muvuaye ne matekete a ku bukulakaje, Abrahama wakapeta ditalala ne bupole mu bidimu biende bia ndekelu, usanka pavuaye uvuluka matuku a muoyo mapitshisha mu disadila Yehowa. Uvua kabidi mutekemene ne ditabuja dionso “musoko udi ne bishimikidi” bilelela, Bukalenge bua Nzambi. (Ebelu 11:10) Nenku, wakafua ‘mununu, bidimu biende bikumbane bia bungi.’​—Genese 25:8.

Pa nanku Solomo wakabela ne: “Biashala muntu ne muoyo bidimu bia bungi, asankilemu.” (Muambi 11:8) Nansha bituikala bansonga anyi bakulakaje, disanka dilelela ndisuikila ku malanda etu ne Nzambi.

Pavua nsongalume uvua mu ditanda ulongolola bintu bia ndekelu bia ku bia-mudimu bia tatuende, wakela meji bua malu aa. Wakela meji bua bantu bonso bavuaye mumanye bavua batumika bimpe menemene ne muoyo wabu kadi bakapangila mua kupeta disanka bualu kabavua mu malanda ne Mufuki wabu nansha. Mmunyipu muakamuenekabi biakanyine se: yeye mumane kufila dikankamika bua muntu kusanka mu matuku ende a muoyo, Solomo wakakoma malu ne mêyi aa: “Nkomenu wa bualu, bionso bimana kumvua, udi se: Utshine Nzambi mulelela ne ulame mêyi-matuma ende. Bualu etshi ke tshionso tshidi muntu ne bua kuenza”!​—Muambi 12:13, NW.