Udifile ku dibala
“Too ne ku difika dianyi, uditue mu dibala, mu dibelangana ne dilongesha.”—1 TIMOTEE 4:13, Mukenji Mulenga.
1. Mmunyi mutudi mua kupetela masanka ku dibala dia Bible?
YEHOWA NZAMBI mmupe bukua-bantu nzanzu ya dikema ya dilonga kubala ne kufunda. Mmutupeteshe kabidi Dîyi diende, Bible, bua tumone mua kushidimunyibua biakane. (Yeshaya 30:20, 21) Mu ngakuilu wa mu tshimfuanyi, mabeji ende adi atupetesha mushindu wa “kuenda” pamue ne bankambua batshinyi ba Nzambi bu mudi Abrahama, Izake, ne Yakoba. Tudi mua “kumona” bakaji banemekedi ba Nzambi bu mudi Sara, Rebeka, ne Luta mukaji muena lulamatu muena Moaba. Eyowa, tudi mua “kumvua” kabidi Yezu Kristo wenza Muyuki wende pa Mukuna. Milowo yonso eyi ne dishidimunyibua dia mpatshi bia mu Mifundu Minsantu tudi mua kubipeta bituikala babadi bimpe.
2. Ntshinyi tshidi tshileja se: Yezu ne bapostolo bende bavua bamanye mua kubala bimpe?
2 Kakuyi mpata, muntu mupuangane Yezu Kristo uvua ne nzanzu ya tshishiki bua dibala, ne uvua bushuwa mumanye Mifundu ya tshiena-Ebelu bimpe menemene. Nunku, pakamuteta Diabolo, Yezu wakayitela misangu ya bungi pa kuamba ne: ‘Bakafunda ne.’ (Matayo 4:4, 7, 10) Dimue dituku mu nsunagoga wa mu Nazarete, wakabala patoke ne kutumika ne tshitupa kampanda tshia mulayi wa Yeshaya pa kudilamikatshi. (Luka 4:16-21) Netuambe tshinyi bua bapostolo ba Yezu? Mu difunda diabu, bakatela misangu ya bungi Mifundu ya tshiena-Ebelu. Nansha muvua bamfumu bena Yuda bangata Petelo ne Yone bu bapangi ba mukanda ne bantu ba tshianana bualu kabavua balonge mu tulasa tubandile tua bena Ebelu, mikanda yabu mifunda ku spiritu wa Nzambi idi ijadika patoke ne: bavua bamanye mua kubala ne kufunda bimpe. (Bienzedi 4:13) Kadi nzanzu bua dibala idi bushuwa ne mushinga anyi?
“Wa diakalenga ng’eu udi ubala ne dîyi dikole”
3. Bua tshinyi bidi bia mushinga bua kubala Mifundu ne mikanda ya bena nkristo?
3 Dipeta ne ditumikila dimanya dijalame dia Mifundu bidi mua kufikisha ku muoyo wa kashidi. (Yone 17:3) Nunku Bantemu ba Yehowa badi basunguluja se: bidi bia mushinga menemene bua kubala ne kulonga Mifundu Minsantu ne mikanda ya bena nkristo mipetesha kudi Nzambi ku butuangaji bua kasumbu ka mupika wa lulamatu ne wa budimu ka bena nkristo bela manyi. (Matayo 24:45-47) Bushuwa, pa kutumika ne mikanda ya Watch Tower milongolola bua tshipatshila tshia pa buatshi, bantu binunu mbalongeshibue mua kubala ne nunku bapete dimanya dipeteshi dia muoyo dia Dîyi dia Nzambi.
4. (a) Bua tshinyi diakalenga didi difumina ku dibala, dilonga, ne ditumikila Dîyi dia Nzambi? (b) Pa bidi bitangila dibala, Paulo wakambila Timote tshinyi?
4 Diakalenga didi difumina ku dibala, dilonga, ne ditumikila Dîyi dia Nzambi. Bidi nunku bualu tudi tusankisha ne tunemeka Nzambi, tupeta dibenesha diende, ne tulabula disanka pa kuenza nunku. Yehowa mmusue bua basadidi bende kuikalabu ne diakalenga. Nunku, wakatumina bakuidi dîyi bua kubadila bena Izalele wa kale Mikenji yende. (Dutelonome 31:9-12) Pavua mutentudi Ezela ne bakuabu babadila bantu bavua badisangishe mu Yeruzaleme Mikenji, diumvuija diayi diakalejibua patoke, ne “kusankabo bikole” bu tshipeta. (Nekemiya 8:6-8, 12, MMM) Pashishe, mupostolo muena nkristo Paulo wakambila muena mudimu nende Timote ne: “Too ne ku difika dianyi, uditue mu dibala, mu dibelangana ne dilongesha.” (1 Timotee 4:13, Mukenji Mulenga) Nkudimuinu mukuabu udi wamba ne: “Udifile ku dibala dia patoke dia Mifundu.”—New International Version.
