Utshine Yehowa dîba dionso
1 “Ditshina dia Yehowa didi tshibangidilu tshia meji.” (Mus. 111:10) Didi ditusaka bua kuenza malu mimpe ne dituambuluisha bua kunyema adi mabi. (Nsu. 16:6) Ditshina edi didi diumvuija kanemu kakole bua Mufuki wetu, kadi katusaka bua kubenga kumubungamija, katusaka kabidi bua kumutumikila. Eu ngikadilu utudi ne bua kuikala nende dîba dionso.—Nsu. 8:13.
2 Dituku dionso, bulongolodi bua Satana budi butukoka dikoka dia dikema bua tuetu kulonda njila yabu mibi. (Ef. 6:11, 12) Mubidi wetu mupange bupuangane eu ngua mpekatu ne utu katshia batulela pabuipi ne kuenza anu malu mabi. (Gal. 5:17) Nunku, bua kutumikila mêyi a Yehowa, kuikala ne disanka, ne kupeta muoyo, tudi ne bua kumutshina dîba dionso.—Dut. 10:12, 13.
3 Badi batulomba mu Ebelu 10:24, 25 bua kudisangisha pamue bua kukankamijangana ne ‘kutamba kuenza nunku’ mu tshikondo tshitudi etshi. Bituasua kupeta lupandu mu matuku a ku nshikidilu aa, tudi ne bua kuikala ne tshibidilu tshia kubuela mu bisangilu. Ditshina bua katubungamiji Nzambi didi ditusaka bua kubuela mu bisangilu ne kuanyisha bikole tshipatshila tshiabi. Bantu badi batshina Nzambi badi bamona dibuela mu bisangilu bu diakalenga dia pa buadi didibu nadi mu malu a mu nyuma.
4 Kutumikila mukenji udi utulomba bua kuyisha lumu luimpe lua Bukalenge, mmushindu mukuabu utudi tuleja ne: tudi tutshina Nzambi. (Mat. 28:19, 20; Bien. 10:42) Tshitudi tuenzela menemene mudimu wetu wa diyisha, mbua kuambuluisha bakuabu bua kulongabu pabu mua kutshina Yehowa ne kumutumikila. Ke tshitudi tukumbaja patudi tupinganyina bantu, patudi tudienzeja bua kutuadija kulonga Bible nabu, ne pashishe kubalongesha mêyi a Nzambi onso. Patudi tuenza malu aa, tudi tuleja ne: tudi tutshina Yehowa, ne kabidi, tudi banange bantu netu.—Mat. 22:37-39.
5 Bantu badi kabayi batshina Nzambi kabena bafika ku dianyisha malu a mu nyuma, ne lungenyi lua bena panu ludi lubutulangana, ludi lubakuata mu buteyi. (Ef. 2:2) Tuikalayi ne dipangadika dikole dia ‘kukuatshila Nzambi mudimu ne kunemekela ne ditshina.’ (Eb. 12:28) Nunku netupete mabenesha adi bantu badi batshina Yehowa dîba dionso bapeta.