Kudiku mushindu wa kuenza bua ngondo muinayi wa 2000 ikale ngondo wetu mutambe buimpe anyi?
1 Disatu ku dilolo, dia matuku 19 a ngondo muinayi, nedikale dituku dinene bua tshidimu tshietu tshia mudimu. Dituku adi, pikala dîba dienda dibuela pa buloba bujima, bisumbu bionso bia Bantemu ba Yehowa binene ne bikese nebisekelele Tshivulukilu tshia lufu lua Kristo. Muaba kayi wonso utudi basombele, divuluka mulambu wa Yezu Kristo nedikale bualu bunene bua tshidimu. Dituku dia Tshivulukilu ndileja mu ngondo wa Tshisanga mu Calendrier des Témoins de Jéhovah.
2 Ngondo muinayi mujima udi utupesha mushindu mulenga menemene wa kuleja ne anyima wetu mujima dianyisha dietu bua bulenga bua Yehowa budiye mutuleje pa kufila mulambu wa Muanende. Mmunyi nanku? Mupostolo Paulo wakafunda ne: ‘Dinanga dia Kristo didi dituenzeja; bua tuakujingulula bualu ebu ne: bualu bua umue wakafuila bonso, nunku bonso bakafua; ne yeye wakafuila bonso bua badi ne muoyo kabikadi nawu bua bualu buabu nkayabu, kadi bikale nawu [bua] yeye wakafua ne wakabika ku lufu kabidi bua bualu buabu.’ (2 Kol. 5:14, 15) Eyowa, mu ngondo muinayi tudi mua kuleja ne: katuena ne muoyo buetu nkayetu to, kadi tudi nawu bua eu wakatufuila, pa kuenza bua ngondo eu ikale mutambe buimpe buetu tuetu bena mudimu ba Bukalenge.
3 Uuja formilere bua ulue mpanda-njila muambuluishi mu Tshisanga: Mupostolo Paulo wakashiya tshilejilu tshidi tshitusankisha bikole pakambaye ne: ‘Tshiena mbala muoyo wanyi bu tshintu tshia mushinga mukole kundi, bingamanya mua kujikija tshidikijilu tshianyi tshia lubilu ne mudimu unakuangata kudi Mukalenge Yezu wa kumanyisha lumu luimpe lua ngasa wa Nzambi.’ (Bien. 20:24) Tuetu petu tudi tusanka bua kumanyisha bantu bonso mukenji wa Yehowa Nzambi. Nenku, tuenzayi bua ngondo muinayi ikale ngondo wetu mutambe buimpe utudi mua kulua bampanda-njila bambuluishi!
4 Ngondo muinayi wa tshidimu tshia 2000 nngondo muimpe mutambe udi ba bungi mua kulua bampanda-njila bambuluishi bualu udi ne matuku a Disambombo ne a Dia lumingu atanu atanu. Mu ngondo muisambombo wa tshidimu tshia 1997, tuakafika ku bungi bua bampanda-njila bambuluishi butuvua katuyi banji kupeta muetu munu mu République démocratique du Congo: bamanyishi 8 260 bavua benze mudimu eu, mbuena kuamba ne: bantu 9 pa 100 pa kubafuanyikija ne bungi bua bamanyishi bonso. Kunyima kua bidimu bibidi, bungi bua bamanyishi bakafila luapolo lua mudimu mu 1999 buakavula, kupita pa bantu 6 pa 100. Bidi bileja ne: matuku adi kumpala eku, bungi bua bampanda-njila bambuluishi budi mua kupita bua bidimu bishale. Kabidi, bu mudibu bakepeshe mêba malomba bampanda-njila, kudi mushindu wa bamanyishi ba bungi mu tshisumbu kuenzabu pabu mudimu eu. Mbimpe mumanyishi yonso mutambule adikenkete kumpala ne kunyima bua kumona nne udi ne mushindu wa kulua mpanda-njila muambuluishi mu ngondo muinayi eu.
5 Enza programe webe wa ngondo udi ulonda ku diambuluisha dia Calendrier des Témoins de Jéhovah 2000. Funda matuku audi musungule bua kupatuka mu buambi, ne sangisha mêba onso audi mua kuenza mu buambi mu ngondo muinayi. Sakidila mêba audi mua kuyisha bantu mu mpukapuka anyi bilondeshile matuku audi musungule bua kupatuka ne bantu mu buambi. Onso masanga adiku amba kufika pabuipi ne 50 anyi? Bikalawu kaayi akumbana, kuenaku mua kuenza ndongamu mukuabu udi mua kukuambuluisha bua kulua mpanda-njila muambuluishi anyi? Bua kukumbaja mêba 50 ngondo eu, nebikukengele dîba dimue ne minite 40 dituku dionso mu buambi.
