TSHIBUTSHILU TSHIA MIKANDA TSHIA KU ENTERNETE tshia Watchtower
TSHIBUTSHILU TSHIA MIKANDA TSHIA KU ENTERNETE
tshia Watchtower
Tshiluba
  • BIBLE
  • MIKANDA
  • BISANGILU
  • w99 15/11 dib. 18-23
  • Udi ukumbaja tshionso tshidibu bakulomba kudi Nzambi anyi?

Kakuena filme nansha umue mu tshitupa etshi to.

Tshilema ntshienzeke mu diambula dia filme.

  • Udi ukumbaja tshionso tshidibu bakulomba kudi Nzambi anyi?
  • Tshibumba tshia Nsentedi tshidi tshimanyisha Bukalenge bua Yehowa—1999
  • Tumitu tua bualu
  • Bintu bia muomumue
  • Malu onso adi patupu anyi?
  • Didilambula ne tshidibu batulomba kudi Nzambi
  • Ukonkonone mapangadika ebe bimpe menemene!
  • Bintu bidi bituambuluisha bua kuvuluka Mufuki wetu Munene
  • Tshionso tshidibu batulomba kudi Nzambi
  • Ukumbaje tshionso tshidibu bakulomba
  • “Tshionso tshidi muntu ne bua kuenza”
    Tshibumba tshia Nsentedi tshidi tshimanyisha Bukalenge bua Yehowa—1997
  • Malu manene a mu mukanda wa Muambi
    Tshibumba tshia Nsentedi tshidi tshimanyisha Bukalenge bua Yehowa—2006
  • Uvuluke Mufuki webe Munene!
    Tshibumba tshia Nsentedi tshidi tshimanyisha Bukalenge bua Yehowa—1999
  • Nsombelu webe—Udi ne tshipatshila kayi?
    Tshibumba tshia Nsentedi tshidi tshimanyisha Bukalenge bua Yehowa—1997
Tangila bikuabu
Tshibumba tshia Nsentedi tshidi tshimanyisha Bukalenge bua Yehowa—1999
w99 15/11 dib. 18-23

Udi ukumbaja tshionso tshidibu bakulomba kudi Nzambi anyi?

“Nzambi mulelela nkayende nealumbuluishe mudimu wa mushindu wonso, bua bualu buonso busokoka, bikalabu buimpe anyi bubi.”​—MUAMBI 12:14, NW.

1. Mmalu kayi adi Yehowa mulongoluele bantu bende?

YEHOWA udi ukuatshisha bantu badi batungunuka ne kumuvuluka bu Mufuki wabu Munene. Dîyi diende difundisha ku nyuma wende didi dibapesha dimanya didibu nadi dijinga bua kumusankisha mu malu onso. Spiritu munsantu wa Nzambi udi ubalombola bua kuenza disua diende ne bua ‘kukuama mamuma mu mudimu wonso muimpe.’ (Kolosai 1:9, 10) Kabidi, Yehowa udi ufila biakudia bia mu nyuma ne ubaleja mushindu wa kuendelabu mu njila wende ku butuangaji bua “mupika wa lulamatu ne wa budimu.” (Matayo 24:45-47, NW) Nenku mu mishindu ya bungi, bantu ba Nzambi badi bapeta mabenesha adi afumina mu diulu bualu badi basadila Yehowa ne bakumbaja mudimu wa mushinga mukole wa kuyisha lumu luimpe lua Bukalenge.​—Mâko 13:10.

