Mayuki A Bulunda Adi Mua Kulenga Ku Mutshima

¹ Diyuki didi mua kumvuijibua bu: “dipeshangana dia ngenyi.” Dituadija mayuki a bulunda pa tshiena-bualu kampanda tshidi tshisankisha muntu netu didi mua kukoka ntema yende ne kutuambuluisha bua kulenga mutshima wende ne mukenji wa Bukalenge. Dimonamona malu ndileje ne: mbiakanyine kutuadija ne bantu diyuki dia bulunda ne didilekelela pamutu pa kubala malu mulongolongo.

² Mushindu wa kutuadija diyuki dia bulunda: Kuikala mukumbane bua kuyukila ne muntu kakuena kumvuija ne: ndimupatuila ngenyi ne mvese mulongolongo ya kukemesha nansha. Bidi biumvuija amu kutuadija diyukidilangana. Tshilejilu, mayuki atutu tuenza ne bena mutumba netu mu kartié kaatu a didingidija kadi atu masulakane. Pamutu pa kudianjila kuela meji ku miaku itudi tujinga kuamba, tudi tuandamuna buludi ku ngenyi idiye ufila. Bituateya ntema milelele ku bidiye wamba, neikale mua kuenzulula mayuki a mushindu’eu. Bidi ne bua kuikala bia muomumue ne patudi tufila bumanyishi.

³ Biena-bualu bu mudi dishipangana, malu adi afikila bansonga, malu adi atangila tshimenga tshietu, nsombelu wa bulongolodi ebu peshi bikondo mene, bidi mua kuambuluisha bua kutuadija mayuki a bulunda. Biena-bualu bidi bilenga buludiludi nsombelu wa bantu wa matuku onso mbiakanyine bua kusonsola dijinga diabu dia kumanya bia bungi. Diakamue padi diyuki ditungunuka, tudi mua kudiludika ku kakese ku kakese ku mukenji wa Bukalenge.

⁴ Kuenza diyuki didilekelela kakuena kumvuija ne: didilongolola kadiena ne mushinga nansha. Didi ne mushinga. Kadi, kabiena bikengela kuenza didilongolola didi dikole peshi kukuata miaku yonso ya muyuki ku muoyo nansha, bituenza nunku katuakuikala bajoboke mu diakula. (Tangila 1 Kol. 9:​20-23.) Mushindu mupite buimpe wa kudilongolola ng’wa kusungula tshiena-bualu tshimue peshi bibidi bia mu Bible, ne tshipatshila tshia kushindamijilapu mayuki. Diambulula malu a mu mukanda wa Comment raisonner nedituambuluishe bikole.

⁵ Ngikadilu idi ikengedibua bua diyuki dia bulunda: Patudi tuyukila ne muntu, tudi ne bua kuikala ne musangelu ne kuamba bulelela. Difukisha mimuemue ne dikala ne mpala musanguluke nebituambuluishe bua kuleja ngikadilu eyi. Tudi tufila mukenji mutambe yonso ku bulenga mu bulongolodi ebu; kakuena tshidi tshikoka kabidi ntema ya bena mitshima miakane nansha. Biajingululabu ne: dibatabalela dietu ndisonsola kudi dijinga dilelela dia kubamanyisha lumu luimpe, pamu’apa nebasakibue bua kuteleja.​—⁠2 Kol. 2:⁠17.

⁶ Tshikondo tshia diyuki tshidi ne bua kuikala tshimpe. Nenku, tuikale ne mutshima mulenga ne bujinguludi patudi tumanyisha mukenji wa Bukalenge. (Gal. 5:22; Kolos. 4:⁠6) Tudienzeje bua kushila mutuyukidishi mmuenenu mulenga. Pa kuenza nunku, nansha bituapangila kumulenga ku mutshima bua musangu wa kumpala utudi tuakula nende, muntu eu neanyishe bua kuteleja Ntemu kampanda pamuyukidishaye musangu walonda.

⁷ Bua kutuadija mayuki a bulunda kabiena bikengela amu kuikala ne dimanya dijalame dia muyuki kampanda mukondakane nansha. Bidi bikengela amu kusonsola dijinga dia muntu dia kumanya bia bungi pa kutuadija diyuki pa tshiena-bualu tshidi tshikoka ntema yende. Patudi badilongolole, tudi mua kutuadija mayuki a bulunda ne bantu bonso. Tudienzeje bua kulenga mitshima ya bantu batuapeta pa kubamanyisha lumu lutambe buimpe ku yonso: mabenesha a Bukalenge akena ne ndekelu.​—⁠2 Petelo 3:⁠13.