6 Mpindieu ukadibu bakepeshe bungi bua mêba malomba bampanda-njila ba pa tshibidilu, bikadiku bikuvuila mu lungenyi bua kutuadija pebe mudimu wa ku dîba ne ku dîba eu anyi? Tshiudi muindile ngondo wa muanda-mutekete ntshinganyi? Ngondo muinayi mmuakanyine bua kutuadija mudimu eu. Biwamona ne: pamu’apa kuakukokesha mêba 70 malomba bampanda-njila ba pa tshibidilu, bua tshinganyi kubenga kulua mpanda-njila muambuluishi mu ngondo muinayi eu ne kuteta bua kukumbaja mêba 70? Diakamue paudi umona ne: udi mua kukumbaja mêba 70, pamu’apa muoyo neukusame bua kulua mpanda-njila wa pa tshibidilu bu bakuabu.—Tangila mukanda wa Mudimu wetu, mab. 113-114.
7 Difila menemene bua kumanyisha lumu luimpe: Buetu tuetu bonso, bamanyishi ne bampanda-njila, dinanga dilelela ditudi nadi bua Nzambi ne bua muntu netu didi ditusaka bua kudifila muetu muonso mu mudimu wa Yehowa bilondeshile nsombelu wetu. (Luka 10:27) Nenku tudi tuleja ne: ‘tudi tuenza mudimu mukole ne tudi tutshinta, bua tuakutekemena Nzambi udi ne muoyo, udi Musungidi wa bantu bonso, kadi mutambe kuikala Musungidi wa badi bamuitabuja.’ (1 Tim. 4:10) Ke bua tshinyi tudi batekemene bua bamanyishi bonso nkong batambe kudifila mu buambi mu ngondo muinayi eu ne kabidi tudi batekemene bua muntu yonso enza ne enzelamu mudimu wa Bukalenge.
8 Katupu muoyo mubelu wa Yezu eu to: ‘Bintu bia kunowa bidi bia bungi, kadi bena mudimu badi banya-banya. Nunku, nulombe Mukalenge wa bintu bia kunowa, atume biende bena mudimu mu kunowa kuende.’ Pakajikija Yezu kubambila mêyi aa, wakabikila bapostolo bende 12 e kubatuma bua kuya kuyisha. (Mat. 9:37, 38; 10:1, 5, 7) Bu tshidimu tshijima pashishe, pakavua Yezu mumane kulongesha bantu 12 aba mudimu wa diyisha, ‘wakasungula banga bayidi kabidi makumi muanda-mutekete, wakabatuma kumpala kuende,’ kubambilaye mêyi amue-amue au ne: ‘Bulelela, bintu bia kunowa bidi bia bungi. Nunku nulombe Mukalenge wa bintu bia kunowa, atume bena mudimu mu kunowa kuende.’ (Luka 10:1, 2) Mukanda wa Bienzedi udi umvuija mushindu uvua Yehowa muandamune masambila au. Dia Pentekoste wa 33 B.B., bayidi bakavua 120. Pashishe, bayidi bakavula, kukumbanabu 3 000 ne kuluabu kabidi 5 000. (Bien. 1:15; 2:41; 4:4) Kunyima, ‘bayidi bakadi bavulangana ba bungi.’ (Bien. 6:7) Bia muomumue kabidi, mu bikondo bietu ebi, tudi ne bua kutungunuka ne kulomba Mukalenge bua atupeshe bamanyishi bakuabu ba bungi ba Bukalenge. Mumanyishi yonso wa mu tshisumbu udi ne bua kudilongolola bimpe bua katupishi ngondo nansha umue kayi muyishe to (mu diumvuangana ne masambila etu).
