Mudi bena nkristo bandamuna ku dibatobolola dia patoke

UTU udiumvua bishi patu muntu kampanda ukutobolola anyi ukushiminyina malu? Pa tshibidilu utu udiumvua mutapibue. Bantemu ba Yehowa batu bakamangana ne nsombelu wa muomumue patubo balua tshintu tshia kufidila ngumu ya dishima ne mikonyangaja mu bifidi-ngumu. Kadi anu bu muakamba Yezu mu Matayo 5:11, 12, badi’anu ne kabingila ka kuikala ne disanka.

Tshilejilu, mukanda kampanda wa bena Katolike mu Allemagne wakamba ne: “Ntemu yonso mmuenzejibue bua kufila bia pa lukama 17 anyi 28 bia lupetu luende ku tshilombuelu tshia katendelelu.” Kadi, Bantemu ba Yehowa ki nkatendelelu to, ne mudimu wabo wonso mmukuatshisha kudi mapa a budisuile. Babadi bavule bakapambuishibua kudi lumu lua dishima elu, luakanyingalaja Bantemu ba Yehowa. Kadi mmunyi mudi bena nkristo mua kuandamuna ku dibatobolola dia mu bifidi-ngumu?

Tshilejilu tshidi bena nkristo ne bua kulonda

Matayi nshapita wa 23 udi uleja ne tshivuma muvua Yezu muele patoke baluishi bende bena bitendelelu bua lubombo luabo ne mafi. Bualu ebu budi bufila tshitembelu bua bena nkristo lelu pa mushindu wa kuandamuna ku bijanu anyi? Kabiena nanku menemene to. Muana wa Nzambi uvua muele patoke baluishi bende bena bitendelelu bualu uvua ne bukokeshi ne busulakaji bia pa buabi, wakenza nunku bua kuambuluisha misumba ivua iteleja.

Matayi 15:1-11 udi wamba ne: bavua bajana Yezu bualu bavua bamba se: balongi bende bavua basambuka bilele bia bena Yuda. Yezu wakandamuna bishi? Kakashintulula mmuenenu to. Imue misangu, Yezu uvua wandamuna buludiludi ku bijanu, ubenga mmuenenu yabo mikonyangale. Pa tshibidilu, bena nkristo kabena mu tshilema lelu pa kuteta mua kulongolola mmuenenu mibi pa mudimu anyi malongesha biabo, pa kuteta mua kutokesha nsombelu mu mushindu mulelela ne mululame. Badi benza nunku bua kuambuluisha bantu bena muoyo muimpe bua kujingulula se: bijanu pa Bantemu ba Yehowa mbia dishima ne mbia disendeka.

Kadi tangila muvua Yezu muandamune katupa kîpi kunyima pakamuambila balongi bende ne: ‘Kuena mumanye biebe ne, Bafalese bakulenduka, pakumvuabo dî edi, anyi?’ Bafarizeyi aba “bakalenduka”​—kabavu’anu bapampakane kadi bakalua baluishi bakena kulongolola bavua Yezu muimanshe. Ke bua tshinyi wakandamuna ne: “Nubalekele, badi balombodi bafofo.” Diyukidilangana dia pa mutu ne bantomboji ba tshitunu ba nunku divua dia tshianana, kadiyi dikuatshisha muntu nansha umue, ne divu’anu mua kufikisha ku dikokangana ku mêyi dia patupu. (Matayo 7:6; 15:12-14; fuanyikija ne 27:11-14.) Mandamuna akafila Yezu adi aleja se: kudi ‘tshikondo tshia kupuwa ne tshikondo tshia kuakula.’​—Muambi 3:7.

Bantemu ba Yehowa kabena batekemena se: muntu yonso abanyishe to. Badi bavuluka miaku ya Yezu eyi: “Nuenu badi batumbisha kudi bantu bonso, mulau ulualua kunudi, bualu bua bankambua babo bakenzela baprofete bakadi ne mashimi nunku kabidi.” (Luka 6:26) Bakebeja C. T. Russell, mulombodi wa kumpala wa Société Watch Tower, bua tshinyi kavua udibingisha ku mabandu. Wakandamuna se: “Wewe muimane bua kututa mbua yonso udi ukubulukila miseba, kuakuya kule nansha.”

