Netuwenze kabidi anyi?—Dibikila dikuabu bua bampanda-njila bambuluishi—Tshitupa 1
1 Netuenzeku kabidi tshinyi? Netuenzeku mudimu wa bumpanda-njila buambuluishi mu tshikondo tshia Tshivulukilu anyi? Tshisakidila tshia Mudimu wetu wa Bukalenge wa Luabanya 1997 tshiakakoka ntema yetu ne tshiena-bualu tshinene etshi: “Dikeba bampanda-njila bambuluishi 100 000.” Tuvua ne dieyemena dia se: nuvua ne bua kuangata dibikila edi ne mushinga. Pakasangishabu luapolo lua mudimu lua Tshisanga 1997, tuvua ne disanka dia kumanya se: bamanyishi 3 965 (mmumue ne: 122 mu Burundi, 444 mu Congo-Brazzaville ne 3 399 mu Congo-Kinshasa) bavua baditue mu mudimu wa bumpanda-njila buambuluishi, nansha muvuaku mvita. Tuetu basakidileku bampanda-njila ba pa tshibidilu 5 339 ne bampanda-njila ba pa buabu 86 bavua bafile luapolo ngondo au, tudi tumona se: pabuipi ne 16% (Burundi: 12%; Congo-Brazzaville: 21%) bia ku bamanyishi bonso bavua mu mudimu wa bumpanda-njila. Netuwenze kabidi mu tshikondo etshi tshia Tshivulukilu anyi?
2 Bonso bavua benze madikolela a pa mutu bua kulubuluja mudimu wabu wa budimi mu Tshisanga tshidimu tshishale tudi tubela ka-lumbandi ne luya luonso. Mu butoke buonso, yonso wa kunudi uvua musakibue kudi dinanga dikena dia budisui bua Yehowa Nzambi ne bua muntu nenu. (Luka 10:27; 2 Pet. 1:5-8) Bamanyishi mu nsombelu mishilashilangane bavua badiakaje bua kuenza bumpanda-njila buambuluishi. Mu tshimue tshisumbu, bamanyishi 51 bakenza pamue bumpanda-njila mu ngondo umue, pamue ne bavule ba ku bakulu, ne mamu kampanda uvua ne muana wa ngondo 15, ne muanetu wa bakaji kansanga uvua mulekele mudimu wende ne mupete mudimu wa mêba makese bua kumona mua kuenza bumpanda-njila, ne muanetu wa bakaji mukuabu mukulakaje uvua kayi muanji kuenza bumpanda-njila. Mutangidi wa tshijengu wakafunda ne: “Madikolela a dikema mmenza mu mudimu wa buambi. . . . Kabiena anu ne buenzeji mu teritware kadi bisumbu bidi kabidi bitshionkomoka ne musangelu. Bana betu badi basankidila dimanyangana bimpe bitambe ne dipatula bipeta bilenga mu mudimu wa buambi.”
3 Bansonga kabavua bashadile panyima mu ngondo wa Tshisanga mushale nansha. Mumanyishi kampanda ukena mutambule wa bidimu 13 ukavua mudianjile kutuma lungenyi ku tshikondo tshivuaye mua kuleja didilambula diende kudi Yehowa. Pakatambulaye mu Luishi, wakafunda mukanda umvuija dijinga diende divuaye nadi bua kuenza bumpanda-njila buambuluishi mu Tshisanga, wamba ne: “Bu muvuaku kakuyi tshintu nansha tshimue tshivua mua kumpumbisha musangu au, ngakatuma diakamue dilomba dianyi. . . . Malu malenga mavule atuakamona kaavua kuikala bualu bulelela bu kabiyi bua dibikila dienu dia dinanga bua kuenza bumpanda-njila. Ndi ne dianyisha kudi Yehowa bua mumvua mupete diakalenga edi dia kuikala ku bantu 100 000 bakandamuna.” Mmudifundile tshipatshila bua kuenza kabidi mudimu eu.
4 Pamu’apa uvua munkatshi mua bamanyishi 3 965 bavua baditue mu mudimu wa bumpanda-njila buambuluishi mu Tshisanga tshidimu tshishale, anyi 6 721 mu Lumungulu, anyi kabidi 8 685 mu Kabalashipu. Neuwenze kabidi tshidimu etshi anyi? Biwikala kuvua ne mushindu wa kuenza bumpanda-njila mu Tshisanga tshidimu tshishale, udi mua kubuenzaku tshidimu etshi anyi? Tudiku mua kupitshisha pa bantu 8 260, bungi bua bavua benze bumpanda-njila buambuluishi mu Kabalashipu 1997 (anyi 141 mu Tshimungu 1997 mu Burundi; 444 mu Tshisanga 1997 mu Congo-Brazzaville) anyi? Ebu buvua bungi bubandile bua bampanda-njila butu kabuyi buanji kupeteka mu ngondo nansha umue mu teritware wetu mujima.
