Dîyi dia mulayi dia Nzambi nedikumbane dionso!
1 Bantemu ba Yehowa batu misangu yonso batuma ntema yabu ku milayi ya mu Bible. Nunku tuvua ne disanka dia kumvua ne: tshiena-bualu tshia mpungilu wa distrike bua tshidimu etshi tshivua ne bua kuikala “Dîyi dia mulayi dia Nzambi.” Tuvua ne muoyo kulukulu bua kumanya bivua Yehowa mutulamine bu “biakudia . . . mu tshikondo tshiakanyine.” (Mat. 24:45, NW) Kavua mututekeshe mu mikolo nansha.
2 Malu manene a mu mpungilu: Muyuki wa nshindamenu wa mu Ditanu eu: “Teyayi ntema ku dîyi dia mulayi dia Nzambi,” uvua mufile diumvuija ditokesha pa muanda wa dikudimuka dia mpala wa Yezu. (Mat. 17:1-9) Uvua muele kashonyi pa bualu bua ne: mpindieu mene tukadi pa kubuela mu bikondo bitambe buimpe bualu tukadi basemene bikole, bikole menemene mu bikondo bia ku nshikidilu ne ndongoluelu mupiamupia udi anu pabuipi kumpala eku! Mushindu muimpe utudi ne bua kuteya ntema ku Dîyi dia Nzambi nkudibala pa tshibidilu. Muyuki mukosolola eu: “Tuikalayi ne disanka mu dibala Dîyi dia Nzambi” uvua mufile ngenyi miakanyine bua kuvuija dibala dietu dia Bible dikale dikuatshisha ne disankisha.
3 Mu Disambombo mu mapingaja tuvua bakonkonone malu adi aleja bua tshinyi tudi ne bua kuikala batuishibue ne: tudi mu matuku a ku nshikidilu. Udiku mua kuvuluka malu onso au anyi? Dia lumingu mu dinda, mulayi wa Habakuka uvua ulenga ku muoyo bualu tuvua bumvue ne: matuku etu aa mmafuanangane bikole ne a mu tshikondo tshiende ne malu manene akadi mpindieu pa kulua pikala Yehowa mua kubutula bantu babi ne kupandisha bantu bakane. Uvuaku mupete dilongesha dia mushinga dia drama wa mu Bible wa Yakoba ne Esau anyi? Tudi ne bua kukeba ne tshisumi mabenesha a kudi Yehowa, pa kukandamena kalèngù.
4 Mukanda mupiamupia uvua musankishe bantu: Ndisanka kayipu dituvua nadi bua mukanda mupiamupia wa Prêtons attention à la prophétie de Daniel! Kakuyi mpata, ukadi mutuadije kubala mukanda eu udi ukoka ntema. Ngamba-malu uvua muleje mukanda eu uvua muambe ne: “Pa kumbusha amue malu makese, milayi yonso idi mu mukanda wa Danyele ikadi mimane kukumbana.” Ebi kabienaku bileja mudi bikondo bietu ebi bilomba bua kuikala ne mitalu anyi?
5 Ndongamu wa mpungilu mmukoleshe menemene dituishibua dietu dia se: malaya a Nzambi onso adi kaayi manji kukumbana neakumbane. Bidi bitusaka bua kutungunuka ne kuambila bakuabu dîyi dia mulayi dia Nzambi!