‘Mapa adi mikale bantu’ adi adifila bua kulama mikoko ya Nzambi

¹ Ndikuatshisha kayipu edi dia dinanga dia kudi Yehowa didiye mutupeshile kudi Muanende ne diambuluisha dia “mapa mikale bantu” adiye mufile! (Ef. 4:8, 11, 12, NW) Bantu aba badi ne midimu ya bungi, tutelamu ne didifila didibu badifila bua kulama mikoko ya Nzambi. (1 Pet. 5:2, 3) Mapa a mushinga mukole aa adi atuambuluisha bikole. Balume aba badi baditatshisha ne muoyo mujima bua bantu bonso bikale bimpe mu nyuma, nansha mudi bamue bikale mu ntatu, bapiabapia mu tshisumbu, basama anyi pamu’apa benze bilema.​—Filip. 2:4; 1 Tes. 5:12-14.

² Padi mianda idi yenda yenzeka ne itatshisha bantu pa buloba bujima eyi itutshinyisha, balami bindondi aba badi balua bu ‘tshisokomenu ku tshipepele ne tshinyemenu tshia ku tshipupu.’ Badi batukolesha patudi katuyi ne makanda anyi patudi bazengele ne tujinga bua batukoleshe ku muoyo anu ‘bu misulu ya mâyi mu muaba mûme’ anyi ‘bu dileji dia dibue dinene mu buloba budi butondesha bantu.’​—Yesh. 32:2.

³ Badi bakolesha badi batekete: Bakulu badi badienzeja mu mushindu wa pa buawu bua kukankamija bawetu badi bakadi bayisha batumpika ngondo anyi kabatshiyi mene bayisha, benza muabu muonso bua kubambuluisha bua kutuadijilulabu kudifila mu midimu yonso ya tshisumbu. Makumbula a balami abu a dinanga mmambuluishe bantu ba bungi bua kutuadijilulula kabidi kubuela mu bisangilu bia tshisumbu pa tshibidilu ne kukola mu nyuma kufika too ne ku dituadija dipatuka kabidi mu buambi. Didienzeja dia bakulu dia nunku didi dileja mudi Yehowa utukuba ne dinanga ne dileja kabidi ne: Yezu Kristo udi wenda utulombola. Wakashiya tshilejilu tshia mushindu wa kukeba mukoko kayi wonso udi mua kuikala mupambuke ta mujimine.​—Mat. 18:12-14; Yone 10:16, 27-29.

⁴ Balami bindondi badi batangila bua kumona bimanyinu bidi bileja mudi muntu muikale ukadi mupambuke mu nyuma. Nunku muntu yonso udi ne bimanyinu bidi bileja ne: mmutekete ku muoyo, ukadi katshiyi ubuela mu bisangilu, anyi wenda ukepesha mudimu wende wa buambi, muntu eu udi mua kuikala pamu’apa dijinga ne diambuluisha dia mu nyuma. Bakulu badi ne bua kuambuluisha muanetu yonso udi mvuadilu ne ndengejilu wende wa nsuki utuadija kufuanangana ne wa bena panu, ne badi kabidi ne tshia bua kubela eu yonso udi ubianya malu a mu tshisumbu. Batangidi aba badi baditatshisha ne muoyo mujima ne dinanga mbadiakaje ku budisuile bua ‘kutupa mioyo yabu’ mu bionso bidibu benza bua kuambuluisha bantu ba mushindu’eu bua kupetulula dinanga dia Yehowa.​—1 Tes. 2:8.

⁵ Mu bidimu bishale, bamue bena Kristo batambule bakakosa makasa mu tshisumbu, kuteketabu mu nyuma bua masama, bua malu a mpetu ne bua bilumbu mu dîku. Bakulu kabena babianya anyi batobolola bantu, kadi badi babajadikila mu buimpe se: Yehowa udi utabalela mikoko yende yonso ne neabakuatshishe mu bikondo bikole. (Mus. 55:22; 1 Pet. 5:7) Balami ba mikoko ba ntema badi mua kuyambuluisha bua kumanyayi ne: bu yoyi mua ‘kusemena pabuipi ne Nzambi, yeye neasemene pabuipi nayi,’ neayikoleshe ku muoyo ne neayikankamije.​—Yak. 4:8; Mus. 23:3, 4.

⁶ Badi bangata balema ne mushinga: Balami bindondi aba badi baditatshisha kabidi bua ditangila aba badibu mua kulengulula ta kupua muoyo. Ku bantu batu balua mu tshisumbu kudi bamue badi bikale balema, bakuabu badi anu mu nzubu itubu balamina babedi bakadi kabashiyi bakumbane bua kuendela kuulu bimpe. Bua ntatu idibu nayi eyi, dienza diabu dia mudimu wa dimanyisha mukenji wa Bukalenge ndikese patupu. Pamu’apa babu bantu badibu mua kuyisha badi anu aba badi balua kubatangila, babedi nabu bakuabu anyi ba-minganga badi babuondopa. Nansha nanku, tshionso tshidibu mua kuenza tshidi tshiambuluisha bimpe menemene mudimu wonso wa diyisha udi wenzeka. (Mat. 25:15) Nansha buobo mua kuenza anu minite 15 patupu, badi ne bua kuyibala mu luapolo ne nebatungunuke ne kubabala bu bamanyishi ba Bukalenge badi kabayi bayisha batupisha ngondo.

⁷ ‘Mapa adi mikale bantu’ badi nangananga batabalela majinga a mu nyuma a bana babu mu matuku aa a tshidimu: mu tshikondo tshia Tshivulukilu. Ntshikondo tshiakanyine tshia bakulu kudienzejabu mu mushindu wa pa buawu bua kuambuluisha bonso badi bapambuke ne bakadi balekele kuyisha bua kupetulula kabidi disanka ne ditalala dia mu lungenyi didi difumina ku didisangisha dia musangelu mu tshisumbu! Tudi ne disanka dia bungi patudi tumona bantu ba mushindu’eu badi bikale ‘bena dîku dietu dia bena kuitabuja’ balua mu bisangilu ne baya mu buambi bileja kabidi ditabuja diabu mu mulambu wa tshia-bupikudi.​—Gal. 6:10; Luka 15:4-7; Yone 10:11, 14.