Mandamuna ku nkonko yenu

▪ Mmikanda kayi itudi mua kulonga ne bantu bapiabapia bangabanga ne kutambulabu?

Kumpala kua muntu kulambulaye muoyo wende kudi Yehowa ne kutambulaye, udi ne bua kupeta dimanya dijalame. (Yone 17:3) Neapete malu adiye ne bua kumanya mu dilonga broshire wa Ntshinyi tshidi Nzambi utulomba? ne mukanda wa Dimanya didi difikisha ku muoyo wa kashidi, yonso ibidi. Nangananga broshire wa Utulomba ke wa kulonga kumpala. Kadi, bikala dilonga divua dituadije mu mukanda wa Dimanya, netuikale ne bua kulonga broshire wa Utulomba kunyima kua bamane kujikija mukanda. Bua tshinyi bidi bikengela kuenza nunku?

Broshire wa Utulomba udi uleja mu tshikoso malongesha a nshindamenu a mu Bible. Padiye mulonga kumpala, udi upesha mulongi dimanya dia nshindamenu pa malu malomba bua kusankisha Yehowa. Padiye mulonga kunyima, udi bu diambulula dilenga dia bivuaye mulonge mu mukanda wa Dimanya. Mu mishindu yonso ibidi, kankamija mulongi bua kukeba mvese mifila mu bikoso ne bua kueleelapu meji. Wikale umvuija bimfuanyi, bualu bidi biambuluisha bikole mu dilongesha.​—Tangila Tshibumba tshia Nsentedi tshia dia 15 Tshiongo 1997, mabeji 16-17.

Padi mulongi ujikija dilonga dia mikanda yonso ibidi eyi, udi mua kukokesha kuandamuna nkonko yonso ikalabu mua kumuela kudi bakulu mu didilongolola bua batismo. Bikalabi nanku, kabiena mua kuikala ne mushinga bua kulonga nende kabidi mukanda mukuabu, nansha muikala mulombodi ne bua kutungunuka ne kutabalela bimpe dikola dia mulongi.​—Tangila Tshibumba tshia Nsentedi tshia dia 15 Tshiongo 1996, mabeji 13-14, 17.