Mukanda wa kudi Biro

Bamanyishi basuibue,

Tudi ne disanka dia bungi bua kunumanyisha bungi bua bamanyishi ba mu ditunga dietu bavua bafile luapolo lua ngondo muisatu 2008. Mu ngondo au, bungi bupiabupia bua bamanyishi buvua bua bantu 150 309. Eu ke musangu wa kumpala udi bantu bapite pa 150 000 bafile luapolo luabu lua mudimu mu ngondo umue. Tudi kabidi ne disanka dia kunumanyisha ne: bungi bua mêba atuvua bapitshishe mu buambi, bungi bua bantu batuvua balongeshe Bible ne bua malu makuabu kabidi atutu tuenza mu buambi bivua bibande bikole. Kabidi, tudi ne disanka bua mudi bamanyishi 5 174 ba tshisumi ba mu Congo-Brazzaville bayishe bungi bukuabu bua mêba 122 365. Tudi tunuela nuenu buonso tuasakidila wa manza tente bua mudimu mukole unudi benze mu diyisha dia lumu luimpe lua Bukalenge.​—1 Kol. 15:58.

Mudimu wa luibaku udi pawu wenda bilenga ku Betele. Bualu, mu dia 28 ngondo muinayi 2008, bena dîku dia Betele bavua batuadije kudila mu nzubu wa tshidilu mupiamupia ne kuipikila mu tshikuku tshipiatshipia. Nzubu wa tshidilu mupiamupia eu mmunene misangu ibidi kupita wa kumpala, ne udi ne miaba ya bantu kusomba mitue ku 600.

Mu Dia lumingu dia 23 ngondo muibidi 2008, kuvua dibanjija dia Nzubu wa Mpuilu wa mu Limete ku Tshinsansa. Bantu bonso bavua bateleje muyuki wa dibanjija dia nzubu eu bavua ne disanka dia kuikala kutumbishilamu Yehowa ne dia kumulama bimpe ne mankenda. Mu ngondo wa 7, muaba wa Mpuilu wa ku Kisangani wakajika, nunku tudi tulongolola bua kuibaka mikuabu matuku makese kumpala eku ku Lubumbashi ne ku Mbuji-Mayi. Kuvua kabidi dibanjija dia muaba mukuabu wa kuenzela Mpuilu ku Butembo mu ngondo muinayi 2007 ne ku Beni mu ngondo muibidi 2008. Tudi ne disanka padi bana betu babuela miaba yonso eyi bua kutumbishilamu Yehowa.

Tushalayi anu bashindame patutshidi bindile lupandu lua Yehowa ludi luenda lulua lukasa.

Bana benu,

Betele wa Congo-Kinshasa