2. Nnkonko kayi idi mua kujuka bua mudimu utudi tuenzela Yehowa?

2 Bena Kristo balelela badi ne disanka dia kuikala ne bia bungi bia kuenza mu mudimu wa tshijila udibu benzela Yehowa. Kadi bamue badi mua kuteketa mu mikolo ne kuela meji ne: madikolela adibu benza kaena ne mushinga to. Tshilejilu, ku misangu bena Kristo bakadi badilambule badi mua kudiebeja bikala madikolela abu a muoyo mujima mikale bushuwa ne mushinga. Padibu belangana meji pa dilonga dia mu dîku ne pa malu makuabu, nkonko bu idi ilonda eyi idi mua kujuka mu lungenyi lua mfumu wa dîku: ‘Bitudi tuenza bidi bisankisha Yehowa menemene anyi? Tudiku tukumbaja tshionso tshidibu batulomba kudi Nzambi anyi?’ Mêyi a meji akamba Muambi adi mua kutuambuluisha bua kuandamuna nkonko eyi.

Malu onso adi patupu anyi?

3. Mu diumvuangana ne Muambi 12:8, mmuanda kayi udi muikale wa patupu menemene?

3 Bamue badi mua kuela meji ne: mêyi a muena meji kaena akankamija muntu nansha umue to, ni mbansonga ni mbakulumpe. Muambi wakafunda ne: ‘Malu a patupu, malu onso adi patupu.’ (Muambi 12:8) Bulelela, kupua Mufuki Munene muoyo ku bunsonga, kukulakaja kakuyi dimusadila ke muanda wa patupu menemene. Malu onso adi mikale a patupu anyi a tshianana bua muntu udi muenze nanku, nansha yeye mufue ne bubanji ne lumu bia mushindu kayi pa buloba ebu budi ku bukokeshi bua mubi, Satana Diabolo.​—1 Yone 5:19.

4. Bua tshinyi tudi mua kuamba ne: malu onso ki ng’a patupu to?

4 Malu onso ki ng’a patupu bua basadidi ba Yehowa ba lulamatu badi badibutshila biuma mu diulu to. (Matayo 6:19, 20) Badi ne bia bungi bia kuenza mu mudimu muimpe wa Mukalenge, ne nansha bia munyi, midimu eyi ki nya patupu to. (1 Kolinto 15:58) Kadi bituikale bena Kristo badilambule kudi Nzambi, tudiku ne bia bungi bia kuenza mu mudimu udi Nzambi mutupeshe mu matuku aa a ku nshikidilu anyi? (2 Timote 3:1) Peshi tudi baditue mu nsombelu wa buena udi nende bantu netu ba bungi? Bantu aba badi mua kuikala mu bitendelelu kabukabu ne badi mua kuikala badifilemu ne muoyo mujima, baya mu bitanda biabu pa tshibidilu ne bakumbaja malu adi ntendelelu wabu ubalomba. Nansha nanku, kabatu bayisha lumu luimpe lua Bukalenge to. Kabena ne dimanya dijalame dia se: tudi mu ‘tshikondo tshia ku nshikidilu’ ne ki mbamanye bua se: tudi ne bua kuenza malu ne mitalu mu matuku atudi aa nansha.​—Danyele 12:4.

5. Bikala dikeba dia bintu bia pa tshibidilu bia mu nsombelu dilue tshipatshila tshietu tshinene, ntshinyi tshitudi ne bua kuenza?

5 Yezu Kristo wakamba bua bikondo bietu ebi bikole ne: “Bu muvuabio mu matuku a Nowa, ke muenzekabio [mu dikalaku dia, NW] Muana wa muntu. Matuku avua mvula wa kabutu kayi muanji kuloka, bantu bavua badia, banua, baselangana, baselesha bana babo ba bakaji, too ne ku dituku divua Nowa mubuele mu buatu. Bantu kabavua bamanye bualu too ne pakalua mvula kubabutula bonso. Ke [muikalabi bua dikalaku dia, NW] Muana wa muntu nanku.” (Matayo 24:37-39, MMM) Padiku kakuyi dinekesha, kudia ne kunua ki nkubi to, ne dibaka mbualu budi Nzambi nkayende mulongolole. (Genese 2:20-24) Kadi bituamona se: dikeba bintu bia pa tshibidilu ndilue tshipatshila tshietu tshinene, bua tshinyi kubenga kusambila Nzambi bua bualu ebu? Yehowa udi mua kutuambuluisha bua kuteka malu a Bukalenge pa muaba wa kumpala ne kukumbaja tshidiye utulomba.​—Matayo 6:33; Lomo 12:12; 2 Kolinto 13:7.