5. Mmunyi mudi Buakabuluibua 1:3 usuikakaja diakalenga ku dibala?
5 Muanda wa se: diakalenga dietu ndisuikakaja ku dibala ne ditumikila Dîyi dia Nzambi mmuleja patoke mu Buakabuluibua 1:3 (NW). Mbatuambilemu ne: “Wa diakalenga ng’eu udi ubala ne dîyi dikole ne aba badi bumvua mêyi a mulayi eu, ne badi batumikila malu adi mafundamu; bualu tshikondo tshijadika tshiasemenyi pabuipi.” Eyowa, bidi bikengela tubale ne dîyi dikole ne tumvue mêyi a mulayi a Nzambi mu Buakabuluibua ne mu Mifundu yonso. Wa diakalenga dilelela ng’eu udi ne “disanka mu mikenji ya Yehowa, ne mu mikenji yende, udi ubalamu ne dîyi dia panshi panshi munya ne butuku.” Tshipeta? “Malu onso adiye wenza nealubuluke.” (Musambu 1:1-3, NW) Nunku, bua tubingila tuimpe, bulongolodi bua Yehowa budi bubela yonso wa kutudi bua kubala ne kulonga Dîyi diende muntu pa nkayende, mu mêku, anyi ne balunda.
Didifukila ngenyi ne dieleela meji
6. Yoshua uvua mulombibue bua kubala tshinyi, ne ebi bivua ne dikuatshisha kayi?
6 Mmunyi muudi mua kutamba kubabidila dibala diebe dia Dîyi dia Nzambi ne mikanda ya bena nkristo? Pamu’apa neumone bikale ne dikuatshisha bua kuenza bu muakenza Yoshua, mulombodi mutshinyi wa Nzambi wa Izalele wa kale. Uvua mutumina dîyi ne: “Wikale ubala miaku idi mu mukanda ewu wa Diyi matuku onso, uyanyine mu muoyo webe butuku ne munya, bua umone mua kulama ne kukumbaja bionso bidi bifundamu. Nanku awu newikale ne diakalenga mu malu ebe audi wenza, neulubuluke.” (Yeshuwa 1:8, MMM) ‘Kuanyina mu muoyo’ kudi kumvuija kudiambila mêyi wewe muine ne dîyi dia panshi panshi. Kuenza nunku kudi kuambuluisha bua kuvuluka, bualu bidi bibueja malu mabala mu tshieledi tshia lungenyi. Yoshua uvua ne bua kubala mu Mikenji ya Nzambi “butuku ne munya,” anyi pa tshibidilu. Au ke mushindu uvuaye mua kupeta diakalenga ne kulubuluka mu dikumbaja majitu mamuambika kudi Nzambi. Dibala dia pa tshibidilu dia mushindu’eu dia Dîyi dia Nzambi didi mua kukuambuluisha mushindu wa muomumue.
7. Bua tshinyi tudi ne bua kuepuka dikokeshibua kudi lungenyi lua dipitshisha lukasa mabeji mavule patudi tubala Dîyi dia Nzambi?
7 Kukokeshibu kudi lungenyi lua dipitshisha lukasa mabeji mavule paudi ubala Dîyi dia Nzambi. Biwikala mulongolole bua kupitshisha lupolo kampanda lua dîba bua kubala Bible anyi mukanda kansanga wa bena nkristo, bidi bikengela bua wewe kutukija. Ebi bidi bia mushinga nangananga paudi ulonga ne tshipatshila tshia kuvuluka malu manene. Ne paudi ubala, enza madikolela bua kueleela meji. Konkonona biambilu bia mufundi eu wa Bible. Udiebeje wewe muine se: ‘Udi ne tshipatshila kayi? Ndi ne bua kuenza tshinyi ne mamanyisha aa?’