9 Anyisha utangile kabidi bimpe ngondo wa Tshisanga mu Calendrier 2000. Bu mudi matuku abidi a kumpala a ngondo eu mikale Disambombo ne Dia lumingu, kuenaku mua kudilongolola bua kupatuka mu buambi matuku aa bua kutuadija bimpe ngondo eu ne mudimu wa buambi anyi? Udiku mua kupatuka mu buambi “Dituku dia bibejibeji” dionso dilongolola bua ngondo eu pamue ne bena mu kasumbu kenu ka Dilonga dia Mukanda dia Tshisumbu anyi? Amba tung, bidiku bibi bua wewe kuenza dîba dimue peshi a bungi mu buambi Dia lumingu dionso anyi? Udiku mua kudilongolola bua kupatuka dilolo mu buambi amue matuku anyi? Kupu muoyo bua kuyisha mu mpukapuka dîba dionso diudi upeta mpunga ku mudimu, mu kalasa, anyi paudi wenza midimu mikuabu. Funda matuku audi musungule bua kuenza mêba bungi kampanda mu buambi, ne angata kalandriye bua kufunda mêba onso awenza mu buambi ngondo eu.
10 Ngondo muinayi neikale tshikondo tshimpe bua bonso badi bakumbane ne bua bakuabu badibu banyishile kudi bakulu bua kutuadijabu mudimu wa buambi nansha mudibu kabayi banji kutambula. Biwikala ulonga Bible ne muntu, ukadi mudiunde mu nyuma ne mukumbane bua kulomba mutangidi-muludiki né kudi mua kuikala mushindu wa kumuanyishilabu bua alue mumanyishi wa lumu luimpe anyi? Biwikala ne bana badi kabayi banji kutambula, ukadiku muyikile ne bakulu bua dikola diabu dia mu nyuma anyi? Etshi katshienaku tshikondo tshimpe bua kutuadijabu kuyisha anyi?—Tangila mukanda wa Mudimu wetu, mab. 97-100.
11 Patudi tuenza madikolela bua ngondo wa Tshisanga wa tshidimu tshia 2000 kuikalaye ngondo wetu mutambe buimpe, katupu muoyo bua kudifila mu buambi ne pashishe kufila luapolo luetu lua mudimu ku ndekelu kua ngondo. (Tangila Mâko 6:30.) Kankamijayi bamanyishi badi kabayi banji kutambula badi bapatuka bua musangu wa kumpala mu buambi bua kuuja kabeji ka luapolo lua mudimu ne kukafila diakamue padi ngondo ujika. Madikolela atudi tuenza bua kuyisha ne kufila diakamue luapolo luetu nealengeje luapolo lua ngondo wa Tshisanga ne Yehowa neatumbishibue.
12 Ambila bakuebe balue nebe mu Tshivulukilu: Kabiakutusankishaku bua kumvua ne: bantu ba bungi mbabuele mu Tshivulukilu tshia lufu lua Kristo mu tshidimu tshia 2000 etshi kupita misangu mishale anyi? Eyowa! Bualu abu nebuleje ne: bantu aba bapite bungi mbalue kudisangisha netu bua kuleja mudibu banyisha dinanga ditambe bunene didi Yehowa Nzambi ne Yezu Kristo batuleje bua diakalenga dietu! (Yone 3:16; 15:13) Dilongolola bua bualu nansha bumue kabukupangishi wewe ne bena dîku diebe bua kubuela mu Tshivulukilu.
13 Kubangila ku mpindieu, tuadija kuambila bantu bua kuluabu mu Tshivulukilu. Funda mêna a bonso baudi musue kubikila. Kupu muoyo mêna a bonso bauvua mulonge nabu Bible kale, baudi ulonga nabu mpindieu, ne bonso bautu uya kutangila. Sakidila mêna a bena mudimu nebe baudi mumanyangane nabu, balongi benu ba mu kalasa, bena mutumba ne ba-ngenda-mushinga nebe. Mêna a balela bebe ne bamanyangana nabu bonso kaashadi to. Paudi ujikija kufunda mêna onso, utuadije kupesha muntu ne muntu kabeji ka dibikilangana naku. Umvuija bimpe dîba ne muaba wenzekela Tshivulukilu. Padi dituku dia 19 dia ngondo muinayi diamba kukumbana, ela nshinga anyi ndaku kamonangana ne bantu bauvua mupeshe tubeji bua kubabikila bua kubavuluija. Balomba bua bakuindile dilolo adi bua nuenu kuya nabu njila umue mu Tshivulukilu.
