Babidila muabi eu wa pa buawu!

PETER ukavua kule be mu malonga ende a luondapu pavua mukenji wa Bible wa lupandu mukoke ntema yende. Pakapetaye dipolome, ne kubangaye kuenza mudimu bu doktere mu lupitadi kampanda, bamfumu bende misangu yonso bakamukankamija bua kudishikuluja bu muondapi wa masama a mutu. Eu uvua muabi uvua ba-doktere bapiabapia ba bungi ne bua kubabidila kakuyi dielakana.

Kadi, Petera wakapangadija bua kulekela muabi eu. Bua tshinyi? Uvua mupangile patupu dijinga ne disakibua bivua bikengedibua anyi? Tòo, bualu Peter wakakonkonona bimpe menemene difila dia mudimu edi. Panyima pa mumane kulua Ntemu wa Yehowa muditshipe ne mutambule, wakajinga bua kupitshisha dîba divule mu bitupa bishilashilangane bia mudimu wa Buena-nkristo. Wakelangana meji ne: diakamue kunyima kua dilua muondapi wa masama a mutu, mudimu wende uvua ne bua kudia dîba divulavulayi ne bukole buende kabidi. Uvua mupale pa kulekela tshipatshila etshi tshia pa buatshi, anyi peshi uvua ne meji?

Bua bamue, dipangadika dia Peter divua mua kumueneka bu kadiyi dia meji. Kadi, wakatabalela mifundu ya mu Bible bu mudi Efeso 5:15, 16 (NW). Mupostolo Paulo wakalomba bena kuitabuja nende ne: “Nudimuke bua mushindu unudi nuenda, kabikadi bu bapote, kadi bu bena meji, pa kudisumbila tshikondo tshikumbanyine, bualu matuku adi mabi.”

Bambisha tshiambilu “tshikondo tshikumbanyine.” Ntshikudimuna ku muaku wa tshiena-Greke mutumika nawu misangu mivule mu Bible bua kufunkuna dîba peshi tshikondo tshimanyina ku bimanyikilu kampanda peshi tshiakanyine bua mudimu kansanga musunguluke. Apa Paulo wakazangika ne: bena nkristo badi ne bua kudilamina dîba bua malu a mushinga. Bushuwa, badi bakengela bua “kuikala bajadike bintu bidi bitambe mushinga.” (Filipoi 1:10, NW) Mmuanda wa kudianjila kujadika bidi ne mushinga.

Nenku, ntshinyi tshidi dilongolola dia Nzambi bua tshikondo tshietu etshi? Ntshinyi tshidi disua dia Nzambi bua aba badi bamunange? Milayi ya mu Bible idi ifunkuna patoke matuku etu aa bu ‘tshikondo tshia ku nshikidilu,’ peshi ‘matuku a ku nshikidilu.’ (Danyele 12:4; 2 Timote 3:1) Kristo Yezu kakashiya mpata pa tshivua ne bua kuikala ne mushinga kupita bionso bua matuku etu aa. Mu bujalame buonso wakamba ne: kumpala kua nshikidilu wa ndongoluelu eu mubi wa malu, ‘lumu luimpe elu lua bukalenge luvua ne bua kumanyishibua pa buloba bujima budi bantu bâse, luvua ne bua kuikala tshimanyinu bua matunga onso.’ Anu apu ke nshikidilu kushishaye kulua.​—Matayo 24:3, 14, NW.

Pa nanku, tudi tukengela kubabidila tshikondo tshionso bua kuyisha lumu luimpe lua Bukalenge ne kuenza bayidi. (Matayo 28:19, 20) Bu mudi midimu eyi kayiyi ne bua kuenjibua tshiakabidi, etshi ke tshikondo tshia ndekelu bua tuetu kudifila ne bietu bionso mu mudimu eu wa lupandu. ‘Katataka ntshikondo tshimpe.’ Bushuwa, ‘katataka ndituku dia lupandu.’​—2 Kolinto 6:2.

