Bua tshinyi kufunda note bua bantu bapangila ku mabu?

¹ Bantemu babidi bena dibaka bakapatuka mu buambi pa dinda. Pakasemena dîba munda-munya, bakalukila bubidi buabo kutangila bantu bavua kabayi ku mabu musangu wa kumpala. Muntu kampanda wakabakidila ne kubatelejaye ne ntema. Wakangata mukanda wa Muoyo wa kashidi ne kubalombaye né bavua mua kualukila. Katu muanji kuyukidilangana ne Bantemu ba Yehowa nansha, nenku uvua ne nkonko mivule ya kubela; dilonga dia Bible diakatuadija. Bena dibaka abu bakasanka bikole muvuabu bapete muntu mufuane mukoko. Netusanke bua bualu bua mushindu’eu kutufikilabu anyi? Bidi mua kuenzeka nenku bituikale tufunda ne lubatshi mamanyisha bua bantu bapangila ku mabu ne tualukila pa lukasa.

² Tuvua bakankamijibue misangu ne misangu bua kufunda mamanyisha masunguluke ne kualukila pa lukasa. Anu mudibi bileja kuulu eku, tudi mua kupeta bipeta bimpe bitambe tuetu mua kualukila ku nzubu ya bantu kunyima mu dituku dine adi. Imue misangu, mutudi tudibamba bua kujikija teritware mutukosela, katuena tufunda note bua bantu bapangila ku mabu ne disuminyina dikengedibue. Bamue batu badiambila ne: ‘Tutu tujikija teritware wetu mbingu ibidi peshi isatu yonso; nenku kabiena ne mushinga bua kufunda note bualu, mu mishindu yonso nengalukile.’ Kadi, udi apa ne kabingila ka pa mutu ka kufunda note. Bushuwa, mu teritware mienzela mudimu bikole, netukebulule ne lubatshi aba badi bakanyine mukenji pa kuenza madikolela bua kupeta bantu batuvua bapangile mu dipita dietu dia kumpala. Mu mushindu kayi?

³ Mu misoko mivule, bantu pabuipi ne tshia bibidi kabena ku mabu munda-munya. Nenku, netudiundishe teritware wetu pa kuditonta bipitshidile pa bantu bapangila ku mabu. Nansha mu teritware mienzela mudimu misangu anu mikese, tudi mua kubabidila bipeta bilenga pa kuenza madikolela bua kupetangana ne bantu buonso kumpala kua kupingaja fishi wa teritware.

⁴ Tudi mua kudilongolola bua kualukila dituku dikuabu bua kumona bantu bapangila, nangananga bimpe munkatshi mua lumingu. Ba bungi batu bapangadije kualukila mu dituku dishilangane ne dia dipita dia kumpala ne pa dîba dikuabu. Pamu’apa newanyishe kudilamina dîba mu disambombo ne mu dia lumingu bua kualukila kumona bantu bapangila munkatshi mua lumingu. Tuambe eku tuambe eku, bisumbu bia bungi mbifike ku dimona se: mudimu wa buambi muenza ku dilolo udi ne bipeta bimpe. Pa dîba dia buena edi, bamanyishi badi bapeta bipitshile pa tshia bibidi tshia bantu ba mu teritware.

⁵ Udi ne bua kufunda makumbula ku luseke. Biwamona se: kuena ne mushindu wa kualukila bua kumona bantu bapangila, upeshe eu udi ne bujitu mu tshisumbu kabeji kebe ka note de maison en maison, bua kutumikabu naku kudi bana betu balume ne bakaji baalua kuenza mudimu mu teritware.

⁶ Mu dikobelela ne ntema tshitupa etshi tshia mudimu wetu, netuikale ne bipeta bitambe kuvula kabidi ne disanka. Netuikale ne disankishibua, bamanye se: tudi tukeba ne lubatshi bantu badi bafuane mikoko ne tubakobelela.—Yehez. 34:11-14.