8. Bua tshinyi bidi bia mushinga bua kueleela meji dîba dia dibala dia Mifundu?
8 Utukije bua kueleela meji paudi ubala Mifundu Minsantu. Ebi nebikuambuluishe bua kuvuluka miyuki ya mu Bible ne kutumikila mêyi-maludiki a mu Mifundu. Dieleela meji pa Dîyi dia Nzambi ne nunku kuvuluka malu manene mu tshieledi tshiebe tshia lungenyi nebikuambuluishe kabidi bua kuakula malu adi umbukila mu mutshima, upetesha bakonki bena muoyo mululame mandamuna pamutu pa kuakula bualu kampanda budi mua kukubungamija kunyima. Lusumuinu kampanda lufunda ku spiritu wa Nzambi ludi luamba ne: “Mutshima wa muntu muakane udi welangana meji a bualu budiye mua kukudimuna.”—Nsumuinu 15:28.
Suikakaja malu mapiamapia ku a kale
9, 10. Mmunyi mudi dibala diebe dia Bible mua kuakajibua kudi disuikakaja dia malu mapiamapia a mu Mifundu ku aa awukadi mumanye?
9 Bavule ba ku bena nkristo badi ne bua kutonda ne: kumpala bavua bamanye anu bikese pa bidi bitangila Nzambi, Dîyi diende, ne malongolola ende. Kadi, lelu’eu, ba-ministre aba bena nkristo, bituadijile ku bufuki ne dipona dia muntu mu mpekatu, badi mua kumvuija tshipatshila tshia mulambu wa Kristo, badi mua kuakula pa bidi bitangila dibutudibua dia ndongoluelu eu mubi wa malu, ne badi mua kuleja mushindu wabeneshibua bukua-bantu buena butumike ne muoyo wa kashidi pa buloba bua mparadizu. Mu bualabale bunene bidi mua kuenzeka bualu basadidi aba ba Yehowa mbapete “dimanya dia malu a Nzambi” pa kulonga Bible ne mikanda ya bena nkristo. (Nsumuinu 2:1-5) Mbasuikakaje ku kakese ku kakese malongesha mapiamapia ku akavuabu bajingulule kale.
10 Kusuikakaja malu mapiamapia a mu Mifundu ku aa awukadi mumane kumanya kudi ne dikuatshisha ne kudi kufuta. (Yeshaya 48:17) Padi mikenji, mêyi-maludiki, anyi mene imue ngenyi pa bintu bikena bimueneka bia mu Bible bilejibua, ubisuikakaje ku biukadi mumanye. Upunge mamanyisha bua ikale mu diumvuangana ne biukadi mulonge pa bidi bitangila “tshitembelu tshia mêyi a lupandu.” (2 Timote 1:13, NW) Keba mamanyisha adi mua kukuambuluisha bua kukolesha malanda ebe ne Nzambi, kuakaja bumuntu buebe bua muena nkristo, anyi kukuambuluisha bua kuabanyangana malelela a mu Bible ne bakuabu.
11. Ntshinyi tshiudi mua kuenza paudi ubala muanda kampanda wa mu Bible udi wakula pa bidi bitangila nsombelu? Fila tshilejilu.
11 Paudi ubala bualu kampanda budi Bible wamba pa bidi bitangila nsombelu, enza madikolela bua kusunguluja dîyi-diludiki didi mu tshialu. Weleelepu meji, ne upangadije tshiudi mua kuenza mu nsombelu ya muomumue. Yozefe muana wa balume wa Yakoba wakabenga misangu yonso bua kuditua mu tshiendenda ne mukaji wa Potifare, webeja ne: “Mundi mua kuenza bualu bubi bunene nenku, kutombokela [Nzambi, NW] mmunyi?” (Tshibangidilu 39:7-9, MMM) Mu muyuki eu musonsodi, udi upetamu dîyi-diludiki kampanda dia nshindamenu—tshiendenda mmpekatu munene muenzela Nzambi. Udi mua kusuikakaja mu lungenyi dîyi-diludiki edi ne biambilu bikuabu bia mu Dîyi dia Nzambi, ne neubabidile dimanya edi biwikala mutetshibue bua kuditua mu tshienzedi tshibi tshia mushindu’eu.—1 Kolinto 6:9-11.
