“Etshi Tshidi Tshiumvuija Muoyo Wa Kashidi”
1 Mêyi a Yezu mafunda mu Yone 17:3 nga kuangata ne mushinga mukole. Adi amba bimpe tshidiwu asua kumvuija ne: kulonga mua kumanya Nzambi ne Kristo kudi kumvuija muoyo wa kashidi! Kadi, mbikumbane amu kumanya Yehowa ne Yezu bua kupeta difutu dia nunku anyi? Tòo. Bena Izalele bavua bamanye se: Yehowa uvua Nzambi wabu, kadi nsombelu wabu uvua uvila ditaba diabu. Nenku, bakapangila dianyishibua kudi Nzambi. (Hosh. 4:1, 2, 6) Lelu’eu miliyo ya bantu badi imue misangu ne “lukunukunu bua Nzambi; kadi kabiyi mu diumvuangana ne dimanya dijalame.” (Lomo 10:2, NW) Bidi bikengela bafike ku dimanya Yehowa “Nzambi umuepele mulelela,” ne bamanye mua kumusadila biakane. Mu tshipatshila etshi, netufile mu Tshisua-munene mukanda wa Dimanya didi difikisha ku muoyo wa kashidi. Netuenze munyi? Mibelu mikese idi ilonda eyi neyikale ne dikuatshisha kutudi.
2 Bu mudi lungenyi lua kuikala ne muoyo wa kashidi pa buloba kaluyi tshibidilu kudi bantu bavule, mbuelelu eu neikale mua kukoka ntema yabu:
◼ “Tudi tuela bena mutumba netu lukonko. Biakulombabu bua kusomba tshiendelele mu bulongolodi bua nunku, newitabe dilomba adi anyi? [Leja tshimfuanyi tshia mu mabeji 4-5 tshia mu mukanda wa Dimanya. Teleja diandamuna.] Nsombelu eu wa disanka udi bushuwa mua kumupeta. Kadi buebe wewe, ntshinyi tshiudi ne bua kuenza bua kumupeta? [Lekela muntu andamune.] Bambisha tshidi tshitulomba mu Yone 17:3. [Bala mvese au.] Mukanda eu udi wambuluisha bantu bavule bua kupetabu dimanya edi dia pa buadi. Newanyishe bua kuupeta anyi? [Teleja diandamuna.] Mu dikumbula dianyi dialonda, nenkuleje bua tshinyi bidi bia meji bua kuitabuja ne: tudi mua kusomba tshiendelele pa buloba mene apa.”
3 Paudi walukila bua kutangila aba bauvua muyukidilangane nabu pa Yone 17:3, udi mua kutuadija nunku:
◼ “Musangu mushale, mvua mukubadile mêyi a dikema a Yezu adi mafunda mu Yone 17:3, mudiye utujadikila ne: kulonga mua kubamanya, yeye ne Tatuende, kudi kumvuija muoyo wa kashidi. Kadi bantu ba bungi badi bela meji ne: nsombelu mulenga mmutuindile anu mu diulu. Udi wela meji kayi? [Teleja diandamuna.] Biwikala ne mukanda umvua mukushile pabuipi, nensanke bua kukuleja imue mvese ya mu Bible ìdì ijadika ne: Mparadizu neasuludibue pa buloba. [Yukidilanganayi pa bikoso 11-16 mu mabeji 9-10 a mukanda wa Dimanya.] Musangu ùdì ulonda, nensanke bua kukuleja bua tshinyi udi mua kuikala ne dieyemena mu malaya a mu Bible aa. Pa kuindila dituku adi, imue misangu udiku mua kubala nshapita 2 mu mukanda webe anyi?”
