Bakenza disua dia Yehowa

Paulo udi ufila bumanyishi ne dikima kumpala kua banene

DISHILANGANA pankatshi pa bantu aba babidi divua ditambe kumueneka. Umue uvua muvuale tshifulu tshia bumfumu eku mukuabu muvuale nkanu. Umue uvua mukalenge; mukuabu uvua muena buloko. Mumane kuenza bidimu bibidi mu lukanu, mupostolo Paulo wakimana mpindieu kumpala kua Herode Agripa II mukokeshi wa bena Yuda. Mukalenge ne mukajende Berenise, bavua balue ‘ne kudileja kunene, bakabuela mu muaba wa kumvua bilumbu, ne tumanda ne bantu banene ba musoko.’ (Bienzedi 25:23) Mukanda kampanda udi wamba ne: “Imue misangu kuvua nkama ne nkama ya bantu muaba au.”

Festo, ngovena uvuabu bafuma ku diteka, uvua mulongolole tshisangilu etshi. Felikse, ngovena uvua mushiye nkuasa, uvua usanka bua kulekela Paulo ukenga mu buloko. Kadi Festo wakela mabanda matumpila Paulo mpata. Ee, Paulo uvua musuminyine bikole bua kuleja muvuaye kayi ne bualu mu mushindu wa se: uvua mulombe bua kuya ne tshilumbu tshiende kudi Kezare! Tshilumbu tshia Paulo tshiakakoka ntema ya Mukalenge Agripa. Wakamba ne: ‘Meme kabidi nakadi musue kumvua dîyi dia muntu au.’ Ne lukasa luonso Festo wakenza malongolola, pamu’apa udiebeja meji avua mukalenge mua kuela bua muena buloko eu wa pa buende.​—Bienzedi 24:27–25:22.

Dituku diakalonda, Paulo wakadimona muimane kumpala kua tshisumbu tshinene tshia banene. Wakambila Agripa ne: “Ndi ne disanka bua kudilumbuluila lelu kumpala kuebe pa bionso bidibo bangamba kudi bena Yuda, bualu wewe udi mumanye bibidilu bionso bia bena Yuda ne malu adibo belangana mpata. Nanku ndi nkulomba bua unteleje ne lutulu.”​—Malu Menza 26:2, 3, MMM.

Paulo udi udilumbuluila ne dikima

Tshia kumpala, Paulo wakambila Agripa bua nsombelu wende wa kale bu mukengeshi wa bena nkristo. Wakamba ne: ‘Ngakakeba bua bapenda Nzambi; ngakabakengesha too ne ku misoko ya bisamba bikuabu.’ Paulo wakatungunuka ne kulonda mushindu uvuaye mupete tshikena-kumona tshia dikema, muakamonaye Yezu mubiishibue umuebeja ne: ‘Udi unkengeshila meme tshinyi? Wewe udi udikengesha pautshidi usuba mikolo ku mutshi musonga.’a​—Bienzedi 26:4-14.

Pashishe Yezu wakapesha Shaula mudimu wa kumanyisha bantu ba bisamba bionso ‘malu akamonaye ne malu akamuenekela kudiye.’ Paulo wakalonda ne: wakadienzeja ne tshisumi bua kukumbaja mudimu uvuabu bamupeshe. Wakambila kabidi Agripa ne: ‘Bua bualu ebu mbuakankuatshila bena Yuda mu ntempelo, bakeba kunshipa.’ Ukeba bua kulenga muoyo wa Agripa bu muvuaye musue kumanya bivule pa Buena-Yuda, Paulo wakazangika ne: bushuwa bumanyishi buende kabuvua bua ‘kuamba manga malu, anu akambabu kudi baprofete ne kudi Mose ne alualua’ pa bidi bitangila lufu ne dibiishibua dia Masiya.​—Bienzedi 26:15-23.

Festo wakamukosa ku dîyi. Kutuayi tshikemu ne: ‘Lungenyi luebe lua bungi ludi lukupadisha!’ Paulo kuandamunaye ne: ‘Mukalenge Festo, tshiena mupale, kadi ndi ngamba mêyi a bushuwa ne a meji.’ Pashishe Paulo kuambaye bua Agripa ne: ‘Mukalenge Agripa udi mumanye bua malu aa; ndi mmuambilawu ne dikima; bualu bua ndi ngitabuja ne: Kakuena bualu [nansha] bumue bua mu malu aa budi bumusokome, bua bualu ebu kabuakenjibua mu ditumba dia nzubu.’​—Bienzedi 26:24-26.

