Malonga A Bible Adi Apatula Bayidi

¹ Mutungula muena Éthiopie wakakonka Filipe ‘uvua mumuambile lumu luimpe lua Yezu’ ne: “Tshidi tshimpumbisha bua kubatijibua ntshinyi?” (Bien. 8:27-39) Mutungula eu ukavua ne dinanga bua mifundu mienzeja ku spiritu wa Nzambi ne, mumane kupeta diambuluisha dia mu nyuma dia Filipe, wakadiakaja bua kulua muyidi. Kadi bantu bonso ki mbatuishibue se: badi ne bua kukonkonona Mifundu pa nkayabu nansha.

² Diakalenga, bulongolodi bua Yehowa mbutupatuile broshire mupiamupia udi ne tshiena-bualu: Un livre pour tous, udi ulomba bantu bua bakonkonone mukenji wa mu Bible bua tshikondo tshietu. Malu adimu neikale ne bua kukoka ntema ya bantu ba muoyo umue, pamu’apa balonge bia bungi, kadi kabayi ne dimanya dia nsongo pa Bible. Tshiamu etshi tshitambe bulenga ntshilongolola bua kubapetesha dijinga dia kubala mukanda eu.

³ Patudi tutuadija dilonga dia Bible, nebituambuluishe bua kutangilula mibelu mitambe buimpe mifila mu tshisakidila tshia Mudimu wetu wa Bukalenge wa Kashipu 1996, idi yumvuija mushindu wa kulombola malonga adi apatula bipeta ku diambuluisha dia mukanda wa Dimanya. Mu dilombola dilonga, tuikale ne ntema ku malubuluka a muntu bua kujingulula malu adi akengela kutabalela bikole. Tumukankamije bua kudilongolola kumpala kua dîba ne bua kubala mvese ya mu Bible. Mandamuna adiye ufila mu miaku yende nkayende adi mua kuleja dianyisha diende diondoke bua bulelela. Misangu kana yonso, aba batu babala mikanda mikuabu ya Société ne babuela pa tshibidilu mu bisangilu batu balubuluka lukasa. Tukankamije muntu eu bua akule ne badiye nabu dîba dionso pa bidiye ulonga. Tumuleje ne bulenga buonso tshidiye ne bua kuenza bua kulubuluka mu nyuma. Katuena ne bua kutungunuka ne dilonga padi bantu kabayi benza madikolela bua kuangata dipangadika. Balongi ba Bible badi ne bua kuangata dipangadika dia kulonga, dia kuimana ku luseke lua bulelela kabayi batenkakana ne dia kuya kumpala batangile ku didilambula kudi Nzambi ne ku diangata batismo.

⁴ Mu amue mêku, mutu malonga a Bible a bungi, bualu bena mu dîku bavule badi balonga muntu ne muntu luende luseke. Kadi, mu nsombelu mivule, nebikale bianyishibue bua kulombola dilonga dia dîku dijima, bualu bidi bisuika dîku mu buobumue mu malu a mu nyuma.

⁵ Yezu udi ututumina dîyi bua tuenze bayidi. (Mat. 28:19) Bua nunku, tudi ne bua kulombola malonga adi asaka bantu ku dilubuluka bua bafike ku didiebeja dikuabu dituku ne: “Tshidi tshimpumbisha bua kubatijibua ntshinyi?”