Tukubayi buobumue butudi nabu ku diambuluisha dia Bukalenge
1 Bukalenge bua Nzambi mmbulamatadi mulelela, udi ne bukokeshi ne bumfumu. Ke tshivua tshiena-bualu tshia buambi bua Yezu. (Mat. 4:17) Mudimu wa Yezu uvua mbangabanga mudimu wa dilongesha ne wa bumanyishi bua bulelela budi butangila Bukalenge. Yezu mmutulongeshe mua kusambila bua Bukalenge ne mua kutungunuka ne kubukeba. (Mat. 6:9, 10, 33) Bituashala pabuipi ne Yehowa kabidi ne bulongolodi buende, anyi bituakumbaja bujitu buetu bua kufila bumanyishi ne bikale batapuluke ne bena mu bulongolodi ebu, netuikale mua kulama buobumue butudi nabu ku diambuluisha dia Bukalenge. Ku bienzedi bietu ne ku mêyi etu, tudi tuleja se: tudi baditeke ku luseka lua Bukalenge.—Yone 18:37.
2 Biangatshile mu 1914, Bukalenge mmuanda mulelela kudi miliyo ya bakokedi babu. Buobumue budi munkatshi muabu mbushilangane menemene ne bidi bienzeka mu bulongolodi bua lelu budi butapulukangane. Bua kuikalabu bukole butuangaji, Bukalenge budi ne bua kuikala bualu bulelela kutudi. Bua tshinyi mbulelela ku mêsu kuetu?
3 Anu bu mu mbulamatadi yonso, Bukalenge bua Nzambi budi ne tshisumbu tshia mikenji. Pa bidi bibutangila, mikenji yabu idi mu Bible. Dibala dia Dîyi dia Nzambi ku musangu ne ku musangu didi dituvuluija malu adi malombibue kudi bakokedi ba Bukalenge. Didilongela mikanda ne mêyi-malombodi a kudi “mupika wa lulamatu ne wa budimu” bidi bituambuluisha bua kutumikila mikenji ya Nzambi mu nsombelu wetu wa matuku wonso. (Mat. 24:45, NW) Bituatumikila malu wonso atudi tulonga, Bukalenge nebutambe kulua bualu bulelela ku mêsu kuetu. Tudi tushemesha malanda etu a buena muntu pa buloba bujima ne netuibake dîku diena buobumue dia batendeledi bakokedi ba Yezu.
4 Bumanyishi bua Bukalenge budi butusanga mu buobumue: Tudi bapeshibue bukenji bua kuamba lumu luimpe lua Bukalenge “too ne mu bitupa bia kulekule bia buloba.” (Bienz. 1:8,NW) Kuenza mudimu wa buambi ‘mu diumvuangana’ kudi kutusanga pamue bualu tudi tuenza madikolela bua ‘kutumbisha’ Yehowa. (Lomo 15:5, 6) Pa kukuatshishangana ne mitalu ne bana betu ba pa buloba bujima, tudi tukolesha ditabuja dietu ne tudi tupa spiritu wa Yehowa mushindu wa kuenzaye mudimu netu mu dikumbana dia disua diende. Mu ‘dikumbaja mudimu wa Mukalenge,’ ‘netutantamane, katuyi tutshinkakana.’—1 Kol. 15:58,NW.
5 Mu matunga mavule, Satana udi uteta bua kutekesha buobumue buetu pa kutuila mudimu wa buambi nkanana. Udi utumika ne mishindu yonso idiye nayi bua kukebesha dipangakanangana ne kujula dibenga kumvuangana ku mêyi ne tshipatshila tshia kukeba milandu ne matandu. (Nsum. 6:19; Gal. 5:19-21, 26) Mmusue kutumona tubuelakana mu dikokangana ku mêyi dia mu bulongolodi ebu, anyi tusanyika amue malu a tshididi peshi a mu nsombelu wa bantu. (Yak. 3:14-16) Mifundu idi itukankamija bua kutantamena buenzeji buende, tshianana neatudie. (1 Pet. 5:8, 9) Bulelela bua ditekemena dia Bukalenge kabuena ne bua kujimina mu lungenyi luetu ne mu mutshima wetu.
6 Bituikala banyishe kulama buobumue buetu, tudi ne bua kuikala ne mmuenenu muimpe ne kudima meji a kuulu. Patudi tupetangana ne ntatu, nangananga padi bana betu babuejakajamu, tudi ne bua kuleja mamuma a spiritu bua kulama ditalala. Tudi ne bua kuimansha lutambishi, lubabu ne diditemba bia mu bulongolodi ebu bidi bijudija matapuluka. (Ef. 4:1-3; Kolos. 3:5-10, 12-14) Tudi ne bua kuuja tshieledi tshietu tshia lungenyi ne ngenyi mimpe ne miibaki. Bukalenge mbualu bulelela kutudi! Kadi tudi ne bua kuikala badimuke bua kutungunukabi ne kuikala nenku.—Ef. 6:11, 13.
7 Bu mudi ditekemena dia mpatshi dia Bukalenge dikala bualu bulelela mbutusange pamue mu tshikadilu tshia buobumue tshikalaku kashidi.—Mus. wa 133:1.