Tuikalayi Benji Ba Dîyi, Ki Ng’amu Bateleji Patupu
1 Mu tshikondo tshietu etshi, bena nkristo balelela badi bangata ne mushinga mujima dikankamijibua dia kuikala benji ba Dîyi, kabayi amu bateleji patupu. (Yak. 1:22) Ngikadilu wabu mmushilangane kule ne kule ne eu wa badi badiamba bena nkristo kadi basadila Nzambi anu ne mishiku yabu. (Yesh. 29:13) Yezu wakaleja patoke ne: amu aba bikale mua kuenza disua dia Nzambi ke bapandishibua.—Matayo 7:21.
2 Ntendelelu mupange midimu ya budiambiki kudi Nzambi kêna ne mushinga nansha. (Yak. 2:26) Nenku diebeje ne: ‘Bienzedi bianyi bidiku bijadika se: ditabuja dianyi ndilelela anyi? Nsombelu wanyi udiku mu diumvuangana menemene ne mitabuja andi nawu anyi? Mmunyi mundi mua kuidikija Yezu?’ Pa kuandamuna bulelela ku nkonko eyi, netuikale mua kumona dilubuluka dietu pa bidi bitangila kuenza disua dia Nzambi ne bidi bitushadile bua kukumbaja.
3 Bu mutudi bayidi ba Yezu, tudi ne bua kuikala ne tshipatshila tshia kumpalampala tshia muomumue ne etshi tshileja kudi mufundi wa misambu: “Kudi Nzambi tudi tujinga kulambula disamuna mu bule bua dituku dijima, ne netutumbishe dîna diende tshiendelele.” (Mus. wa 44:8, NW) Buena-nkristo nnsombelu udi ne bua kulejibua ku dituku too ne ku dikuabu ne mu malu wonso atudi tuenza. Tudi tupeta disankishibua divule patudi tuleja ku midimu yetu yonso dijinga dietu dilelela dia kusamuna Yehowa.—Fil. 1:11.
4 Kusamuna Yehowa kakuena kuimanyina amu pa kuikala ne nsombelu mululame nansha: Bu ngikadilu mulenga muikale tshionso tshidi Nzambi ukengela, tuvua mua kukeba amu mua kudiakaja patupu. Kadi, ntendelelu wetu udi umvuija kabidi ne: tudi ne bua kumanyisha ngikadilu milenga ya Nzambi ne kujikula patoke dîna diende.—Eb. 13:15; 1 Pet. 2:9.
5 Buambi bua patoke bua lumu luimpe mbumue bua ku midimu ya mushinga mukole itudi ne bua kukumbaja. Yezu wakadifila mu mudimu eu, bualu uvua mumanye se: ke muoyo wa kashidi bua aba bateleja. (Yone 17:3) Lelu’eu, “mudimu wa Dîyi” kawena ne mushinga mushadile nansha; mmushindu umu’epele wa dipandishibua dia bantu. (Bienz. 6:4; Lomo 10:13) Masanka adi matuindile adi atumvuija bua tshinyi Paulo wakatukankamija bua ‘kuambila bantu Dîyi dia Nzambi’ ne ‘kunanukila ne kubambila.’—2 Tim. 4:2.
6 Mpa muaba kayi patudi ne bua kuteka disamuna Yehowa mu nsombelu wetu? Mufundi wa misambu wakaleja ne: ke tshivua dijinga diende mu bule bua dituku dijima. Etshi ki mmuenenu wetu kabidi anyi? Mmuomo menemene. Netuikale mua kumona malanda etu ne bakuabu bu mishindu mivule ya kumanyisha dîna dia Yehowa. Netukebe mua kutangija muyuki wetu ku malu a mu nyuma. Netuenze madikolela bua kukumbaja mudimu wa buambi pamue ne tshisumbu ku musangu ne ku musangu. Aba badi ne mushindu badi mua kuangata dipangadika dishindame bua kuenza mudimu wa bumpanda-njila, eu ùdì wambuluisha bua kuteka mudimu wa buambi pa muaba wa nsongo dituku dionso mu nsombelu wabu. Dîyi dia Nzambi didi ditujadikila ne: aba badi benza disua dia Nzambi ne dinanukila mbena disanka.—Yak. 1:25.