5 Shindamena pa Tshisanga ne Lumungulu: Tshidimu etshi, Tshivulukilu netshikale mu Disambombo dia 11 Tshisanga, tshivuija ngondo wa Tshisanga mutambe buimpe bua divudija mudimu wa buambi. (2 Kol. 5:14, 15) Mu matuku 11 a ku mbangilu kua ngondo, netutume ntema ku dibikila basankididi bavule bua babuele mu Tshivulukilu. Biwikala mupangadije bua kuenza bumpanda-njila buambuluishi, suaku uwuje dilomba diebe kumpala kua dituku diudi ujinga kutuadija.—1 Kol. 14:40.
6 Bu mudi Lumungulu muikale ne matuku a ku ndekelu kua mbingu misangu itanu, bamanyishi badi baya mu tulasa anyi badi ne mudimu wa ku mubidi udi ubangata dituku dijima badi mua kumona bipepele bua kuenza bumpanda-njila buambuluishi mu ngondo au. Pa kuakaja ndongamu webe bua kuenza mêba dikumi mu buambi mu matuku a ku ndekelu kua mbingu, neukengele bua kusakidila anu mêba makuabu dikumi munkatshi mua ngondo bua kufika ku mêba malombibue 60.
7 Mu Lumungulu ne Kabalashipu, netufile mu buambi Tshibumba tshia Nsentedi ne Réveillez-vous! Ebi bidi ne bua kukankamija bavule ba kutudi bua kuipatshila bumpanda-njila ne kubuenza. Bua tshinyi tudi tuamba nanku? Bibejibeji mbipepele bua kubileja bantu (kabidi mbapuekeshe mushinga wabi) ne bitu bisankisha bua kutumika nabi mu buambi. Mbiakanyine mua kutumika nabi mu nseke yonso ya mudimu—ku nzubu ne ku nzubu, ku magazen ne magazen, ne patudi tuyukila ne bantu mu misesu, mu bimanyikidi bia mashinyi ne mikuabu miaba ya difidila bumanyishi mu mpukapuka. Bualu butambe mushinga mbua se: Tshibumba tshia Nsentedi ne Réveillez-vous! bidi bizangika malelela a Bukalenge. Bidi bikoka ntema pa dikumbana dia milayi ya mu Bible, bijadika ne: Bukalenge bua Nzambi budi bukokesha. Bidi kabidi ne buenzeji pa nsombelu wa babadi bualu bidi biakula bua bidi bantu bakengela bushuwa. Tuetu mua kuela meji pa mushindu udi bibejibeji bia mushinga ebi bikale ne buenzeji pa nsombelu wetu, netudiumvue basakibue bua kudifila mu dibiabanya bikole mu Lumungulu ne Kabalashipu.
8 Luapolo idi ileja ne: bisumbu bivule mbilame mushiki wa bibejibeji. Tulejayiku ne: tudi tuanyisha dîba ne mfranga mitula bua kubipatula ne katubishiyi binyanguka patupu. Tuvuluke kabidi ne: binunu bia bantu ba muoyo muimpe badi dijinga ne bibejibeji ebi bua kumanya bulelela. (Yone 8:31, 32) Nunku tudi tukankamija bonso badi bualu ebu butangila, nangananga batangidi ba mudimu, basadidi ba mudimu bambika bujitu bua bibejibeji ne balombodi ba dilonga dia mukanda, bua kuditua kumpala mu dijikija stoke eyi. Tudienzeje bua kuenza nunku eku tusadila bu bampanda-njila bambuluishi.
9 Mu didilongolola bua mudimu eu munene wa diabanya bibejibeji, neupetele masanka ku dikonkonona dia biena-bualu ebi: “Tshibumba tshia Nsentedi ne Réveillez-vous!—Bibejibeji bia bulelela mu tshikondo tshiakanyine” (Tshibumba tshia Nsentedi, 1 Tshiongo 1994), ne “Tulongolole dileja dietu nkayetu dia bibejibeji” (Mudimu wetu wa Bukalenge, Kasuabanga 1996).
