Tuambuluishayi Bantu Netu Bua Kumanyabu Mushinga Wa Bible
1 Yezu wakapesha bayidi bende bivuabu bakengedibua. Tudi tubala mu Luka 24:45 ne: ‘Wakabulula [lungenyi luabu, NW] bua kujingululabu mukanda wa Nzambi.’ Uvua mumanye se: bua kuanyishibuabu kudi Tatuende, bavua ne bua kulonga ne kumvua Dîyi dia Nzambi, Bible. (Mus. wa 1:1, 2) Buambi buetu budi ne tshipatshila tshia muomumue. Tudi tujinga kutuadija malonga a Bible bua ‘kulongesha bantu mua kutumikila malu onso adi Yezu mutume dîyi.’ (Mat. 28:20, NW) Muikale ne mmuenenu eu, konkonona imue mibelu idi mua kuambuluisha mu makumbulula ebe.
2 Biwikala uvua muashile diyuki diebe dia kumpala pa mukanda wa “La Bible: Parole de Dieu ou des hommes?,” udi mua kutuadijilula nenku:
◼ “Ndi njinga kukuyukidisha pa bukuabu bualu budi buleja mushinga wa mibelu ya mu Bible. Bantu ba bungi badi bela meji ne: mbikole bua kumvuangana ne bakuabu. Tshitudi mua kuenza ntshinyi bua kulengeja malanda etu ne bena mutumba netu? [Teleja diandamuna, bulula mukanda mu dib. 168, ne bala Matayo 7:12. Usakidile ngenyi ya mu § 16.] Ntshilejilu tshikuabu tshia meji adi mu mibelu ya mu Bible. Pangalukila, nensanke kukuleja mibelu idi Bible ufila bua nsombelu wa disanka bua bena dibaka.” Nupunge dîyi bua dialukila diebe bua kuyukila mabeji 170-2, mudi mupeteka mibelu ya mu Bible bua nsombelu wa disanka mu dîku.
3 Bikala muntu muleje dijinga dia kumanya bia bungi pa Bible, udi imue misangu mua kutuadija dilonga dia Bible nunku:
◼ “Bantu bonso nebasanke kuikala ne muoyo mu bulongolodi bua ditalala ne kabuyi njiwu. Bu mudibi dijinga dia bantu bonso, bua tshinyi bulongolodi budi mu tshimvundu ne mu tshinyangu nunku? [Teleja diandamuna.] Bible wa Traduction du monde nouveau udi ukuleja muaba ûdi mua kupeta diandamuna ku lukonko elu mu Bible.” Bulula dibeji dia 1655 ne leja dilondangana didi ne mutu wa “Sujets de conversation bibliques,” n° 23a: “Auteur de la détresse mondiale.” Bala 2 Kolinto 4:4. Umvuija ne: Nzambi neabutule Diabolo ne neajadike bulongolodi bua ditalala ne bua diakalenga bia kashidi. Bala Buakabuluibua. 21:3, 4. Pashishe udi mua kuamba ne: “Pangalukila, nensanke kukuleja imue mvese idi yumvuija bua tshinyi udi mua kutekemena bulongolodi bukena dikenga.”
4 Bikala ngenzelu wa buludi bua kutuadija dilonga dia Bible mupatule bipeta bimpe, pawalukila kudi muntu udi mua kuamba ne:
◼ “Musangu mushale tuakatela tumue tubingila tudi tuleja mushinga wa kulonga Bible. Eu waditatshisha bua kuenza nunku udi mua kupeta disanka dia kumona bidi Nzambi mutulaye. [Bala Yone 17:3.] Programe wetu wa dilongesha Bible ukadi muambuluishe binunu bia bantu bua kumanyabu bia bungi pa bidi Nzambi mutulaye ne pa mushindu utudi mua kumusankisha.” Angata mukanda wa Dimanya, konkononayi biena-bualu bia nshapita ne leja mudi dilonga dia Bible dienzeka.
5 Pa kuambuluisha bantu bua kujingululabu mushinga wa pa buawu wa Dîyi dia Nzambi, tudi tubapetesha diambuluisha dimpe ditambe. Meji adibu mua kupeta pa kulonga Dîyi edi adi mua kuikala “mutshi wa muoyo” ne kubapetesha diakalenga dinene.—Nsum. 3:18.