Tudi mua kupetulula dieyemena!

NANSHA mudi dipangika dia dieyemena didiku lelu dikale tshimanyinu tshia ‘matuku a ku nshikidilu,’ diakamueneka kabidi kukadi binunu bia bidimu. (2 Timote 3:1) Diakajukila diambedi mu muaba utudi katuyi mua kuelela meji​—mu mparadizu. Bible udi wamba bua muaba eu ne: ‘Nzambi wakakuna bintu mu budimi ku esete, mu Edene; wakatekamu mulume wakafukaye. Yehowa Nzambi wakamenesha mitshi yonso idi mimpe ku mêsu ne idi mimpe bua kudia mu buloba; mutshi wa muoyo kabidi wakadi munkatshi mua budimi, ne mutshi wa lungenyi lua kujingulula malu mimpe ne malu mabi.’​—Genese 2:8, 9.

Mvese idi ilonda idi yumvuija mudi muanda eu muikale utangila dipangika dia dieyemena didiku lelu’eu. Tudi tubala ne: ‘Yehowa Nzambi wakamuelela mukenji ne: Udi mua kudia mamuma a mitshi yonso ya mu budimi, bu muudi musue; kadi mamuma a mutshi wa lungenyi lua kujingulula malu mimpe ne malu mabi kuadi nansha; bualu bua mu dituku diudi wadia wewe neufue bulelela.’ (Genese 2:16, 17) Adama uvua ne kabingila bua kuela mpata bua tshivua Yehowa muambe anyi?

Tudi tutungunuka ne kubala ne: ‘Nyoka wakatamba nyama yonso yakafuka Yehowa Nzambi budimu. Nyoka wakakonka mukaji ne: Nzambi wakamba ne: Kanudi mamuma a mitshi yonso idi mu budimi anyi? Mukaji wakambila nyoka ne: Tudi mua kudia mamuma a mitshi yonso idi mu budimi; kadi mamuma a mutshi udi munkatshi mua budimi, Nzambi wakamba ne: Kanuadi, kanualengi, bua kanufu. Nyoka wakambila mukaji ne: Kanuena nufua bulelela; bualu bua Nzambi udi mumanye ne: Panuadia mamuma au, mêsu enu neabuluke, nenuikale bu Nzambi, nenumanye malu mimpe ne malu mabi. Pakamona mukaji ne: Mutshi au udi muimpe wa kudia ne udi muimpe ku mêsu ne udi mua kupa muntu lungenyi, yeye wakangata dimuma, wakadia, wakapesha mulume wende kabidi, ne yeye wakadia.’​—Genese 3:1-6.

Mu dilengulula didimuija ditoke dia Nzambi, Adama ne Eva bakaleja dipanga dieyemena kudi Yehowa. Bakalonda dikasa dia Satana muluishi wa Nzambi, uvua muakule ne Eva ku diambuluisha dia nyoka muena dîna. Satana wakapanga dieyemena mu nkokeshilu wa Yehowa. Bua muanda eu ne bua mutshima wa lutambishi ne diambu, wakatombokela Nzambi ne kufikishaye bantu mu dienza bia muomumue. Wakabasaka ku diela meji ne: Nzambi kavua muntu wa kueyemena to.

Tshipeta tshivua malanda a makeyikeyi

Ukadi mua kuikala mumone se: bantu batu kabayi beyemena bakuabu batu ne lutatu bua kulama malunda. Publilius Syrus, mufundi wa muakulu wa Latin wa mu siekele wa kumpala K.B.B., wakafunda ne: “Dieyemena ke tshisuikidi tshimuepele tshia bulunda.” Ku tshienzedi tshiabu tshia buntomboji, Adama ne Eva bakaleja ne: kabavua beyemene Nzambi nansha. Pa nanku, Nzambi kavua bushuwa ne kabingila bua kubeyemena pabu nansha. Bu tshipeta tshia dinyanguka dia dieyemenangana, bantu ba kumpala bakajimija bulunda budia ne Nzambi. Kakuena tshidi tshileja ne: Yehowa uvuaku muakule kabidi nabu panyima pa mumane kubapisha bua buntomboji buabu.

Malanda pankatshi pa Adama ne Eva akapeta kabidi lutatu. Yehowa wakamanyisha Eva ne: ‘Nentambe kuvudija didinyenga diebe ne kuimitshishibua kuebe, neulele bana ne didinyenga; mutshima webe newikale kudi mulume webe; yeye neikale ne bukokeshi ku mutu kuebe.’ (Genese 3:16, disendamija miaku ndietu.) Bible de Jérusalem udi wamba ne: “Yeye neakukokeshe.” Pamutu pa kuleja bukokeshi bua dinanga ku mutu kua mukajende bu muvua Nzambi musue, mpindieu Adama wakalua mfumuende, umukokesha.

Panyima pa bamane kuenza mpekatu, Adama wakakeba bua kutumpila mukajende tshilumbu. Buende yeye, bualu buvua mukaji muenze ke buvua bubipatshishe mu budimi bupuangane ne bubatumishe mu buloba kabuyi bulongolola bimpe, bafundila lutatu mu nsombelu kayiyi mipuangane kumpala kua kupinganabu ku lupuishi. (Genese 3:17-19) Tudi mua kuela meji bimpe ne: bualu ebu buvua tshikebeshi tshia dibenga kumvuangana pankatshi pa bantu aba babidi. Adama uvua mua kuikala munekeshe, wamba ne: kavua mua kuteleja kabidi Eva nansha kakese. Pamu’apa uvua mumvue bu udi mubinge mu dimuambila ne: ‘Kubangila ku lelu meme ke mfumu.’ Eva ku luende luseke, uvua mua kuikala mumone se: Adama uvua mupangile bua kukumbaja mudimu wende bu mfumu wa dîku, mumufikishe ku dijimija dieyemena kudiye. Mu mishindu yonso, mu dipanga kueyemena Nzambi, bantu bakajimija bulunda buabu ne Nzambi ne bakanyanga malanda munkatshi muabu.