Fuanyikija mu lungenyi malu menzeka a mu Mifundu
12. Bua tshinyi kufuanyikija mu lungenyi miyuki ya mu Bible paudi uyibala?
12 Bua kubueja malu mu tshieledi tshiebe tshia lungenyi paudi ubala, fuanyikija mu lungenyi mudi muanda wenda wenzeka. Mu lungenyi tangila muaba, nzubu, bantu. Teleja mêyi abu. Umvua mupuya wa mampa adi woshibua pa tshioshedi tshia mampa. Fuikakaja nsombelu eyi. Nunku dibala diebe nedikale bualu busonsodi, bualu udi mua kumona tshimenga kampanda tshia kale, kubanda mukuna kansanga mutumbuke, kukemeshibua kudi bintu bia mpatshi bia bufuki, anyi kudisangisha ne balume ne bakaji bena ditabuja dinene.
13. Mmunyi muudi mua kumvuija muanda udi mufunda mu Balumbuluishi 7:19-22?
13 Tshilejilu, udi ubala Balumbuluishi 7:19-22. Fuanyikija mu lungenyi tshidi tshienzeka. Mulumbuluishi Jedeon ne bilobo nkama isatu bena Izalele mbanyungulule tshitudilu tshia bena Madiane muntu yonso pa muaba wende. Tudi bu pa dîba dikumi butuku, ntuadijilu wa “mundankulu.” Bansentedi bena Madiane bafumi ku diimana pa miaba yabu, ne mîdima idi ibuikila tshitudilu tshia baluishi ba Izalele badi mu tulu. Mona! Jedeon ne bantu bende mbambule mpungi. Badi ne tulondo tualabale tua mâyi tudi tubuikila bimunyi bikuata mu bianza biabu bia bakaji. Diakamue, milongo isatu ya bantu lukama ku umue idi yela mpungi, ishipa tulondo, ijula bimunyi kuulu, ne yela lubila ne: ‘Muele wa mvita wa Yehowa ne wa Jedeon!’ Udi utangila ku kamponya. Ee, bena Madiane badi basa lubilu ne batuadija kuela mbila! Padi nkama eyi isatu batungunuka ne kuela mpungi yabu, Nzambi udi uteka miele ya mvita ya bena Madiane bua kuluishanganabu umue ne mukuabu. Madiane wanyemi, ne Yehowa wapeshi Izalele ditshimuna.
Peta malongesha a mushinga
14. Mmunyi mudi Balumbuluishi nshapita wa 9 mua kuambuluisha bua kulongesha muana kampanda dikengela dia kuikala mudipuekeshi?
14 Pa kubala Dîyi dia Nzambi, tudi mua kupeta malongesha a bungi. Tshilejilu, pamu’apa udi musue kubueja mu tshieledi tshia lungenyi tshia bana bebe dikengela dia kuikala badipuekeshi. Ee, bidi ne bua kuikala bipepele bua kufuanyikija mu lungenyi ne kujingulula diumvuija dia tshivua tshiambibue mu mulayi wa Yotama muana wa balume wa Jedeon. Tuadija kubala Balumbuluishi 9:8. ‘Kale,’ ke muakamba Yotama, ‘mitshi yonso yakadisangisha bua kusungula mukalenge wa ku mutu kuayi.’ Mutshi wa olive, mutshi wa mfigi, ne mvinyo yakabenga bua kukokesha. Kadi mutshi wa mêba wa tshianana uvua wowo ne disanka bua kulua mfumu. Mumane kubadila bana bebe muyuki eu ne dîyi dikole, udi mua kumvuija ne: bikunyibua bia mushinga bivua bileja bantu bakanyine bakabenga kukeba muanzu wa bukalenge ku mutu kua bena Izalele nabu. Mutshi wa mêba, ùvùa wambuluisha anu bu nkunyi, uvua uleja bukalenge bua muditambishi Abimeleke, mushipianganyi wakasua bua kukokesha bakuabu kadi wakatua ku ndekelu bu dikumbana dia mulayi wa Yotama. (Balumbuluishi, nshapita wa 9) Mmuana kayi wasua kukola ne kufuana mutshi wa mêba?
