Bana​—Nudi disanka dietu!

¹ Bansongalume ne bansongakaji, nudiku bibidilangane ne dîyi-dituma dia Yehowa dia kuikala badifile mu midimu ya mu tshisumbu anyi? (Dut. 31:12; Mus. 127:3) Bidi disanka pa kunumona ku luseke luetu patudi tutendelela Yehowa pamue! Nutu nusanguluja mitshima yetu panutu nusomba mu bisangilu kanuyi nuenza mutoyi ne nuteleja ne ntema. Bitu bitamba kutusankisha panutu nuteta bua kufila mumvuija mu miaku yenu nkayenu. Tshisumbu tshijima tshitu ne milowo panutu nuenza midimu minupesha mu Kalasa ka Mudimu wa Teokrasi, panutu nuditua netu ne luzuku luonso mu mudimu wa budimi, ne patutu tumvua ne: nutu nufila bumanyishi ne dikima kudi balongi nenu ne balongeshi.​—Mus. 148:12, 13.

² Tudi tujinga bua numanye se: tudi tudisua bua bualu buenu patudi tumona bikadilu bienu bilenga, mmuenekelu wenu wa mankenda, nsombelu wenu mukezuke, ne kanemu kenu bua bantu bakulumpe. Disanka dietu nditambe kuikala dinene panudi nuleja ne: nudi ‘nuvuluka Mufuki wenu Munene’ pa kudifundila nuenu bine bipatshila bia teokrasi.​—Muam. 12:1, NW; Mus. 110:3.

³ Tuambilayi bipatshila bienu: Muana wa balume kampanda wa bidimu muanda-mukulu wakambila mutangidi wa distrike ne: ‘Tshia kumpala ndi musue kutambula, pashishe nenganyishe bua kuambuluisha mu tshisumbu mu disadila ku biamu bia mêyi ne diakaja bikolokolo, kuikala musadidi, kuambuluisha ku mikanda, kubala mu malonga a mukanda ne mu Malonga a Tshibumba tshia Nsentedi. Pashishe nenganyishe bua kuikala musadidi wa mudimu, ne pashishe mukulu. Nenganyishe kabidi bua kuikala mpanda-njila ne kuya mu kalasa ka bampanda-njila. Ne pashishe nenganyishe bua kuya ku Betele, kuikala mutangidi wa tshijengu anyi mutangidi wa distrike.’ Ndianyisha kayipu dilenga diakaleja muana eu bua muabi wa kusadila Nzambi!

⁴ Mu matunga asatu adi ku butangidi bua filiale wetu, tudi tukeba bansonga bavule badi badiakaje bua kudilambula, bilondeshile lungenyi lua mu Yeshaya 6:8. Mvita idi minyangakaje teritware wetu idi ifila tshijadiki tshia se: dikebakeba bubanji bua bintu bia ku mubidi ki njila wa meji nansha. (Muam. 2:17-19) Mmunyipu mudibi bia meji bua kukeba bubanji bua mu nyuma mu disadila Yehowa ne anyima wetu mujima mu tshikondo tshîpi tshidi tshishadile ndongoluelu eu mukulakaje mukokesha kudi Satana! (Mat. 6:19-21) Kalasa ka Dilongesha Mudimu kadi kakidila bansonga bajike badi basadidi ba mudimu peshi bakulu. Badi bakuata mu kalasa aka badi babatuma miaba yonso ne badi basadila bu bampanda-njila ba pa tshibidilu anyi ba pa buabu, mu tshijengu anyi mu distrike. Nunku, bana ba lelu’eu mbampanda-njila ne batangidi bena ngendu ba makelela!

⁵ Bu munudi nukola ku mubidi ne mu nyuma, tudi tusanka bua kunumona nufika ku bipatshila bienu. (Fuanyikija ne Luka 2:52.) Tshidimu tshionso, ba kunudi binunu badi balua bamanyishi bakena batambule ne pashishe badiakaja bua kutambula bu basadidi ba Yehowa badilambule. Disanka dietu didi didiunda patudi tulua kunumona nufika ku bumpanda-njila buambuluishi ne nansha nuditua mu mudimu wa ku dîba ne ku dîba. Bushuwa, bana, nudi disanka dietu ne mpokolo mulenga wa disamuna Tatu wetu wa mu diulu. Yehowa anubeneshe bia bungi!​—Nsu. 23:24, 25.