Dîyi Dia Nzambi Didi Ditulombola
1 “Bulongolodi bua lelu budi ne masama mavule, kadi manga kaena amueneka. Miliyo ya bantu mbakengesha kudi nzala; bakuabu, bungi bùdì budiunda, badi badienza bapika ba bintu bia lulengu. Mêku mapanduluke adi enda avulangana, eku diangatangana dia tshibindi ne tshinyangu bia ‘mu butshika’ bivudija ngumu. Bintu bia lulengu bidi bivulangana mu lupepele lutudi tueyela ne mu mâyi atudi tunua. Katuyi tupua muoyo dibunda bibawu, didi dikengesha bantu bavule mu miaba itudi basombele.”
2 Ke mushindu udi mukanda wa La Bible : Parole de Dieu ou des hommes ? utuadija. Mbangilu wawu udi ne mushinga lelu’eu anu muvuabi tshikondo tshiakapatukawu kukadi bidimu muanda-mutekete. Bantu badi bakengela kumanya ne: Dîyi dia Nzambi didi ditulombola ne didi dileja mishindu ya dijikija ntatu yonso idi itukuata. Mu Tshiongo, netudienzeje bua kubambuluisha pa kufila Traduction du monde nouveau ne mukanda wa La Bible : Parole de Dieu ou des hommes ? Tudi bamanye se: kushila muntu mukanda patupu ki ntshieya tshia se: neitabe bulombodi bua Nzambi. Bidi bitukengela kualukila bua kutangila bantu ne tshipatshila tshia kutuadija malonga a Bible. Tudi batuishibue se: netupete diambuluisha bituenza madikolela aa. (Mat. 28:19, 20) Mona bimue bilejilu bitudi tukulomba bua kulonda:
3 Biwapeta muntu mukulumpe, udi mua kuteta mbuelelu eu:
◼ “Ndiku mua kukuela lukonko: Pauvua muana mutekete, bantu bavua ne ngikadilu kayi bamue kudi bakuabu? [Lekela muntu andamune.] Kuenaku umona se: mbishilangane bikole lelu’eu anyi? Bua diebe dimona, bua tshinyi malu mmashintuluke? [Lekela muntu andamune.] Bushuwa, tudi tumona dikumbana dia mulayi wa mu Bible. [Bala 2 Timote 3:1-5.] Bible kêna amu umvuija ne bujalame bulongolodi ebu mushindu udibu lelu’eu; udi ulaya bulongolodi bulenga mu matuku atshilualua akadi pabuipi. Ke bua tshinyi tudi tukankamija bantu bonso bua kumubala. Udiku mubambishe ne: nkudimuinu undi mutumike nende, Traduction du monde nouveau, mmufunda mu ngakuilu musunguluke anyi?” Sakidila ne: mmufunda mu Mfualansa ya lelu, ke tshidi tshitamba kuvuija mifundu mipepele bua kumvua. Leja mukanda wa La Bible : Parole de Dieu ou des hommes ? ne zangika nshapita wa 10, udi usulakaja mulayi mukuabu utudi tumona wenda ukumbana. Fila Bible ne mukanda.
4 Paudi walukila bua kutangila muntu mukulumpe uuvua mushile Bible ne mukanda, udi mua kuamba ne:
◼ “Musangu mushale, tuakapunga dîyi bua kuamba ne: nsangilu wa bantu wa lelu mmunyanguke mu malu mavule, patudi tutangila nsombelu mushindu uvuaye kukadi bidimu bikese patupu. Kadi, ndi mualukile bua kukuleja ne: Bible udi ulaya bulongolodi bulenga bua matuku atshilualua. [Bala Buakabuluibua 21:3, 4.] Dimanya dia se: Dîyi dia Nzambi didi diamba nunku didi ne bua kutusaka bua kutangila malu makuabu adidi nawu bua kutumanyisha.” Bulula mukanda wa Parole de Dieu pa nshapita 14 ne bala bik. 3-4. Lomba muntu bua dilonga dia Bible kabiyi kufuta mfranga.