Didilambula ne tshidibu batulomba kudi Nzambi

6. Mmu mushindu kayi udi bamue bena Kristo batambule bapangila bua kukumbaja tshidibu babalomba kudi Nzambi?

6 Bamue bena Kristo batambule badi ne bua kusambila ne muoyo mujima bualu kabena bakumbaja mudimu wakabangabu dîba diakadilambulabu kudi Nzambi. Kukadi mpindieu bidimu ndambu, bantu bapite pa 300 000 batu batambula ku tshidimu tshionso, kadi bungi busanga bua Bantemu ba Yehowa ki mbubande menemene to. Bamue bantu bakalua bamanyishi ba Bukalenge mbalekele kuyisha lumu luimpe. Kadi, bantu aba badi ne bua kuenza mudimu wa bena Kristo ne muoyo mujima kumpala kua kutambulabu. Ke tshialeja ne: mbumvue mudimu uvua Yezu mupeshe balongi bende bonso, pakambaye ne: ‘Yayi nuvuije ba bisamba bionso bayidi, nubabatize mu dîna dia Tatu ne mu dia Muana ne mu dia nyuma muimpe; nubayishe mua kuenza malu onso angakanuambila.’ (Matayo 28:19, 20) Anu buobu bikale ne mikalu ya pa buayi peshi disama kampanda anyi malu makuabu adi mabapite dikanda, bena Kristo batambule bakadi kabatshiyi benza mudimu bu Bantemu ba lukunukunu ba Nzambi ne Kristo kabena kabidi bakumbaja tshidibu babalomba kudi Mufuki wetu Munene nansha.​—Yeshaya 43:10-12.

7. Bua tshinyi tudi ne bua kuikala tudisangisha pa tshibidilu bua kutendelela Nzambi?

7 Isalele wa kale uvua tshisamba tshidilambule kudi Nzambi ne tshivua mu tshipungidi tshia Mikenji. Bantu bavuamu bavua ne malu a kukumbaja kumpala kua Yehowa. Tshilejilu, bantu balume bonso bavua ne bua kuikala basangila bua kuenza bibilu bisatu bia ku tshidimu, ne muntu mulume uvua ubenga kusekelela Pasaka ku bukole bavua ‘bamumusha munkatshi muabu’ pa kumushipa. (Nomba 9:13; Lewitiki 23:1-43; Dutelonome 16:16) Bu muvuabu bantu ba Nzambi badilambule kudiye, bua buobu kukumbaja malu avuaye ubalomba, bena Isalele bavua ne bua kusangila bua kumutendelela. (Dutelonome 31:10-13) Kakuena muaba udibu bambe mu Mikenji ne: ‘Enza nenku pawikala umona bikusankisha’ to. Bua bantu badi badilambule kudi Yehowa lelu’eu, mukenji eu wa kudisangisha udi uvuija mêyi a Paulo aa ne mushinga: “Tuvulukanganayi bua kukoleshangana mitshima bua kutamba kunanga ne kuenza malu mimpe. Katulekedi mua kubuela mu bisangilu bietu; katuikadi bu bakuabo bakuditua mu tshilele tshia kubenga kubuelamu. Kadi, tukoleshanganayi mitshima, tutambe kuenza nanku bu munudi numona dituku dia Mfumu dikadi disemena pabuipi.” (Ebelu 10:24, 25, MML) Bushuwa, kudisangisha pa tshibidilu ne bena kuitabuja netu mbumue bua ku malu adi bena Kristo badilambule ne bua kukumbaja kumpala kua Nzambi.

Ukonkonone mapangadika ebe bimpe menemene!