Nunku katuena ne bua kulekela bijanu bia baluishi ba menemene bitukuatshisha ditànàji mu mudimu wetu kudi Nzambi to. (Musambu wa 119:69) Tudituayi ne kasuki mu mudimu wa bena nkristo balelela, mbuena kuamba se: kumanyisha Dîyi dia Nzambi. Kadi pa tshibidilu, netupete bikondo bia kuandamuna nkonko ne kumvuija tshidi mudimu wetu, kukolesha muntu ku muoyo ne kumushidimuna mu Dîyi dia Nzambi.​—Matayo 24:14; 28:19, 20.

Tuandamune ku bijanu anyi?

Yezu wakamba bua bamulondi bende ne: ‘Kanuena ba pa buloba . . . nenku ba pa buloba badi nenu lukuna.’ (Yone 15:19) Ngumu ya bifidi-ngumu ya bungi idi yunguijila Bantemu ba Yehowa mitobo ntshijadiki tshia lukuna elu, ne ngumu ya mushindu’eu tudi ne bua kuyilengulula. Pabi, imue misangu bifidi-ngumu bidi mua kufila lumu ludi luleja dibula diabi dia dimanya pa Bantemu anyi ludi lunyanga ne lumvuija bibi malu kampanda. Ba-kamona-kamba bakuabo badi bapetela ngumu ku mpokolo idi ne kansunga. Tutu tulengulula lumu lua dishima mu bifidi-ngumu anyi tubingisha bulelela mu njila muakanyine bilondeshile nsombelu, bilondeshile mujudi wa didiwula ne kipatshila kende.

Imue misangu tudi mua kufundila mupatudi wa tshibejibeji mukanda muakanyine bikalaye mua kuupatula muine emu bua kulongolola malu akafundaye. Kadi mukanda wa mushindu’eu udi mua kutuala tshipeta tshibengangane ne tshiufundila. Bishi? Dishima dia kumpala didi mene mua kuenda lumu bipitshidile, anyi baluishi badi mua kupeta kabidi mushindu wa kupatula mashimi anyi nsenda mu bikandakanda. Misangu mivule bitu bia meji bua kulekela tshilumbu tshia kufundila mupatudi mukanda mu maboko a bakulu. Padi lumu kampanda lua tshifidi-ngumu lujula biejeji bimana kufuikakaja, biro bia filiale bia Société Watch Tower bidi mua kumanyisha bisumbu bia mu ditunga malu aa, nenku biambuluisha bamanyishi bua kupeta mushindu wa kufila diumvuija dikumbane kudi bakonki.

Udi musue kubuelakana pebe mu ditandangana pa biambamba bibi ebi anyi? Mubelu wa Yezu bua ‘kubalekela,’ kubalengulula, udi wa kutumika nawu menemene bua batontolodi ba mushindu’eu. Bena nkristo ba lulamatu badi ne tubingila tua mu Bible bua kuepuka batontolodi ne mmuenenu yabo. (1 Kolinto 5:11-13; Tito 3:10, 11; 1 Yone 2:19; 2 Yone 10, 11) Pikala muntu wa bululame musue kumanya né bijanu pa Bantemu mbiashila pa bulelela anyi dishima, pa tshibidilu dimanya diebe diibaka bimpe nkayadi ndikumbane bua kufila diandamuna.​—Tangila Tshibumba tshia Nsentedi tshia mu dia 15 Luabanya 1986, mabeji a 13 ne 14 (fransé).

Paudi ututakena ne lumu lukonyangale mu tshifidi-ngumu, londa mubelu wa Nsumuinu 14:15: ‘Mutshimbakanyi udi witabuja dî dionso, kadi muena budimu udi utangila kudiye uya.’ Bantu bavule mu [ditunga dia] Suisse bakanyingalala bikole pakamba muyuki wa mu tshifidi-ngumu kampanda ne: Ntemu nsongakaji kasanga wakafua bualu balela bende bakabenga bua bena mu lupitadi kumuela mashi. Malu avua nanku anyi? Tòo. Mubedi wakabenga dimuela mashi bua ditabuja diende, kadi wakitaba manga makuabo mapinganyi akena ne mashi. Bivua mua kuikala bibanga kumpala kakuyi bualu ne bumue bivua mua kupandisha muoyo wende. Kadi, lupitadi luakanengesha malu tshianana too ne pakafua mubedi. Muyuki wa mu tshifidi-ngumu kawuvua muakule bua malu wonso aa nansha.

Nenku, tshinka bungi bua malelela adi mu miyuki ya mushindu’eu. Tudi mua kumvuija bakonki ne: bakulu badi batangidila malu aa ne dinanga dionso ne mu diumvuangana ne mêyi-maludiki a mu Bible. Dilamata ku mêyi-maludiki dîba dia kuandamuna didi ditukanda ku ditupika diakamue ku nkomenu.​—Nsumuinu 18:13.

