Badi batabalela bintu bia mfumu

¹ Mu bikondo bifundilebu Bible, bavua bambika mulami bujitu bunene. Nunku, Abrahama wakambika mulami wende wa bintu bujitu bua kupetela muanende Izaka mukaji. (Gen. 24:1-4) Mulami au uvua ne bujitu bua kutungunuja ndelanganyi ya Abrahama. Buvua bujitu bunene butambe. Kabiena bikemesha bua muvua Paulo muambe ne: “Badi bakeba munkatshi mua balami bua kusangana mulami yonso muikale muntu udibo mua kueyemena.”​—1 Kol. 4:2.

Bulami bua buena-nkristo

² Bible udi umvuija imue nseke ya mudimu wa buena-nkristo bu bulami. Tshilejilu, mupostolo Paulo wakambila bena Efeso bua ‘diabanyangana dia [“bulenga bukena butuakanyine,” NW] bua Nzambi buakamupabu bua bualu buabu.’ (Ef. 3:2; Kolos. 1:25) Uvua umona mudimu wende wa kumanyisha lumu luimpe kudi bisamba bu bulami buvuaye ne bua kukumbaja ne lulamatu. (Bien. 9:15; 22:21) Mupostolo Petelo wakafundila bana babu bela manyi ne: “Ikalayi bakididianganyi bamue bua bakuabu, kakuyi dinungana. Bu mu mushindu udi muntu ne muntu mupete dipa, tumikayi nadi mu disadilangana bamue ne bakuabu bu balami balenga ba bulenga bukena butuakanyine bua Nzambi buleja mu mishindu kabukabu.” (1 Pet. 4:9, 10, NW; Eb. 13:16) Bintu bionso bivua nabi bena nkristo aba ba mu siekele wa kumpala bivua bifumina ku bulenga bukena butuakanyine bua Yehowa. Nunku, bavua balami ba bintu abi ne bavua ne bua kutumika nabi mu mushindu wa buena-nkristo.

³ Lelu’eu, Bantemu ba Yehowa badi ne mmuenenu wa muomumue. Bu mudibu badilambule kudi Yehowa Nzambi, badi bamona biabu bionso bidibu nabi​—muoyo wabu, makanda abu, bintu biabu—​bu mamuma a “bulenga bukena butuakanyine bua Nzambi buleja mu mishindu kabukabu.” Anu bu balami balenga, badi badiumvua bikale ne bujitu ku mêsu kua Nzambi bua mushindu udibu batumika ne bintu abi. Kabidi, mbabapeshe dimanya dia lumu luimpe. Diodi edi didi padi tshintu tshilama tshidibu bajinga kutumika natshi mu mushindu mutambe buimpe, mmumue ne: bua kutumbisha dîna dia Yehowa ne kuambuluisha bantu bakuabu bua bafike ku dimanya dia bulelela.​—Mat. 28:19, 20; 1 Tim. 2:3, 4; 2 Tim. 1:13, 14.

⁴ Mmushindu kayi udi Bantemu ba Yehowa bakumbaja majitu abu bu balami? Luapolo lua tshidimu tshishale ludi luleja ne: bavua benze mêba mapite pa muliyare mujima mu diyisha “lumu luimpe lua Bukalenge” pa buloba bujima ne bavua balombole malonga a Bible mapite pa 4 500 000. (Mat. 24:14) Mbaleje kabidi ne: badi balami ba lulamatu ba Yehowa mu difila mapa a kalolo bua kukuatshisha mudimu pa buloba bujima ne kulongolola Nzubu yabu ya Bukalenge, mu didileja bakididi ba batangidi bena ngendu ne bena nkristo bakuabu, ne mu dileja buimpe bua pa buabu kudi aba badi bakengela diambuluisha, bu tshilejilu aba badi bakengesha kudi mvita. Mu tshi-bungi, bena nkristo balelela badi batabalela mu mushindu mulenga bintu bia Mfumu.