8. Bua tshinyi nsonga ukadi mudilambule udi ne bua kukonkonona ne muoyo mujima mudimu wa tshijila udiye wenza?

8 Pamu’apa udi nsonga ukadi mudilambule kudi Yehowa. Neupete mabenesha a bungi biwateka malu a Bukalenge pa muaba wa kumpala. (Nsumuinu 10:22) Mu dienza masambila ne pa kudianjila kudilongolola bimpe menemene, udi mua kupeta mushindu wa kuenza mudimu wa ku dîba ne ku dîba mu bunsonga buebe​—kuenza nanku ke mushindu mulenga wa kuleja ne: udi muvuluke Mufuki webe Munene. Tshianana, bintu bia ku mubidi bidi mua kutuadija kukuangata dîba dia bungi ne ntema. Anu mutu bantu ba bungi benza, udi mua kufika ku disela utshidi ne mabele mukana ne udi mua kufika ku dibuela mabanza bua kusumba bintu bia ku mubidi. Mudimu udi upetesha makuta udi mua kukudia dîba ne makanda a bungi. Biwikala ne bana, newikale ne bua kuambula majitu a dîku munkatshi mua bidimu bia bungi. (1 Timote 5:8) Pamu’apa kuakuikala mupue Mufuki webe Munene muoyo to, kadi mbia meji bua kuvuluka ne: kudianjila kudilongolola peshi kubenga kuenza nanku kudi mua kusebela nsombelu webe wa ku bukulumpe njila. Mu bidimu bia ku bukulakaje, udi mua kulua kudijinga ne: uvuaku mua kuikala muenzele Mufuki webe Munene mudimu wa tshijila paukavua muntu mukole. Bua tshinyi kubenga kuelangana meji ne muoyo mujima kubangila ku mpindieu bua malu awikala mua kuenza bua umone mua kupeta disanka mu mudimu wa tshijila uudi wenzela Yehowa mu bidimu biebe bia bunsonga?

9. Ntshinyi tshidi muntu ukadi mukulakaje ne uvuaku ne bujitu mu tshisumbu tshikondo kampanda mua kuenza?

9 Tuakulayi bua muntu uvua pamu’apa mulami wa “tshisumbu tshia mikoko ya Nzambi” tshikondo kampanda. (1 Petelo 5:2, 3) Bua kabingila kansanga, yeye nkayende mmulekele mudimu eu. Bushuwa, bu mukadiye mpindieu mukulakaje, bidi mua kumukolela menemene bua kutungunuka ne mudimu wa Nzambi. Kadi udiku mua kuipatshila bua kuenza kabidi midimu mikuabu ya Nzambi anyi? Muntu wa nunku udi mua kutuadila bakuabu mabenesha a bungi bu yeye mua kuikala ne mushindu wa kuambula bujitu buvule mu tshisumbu! Ne bu mudiku kakuyi muntu udi ne muoyo anu bua bualu buende nkayende, balunda ne bananga nebasanke bikalaye ne mushindu wa kuvudija mudimu wende udiye wenza bua butumbi bua Nzambi. (Lomo 14:7, 8) Tshidi tshipite bionso ntshia se: Yehowa kakupua muoyo malu adi muntu yonso wenza mu mudimu wende nansha. (Ebelu 6:10-12) Nenku, ntshinyi tshidi mua kutuambuluisha bua kuvuluka Mufuki wetu Munene?

Bintu bidi bituambuluisha bua kuvuluka Mufuki wetu Munene

10. Bua tshinyi Muambi ke uvua mukumbane bimpe menemene bua kutupesha mibelu bua kuvuluka Mufuki wetu Munene?

10 Muambi ke uvua mukumbane bimpe menemene bua kutupesha mibelu bua tuetu kuvuluka Mufuki wetu Munene. Bua kuandamuna ku masambila avuaye muenze ne muoyo mujima, Yehowa wakamupesha meji a pa buawu. (1 Bakelenge 3:6-12) Solomo wakakebulula malu onso a bantu mu buondoke. Kabidi, nyuma wa Nzambi wakamusaka bua kufunda malu avuaye mupete bua kuambuluisha bantu bakuabu. Wakafunda ne: ‘Bualu bukuabu, Muambi wakadi ne meji, yeye wakayisha bantu lungenyi; bulelela, yeye wakelangana meji, wakakebakeba ne wakalondolola nsumuinu ya bungi. Muambi wakadifila bua kupeta mêyi adi asankisha bantu, mêyi makane ne malelela.’​—Muambi 12:9, 10.