Diangata dipangadika dia meji

Peter​—nsongalume mutela kuulu eku—​wakela meji bimpe menemene pa bidi bitangila dipangadika diende ne wakapima bujitu bua masungula ende. Wakajingulula ne: kabivua ne bua kuikala bibi buende yeye bua kulonga ne tshipatshila tshia kulua muondapi wa masama a mutu. Kadi ntshinyi tshivua ne mushinga mutambe kudiye? Tshivua mudimu wende wa Buena-nkristo, pa kutangila dikengedibua dikole dia mudimu eu. Pine apu, uvua ne majitu a kukumbaja. Uvua musele ne uvua ne bua kuambuluisha mukajende, udi wenza pende mudimu wa buambi wa ku dîba ne ku dîba. (1 Timote 5:8) Peter kabidi uvua ne bua kufuta mabanza masuikakaja ku malonga ende. Pa nanku, ntshinyi tshiakapangadijaye bua kuenza?

Peter wakapangadija bua kudishikuluja mu radiologie ne kulonga biamu bileji bia bitupa bia munda. Eu uvua mudimu uvua mua kuangata dituku dijima dia mudimu dia pa tshibidilu. Uvua kabidi ne bua kupeta dilongesha diende mu mêba a pa tshibidilu a mudimu. Eyowa, bamue bavua mua kuumona bu muanzu wa bunême bukese, kadi uvua ne bua kumushiila dîba divule dia kupitshisha mu bipatshila bia mu nyuma.

Muanda mukuabu wa mushinga wakasonsola dipangadika dia Peter. Eku kayi ulumbuluisha bakuabu bàvuà mua kuikala bapangadije malu mushindu mushilangane, uvua mumanye se: kudibueja bikole mu malu a mu bulongolodi ebu kudi kukebela muena nkristo njiwu. Kudi mua kumusaka ku dilengulula majitu a mu nyuma. Ebi mbiumvuija kudi tshilejilu tshikuabu tshidi tshiimanyine patshi pa mudimu.

Mumanyishi mukuabu wa Bukalenge wa ku dîba ne ku dîba uvua muena mudimu wa bianza mulongesha bimpe. Uvua udiambuluisha yeye nkayende ne lupetu pa kupana bintu biende bizola. Pavuaye upitshisha tshitupa tshinene tshia dîba diende mu mudimu wa mushinga mukole wa Buena-nkristo, uvua nenku mua kudiambuluisha mu mushindu muakanyine. Kadi, dijinga dia kualabaja mudimu wende wa bianza diakabanga kudiunda. Wakadina bikole mu dizola ne dienza mudimu wa bianza, kulekelaye mudimu wa ku dîba ne ku dîba, ne ndekelu wa bionso wakalua katshiyi wenza nansha kakese mudimu wa diyisha Bukalenge. Kunyima, wakalua kudibueja mu ngikadilu ukena wa mu Mifundu, biakafikisha ku dibenga kuikala diende kabidi umue wa mu tshisumbu tshia bena nkristo.​—1 Kolinto 5:11-13.

Tshikondo tshietu etshi ntshia pa buatshi

Anu bu aba bàdì basadila Yehowa mpindieu, bushuwa tudi basue kushala ne lulamatu kudiye. Tudi bamanye ne: tudi mu tshikondo tshitambe kuikala tshia pa buatshi tshia mu miyuki ya bukua-bantu. Bua kutungunuka mu disadila Nzambi ne eku kupita ne nsombelu ya matuku etu aa mu mushindu mukumbanyine, tudi pamu’apa tukengela bua kuenza makajilula kabukabu. Tudi mua kutshifuanyikija ne tshikondo tshia dinowa bua tshidime. Ntshikondo tshia mudimu wa pa buawu, tshidibu batekemena bua bena mudimu ba mu budimi kudienzejabu bikole kupita muabu mua kale ne bua kudituabu mu mudimu wa matuku male. Bua tshinyi? Bualu bia kunowa bidi ne bua kusangishibua mu lupolo lua dîba luîpi.

Nkushadile ndongoluelu eu mubi wa malu anu dîba dikese. Mpindieu kupita tshikondo tshikuabu kayi tshionso, muena nkristo mulelela udi ukengela bua kudienzeja yeye muine bua kulonda tshilejilu tshia Yezu ne kuendela mu makasa ende. Nsombelu wende pa buloba wakaleja patoke tshivua ne mushinga mutambe bunene kudiye. Wakamba ne: “Patshidi munya muikaleku, tudi ne bua kuenza midimu ya Udi muntume. Butuku bukadi pa kuila budi muntu nansha umue kayi mua kukuata kabidi mudimu.” (Yowanese 9:4, MMM) Mu diamba ne: butuku bukavua pa kuila, Yezu uvua ufunkuna tshikondo tshia dilumbuluishibua ne dishipibua diende, pavua mudimu wende wa pa buloba ne bua kujika ne pavuaye mua kuikala kayi ne mushindu wa kudifila mu mudimu wa Tatuende wa mu diulu.