15. Mmunyi mudi mushinga wa bulamatshi ku mikenji muzangika mu mukanda wa Luta?
15 Mushinga wa lulamatu mmuleja patoke mu mukanda wa mu Bible wa Luta. Fuanyikija ne: bena mu dîku diebe badi babala muyuki au muntu ne muntu wende musangu ne dîyi dikole ne benza madikolela bua kujingulula tshidiwu wamba. Udi umona mukaji muena Moaba Luta wenza luendu ku Beteleme ne mamuende muenu mukamba, Naomi, ne údí umvua Luta wamba ne: “Bantu bebe nebikale bantu banyi ne Nzambi webe neikale Nzambi wanyi.” (Luta 1:16) Udi umona muenji wa mudimu mukole Luta wangula miepu mishiya mu budimi bua Boaze panyima pa banowi. Udi umumvua umuela ka-lumbandi, wamba ne: ‘Bena musoko bonso mbamanye ne: wewe udi mukaji wa kanemu.’ (Luta 3:11) Katupa kîpi kunyima, Boaze udi usela Luta. Mu diumvuangana ne ndongoluelu wa disela bukonde, kudi Boaze wakalelela “Naomi” muana wa balume. Luta udi ulua nkambua-mukaji wa Davidi ne ndekelu wa bionso wa Yezu Kristo. Nunku wakapeta “difutu dipuangane.” Kupita apu, aba badi babala muyuki eu wa mu Mifundu badi bapetelaku dilongesha dia mushinga: Ikala ne bulamatshi kudi Yehowa, ne neubeneshibue bia bungi.—Luta 2:12, NW; 4:17-22; Nsumuinu 10:22; Matayo 1:1, 5, 6.
16. Nditeta kayi diakakama bena Ebelu aba basatu, ne mmunyi mudi muyuki eu mua kutuambuluisha?
16 Muyuki wa bena Ebelu babikidibue ne: Shadrake, Meshake, ne Abedenego udi mua kutuambuluisha bua kuikala ne lulamatu kudi Nzambi mu nsombelu ya mateta. Fuanyikija mu lungenyi bualu ebu padi Danyele nshapita 3 ubadibua ne dîyi dikole. Lupingu lunene lua ngolo ndutumbuke mu mpata wa Dura, muaba udi bamfumu bena Babilone badisangishe. Ku tshivuma tshia biombelu, badi binama panshi ne batendelela lupingu ludi Mukalenge Nebukadnezare muibake. Mbuena kuamba ne: bonso pa kumbusha Shadrake, Meshake, ne Abedenego badi benza nunku. Ne kanemu konso, kadi ne dipangadika dikole, badi bambila mukalenge eu ne: kabakusadila nzambi yende ne kutendelela lupingu lua ngolo. Bansongalume aba bena Ebelu badi bimanshibua mu tshikutu tshia kapia kakole. Kadi ntshinyi tshidi tshienzeka? Pa kutangila munda, mukalenge eu udi umona balume banayi ba mukitshi, umue wa kudibu ‘uvua ne tshimfuanyi tshia muana wa nzambi.’ (Danyele 3:25) Bena Ebelu aba basatu badi bapatudibua mu tshikutu tshia kapia, ne Nebukadnezare udi ubenesha Nzambi wabu. Mbia mushinga bua kufuanyikija muyuki eu mu lungenyi. Ne ndilongesha kayipu didiwu upetesha pa bidi bitangila lulamatu kudi Yehowa dîba dia diteta!
Petela masanka ku dibala dia Bible mu dîku
17. Mu mêyi makese tela amue a ku malu a disanka adi dîku diebe mua kulongela ku dibala dia Bible pamue.
17 Dîku diebe didi mua kulabula masanka a bungi binuikala nupitshisha pa tshibidilu dîba bua kubala Bible pamue. Bituadijile ku Genese, nudi mua kufuanyikija mu lungenyi bufuki ne kumona tshisombedi tshia kumpala tshia Mparadizu tshia muntu. Nudi mua kuabanyangana malu menzeke aa a bankambua bena lulamatu ne mêku abu ne kulonda bena Izalele padibu basabuka Mbuu Mukunze ku makasa kuume. Nudi mua kumona mulami wa mikoko nsongalume Davidi utshimuna muena Filistiya wa mpolondo Goliate. Dîku diebe didi mua kubambisha diibakibua dia ntempelo wa Yehowa mu Yeruzaleme, didi mua kumona dibutudibua diende kudi biluilu bia bena Babilone, ne didi mua kumona dimuibakulula muinshi mua bukokeshi bua Nguvernere Zorobabele. Pamue ne balami ba mikoko bapele pabuipi ne Beteleme, nudi mua kumvua dimanyisha dia muanjelu dia diledibua dia Yezu. Nudi mua kupeta dimanyisha ku dimue ku dimue pa batismo wende ne mudimu wende, nudi mua kumumona ufila muoyo wende wa bu-muntu bu tshia-bupikudi, ne nudi mua kulabula disanka dia dibiishibua diende. Pashishe, nudi mua kuenza luendu ne mupostolo Paulo ne kumona dibanjijibua dia bisumbu dîba didi Buena-nkristo butangalaka. Pashishe, mu mukanda wa Buakabuluibua dîku diebe didi mua kupeta milowo ku tshikena-kumona tshia mpatshi tshia mupostolo Yone bua matuku atshilualua, pa kukonga ne Bukokeshi bua Bidimu Tshinunu bua Kristo.