“Mulami wa lulamatu, wa budimu”

⁵ Bulami ebu kabuena anu bua muntu ne muntu pa nkayende, kadi budi butangila bulongolodi bujima kabidi. Yezu wakakula bua tshisumbu tshia bena nkristo bela manyi pa buloba bu “mulami wa lulamatu, wa budimu.” (Luka 12:42, NW) “Mulami wa lulamatu” eu udi ne bujitu bua kufila “biakudia” ne kuikala ntunga-mulongo mu buambi bua lumu luimpe mu bisamba bionso. (Buak. 12:17) Mu diumvuangana ne bualu ebu, kasumbu ka mulami wa lulamatu, kadi ne Kasumbu Kaludiki bu muleji-mpala, kadi ne bujitu bua mushindu udibu batumika ne mapa menza bua dikuatshisha dia mudimu pa buloba bujima. Mapa aa mmenza ne dieyemena dionso, ne “mulami wa lulamatu, wa budimu,” udi ne bujitu bua kutabalela bua se: batumike nawu bua tshivuabu baafidile, kabidi ne meji, ne diditatshisha bua kutula mfranga mikese ne kupatula bipeta bimpe.

⁶ Tudi ne tshilejilu tshia ditumika dia meji ne mapa aa mu didiunda dia midimu ya Bantemu ba Yehowa ya dipatula mikanda ku biamu mu bule bua siekele eu wa 20. Diabanya dia Bible ne mikanda miumvuiji ya Bible​—bibejibeji, mikanda, broshire, trakte ne Ngumu ya Bukalenge—​ndienze mudimu wa mushinga mu dimuangalaja dia “lumu luimpe” mu “matuku a ku nshikidilu.” (Mâko 13:10; 2 Tim. 3:1) Tshibumba tshia Nsentedi, ntshiamu tshinene mu difila “biakudia mu tshikondo tshiakanyine” kudi bena mu “nzubu wa Nzambi” ne kudi balunda babu, “musumba munene” wa “mikoko mikuabu.”​—Mat. 24:45; Ef. 2:19, NW; Buak. 7:9; Yone 10:16, NW.

⁷ Ku ntuadijilu, mikanda yonso ya Bantemu ba Yehowa ivua mipatula ku biamu bia bangenda, kadi mu bidimu bia 1920, bakapangadija ne: basadidi ba Yehowa nebatambe kupatula bipeta bimpe ne kutula mfranga mikese bikalabu mua kudipatuilayi ku biamu biabu. Panyima pa ntuadijilu mupuekele mu 1920, midimu ya dipatula mikanda yakadiunda ku kakese ku kakese ku Brooklyn ne kuluayi minene mitambe. Mu 1967, kuvua nzubu minene inayi ivua ne biamu bia dipatula mikanda. Bakatuadija kabidi dipatula mikanda mu matunga makuabu, kadi mudimu eu wakimana mu matunga a bungi bua Mvita Mibidi ya Buloba bujima.

⁸ Kadi, nansha muvua midimu ya dipatula mikanda ku biamu eyi midiunde, mu États-Unis kayivua mikumbane bua kupatula mikanda bua buloba bujima to. Mu bidimu bia kunyima kua mvita, bakatuadija anyi kutungunuja nenku midimu ya dipatula mikanda mu matunga makuabu a bungi, bu mudi mu Afrique du Sud, Allemagne fédérale, Angleterre, Canada, Danemark, Grèce ne Suisse. Ku ntuadijilu kua bidimu bia 1970, Australie, Brésil, Finlande, Ghana, Japon, Nigeria ne Philippines biakaditua mu mulongo eu. Biamu bia dipatula mikanda bia amue matunga aa bivua bipatula mikanda minene. Mu tshikondo tshimue tshimue etshi, bakalongesha ba-misionere ba ku Gilada midimu ya dipatula mikanda ku biamu ne bakabatuma mu amue a ku matunga aa bua kuambuluishamu bana betu bua kukumbaja mudimu eu.

⁹ Mu bidimu bia 1980, matunga avua apatula bibejibeji akafika ku bungi bua katshia ne katshia bua 51.a Bionso ebi biakamueneka mushindu mutambe buimpe wa kutumika ne bintu bia Mfumu. Tshivua tshijadiki tshinene tshia didiunda dia mudimu wa Bukalenge. Kabidi, mbujadikipu kayi bukole bua dikuatshisha dia kalolo dia kudi miliyo ya Bantemu ba Yehowa bavua ‘batumbisha Yehowa ne biuma biabu’! (Nsu. 3:9) Nunku, bavua badileja buobu bine balami balenga ba bintu bivua Yehowa mubapeshe mu mishindu kabukabu.