Bushuwa, munkatshi mua mudimu wende wa bidimu bisatu ne tshitupa, Yezu wakapitshisha amue a ku mêba ende mu dienza bishima ne diondapa babedi. Nansha nanku, wakatumika ne tshitupa tshinene tshia dîba diende bua kuyisha mukenji wa Bukalenge ne bua ‘kuambila bena lukanu bualu bua dikopoka diabu’ ku bitendelelu bia dishima. (Luka 4:18; Matayo 4:17) Yezu wakenza madikolela malelela mu mudimu wende ne kabidi wakadipetela tshikondo bua kushidimuna bayidi bende bua bamone mua kuibaka pa nshindamenu ukavuaye muenze ne batungunuke ne mudimu wa diyisha mu mushindu mupatudi wa bipeta. Yezu wakababidila tshikondo tshionso bua kutungunuja bipatshila bia Bukalenge ne wakajinga bua bayidi bende benze bia muomumue.​—Matayo 5:14-16; Yone 8:12.

Bu Yezu, tuetu bàdì balondi bende ba lelu, tudi ne bua kumona nsombelu wa bukua-bantu anu bu mudi Yehowa umumona. Dîba dia ndongoluelu eu wa malu nditangile ku ndekelu, ne Nzambi mmusue ne luse luonso bua bonso bapete mushindu wa kupetela lupandu. (2 Petelo 3:9) Pa nanku, kabienaku mua kuikala bia meji bua kuteka bipatshila bikuabu bionso pa muaba muibidi bua kuenza disua dia Yehowa anyi? (Matayo 6:25-33) Nangananga mu tshikondo tshia pa buatshi bu etshi, tshintu kampanda tshìdì mua kuangatshibua bimpe ne mushinga tshidi mua kulua mene tshia mushinga mukese mu nsombelu yetu bu bena nkristo.

Muntu wa kutudi neanyingalale bua diteka disua dia Nzambi pa muaba wa kumpala mu nsombelu yetu anyi? Tòo, bushuwa, bualu nsombelu wa muena nkristo wa didibudisha bimue bintu udi ufutshibua bimpe menemene. Tshilejilu, Yezu wakambila bayidi bende ne: ‘Bulelela, ndi nnuambila ne: muntu yonso wakushiya nzubu wende, anyi bana babu balume, anyi bana babu bakaji, anyi mamuende, anyi tatuende, anyi bana bende, anyi madimi ende, bua bualu buanyi ne bua lumu luimpe, katataka yeye neapete bintu misangu lukama bitambe bia diambedi mu tshikondo etshi, nzubu ne bana babu balume ne bana babu bakaji ne bamamu ne bana ne madimi, ne makenga kabidi; palua tshikondo tshikuabu, neapete muoyo wa tshiendelele.’​—Mâko 10:29, 30.

Muntu nansha umue kêna mua kufuanyikija mushinga wa mfranga ne mushinga wa mafutu mapeta kudi aba bàdì batumika ne dîba diabu bua kusamuna Yehowa ne kumanyisha mukenji wa Bukalenge. Badi bapeta masanka mapite bungi! Aa adi akonga balunda balelela, disankishibua bua dienza disua dia Nzambi, mimuemue ya Nzambi ya dianyishibua, ne ditekemena dia muoyo ukena ndekelu. (Buakabuluibua 21:3, 4) Ne ndibeneshapu kayi dia kuambuluisha bantu mu nyuma ne kutuadila dîna dinsantu dia Yehowa lumu bu Bantemu bende! Kakuyi mpata, “kudisumbila tshikondo tshikumbanyine” ke bushuwa njila wa meji ne mupeteshi wa difutu. Mpindieu kupita tshikondo tshikuabu kayi tshionso, ke tshikondo tshia kuditua mu dimanyisha lumu luimpe lua Bukalenge bua Nzambi. Neubabidile ne ubambakaje muabi eu wa pa buawu anyi?

[Mêyi adi kuinshi]