Ngumu ya Bukalenge ya kumuangalaja pa buloba bujima dîba diakane

¹ Dia lumingu dia 23 Tshisanga, nekuikale diyuki dia pa buadi pa tshiena-bualu etshi tshidi tshilenga mutshima: “Ndekelu wa bitendelelu bia dishima ukadi pabuipi.” Ku ndekelu wa tshisangilu dituku adi nebabanye Ngumu ya Bukalenge, trakte wa mabeji anayi udi usaka ku diela meji. Mukenji wa pa mianda ya matuku aa wikalamu neumuangalake pa buloba bujima mu kupita kua mbingu isatu yalonda, kutuadija mu dia 24 Tshisanga too ne mu dia 14 Lumungulu.

² Pa buloba bujima, bantu badi mu dilubakana. Miaba yonso idibo, ntatu mmibele mionji mu nshingu. Trakte wa Ngumu ya Bukalenge neikale ne dikuatshisha dilelela bua aba badi bapampakana bushuwa pa bidi bienzeka, bualu idi ikoka ntema yabu ku Dîyi dia Nzambi, mpokolo wa mibelu kayi mua kutupakana bua muntu. (Mus. wa 119:105) Tudi bindile ne muoyo kulukulu bua kupeta Ngumu ya Bukalenge eyi mu dia 23 Tshisanga. Bituadije mpindieu, kudi bia bungi bia kuenza bua kulongolola kampanye ka katshi ku dînu ka buambi mu mbingu isatu yalonda.

³ Muntu yonso mmukankamijibue bua kudifilamu: Nnganyi udi mua kudifila mu kampanye aka? Buonso bakadi bamanyishi kabiyi mpata mbindile ne muoyo kulukulu bua kuenza nunku! Kadi bua aba batshidi balonga ne basangila netu pa tshibidilu mu bisangilu bia tshisumbu? Bamue badi basangila netu kukadi matuku ne benda balubuluka. Pikalabo bakaje nsombelu wabo bilondeshile mêyi-maludiki a mu Bible, mbakumbaje ngikadilu milomba bua kulua bamanyishi ba Bukalenge anyi? Ntemu udi ulombola dilonga udi mua kukonkonona lukonko elu pamue ne mulongi wende ne, pikalaye ujinga kupatuka mu buambi, bakulu babidi nebakonkonone nende malu adi mu dibeji dia 98 mu mukanda wa Badilongolole bua kuenza mudimu wetu bimpe. Ebi nebikale ne bua kuenjibua kumpala kua dîba, bua buonso badi bakumbaje ngikadilu milomba bua kuikala bamanyishi kabayi batambule badifile muabu muonso mu kampanye aka ka pa buaku. Balongi ba Bible badi kabayi mua kuikala bamanyishi kabayi batambule nebakankamijibue bua kufila trakte eu wa Ngumu ya Bukalenge pa mianda ya matuku aa kudi balunda babo ne bena mu mêku abo.—Tangila Tshibumba tshia Nsentedi (Fransé) tshia mu dia 15 Kasuabanga 1988, dibeji dia 17, tshikoso tshia 8.

⁴ Mudimu eu ki mmukole nansha; muntu yonso udi mua kudifilamu. Mu dilonga dia Bible dia ku lumingu mu dîku, baledi nebalongolole maleja a bilejilu mushindu wa se: muena dîku yonso ikale mulongolola bimpe bua kufila trakte wa Ngumu ya Bukalenge mu buambi bua ku nzubu ne ku nzubu. Pa tshibidilu, mbiakanyine kukuata mudimu ne dileja dipepele. Kunyima kua mbuelelu muipi, leja trakte wa Ngumu ya Bukalenge kudi mukuyukidishi ne mukankamije bua kumubala. Bialejaye dijinga dia kumanya bivule, angata note bua kutungunuka ne diyukidilangana musangu mukuabo. (1 Kol. 3:6, 7) Dileja dipepele ne dilongolola bimpe ke nsapi wa dipatula bipeta bilenga.

⁵ Nekuikale “mudimu wa bungi” mu Tshisanga ne mu Lumungulu. Pa nanku, pikala trakte eyi kayiyi mipeteka mu dituku difunkuna, netuikale mua kuyabanya diakamue padiyi ifika. Kadi mu kuindila, netukuate mudimu ne eyi idi mu stoke wa tshisumbu.—1 Kol. 15:58.