Dishintuluka dia malu

¹⁰ Munkatshi mua bidimu bia 1970 ne ku ntuadijilu kua bidimu bia 1980, malubuluka manene akamueneka mu dipatula dia mikanda ku biamu, ne Bantemu ba Yehowa bakatuadija ngenzelu mipiamipia. Too ne tshikondo atshi, batshivua anu batumika ne ngenzelu wa kale wa ditapa mikanda ku biamu. Bionso ebi biakalua kushintuluka ku kakese ku kakese, ne bakatuadija kutumika ne ngenzelu wa offset wa buena-lelu. Ke mukadibu bapatula mpindieu mikanda milenga mikale ne bimfuanyi mu mekala anayi pamutu pa abidi (difiika ne dikuabu dikala) mu ngenzelu wa kale wa ditapa mikanda. Pashishe, ordinatere e kulua kushintulula ngenzelu ya kumpala kua dituta dine dia mikanda ku biamu. Bantemu ba Yehowa bakapatula nenku programe wa MEPS wa biamu bia ordinatere, udi wambuluisha bua kupatula mikanda mu miakulu mipite pa 370. Kakuena programe nansha umue wa bangenda udibu mua kufuanyikija ne wa MEPS pa bidi bitangila bungi bua miakulu mudiye ukuata mudimu.

¹¹ Ku diambuluisha dia programe wa MEPS ne ngenzelu mikuabu mipiamipia, bu mudi mikanda mitumina mu ordinatere, malubuluka makuabu manene mmenzeke mu dipatula dia biakudia mu tshikondo tshiakanyine. Mu ngenzelu ya kale, biena-bualu bia bibejibeji mu miakulu mikuabu pa kumbusha Anglais bivua bipatuka ngondo mivule panyima, pamu’apa mene nansha tshidimu tshijima, panyima pa mpatuidi wa mu Anglais. Mpindieu, Tshibumba tshia Nsentedi tshitu tshipatuka musangu umue mu miakulu 115, ne Réveillez-vous! mu miakulu 62. Mbuena kuamba ne: pa buloba bujima bantu 95 pa lukama ba ku babuedi ba mu dilonga dia ku lumingu dia Tshibumba tshia Nsentedi dilongolola kudi Bantemu ba Yehowa batu bakonkonona tshiena-bualu tshia muomumue mu tshikondo tshimue. Ndibenesha kayipu! Kakuyi mpata, diela mfranga mu ngenzelu mipiamipia eyi divua ditumika dimpe ne bintu bia Mfumu.

Makengela mashilangane mu dilongolola dia midimu

¹² Bu muvuaku ngenzelu mipiamipia eyi, makengela a bulongolodi bua Bantemu ba Yehowa mu dituta dia mikanda akashintuluka. Biamu bipiabipia bia offset bidi ne lukasa kupita biamu bia kale bia ditapa nabi mikanda, kadi bidi kabidi mushinga mukole. Ditumika ne biamu bia nzembu ne ordinatere mu midimu ya kumpala kua dipatula mikanda ku biamu bu mudi difunda, dikudimuna, mudimu wa dizola, dituangaja​—didi diambuluisha bikole kupita ngenzelu ya kale, kadi didi dilomba mfranga mivule. Biakalua kumueneka patoke ne: dipatula bibejibeji ku biamu mu matunga 51 mashilangane kadivua diambuluisha bua kulaminyina mfranga to. Ke bua tshinyi, mu bidimu bia 1990, “mulami wa lulamatu” wakakomonona bualu ebu tshiakabidi. Nkomenu uvua tshinyi?