18, 19. Mmibelu kayi idi mifidibue pa bidi bitangila dibala dia Bible mu dîku?
18 Binuikala nubala Bible ne dîyi dikole mu dîku, numubale mu mushindu mumvuike ne musangelu. Panudi nubala bimue bitupa bia Mifundu, muena mu dîku umue—pamu’apa tatu—udi mua kubala mêyi a muyuki. Bakuabu ba kunudi badi mua kuangata miaba ya bantu ba mu Bible, nubala bitupa bienu ne dishindumuna diakanyine.
19 Panudi nuditua mu dibala dia Bible mu dîku, nzanzu yenu bua dibala idi mua kuvula. Pamu’apa, dimanya dienu dia Nzambi nedivule, ne ebi bidi ne bua kutamba kunusemeja pabuipi nende. Azafe wakimba ne: ‘Bidi bimpe bua meme kusemena pabuipi ne Nzambi. Nakuvuija Mukalenge Yehowa tshinyemenu tshianyi, bua mmanye bianyi mua kuambila bantu bua midimu yebe yonso.’ (Musambu wa 73:28) Ebi nebiambuluishe dîku diebe bua kuikaladi bu Mozese, eu “uvua utungunuka ne kutantamana bu uvua umona Eu ukena-umueka,” mbuena kuamba ne: Yehowa Nzambi.—Ebelu 11:27, NW.
Dibala ne mudimu wa Buena-nkristo
20, 21. Mmunyi mudi mudimu wetu wa buambi musuikakaja ku nzanzu bua dibala?
20 Dijinga dietu dia kutendelela “Eu ukena-umueka” didi ne bua kutusaka ku dienza madikolela bua kuikala babadi bapiluke. Nzanzu bua dibala bimpe idi ituambuluisha bua kufila bumanyishi buashila pa Dîyi dia Nzambi. Idi kakuyi mpata ituambuluisha bua kukumbaja mudimu wa buambi bua Bukalenge uvua Yezu muomekele bamulondi pakambaye ne: “Ndayi ne nuvuije bantu ba mu matunga onso bayidi, nubatambuishe mu dîna dia Tatu, dia Muana ne dia spiritu munsantu, nubalongeshe mua kutumikila mêyi onso andi munutumine.” (Matayo 28:19, 20, NW; Bienzedi 1:8) Difila bumanyishi ke mudimu munene wa bantu ba Yehowa, ne nzanzu bua dibala idi ituambuluisha bua kuukumbaja.
21 Bidi bikengela madikolela bua kuikala mubadi mupiluke ne mulongeshi muena nzanzu wa Dîyi dia Nzambi. (Efeso 6:17) Nunku, ‘enza muebe muonso mua kuenza bua udileje kudi Nzambi bu muntu muanyishibue, udi utumika bilenga ne dîyi dia bulelela.’ (2 Timote 2:15, NW) Vudija dimanya diebe dia bulelela bua mu Mifundu ne nzanzu yebe bu Ntemu wa Yehowa pa kudifila wewe muine ku dibala.
Mandamuna ebe adi tshinyi?
◻ Mmunyi mudi diakalenga disuikakaja ku dibala dia Dîyi dia Nzambi?
◻ Bua tshinyi kueleela meji pa biudi ubala mu Bible?
◻ Bua tshinyi kutumika ne disuikakaja ne difuanyikija mu lungenyi paudi ubala Mifundu?
◻ Ng’amue malongesha kayi atudi tupetela ku dibala dia Bible?
◻ Bua tshinyi kubala Bible ne dîyi dikole mu dîku, ne ndiumvuangana kayi didi pankatshi pa dibala ne mudimu wetu wa Buena-nkristo?
[Bimfuanyi mu dibeji 13]
Panudi nubala Bible mu dîku, fuanyikijayi miyuki mu lungenyi ne eleelayi meji pa diumvuija diayi