Bamanyishi ba Bukalenge badi balonda

“Buobumue munkatshi mua bantu bashilangane” mu Inde

“BUOBUMUE munkatshi mua bantu bashilangane.” Mêyi aa ke atu bantu bavule ba mu ditunga dia Inde bamba bua kuleja mudibu bitaba bua bantu basombe mu ditunga edi. Ki mbitekete bua kusomba mu buobumue mu ditunga dinene nunku didi ne bantu ba bibidilu, miakulu, ntendelelu, bisa, mvuadilu ne ndilu bishilangane nansha. Kadi, buobumue ebu budi ku biro bidibu balombuela midimu ya Bantemu ba Yehowa mu Inde, nansha mudi bena budisuile badi basombeleku ne benzaku mudimu bafumine mu provense ne miaba ya bungi ne bakula miakulu ya bungi mishilangane.

• Tuangate tshilejilu tshia Rajrani, nsongakaji mufumine mu Punjab, ku Nord-Ouest menemene kua Inde. Patshivua Rajrani mu kalasa, mulongi wabu mukuabu wakabanga kulonga Bible ne Bantemu ba Yehowa. Nsongakaji eu wakateta bua kuambila Rajrani bua alonge pende Bible. Bu muvua nsongakaji eu kayi mutambe kumanya Anglais, ne bu muvua Tshibumba tshia Nsentedi katshiyi tshianji kuikalaku mu muakulu wa Punjabi, wakalomba kabidi Rajrani bua kuikalaye umukudimuina malu avua mu tshibejibeji etshi. Malu akabala Rajrani mu Tshibumba tshia Nsentedi akatuadija kumushintulula bikole, kutungunukaye too ne muakadilambulaye kudi Yehowa Nzambi, nansha muvua baledi bende babenga. Lelu ukadiye ku Betele wa mu Inde, udi wenza mudimu umue-umue wakamufikisha ku bulelela au. Udi ukudimuna mikanda ya Bantemu mu muakulu wa Punjabi.

• Tuangate kabidi tshilejilu tshia Bijoe, mmufumine mu provense wa Kerala udi ku Sud-Est kua ditunga dia Inde. Bavua bipate Bijoe mu kalasa bualu uvua mubenge kubuelakana mu misekelelu ya ditunga. Kunyima kua kabadi kamane kukosa tshilumbu etshi tshivua tshinenge bikole ne kabingisha Bantemu ba Yehowa, Bijoe wakapingana mu kalasa.a Wakatungunuka kabidi ne tulasa tua iniversite. Kadi buendenda buvuamu buakatatshisha kuondo kende ka muoyo bikole, kumbukaye anu ku ntuadijilu kua tshidimu. Lelu ukadiye ne bidimu dikumi ku Betele, mmulue kumona ne: mmupete malu mimpe a bungi padiye mu dîku dia Betele didi ne bantu bashilangane kadi bikale mu buobumue, kupita pavuaye mua kuikala mutungunuke ne tulasa tua iniversite.

• Norma ne Lily badi bonso ne bidimu bipite pa 70 ne mbashale bakaji bakamba kukadi bidimu bia bungi. Yonso wa kudibu ukadi muenze bidimu bipite pa 40 mu mudimu wa ku dîba ne ku dîba. Lily ukadi muenze bidimu 20 ku Betele kudiye ukudimuna mikanda mu muakulu wa Tamil. Norma mmulue ku Betele kukadi bidimu 13 panyima pa lufu lua bayende. Pa kumbusha mudimu wa tshitembu udibu benza ne muoyo mujima ne mitalu, badi kabidi basaka bakuabu mu dîku dijima dia Betele bua kuikaladi mu buobumue. Batu basue kuakidila benyi, ne batu basomba ne bansonga badi mu dîku dia Betele, bayikila nabu bua masanka adibu bapete munkatshi mua bidimu bia bungi bidibu bena Kristo. Ne bansonga pabu batu bababikila mu nzubu yabu ne babambuluisha padibi bikengedibua. Ebi mbilejilu bilenga bushuwa!

Bu mudi bena budisuile ba ku Betele aba bamane kutshimuna malu adi akebesha dikokangana ne matapuluka bidi bitangalake miaba ya bungi, badi benza mudimu pamue ne disanka mu dîku dia Betele didi mu buobumue bua kuambuluisha banga bantu mu ditunga dia Inde.​—Musambu 133:1.

[Mêyi adi kuinshi]

[Mêyi a dianyisha bua tshimfuanyi mu dibeji 8]

Tshimfuanyi tshidi munyima: Mountain High Maps® Copyright © 1997 Digital Wisdom, Inc.