¹³ Dikonkonona malu ndileje ne: “bintu bia mushinga” bifila kudi Bantemu ba Yehowa ne balunda babu bidi mua kukuata mudimu bimpe bikala mudimu wa dipatula mikanda ku biamu muakajilula. Nunku ku kakese ku kakese bakakepesha bungi bua filiale idi ipatula mikanda ku biamu. Allemagne mmuangate bujitu bua dipatula bibejibeji ku biamu bua matunga mavule a ku Mputu wa ku Est ne ku Ouest, kabidi ne bua amue matunga atshivua too ne mpindieu adipatuila bibejibeji ku biamu. Italie udi wabanya mikanda mu matunga a mu Afrike ne Mputu wa ku Sud-Est, bu mudi Grèce ne Albanie. Mu Afrike, anu ditunga dia Nigeria ne dia Afrique du Sud ke adi apatula bibejibeji ku biamu. Makajilula a mushindu eu mmenza mu bitupa bionso bia pa buloba.

Malu a kutabalela

¹⁴ Mu Kashipu 1998, nebimanyike dipatula dia bibejibeji ku biamu mu amue matunga a ku Mputu, bu mudi mu Autriche, Danemark, France, Grèce, Pays-Bas ne Suisse. Mudimu eu nebawenze ku Mputu kudi Allemagne, Angleterre, Espagne, Finlande, Italie ne Suède. Mbashindamene pa malu kayi bua kusungula matunga atungunuka ne dipatula mikanda ku biamu ne makuabu alekela kuenza nanku? Mu diumvuangana ne bukenji bumupesha bua kutumika ne meji ne bintu bia Mfumu, “mulami wa lulamatu” mmutshinke bua matunga onso aa bungi bua mfranga mitula bua kupatula bibejibeji ku biamu ne dibiabanya. Mmukonkonone kabidi mikenji ya mu matunga au bua kumona muaba udibu mua kupatuila mikanda ku biamu ne kuyabanya mu nsombelu mitambe kuakanyina mu diumvuangana ne mikenji ya ditunga.

¹⁵ Midimu eyi mmimanyika mu amue matunga ne midiundisha mu makuabu nangananga bua tubingila tuakanyine. Mbitambe kuakanyina bua kupatuisha mikanda ku biamu bua matunga makuabu mavule mu ditunga dimuepele; nunku tudi tutumika bimpe ne biamu bia mudimu bia mushinga mukole. Mpindieu midimu ya dipatula mikanda ku biamu mmienzela miaba idi ditula dia mfranga dikale dipuekele bikole, biamu bikaleku, ne mushindu muine wa dituma mikanda kauyi wa lutatu. Mu mushindu eu bintu bia Mfumu mbitumika nabi bimpe. Kadi, kuimanyika dipatula dia mikanda mu ditunga kampanda ki mbuena kuamba ne: buambi nebuimane pabu mu ditunga adi nansha. Nekuikale mikanda mipite bungi, ne Bantemu nkama ya binunu badi mu matunga au nebatungunuke ne kumanyisha “lumu lua ditalala” kudi bantu nabu. (Ef. 2:17) Pa kumbusha dilaminyina mfranga, diakajilula edi didi kabidi ne bipeta bikuabu bilenga.

¹⁶ Tshilejilu, biamu bivule bia dipatula mikanda bia buena-lelu bivua mu Danemark, mu Grèce, mu Pays-Bas ne mu Suisse mbabitume mu Nigeria ne mu Philippines. Babilombodi bamanyi ba mudimu mbitabe bua kuya nabi ne kulongesha bana betu ba muaba udibu babituma bua kumonabu mua kutumika nabi pashishe. Bua nunku, matunga aa adi mpindieu ne bibejibeji bimuebimue ebi bitambe buimpe bu mu matunga makuabu.

¹⁷ Tangilayi bualu bukuabu ebu bua disanka: Mpindieu matunga makese mudi mudimu eu utungunuka ke adi atula mfranga bua dipatula bibejibeji ku biamu. Pa nanku, mu matunga mudibu balekele dipatula bibejibeji ku biamu mfranga idiku mpindieu bua malu makuabu, tshilejilu bua kuasa Nzubu ya Bukalenge anyi kufila diambuluisha bua bana betu ba mu matunga malanda. Nunku, bua ditumika dimpe ne bintu bia Mfumu, tudi mua kuamba biakane mêyi aa a mupostolo Paulo mafundila bena Kolinto bua bidi bitangila buloba bujima ne: ‘Tshiena nnuambila dîyi edi bua bakuabu batalale ne bua nuenu nuikale ne bujitu, kadi bualu bua kukelemeja majitu; dikumbana dia bintu bienu dikale dikuatshisha dia dikepa dia bintu biabu mu tshikondo tshia mpindieu, nunku majitu enu neakelemejibue.’​—2 Kol. 8:13, 14.