11. Bua tshinyi tudi ne bua kuitaba mibelu ya meji ya Solomo?

11 Tudi tubala mu Mukanda wa Mvidi Mukulu bua mêyi aa ne: “Ntoyi kavua muntu wa meji patupu, uvua mulongeshe kabidi bantu malu avuaye mumanye. Uvua mukebulule nsumuinu ya bungi, muyikonkonone, kabidi muyilengeje. Ntoyi uvua muenze muende muonso bua kupeta miaku idi isankisha bantu ne kufunda malu amu malelela.” Solomo wakadienzeja bua kulenga mitshima ya babadi ba mikanda yende ne mêyi malenga adi asankisha ne biena-bualu bimpe bia mushinga. Bu mudi mêyi ende adi mu Mifundu mikale mafundisha ku spiritu munsantu, tudi mua kuitaba malu onso avuaye mupete ne mibelu ya meji katuyi tudilaminyina.​—2 Timote 3:16, 17.

12. Mu mêyi ebe nkayebe, umvuija malu akamba Solomo mu Muambi 12:11, 12.

12 Nansha muvuaku kakuyi biamu bia kupatula nabi mikanda bu bidiku lelu’eu, kuvua mikanda mipite bungi mu tshikondo tshia Solomo. Mmunyi muvua bantu ne bua kuangata mikanda ayi? Wakamba ne: ‘Mêyi a bena meji adi bu misongolo; bu misumadi mikuma bikole [ya] kudi mulami umue, [ke mudi bantu badi badifile mu difunda mikanda ya nkoselu ya bilumbu, NW]. Bualu bukuabu, muananyi, udimuke; kakuena ndekelu wa kufunda kua mikanda ya bungi; kutamba kuyila kudi kutekesha mubidi.’​—Muambi 12:11, 12.

13. Mmunyi mudi mêyi a bantu badi ne meji a Nzambi mikale bu misongolo, ne mbanganyi badi bu ‘misumadi mikuma bikole’?

13 Mêyi a bantu badi ne meji a kudi Nzambi adi bu misongolo. Mmushindu kayi nanku? Adi asaka babadi anyi bateleji bua kuya kumpala biumvuangane ne mêyi a meji adibu babale anyi adibu bumvue. Kabidi, bantu badi badifile mu “difunda mikanda ya nkoselu ya bilumbu” anyi mêyi a meji ne a mushinga wa bungi, badi bu ‘misumadi mikuma bikole’ anyi mibueja bikole. Bidi mua kuikala bilelela bualu mêyi malenga a bantu ba mushindu’eu adi aleja meji a kudi Yehowa ne adi mua kuambuluisha bua kushindamija ne kukuatshisha babadi peshi bateleji. Biwikala muledi udi utshina Nzambi, wenze muebe muonso bua kushimika meji a nunku mu lungenyi ne mu mutshima wa muanebe.​—Dutelonome 6:4-9.

14. (a) Mmikanda ya mushindu kayi idi kayiyi mimpe bua ‘kutamba kuyiyila’? (b) Mmikanda kayi itudi ne bua kubala, ne bua tshinyi?

