Enza mudimu wa dinowa bikole
1 Baprofete ba kale ba Yehowa ne Yezu Kristo pende bakakula bua mudimu wa disangisha bantu eu. (Yesh. 56:8; Yeh. 34:11; Yone 10:16) Mudimu eu udi wenda wenzeka pamue ne dimanyisha dia lumu luimpe lua Bukalenge. (Mat. 24:14) Dishilangana pankatshi pa bantu badi benzela Nzambi mudimu ne badi kabayi bamuenzelawu didi dienda dimueneka patoke. (Mal. 3:18) Muanda eu udi umvuija tshinyi buetu tuetu?
2 Bujitu budi nabu muntu ne muntu: Tshilejilu tshia Paulo tshidi mua kutulongesha malu, bualu yeye uvua mudifile bikole mulue bu ntunga-mulongo wa mudimu wa bena Kristo wa diyisha bantu. Uvua udimona muikale ne dibanza dia kuyisha bua ne: bantu bonso bumvue lumu luimpe ne bapandishibue. Ke tshiakamusaka bua kuenza mudimu ne tshisumi bua kubambuluisha. (Lomo 1:14-17) Pa kumona mudi bantu bikale mu njiwu mikole lelu’eu, katuenaku bamone ne: tudi ne bujitu bunene menemene bua kuyisha bantu ba mu teritware udibu batupeshe anyi?—1 Kol. 9:16.
3 Tshikondo etshi ntshia kuenza malu kakuyi dijingakana: Tudi mua kufuanyikija mudimu wa buambi ne wa dipandisha bantu badi mu njiwu kampanda. Bidi bikengela kufika muaba udi bantu aba ne kubapandisha bangabanga ne dîba kupitadi. Tshikondo ntshishale tshîpi. Bantu badi mu njiwu! Kabiena bikemesha bua muvua Yezu muambile bayidi bende bua ‘balombe Mukalenge wa bintu bia kunowa, atume bena mudimu mu kunowa kuende.’—Mat. 9:38.
4 Bamanyishi ba Bukalenge ba bungi mbavudije mudimu eu udi upandisha bantu bualu mbamanye ne: tshikondo etshi ntshia kuwenza ne mitalu. Nsongalume mukuabu (diende Hirohisa) uvua musombe amu ne mamuende ne bakunyi bende banayi. Uvua ujuka patshiatshia pa dîba 3 uya kupanyisha bikandakanda bua kupeta makuta a kuambuluisha nawu dîku diabu. Nansha nanku, wakajinga bua kuvudija mudimu wende wa buambi, ke yeye kutuadija bumpanda-njila bua pa tshibidilu. Bu mudi mudimu eu kauyi mua kuenzeka kabidi, udiku ne mushindu wa kuuvudija pebe anyi?
5 “Matuku adi mashale makese.” (1 Kol. 7:29, Muanda Mulenga Lelu) Tuenzayi tshionso tshitudi mua kuenza mu mudimu mutambe bunene eu udi wenzeka pa buloba lelu’eu. Yezu wakafuanyikija mudimu eu ne wa dinowa. (Mat. 9:35-38) Tuetu tudifila bikole mu mudimu wa dinowa eu, tudi petu mua kuambuluisha muntu kampanda bua kubuelaye mu musumba munene wa batendeledi udibu bambe mu Buakabuluibua 7:9, 10.