Nnganyi utudi mua kueyemena?

Anu mudi tshilejilu tshia Adama ne Eva tshileja, katuena mua kueyemena muntu yonso tshianana nansha. Mmunyi mutudi mua kumanya muntu udi muakanyine ne udi kayi muakanyine dieyemena dietu?

Musambu 146:3 udi utubela ne: ‘Kanueyemenyi baminyampala, anyi muana wa muntu, unudi kanuyi mua kusangana dikuatshisha kudiye.’ Ne mu Yelemiya 17:5-7 tudi tubala ne: ‘Mulawu udi ukuata muntu udi weyemena bantu, udi uvuija bantu bu diboko diende dia bukole, ne udi umusha mutshima wende kudi Yehowa.’ Ku lukuabu luseke, ‘muntu udi weyemena Yehowa ne udi ubala Yehowa nkayende bu [“dieyemena,” NW] diende, udi ne disanka.’

Bushuwa, kueyemena bantu kakutu anu kubi misangu yonso to. Mvese eyi idi ileja patupu ne: kakuena tshintu tshidi ne bua kupingana pa muaba wa dieyemena Nzambi, kadi kueyemena bantu bapange bupuangane kutu imue misangu mua kufikisha ku dikenga. Tshilejilu, aba badi beyemena bantu bua kukumbajabu malu adi anu Nzambi nkayende mua kukumbaja​—bu mudi kufila lupandu ne ditalala ne bukubi bivule—​badi ne bua kuedibua mâyi ku makasa.​—Musambu 46:9; 1 Tesalonike 5:3.

Bushuwa, bantu ne ndongoluelu yabu mbakanyine dieyemena anu padibu benza malu mumvuangane ne malongolola a Nzambi ne mêyi-maludiki a Nzambi. Nenku, bituikala ne bua kusaka bakuabu ku ditueyemena, tudi ne bua kuamba bulelela, kuikala ne bululame ne kuikala ba kueyemena. (Nsumuinu 12:19; Efeso 4:25; Ebelu 13:18) Anu mu dikala ne nsombelu mumvuangane ne mêyi-maludiki a mu Bible ke pikala dieyemena didi nadi bakuabu kutudi mua kuikala ne kabingila ne kumuenekadi bu mpokolo wa dikoleshangana ne dikankamijangana.

Tupetulule dieyemena

Bantemu ba Yehowa badi ne nshindamenu mukole bua kueyemena Nzambi ne kukankamija bakuabu bua benze bia muomumue. Yehowa mmuena lulamatu ne bulamatshi, utudi mua kueyemena misangu yonso bua se: neenze tshidiye muambe, bualu ‘Nzambi katu mumanye mua kushima.’ Dieyemena Nzambi wa dinanga kadiakufikisha ku diedibua mâyi ku makasa nansha.​—Ebelu 6:18; Musambu 94:14; Yeshaya 46:9-11; 1 Yone 4:8.

Bantu badi bikale mu buobumue mu dieyemena Yehowa ne badi bikale ne nsombelu mumvuangane ne mêyi-maludiki ende badi batamba kusakibua bua kueyemenangana. Mu bulongolodi mudi kamuyi dieyemena, ndisanka kayipu bua kupeta bantu ba kueyemena! Ela meji muvua bulongolodi ebu mua kuikala bushilangane bu tuetu bikale tueyemena tshishiki bualu budi muntu yonso wamba anyi wenza! Bualu ebu nebuenzeke mu bulongolodi bupiabupia butshilualua budi Nzambi mulaye. Kakuakuikala kabidi dipangika dia dieyemena!

Udi musue bua kuikala ne muoyo tshikondo atshi anyi? Biwikala musue, Bantemu ba Yehowa badi bakubikila bua ukoleshe dieyemena diebe kudi Nzambi ne mu malaya ende pa kulonga bivule pa malu-malomba ende bua kupeta muoyo. Dilonga dia Bible didi difila tshijadiki tshia se: Nzambi udiku, ne se: udi uditatshisha bua diakalenga dia bukua-bantu, kabidi se: mu katupa kîpi emu neaditue mu dilongolola malu a pa buloba ku diambuluisha dia Bukalenge buende. Bantu miliyo mivule mbalonge mua kueyemena Nzambi ne Bible Dîyi diende. Ne disanka dionso, Bantemu ba Yehowa nebakuleje mushindu utubu benza dilonga dia Bible dia patoke kakuyi dilomba mfranga. Peshi fundila bapatudi ba tshibejibeji etshi bua kupeta mamanyisha a pa mutu.

[Lungenyi lunene lua mu dibeji 5]

Dipanga kueyemena Nzambi didi difikisha ku dinyanguka dia malanda a bantu

[Lungenyi lunene lua mu dibeji 6]

Bantu mbakanyine dieyemena anu padibu benza malu mumvuangane ne mêyi-maludiki a Nzambi