14 Kadi bua tshinyi Solomo wakamba mêyi aa bua mikanda? Bushuwa, patudi tiyifuanyikija ne Dîyi dia Yehowa, mikanda kayiyi ndekelu ya bena panu idi anu ne meji a bantu. Mavule a ku meji aa adi aleja lungenyi lua Satana Diabolo. (2 Kolinto 4:4) Ke bua tshinyi “kutamba kuyila” mikanda ya panu ya mushindu’eu kakuena kufila bualu bua nsongo buanenga to. Kadi malu a bungi adimu adi mua kutuenzela bibi mu nyuma. Anu bu Solomo, tuelanganayi meji pa malu adi Dîyi dia Nzambi diamba bua muoyo. Nebikoleshe ditabuja dietu ne kutusemeja pabuipi ne Yehowa. Kutamba kutuma ntema ku mikanda mikuabu anyi bintu bikuabu bidi bimanyishangana malu kudi mua kututshiokesha. Nangananga padi mikanda eyi mifunda kudi bantu badi ne ngelelu wa meji wa bena panu mubengangane ne meji a Nzambi ke padiyi ne njiwu ne itekesha ditabuja didi nadi muntu kudi Nzambi ne mu malu adiye mulongolole. Nenku tuvulukayi ne: mikanda ivua ne dikuatshisha dia bungi mu matuku a Solomo ne itshidi kabidi nadi mu matuku etu aa ng’eyi idi ileja meji a “mulami umue,” Yehowa Nzambi. Mmufile mikanda mikese 66 ya Mifundu Minsantu, ne tudi ne bua kutamba kutuma ntema ku mikanda eyi. Bible ne mikanda idi imumvuija ya “mupika wa lulamatu” bidi bituambuluisha bua kupeta “dimanya dia malu a Nzambi.”​—Nsumuinu 2:1-6.

Tshionso tshidibu batulomba kudi Nzambi

15. (a) Mmunyi muudi mua kumvuija mêyi a Solomo adi akula bua “tshionso tshidibu balomba muntu”? (b) Ntshinyi tshitudi ne bua kuenza bituikala basue kukumbaja tshidibu batulomba kudi Nzambi?

15 Bua kuleja mu tshikoso malu onso avuaye mukebulule, Muambi Solomo udi wamba ne: “Nkomenu wa bualu, bionso bimana kumvua, udi se: Utshine Nzambi mulelela ne ulame mêyi ende. Bualu atshi ke tshionso tshidibu balomba muntu. Bualu Nzambi mulelela nkayende nealumbuluishe mudimu wa mushindu wonso, bua bualu buonso busokoka, bikalabu buimpe anyi bubi.” (Muambi 12:13, 14, NW) Ditshina dimpe ne kanemu kudi Mufuki wetu Munene nebitukube tuetu ne mêku etu bua katulondi nsombelu wa bupâle udi mua kutukebela ntatu ne tunyinganyinga bungi kabuyi kuamba. Ditshina dimpe dia Nzambi ditu dia bulelela ne didi tshibangidilu tshia meji ne dimanya. (Musambu 19:9; Nsumuinu 1:7) Bituikala ne busunguluji bushindamene pa Dîyi dia Nzambi difundisha ku nyuma, ne bituatumikila mibelu yadi mu malu onso, nanku netukumbaje ‘tshionso tshidibu batulomba’ kudi Nzambi. Tòo, ki mbualu bua kufunda pa dibeji malu onso atudi ne bua kuenza nansha. Kadi, tshidibu batulomba ntshia se: tunyemene ku Mifundu patudi tujandula nshinga ya mu nsombelu, ne misangu yonso tuenze malu mushindu udi Nzambi musue.