5 Biwatuadija diyukidilangana ne nsonga udi mua kuamba ne:
◼ “Ndi njinga kukuela lukonko: Muudi nsonga, udiku wela meji ne: tudi ne kabingila kampanda ka kumona matuku atshilualua ne ditekemena anyi? Mmunyi muudi umona malu? [Lekela nsonga andamune.] Diakalenga, tudi ne kabingila kakole ka kuikala ne lungenyi luimpe. [Bala Musambu wa 37:10, 11.] Bu mudi bantu ne mmuenenu mishilangane pa Bible ne malu adimu, tudi bapatule mukanda eu, La Bible : Parole de Dieu ou des hommes ? Bambisha tubingila tudi mukanda eu utukankamijila dibala dia Bible. [Bala bik. 16-17, mab. 10-11.] Bituadijile tshikondo tshitudi tutuishibua ne: Bible udi wamba bulelela, tudi tupeta ditekemena dilelela bua matuku atshilualua. Biwajinga kubala mukanda eu, nensanke bua kukushilawu ku dipa dikese.”
6 Paudi walukila bua kutangila nsonga uvua muitabe mukanda wa “ Parole de Dieu,” udi mua kutuadija kuamba ne:
◼ “Ndi muanyishe pa kumona se: udi uditatshisha bua matuku atshilualua. Udi uvuluka, mvua mukuleje mvese kampanda wa mu Bible udi utulaya nsombelu wa disanka ne mulelela mu matuku atshilualua. Mona mukuabu. [Bala Buakabuluibua 21:3, 4.] Mukanda umvua mukushile udi ufila bijadiki bidi bituisha bia se: Bible n’Dîyi dia Nzambi ne ki ndia bantu nansha. Bualu ebu mbua mushinga mukole. Mona tshidibu buleja. [Bala bik. 1-2, mab. 184-5.] Biwanyisha, nensanke bua kulonga nebe Bible kabiyi kufuta mfranga.” Bikala nsonga muitabe bua kulonga, muebeje né udi ne Bible. Bikalaye kayi nende, muleje Traduction du monde nouveau.
7 Muntu udi kayi mumone kua kueyemena bua kupeta diambuluisha bua kujikija ntatu yende neanyishe pamu’apa mbuelelu eu:
◼ “Mu tshikondo tshietu etshi, muntu yonso utu upetangana ne ntatu minene. Bavule batu beyemena kudi bafidi ba mibelu ba mishindu yonso. Bamue batu baya kudi bena mbuku. Ku diebe dimona, nkuepi kutudi mua kupetela mibelu ya mushinga itudi mua kubabidila bushuwa? [Lekela muntu andamune.] Bible udi uleja bualu kampanda bua mushinga mukole budi muntu yonso ne bua kumanya.” Bala Yelemiya 10:23. Bulula mukanda wa La Bible : Parole de Dieu ou des hommes ? mu dib. 187 ne bala tshik. 9. “Mukanda eu neukuambuluishe bua kumvua muikala ntatu yetu yonso mua kujimina ku diambuluisha dia Bukalenge bua Nzambi. Newanyishe bua kuubala anyi?”
8 Bituikala bambe mu dimonangana dia kumpala ne: muntu udi dijinga ne mulombodi, mu dikumbulula, tudi mua kutungunuja diyukidilangana mushindu eu:
◼ “Musangu mushale, tuakapunga dîyi pa bualu bua se: tudi tukengela bulombodi bua Nzambi bituasua kutshimuna mu dijikija dia ntatu ya mu nsombelu. Pa bualu ebu, ndi ngela meji ne: newanyishe nkomenu utudi mua kubala mu mukanda umvua mukushile. [Bala bik. 12-13, dib. 189 mu mukanda wa Parole de Dieu.] Ndi ne disanka dia kukulomba bua kulonga Bible ku nzubu kabiyi kufuta mfranga ne ndi njinga kukuleja anu mpindieu mutubi bienzeka.”
9 Yehowa neabeneshe madikolela atudi tuenza bua kuambuluisha bansonga ne bakulakaje bua kumonabu mushinga wa Dîyi dia Nzambi, didi dikale mulombodi mu nsombelu wetu.—Mus. 119:105.