Ngumu mipetela ku mpokolo wayi idi ne mushinga

Mu siekele wa kumpala, bantu bakatangalaja mashimi pa bidi bitangila Yezu Kristo bua kunyanga lumu luende, bamue bakamuleja mene bu mutungidi wa tshisamba tshiende. (Luka 7:34; 23:2; fuanyikija ne Matayo 22:21.) Kunyima, tshisumbu tshipiatshipia tshia bena nkristo tshiakapetangana ne buluishi ku nseka yonso ibidi: kudi bitendelelu ne bena mu bulongolodi ebu. Bu ‘muakasungula Nzambi malu mapote a pa buloba,’ bavule bakapepeja basadidi bende. (1 Kolinto 1:22-29) Bena nkristo balelela lelu badi ne bua kutabalela ditobolola, bualu didi mushindu munga wa dikengeshibua.​—Yone 15:20.

Kadi, Bantemu ba Yehowa badi banyisha, padi muntu udibu bayikila nende uleja ndubidila ne uleja mmuenenu wa muomumue ne wa bamue bakumbudi ba Paulo ku Roma, bakamba ne: ‘Tudi basue kumvua bualu bûdi wela meji; bualu bua tshisumbu etshi, tudi bamanye ne, Badi batshibanda kuonso.’​—Bienzedi 28:22.

Pesha bantu bamanyisha bibi diumvuija, udifila ne lutulu. (Lomo 12:14; fuanyikija ne 2 Timote 2:25.) Balomba bua bakebe ngumu ya mpokolo wa kumpala pa Bantemu ba Yehowa, ebi nebiambuluishe bua kusokolola mabandu a dishima. Udi kabidi mua kutumika ne mumvuija maleja kudi Société Watch Tower, adi afila tunungu pa bulongolodi, malu abu a kale, ne malongesha abu.a Filipe wakandamun’anu Natanaele musangu umue ne: “Lua umone.” (Yone 1:46) Tudi mua kuenza bia muomumue. Eu udi musue neikale mua kuakidibua bimpe bua kukumbula Nzubu wa Bukalenge wa muaba udiye musombele bua kudimuenena bu-muntu bua Bantemu ba Yehowa ne mitabuja abu.

Kutshingishibu kudi baluishi

Ndikankamija kayipu bua kumanya se: ditobolola adi kaditu dikanda bantu bua kulua Bantemu! Mu programe kampanda munene wa diyukidilangana ku televizion mu Allemagne, batontolodi bakasuikila Bantemu mashimi mavule. Mubandidi kansanga wakajingulula se: mêyi abo avua malengeja ne avua a patupu pashishe wakasakibua bua kutuadijilula dilonga diende dia Bible ne Bantemu. Eyowa, ditobolola dia patoke didi imue misangu mua kufikisha ku bipeta bilenga!​—Fuanyikija ne Filipoi 1:12, 13.

Mupostolo Paulo uvua mumanye ne: bamue bavua mua kufila ntema ku “tusumuinu” pa mutu pa bulelela. Nenku wakafunda ne: ‘Wikale ne meji mapole mu malu onso, witabuje makenga, wenze mudimu wa butangadiki, ukumbaje mudimu webe wa Nzambi.’ (2 Timote 4:3-5) Nunku kushidi ditànàji muaba to, ne ‘kutshingishibu nansha ku bualu bumue’ kudi baluishi bebe. (Filipoi 1:28) Shala mupole ne mudibumbe ne isha lumu luimpe ne disanka, ne neumone mua kupita ne dikima dionso ne ditobolola dia patoke. Eyowa, wavuluka dilaya dia Yezu: ‘Panupendabo ne panukengeshabo ne panushiminyinabo mashimi onso, bua bualu buanyi, nenuikale ne disanka. Nusanke, nuikale ne disanka dingi, bualu bua difutu dienu didi mu diulu ndinene; bakakengesha baprofete nunku bakadi ku mpala kuenu.’​—Matayo 5:11, 12.

[Mêyi adi kuinshi]

[Lungenyi lunene lua mu dibeji 27]

Panudi nututakena ne baluishi, ke muakambila Yezu balongi bende: “Balekelayi nanku.” Uvua usua kuamba tshinyi?

[Lungenyi lunene lua mu dibeji 29]

“Nudi bena diakalenga panutobolola bantu ne panukengeshabo ne panushiminyinabo malu mabi wonso bua bualu buanyi.”​—Matayi 5:11, NW