Fila mukanda wa Disanka mu dîku kudi bakulumpe ne bana

¹ Muana wa balume wa mvula 11 wa mu ditunga dia Californie (États-Unis) wakumvuija dianyisha diende bua mukanda wa Nsapi wa disanka mu dîku. Wakafunda ne: “Ndi ne dianyisha bua mukanda eu, ne ndi nkankamija mêku makuabu bua awubale bualu mmuimpe be. Udi kabidi wambuluisha dîku dianyi bua kuikala ne ditalala ne disanka ku nzubu.” Tshidi muana eu wamba tshidi ne bua kutukankamija bua kufila mukanda wa Disanka mu dîku kudi bakulumpe ne bana. Mona imue ngenyi yudi mua kuteta mu mudimu webe mu Luishi:

² Paudi upetangana ne nsonga, udi mua kuamba ne:

▪ “Bansonga bavule ba bukole buebe ebu badi bela meji bua dibaka. Ndiku mua kumanya né udi pebe ne meji a dibaka anyi? [Mulekele andamune.] Bansonga batu bamba misangu ya bungi ne: ki mbajadike bikalabu badiakaje bua dibaka. Ndi musue kukuleja tshidi mukanda eu mukese wamba pa bualu ebu.” Bulula mukanda wa Disanka mu dîku mu dibeji dia 14 ne bala tshikoso 3. Pashishe leja mitu mikese yonso ya bualu idi mu nshapita eu. Fila mukanda ne numvuangane bua wewe kupingana.

³ Biwasangana muledi, udi mua kuamba ne:

▪ “Tudi tuyukila ne baledi pa imue ngenyi-miludiki milenga idi ikuatshisha bantu bushuwa mu dikolesha dia bana. Ngenyi eyi idi mu mukanda mukese eu wa Nsapi wa disanka mu dîku.” Bulula mu dibeji dia 55. Bala tshikoso tshia 10, pashishe Dutelonome 6:6, 7 mu tshikoso tshia 11. Panyima wele kashonyi pa biambilu bifunda mu miaku misendamija mu tshikoso tshia 12 too ne tshia 16. Tungunuka ne mêyi aa: “Mukanda eu mmuambuluishe baledi ba bungi bua kupatula bipeta bimpe. Biwasua kuubala, nenkushilawu.”

⁴ Mu diyukila ne muntu mukulakaje, udi mua kuamba ne:

▪ “Suaku ungambile meji audi wela pandi njikija dibala mêyi makese aa.” Bala biambilu bibidi bia kumpala mu tshikoso tshia 17 mu dibeji dia 169 mu mukanda wa Disanka mu dîku. Pashishe windile diandamuna. Bilondeshile tshidiye wamba, udi mua kubala bitupa bikuabu mu mukanda kumpala kua kumupeshawu.

⁵ Mu dilondakaja difila dia mukanda wa Disanka mu dîku, wikale ne lungenyi lua kuteta mua kutuadija dilonga dia Bible. Dilongesha dia 8 mu broshire wa Utulomba anyi nshapita wa 15 mu mukanda wa Dimanya bidi mua kuikala muaba muakanyine wa kutuadijila. Tudienzeje mpindieu bua kuambuluisha bakulumpe ne bana bua biibake nsombelu wa mu dîku wa disanka ne wa bena Kristo.