16. Ntshinyi tshienza Yehowa pa bidi bitangila dilumbuluisha?

16 Tudi ne bua kuvuluka ne: kakuena tshintu tshidi Mufuki wetu Munene kayi mua kumona. (Nsumuinu 15:3) Yeye “nealumbuluishe mudimu wa mushindu wonso.” Bushuwa, Mutambe Bunene nealumbuluishe bua malu onso, ne bua adi masokome ku mêsu kua bantu. Dimanya dia mianda eyi didi mua kutusaka ku ditumikila mêyi a Nzambi. Kadi tshintu tshinene tshidi ne bua kutusaka ndinanga bua Tatu wetu wa mu diulu, bualu mupostolo Yone wakafunda ne: ‘Edi ndinanga dia Nzambi, bua tuetu tutumikile mikenji yende; ne mikenji yende kayena itunemena bujitu.’ (1 Yone 5:3) Ne bu mudi mikenji ya Nzambi miela bua kutupesha diakalenga dia tshiendelele, mbimpe ne mbia meji bua tuetu kuyitumikila. Bua bantu badi banange Mufuki Munene, mikenji eyi kayena mineme bujitu to. Mbasue kukumbaja tshidiye ubalomba.

Ukumbaje tshionso tshidibu bakulomba

17. Ntshinyi tshituenza bituikala basue kukumbaja tshionso tshidibu batulomba kudi Nzambi?

17 Bituikala ne meji ne tujinga kukumbaja menemene tshidibu batulomba kudi Nzambi, pa kumbusha dilama dia mêyi ende, tudi ne bua kutshina bua kumubungamija. Bushuwa, “ditshina dia Yehowa didi tshibangidilu tshia meji,” ne bantu badi balame mêyi ende badi ne “dijingulula dia malu.” (Musambu 111:10; Nsumuinu 1:7) Nenku tuenzayi malu ne meji ne tutumikile Yehowa mu malu onso. Tudi ne bua kuenza nanku mpindieu, bualu Mukalenge Yezu Kristo ukadiku, ne dituku dialumbuluishaye bu Nzuji muteka kudi Nzambi dikadi pabuipi.​—Matayo 24:3; 25:31, 32.

18. Ntshinyi tshituikala mua kupeta bituakumbaja tshionso tshidibu batulomba kudi Yehowa Nzambi?

18 Nzambi udi munkatshi mua dikonkonona mutshima wa muntu yonso wa kutudi mpindieu. Tutu banange malu a mu nyuma anyi, peshi tudi balekele malu a panu anyanga malanda etu ne Nzambi? (1 Kolinto 2:10-16; 1 Yone 2:15-17) Nansha tuetu bikale bansonga anyi bantu bakole, tuenzayi muetu muonso bua kusankisha Mufuki wetu Munene. Bituatumikila Yehowa ne bitualama mêyi ende, netubenge malu a patupu a mu bukua-panu ebu bukadi pa kupita. Tuetu benze nanku, tudi mua kuikala ne ditekemena dia kupeta muoyo wa kashidi mu ndongoluelu mupiamupia wa malu udi Nzambi mulaye. (2 Petelo 3:13) Aa mmalu malenga adi mindile bantu bonso badi bakumbaja tshionso tshidibu babalomba kudi Nzambi.

Newandamune munyi?

◻ Bua tshinyi udi mua kuamba ne: malu onso ki ng’a patupu to?

◻ Bua tshinyi nsonga muena Kristo udi ne bua kukonkonona ne muoyo mujima mudimu wa tshijila udiye wenza?

◻ Mmikanda ya mushindu kayi idi kayiyi mimpe bua ‘kutamba kuyiyila’?

◻ “Tshionso tshidibu balomba muntu” ntshinyi?

[Tshimfuanyi mu dibeji 20]

Bua badi basadila Nzambi, malu onso ki ng’a patupu to

[Tshimfuanyi mu dibeji 23]

Dîyi dia Nzambi ndishilangane ne mikanda mivule ya panu bualu didi ditukolesha ku muoyo ne ditukuatshisha

    Mikanda ya mu Tshiluba (1982-2024)
    Patuka
    Buela
    • Tshiluba
    • Tumina bakuabu
    • Biudi musue
    • Copyright © 2025 Watch Tower Bible and Tract Society of Pennsylvania
    • Malu a kulonda
    • Mikenji ya mua kulama malu masokoka
    • Biudi witaba bua kuenzekabi mu tshiamu
    • JW.ORG
    • Buela
    Tumina bakuabu