Dipangadika dietu ndia kulonda njila wa muoyo wa Yehowa

¹ Bumue bualu bunene bua mu Mpungilu ya “Njila wa muoyo wa Nzambi” buvua dipangadika diangata mu muyuki wa nkomenu. Divua dituadija ne mêyi aa: “Tuetu . . . tudi tuitaba ne muoyo mujima ne: njila wa Nzambi ke njila wa muoyo mutambe buimpe.” Vulukayi amue malu a mushinga a mu dipangadika edi atuvua bitabile ne: “EYO!”

² Dipangadika dietu ndia kushala bakezuke ku mêsu kua Yehowa, katuyi ne katoba ka mu bulongolodi ebu. Netutungunuke ne kuteka disua dia Nzambi kumpala mu nsombelu wetu. Mu dikuata mudimu ne Bible, Dîyi diende, bu mulombodi wetu, katuakusesuka ku dia balume anyi ku dia bakaji, tushindika nunku mudi njila wa Nzambi mutumbuke menemene mupite njila wa bulongolodi ebu.

³ Bua tshitupa tshinene, nsangilu wa bantu udi upetula njila wa muoyo wa Nzambi ne ufika ku bipeta bibi. (Yel. 10:23) Nunku, tudi ne bua kutungunuka ne kulongeshibua kudi Mushidimunyi wetu Munene, Yehowa, udi wamba ne: “Ke njila eu. Endelayimu.” (Yesh. 30:21) Njila wa muoyo wa Yehowa mmutumbuke mu malu onso, anu mudibi bileja mu Mifundu. Bua kulonda njila eu, bidi bikengela bua tupetele diambuluisha tshishiki ku malu onso adi Yehowa utulongesha.

⁴ Ndongamu wa dilongesha mutumbuke wa Yehowa: Yehowa udi utulongesha tshipatshila tshilelela tshia muoyo ne mushindu wa kukuata mudimu ne nsombelu wetu bua kuenza malu matambe buimpe. Udi utulongesha mushindu wa kulengeja nsombelu wetu mu lungenyi, mu malu a tshitembu ne mu nyuma. Udi utulongesha mushindu wa kusomba mu ditalala ne bana betu, mêku etu ne bantu netu. Udi utulongesha malu aa ku diambuluisha dia Bible, mukanda wende, ne ku diambuluisha dia bulongolodi buende.

⁵ Bisangilu bietu bia tshisumbu bidi ne mushinga mukole pa bualu ebu. Patudi tubuela pa tshibidilu mu bisangilu bionso bitanu ne tufilamu mandamuna, tudi tupeta dilongesha dialabale dia ba-ministre ba lumu luimpe ne dilongesha didi dileja nkatshinkatshi mu nsombelu wa Buena-Kristo. (2 Tim. 3:16, 17) Mushidimunyi wetu Munene udi kabidi ufila dilongesha dia teokrasi ku diambuluisha dia mpuilu ne mpungilu. Tshipatshila tshietu tshidi ne bua kuikala ne: katupumbishi nansha kakese tshisangilu tshimue peshi mpuilu padi makanda etu a mubidi ne nsombelu wetu kabiyi bitupangisha mua kubuela.

⁶ Tutungunukayiku ne tshisumi ne kulonda njila wa muoyo wa Nzambi mu matuku adi kumpala, bionso ebi bua butumbi bua Yehowa ne diakalenga dietu dia kashidi!​—Yesh. 48:17.