4 Mona dileja dikala mua kuakanyina biwapetangana ne muntu muena kuitabuja:
◼ “Tudi tuakula ne bena mutumba netu bua tubingila tua dikalaku dia bitendelelu bishilashilangane bivule pa buloba. Anu mu ditunga dia États-Unis nkayamu, bitendelelu mbitue ku 1 200 ne mu matunga onso masanga bidimu bipite pa 10 000. Pabi, Bible udi anu umuepele. Mmunyi muudi mua kumvuija divulangana dia bitendelelu dia mushindu’eu? [Indila diandamuna. Bulula mukanda wa Dimanya pa nshapita 5 ne bala tshikoso 1.] Neupete mandamuna masankishi ku nkonko eyi pa kubala nshapita eu. Nensanke bua kukushiila mukanda eu biwajinga kuukonkonona.” Mukuyukidishi yeye muitabe, nupunge dîyi bua kumonangana pa dîba dijadika ne ukomeshe nunku: “Musangu udi ulonda, netumone tshilejilu bu bikala bitendelelu bionso bidi amu njila mishilashilangane idi ifikisha kaba kamue.”
5 Pawalukila bua kutungunuja diyukidilangana dienu pa tubingila tua dikalaku dia bitendelelu bivule, udi mua kuamba ne:
◼ “Musangu mushale utuakamonangana, ngakajula lukonko bua kumanya bu bikala bitendelelu bionso bidi ndekelu wa bionso amu njila mishilashilangane ìdì ifikisha ku kipatshila ka muomumue. Udi wela meji kayi? [Teleja diandamuna.] Nensanke kukuleja mu mukanda umvua mukushile tshivua Yezu muambe pa bualu ebu. [Bulula mukanda wa Dimanya pa nshapita 5 ne bala bikoso 6-7 mudibu batela Matayo 7:21-23.] Imue misangu udi udiebeja bua tshinyi bidi bia mushinga bua kumanya mu bujalame disua dia Nzambi. Neumone se: bikoso bìdì bilonda bidi bilongesha malu mavule. Bu wewe mua kusua, bala tshitupa tshia nshapita tshidi tshishale; mu dikumbula dianyi dialonda, nensanke bua kukuleja mushinga menemene wa dimanya dijalame dia mu Bible.”
6 Mbuelelu wa buludi utu misangu yonso mulenga bua kutuadija malonga a Bible. Mêyi a mbangilu adi alonda aa mmangatshila mu dibeji dia 12 dia mukanda wa “Comment raisonner”:
◼ “Ndi mukukumbule bua kukulomba [bua witabe] dilonga dia Bible dia ku nzubu kabiyi kufuta mfranga. Biwanyisha, nensanke bua kukuleja mu minute mikese mushindu utu bantu bakonkonona Bible ku mabu, ne mêku abu, mu matunga matue ku 200. Tudi mua kutuadija ne tshiena-bualu tshiwikala musungule. [Leja tshikebelu tshia mukanda wa Dimanya.] Kudiku tshimue tshidi tshitamba kukusankisha anyi?” Lekela muntu adisunguile. Bulula mukanda pa nshapita udi umusankisha ne nutuadije dilonga biangatshile ku tshikoso tshia kumpala.
7 Mona ngenzelu mukuabu wa buludi uudi mua kuteta bua kutuadija malonga:
◼ “Ndi mfila malongesha a Bible kabiyi kufuta mfranga ne ntshidi ne dîba bua kusakidila balongi bakuabu. Ndi ntumika ne mukanda eu. [Leja mukanda wa Dimanya.] Dilonga didi diangata ngondo mikese patupu ne didi difila mandamuna ku nkonko bu mudi: Bua tshinyi Nzambi mmulekele dikenga? Bua tshinyi tudi tukulakaja ne tufua? Ntshinyi tshidi tshifikila banangibue betu badi bafue? Peshi kabidi: Mmushindu kayi utudi mua kusemena kudi Nzambi?” Pashishe webeje ne: “Ndiku mua kukuleja mutubi bienzeka anyi?” Bikala muntu kayi wanyisha dilonga, muebeje né udi wanyisha kuikala ne mukanda wa Dimanya bua kudibadilaye pa nkayende. Biambaye ne: neawubale, muleje mukanda ne muambile mushinga wawu wa matuku aa.
8 Ntshiuma kayipu tshidi natshi muntu udi ne dimanya dijalame dia Nzambi ne dia Kristo! Kulonga mua kubamanya kudi kumvuija bushuwa muoyo wa kashidi mu nsombelu mupuangane. Tubabidile bikondo bionso bua kumanyisha kudi bakuabu dimanya didi difikisha ku muoyo eu mu ngondo wa Tshisua-munene.