10 Bakulu badi bapita kumpala: Bua kuambuluisha bamanyishi bavule bavua bampanda-njila musangu mushale, bakulu ba mu tshisumbu kampanda bakasungula Disambombo dimue mu ngondo bu dituku dia pa buadi dia mudimu wa buambi bua tshisumbu tshijima. Bakenza ndongoluelu bua kupetangana misangu mivule dituku adi, bapetesha bonso mu tshisumbu mushindu wa kuditua mu bumanyishi bua mishindu kabukabu. Ebi bivua bikonga diyisha mu bijengu bia bungenda, mu misesu, ku nzubu ne ku nzubu, dienza makumbulula, difundila bantu mikanda, ne bumanyishi ku telefone. Diandamuna divua dimpe, bamanyishi 117 bakadifila mu mudimu wa budimi dituku adi. Bakasangisha mêba 521 mapitshisha mu buambi ne bibejibeji, broshire ne mikanda bishiya mu buambi bivua 617! Disanka dia mu Disambombo adi diakafika too ne ku Dia lumingu, ne bungi bubandile bua bantu bakabuela mu Tshisangilu tshia Patoke ne Dilonga dia Tshibumba tshia Nsentedi.
11 Mu Tshisangilu tshia Mudimu tshionso mu Tshisanga ne Lumungulu, badi ne bua kuvuluija tshisumbu bua dîba ne muaba wenzekela bisangilu bia mudimu wa budimi mu lumingu ludi lulonda, nangananga padiku ndongoluelu mikuabu mienza pa kumbusha idi pa tshibidilu mu ndongamu. Bampanda-njila ba pa tshibidilu ne bamanyishi badi kabayi bampanda-njila bambuluishi mbakankamija bua kukuatshisha ndongoluelu eyi ya tshisumbu bilondeshile mudi nsombelu wabu mua kubapetesha mushindu.
(Dilonda mu nimero wa Lumungulu.)
[Kazubu mu dibeji 5]
Udi mua kuenza bumpanda-njila buambuluishi anyi?
“Nansha biwikala mu nsombelu wa mushindu kayi, biwikala mutambule, ne muikale ne ngikadilu muimpe, ne mudilongolole bua kuenza mêba 60 ku ngondo mu mudimu wa buambi ne mudilongolole bua kuenza mudimu wa bumpanda-njila munkatshi mua ngondo umue nansha ya bungi, bakulu ba tshisumbu tshienu nebasanke bua kuanyisha dilomba diebe bua wewe kuenza mudimu eu.”—Badilongolole bua kuenza mudimu wetu bimpe, dibeji 113.
[Kazubu mu dibeji 7]
Ndongamu bua mpanda-njila muambuluishi
Bilejilu bua kuenza mêba 15 mu mudimu wa budimi ku lumingu
Dinda—Dimue too ne ku Disambombo
Dia lumingu didi mua kupingana pa muaba wa dituku kayi dionso
Dituku Dîba Bungi bua mêba
Dimue Dinda 2:30
Dibidi Dinda 2:30
Disatu Dinda 2:30
Dinayi Dinda 2:30
Ditanu Dinda 2:30
Disambombo Dinda 2:30
Mêba masangisha: 15
Matuku majima abidi
Matuku abidi madisunguila mu lumingu
Dituku Dîba Bungi bua mêba
Disatu Dituku dijima 7:30
Disambombo Dituku dijima 7:30
Mêba masangisha: 15
Dilolo dia matuku abidi ne ndekelu wa lumingu
Dilolo dia matuku abidi madisunguila mu lumingu
Dituku Dîba Bungi bua mêba
Dimue Dilolo 1:30
Disatu Dilolo 1:30
Disambombo Dituku dijima 8
Dia lumingu Tshitupa tshia dituku 4
Mêba masangisha: 15
Mêba a mapingaja a mu lumingu ne Disambombo
Dia lumingu didi mua kupingana pa muaba wa dituku kayi dionso
Dituku Dîba Bungi bua mêba
Dimue Mu mapingaja 2
Dibidi Mu mapingaja 2
Disatu Mu mapingaja 2
Dinayi Mu mapingaja 2
Ditanu Mu mapingaja 2
Disambombo Dituku dijima 5
Mêba masangisha: 15
Ndongamu wanyi nkayanyi wa buambi
Pangadija bungi bua mêba a kuenza bua tshikondo tshionso
Dituku Dîba Bungi bua mêba
Dimue
Dibidi
Disatu
Dinayi
Ditanu
Disambombo
Dia lumingu
Mêba masangisha: 15