Beneshayi Yehowa “Mu Bule Bua Dituku”
1 Mu Musambu wa 145:2 (NW), mudi dilaya diakenzelabu Yehowa kudi mfumu Davidi wamba ne: “Nenkubeneshe mu bule bua dituku, ndi musue bua kusamuna dîna diebe bua bikondo bikena bijadika, eyowa bua tshiendelele.” Tuetu kabidi, tudi ne tubingila tua kubenesha ne kusamuna Tatu wetu wa mu diulu. Kadi mmunyi mutudi mua kuidikija Davidi ne kutumbisha bumfumu butambe bunene bua Yehowa “mu bule bua dituku”?
2 Uujayi dianyisha mu mitshima yenu bua Yehowa: Dilonga dia pa tshibidilu dia Dîyi dia Nzambi didi dikolesha dianyisha dietu bua bidi Yehowa mutuenzele, bua bidiye utuenzela mpindieu ne bua biatuenzelaye kabidi. Pa kutungunuka ne kujingulula malu a dikema a Yehowa, netuujibue tente ne dianyisha ne netumanyishe bulenga buende. (Mus. wa 145:7) Netusakibue bua kusamuna Yehowa mu tshikondo tshionso.
3 Samunayi Yehowa mu mayuki enu a dituku dionso: Panudi nuyukidilangana ne bena mutumba nenu, ne balunda, ne bena mudimu nenu anyi ne bantu bakuabu banudi nupetangana nabu dituku dionso, nudi mua kubabidila tshikondo tshia kubamanyisha ditekemena dienu. Imue misangu muena mutumba kampanda neanumanyishe disumpakana diende pa kumona dibunda bibawu mu kartié; mulunda kampanda udi imue misangu usumpakana pa kumona dinua ne dibueja bintu bia lulengu mu mubidi peshi pa kumona nsombelu wa buendenda; muena mudimu nenu kampanda udi mua kupatula lungenyi kansanga bua bidi bitangila malu a tshididi. Nudi mua kukoka ntema yabu pa mêyi-maludiki ne pa malaya bidi mu Dîyi dia Nzambi ne kubaleja mmuenenu muimpe udibu ne bua kulonda bituadijile ku mpindieu, ne mushindu wa kujandula ntatu yabu. Mêyi a mushindu eu mamba ‘pa tshikondo tshiawu’ adi mua kuikala dibenesha.—Nsum. 15:23, NW.
4 Akulayi bua Yehowa ku dîba ne ku dîba: Muntu udi ne dianyisha diondoke bua Yehowa udi ujinga kumanyisha lumu luimpe kudi bantu ba bungi. (Mus. 40:8-10) Nenku udiebeje ne: ‘Ndiku ngenza muanyi muonso bilondeshile nsombelu wanyi anyi?’ Ba bungi mbafike ku dimona se: pa kushintulula amu kakese ditumika diabu ne dîba, bavua mua kuikala bampanda-njila ba pa tshibidilu. Bikala nsombelu wenu wa mpindieu kayi unupetesha mushindu wa kuenza nunku, kanuena mua kuikalaku nansha bampanda-njila bambuluishi anyi? Tshikondo tshia Tshivulukilu tshidi tshipetesha mushindu wa kuvudija mudimu. Luabanya ne Tshisanga nngondo miakanyine bua nuenu kudifila bia bungi mu mudimu pa kuikala bampanda-njila bambuluishi.
5 Ambuluishayi bapiabapia bua kudisangishabu kunudi bua kubenesha Yehowa: Disekelela dia Tshivulukilu tshia lufu lua Yezu ditu dituvuluija ku tshidimu ne ku tshidimu tubingila tutudi natu bua kuela Yehowa tuasakidila ne kusamuna Dîna diende. Ntshikondo tshiakanyine mu mushindu wa pa buawu bua kukankamija bantu badi balonga Bible bua kudisangishabu kutudi bua kumanyisha patoke bukalenge bua Yehowa. Nubakankamije bua kuelanganabu meji mu disambila pa bidi biamba mu mukanda wa Dimanya didi difikisha ku muoyo wa kashidi, mabeji a 173-5, bikoso bia 7-9. Bikalabu bakumbaje malu malomba, kabena ne kabingila nansha kamue ka kushala bindile bamba ne: kabena ne dimanya kuenza. Bamanyishi bapiluke mbakumbane mua kubaleja mushindu wa kumanyisha Bukalenge. Bikala bapiabapia bapete dikima didi dikengedibua bua kuamba lumu luimpe, badi mua kuikala ne dishindika dia se: Yehowa neabambuluishe.—Bienz. 4:31; 1 Tes. 2:2.
6 Binuenza madikolela bua kubenesha Yehowa mu bule bua dituku, nenupete masanka a kashidi buenu nuenu bine ne bua bakuabu kabidi.