Pashishe Paulo kuambilaye Agripa buludiludi ne: ‘Mfumu Agripa, wewe udi witabuja mêyi akadi [“baprofete,” NW] bambe anyi?’ Kakuyi mpata lukonko elu luvua lutatshishe Agripa. Tuamba eku tuela eku, kavua musue kujimija lumu luvua bantu bamuambike, ne kuitaba mêyi a Paulo kuvua mua kuikala dilamata ku tshivua Festo ubikila ne: ‘dipala.’ Pamu’apa mujingulule dielakana dia Agripa, Paulo wakadiandamuina lukonko luende. Kuambaye ne: ‘Ndi mumanye ne: wewe udi uitabuja!’ Mpindieu Agripa kuakulaye, kadi kavua mutokeshe mêyi ende nansha. Kuambilaye Paulo ne: ‘Wewe udi wamba kungitabujija bua meme kulua muena nkristo mu tshitupa tshîpi!’​—Malu Akenza Milopo 26:27, 28, MML, disendamija miaku ndietu.

Ne nzanzu yonso Paulo wakatumika ne mêyi a Agripa a diepela nawu lukonko bua kuleja bualu kampanda bua bukole. Wakamba ne: ‘[“Nansha ku tototo anyi ku ndandanda,” NW], ndi ndomba [“Nzambi,” NW] se: kabikadi anu bua wewe nkayebe to, kadi mbua nuenu bonso badi bateleja mêyi anyi lelu kabidi, nulue bu mundi emu, pa kumusha nkanu eyi!’​—Malu Akenza Milopo 26:29, MML.

Agripa ne Festo kabakamona bualu nansha bumue kudi Paulo buvua bulomba bua kumushipa anyi kumuela mu buloko. Nansha nanku, kabavua mua kubenga dilomba diende bua kuya ne tshilumbu etshi kudi Kezare. Ke bua tshinyi Agripa wakambila Festo ne: “Tuvua mua kulekela muntu ewu bu yeye kayi mulombe bua kuya ne tshilumbu kudi Kezare.”​—Malu Menza 26:30-32, MMM.

Dilongesha buetu tuetu

Ngenzelu wa Paulo wa kufila bumanyishi kumpala kua banene udi utupesha tshilejilu tshia pa buatshi. Mu diakula ne Mukalenge Agripa, Paulo wakatumika ne budimu. Kakuyi mpata uvua mumanye bualu bua bundu buenza kudi Agripa ne Berenise. Dibaka diabu divua dia tshibindi, bualu Berenise uvua bushuwa muanabu ne Agripa. Kadi musangu eu Paulo kakasungula bua kuakula pa nsombelu wa tshitembu to. Pamutu pa nanku, wakazangika malu avuaye yeye ne Agripa banyishe. Kusakidila apu, nansha muvua Paulo mulongesha kudi Gamaliele, Mufarizeyi mumanyi wa mukanda, wakitaba ne: Agripa uvua mupiluke mu bilele bia bena Yuda. (Bienzedi 22:3) Nansha muvua Agripa kayi ne nsombelu wa tshitembu, Paulo wakakula nende ne kanemu bualu Agripa uvua ne muanzu wa mukokeshi.​—Lomo 13:7.

Patudi tufila bumanyishi bua mitabuja etu ne dikima, tshipatshila tshietu ki ntshia kutandula anyi kudiwula bilele bipange bukezuke bia bateleji betu nansha. Kadi bua kumona mua kubapepejila malu bua bitabe bulelela, tudi ne bua kuzangika malu malenga a lumu luimpe, kuela kashonyi pa matekemena atudi nawu bonso. Patudi tuakula ne bantu bakulumpe anyi badi mu bukokeshi, tudi ne bua kuitaba mianzu yabu. (Lewitiki 19:32) Mushindu’eu tudi mua kuidikija Paulo, wakamba ne: “Ndi mulue malu onso kudi bantu ba mishindu yonso, bua mmone mua kusungila bamue mu mishindu yonso.”​—1 Kolinto 9:22, NW.

[Mêyi adi kuinshi]