14 Bilondeshile tshivua Société mulombe musangu mushale, bakulu badi ne bua kuenza madikolela a pa buawu bua kukankamija bamanyishi bonso bakadi kabatshiyi bapatuka mu buambi kadi bikale mu teritware wenu bua balue pabu mu Tshivulukilu. (Mat. 18:12-14) Bakulu nebakonkonone mukanda wa mu dia 2 Luishi 1999 uvua Société mubatumine. Sekretere wa tshisumbu neafunde mêna a bamanyishi bonso bakadi kabatshiyi bapatuka mu buambi, ne mutangidi wa mudimu neambile bakulu bua kuya kubakumbula ne kubabikila bua balue mu Tshivulukilu. Pamu’apa diya kabatangila edi kudi bakulu bua kubakankamija didi mua kubambuluisha bua kutuadijalula mudimu wa buambi ne kuwenza nansha mu ngondo muinayi. Bua kubakoleshabi, mbimpe kulongolola bua kupatukabu mu buambi ne bamanyishi bapiluke.
15 Muntu ne muntu akankamije mukuabu mu ngondo muinayi. Mbimpe kuikale diumvuangana dimpe pankatshi pa bakulu, basadidi ba mudimu ne bamfumu ba mêku bua kuvuija ngondo wa Tshisanga wa 2000, ngondo wetu mutambe buimpe. Mbimpe bakulu bikale ne tshisumi bualu buobu ke badi ne tshia kulongolola malu onso aa bimpe. (Eb. 13:7) Bidi bikengela kulongolola bimpe bisangilu bua mudimu wa buambi munkatshi mua lumingu ne ku ndekelu kualu. Bidi kabidi bikengela kulongolola bikuabu bisangilu bua mudimu wa buambi mu mapingaja ne ku dilolo. Lamikayi ku tshibasa ndongamu wa malu onso anudi balongolole bua ngondo muinayi. Nebikengele kudianjila kusungula muntu wikala ne bua kulombola tshisangilu tshionso tshia mudimu tshinudi balongolole bangabanga ne kupatuka mu buambi. Teritware ikaleku mikumbane bua bantu bonso bikale ne bua kupatuka mu buambi.
16 Mu ngondo muinayi netufile Tshibumba tshia Nsentedi ne Réveillez-vous! Bua kumona mua kutuadija kulonga Bible ne bantu, netupeshe bantu bonso badi basankidila bulelela broshire wa Utulomba. Nenku, mbimpe bamanyishi bikale ne broshire ne bibejibeji bungi bukumbane.
17 Ku ndekelu kua ngondo, balombodi bonso ba dilonga dia mukanda ne bindondi biabu nebakankamije muntu yonso wa mu kasumbu kabu bua kufilaye luapolo luende lua mudimu diakamue padi ngondo ujika. Pamu’apa badi mua kudienzeja bua kufila luapolo luabu mu Dia lumingu, dia 30 wa Tshisanga. Pashishe, padi sekretere ubadika tubeji tua luapolo, yeye mumone ne: kudi bamanyishi badi kabayi bafile luapolo luabu, udi mua kubavuluija ne bukalanga bua bayifile kumpala kua dia 6 wa ngondo muitanu, dituku didiye ne bua kutuma luapolo lua tshisumbu ku biro bia Société. Udi nansha mua kuambila balombodi ba dilonga dia mukanda bua bamuambuluishe bua kuya kukeba luapolo kudi bamanyishi badi kabayi banji kulufila.
18 Tshikondo tshia Tshivulukilu, ntshikondo tshia mushinga mukole ku mêsu a bantu ba Nzambi. Tshidi ne bua kuikala tshikondo tshitudi ne bua kuvudija mudimu utudi tuenzela Yehowa. Netuuvudije anu bikala mumanyishi yonso wa lumu luimpe mua kudifilamu muende muonso, kulua mpanda-njila muambuluishi, ne kudienzeja bua kubikila bantu netu mu Tshivulukilu tshia lufu lua Kristo. Masambila etu aye kudi Yehowa bua atambe kubenesha madikolela atudi tuenza bua kuvuija ngondo wa Tshisanga 2000 ngondo wetu mutambe buimpe bua kumusamuna ne kumutumbisha!—Eb. 13:15.
[Kazubu mu dibeji 3]
Bampanda-njila bambuluishi
Bungi butuvua katuyi banji kupeta:
Congo-Kinshasa: 8 260
(Kabalashipu 1997)
Congo-Brazzaville: 472 (1995)
[Kazubu mu dibeji 4]
Bungi busanga bua bamanyishi
Bungi butuvua katuyi banji kupeta:
Congo-Kinshasa: 114 071
(Kabitende 1999)
Congo-Brazzaville: 4 001
(Kasuamansense 1998)
[Kazubu mu dibeji 5]
Bavua babuele mu Tshivulukilu
Bungi butuvua katuyi banji kupeta:
Congo-Kinshasa: 574 736 (1997)
Congo-Brazzaville: 20 144 (1997)