¹⁸ Bua diakajilula edi, Bantemu ba Yehowa ba pa buloba bujima badi badiumvua bikale pabuipi menemene bamue ne bakuabu. Bua Bantemu ba mu Danemark, kuikala ne bibejibeji bipatula ku biamu mu Allemagne ki mbualu budi mua kubatonda to, nansha muvuabu badipatuilabi nkayabu kumpala. Badi ne dianyisha divule bua mudimu muenza kudi bana babu ba mu Allemagne. Bantemu ba Yehowa ba mu Allemagne mbumvue bibi bualu mapa abu mmatumika nawu bua dipatula mikanda bua bena mu Danemark​—mu Russie, mu Ukraine peshi bua bena mu matunga makuabu anyi? Kabiena nanku to. Badi ne disanka dia kumanya se: mapa a bana babu ba mu matunga au badi mua kutumika nawu bua kukumbaja majinga makuabu.

Tutabalelayi bintu

¹⁹ Mu Nzubu ya Bukalenge yonso ya Bantemu ba Yehowa mudi kashete ka mapa kafunda ne: “Mapa bua dikuatshisha dia mudimu wa pa buloba bujima wa Société​—Matayo 24:14.” Mapa a budisuile mela mu tushete atu mmatumika nawu miaba yonso idi ikengela diambuluisha. “Mulami wa lulamatu” ke udi wangata mapangadika bua ditumika ne mapa au. Nenku, mapa mela mu kashete mu ditunga kampanda adi mua kukuatshisha midimu ya Bantemu ba Yehowa mu ditunga dikuabu, didi kule kilometre binunu ne binunu. Mapa a nunku bakatumika nawu bua kuambuluisha binetu bena nkristo bavua bapetangane ne njiwu ya bipepele bikole, mvula mikole, bikumina anyi mvita. Adi kabidi ambuluisha bua kukuatshisha ba-misionere mu matunga mapite pa 200.

²⁰ Pa tshibidilu, mu bisumbu bia Bantemu ba Yehowa batu bakula bua malu a mfranga anu musangu umuepele ku ngondo, ne anu mu minute mikese patupu. Kakutu disangisha dia mfranga, mu Nzubu ya Bukalenge peshi mu mpuilu. Kabatu balombangana mfranga ne kabatu bangata bantu ku mudimu wa kuenda kusangisha mfranga. Pa tshibidilu, Tshibumba tshia Nsentedi tshitu tshipatula anu tshiena-bualu tshimuepele ku tshidimu bua kumvuija mushindu udibu mua kuenza kudi bantu bonso badi bajinga mua kufila mapa kudi Société ne tshipatshila tshia kukuatshisha mudimu wa pa buloba bujima. Mu Réveillez-vous! kabatu bakulamu pa tshibidilu malu a mfranga ya Société to. Nunku mmunyi muakamueneka mushindu wa kukumbaja mudimu munene eu wa buambi wa pa buloba bujima, kuasa Nzubu ya Bukalenge idi ikengedibua, kukuatshisha mudimu wa pa buawu wa ku dîba ne ku dîba ne kufila diambuluisha kudi bena nkristo bavua badikengela? Yehowa mmubeneshe basadidi bende mu mushindu mutambe bulenga mu dijula muoyo wa kalolo. (2 Kol. 8:2) Tudi tubabidila tshikondo etshi tshitupesha bua kuela tuasakidila kudi bonso bavua ‘batumbishe Yehowa ne biuma biabu.’ Bikale batuishibue bonso ne: “mulami wa lulamatu” neatungunuke ne kutabalela bintu bia Mfumu! Tudi tulomba Yehowa bua abeneshe mapangadika onso mangata bua kualabaja mudimu pa buloba bujima.

[Mêyi adi kuinshi]