Bantu “ne nyanji bu yetu”

UVUA mukalenge ne muprofete kadi muikale kabidi tatu wa dinanga. Umue wa ku bana bende ba balume wakakola e kulua muntu tshianana ne muena lutambishi. Mu dienza madikolela bua kunyenga nkuasa wa bumfumu, muana eu wakajula mvita ya bena ditunga, muikale ne meji a kushipa tatuende. Kadi mu mvita yakenzeka, muana ke wakashipabu. Pakapeta tatu lumu lua lufu lua muanende, wakabanda nkayende mu nzubu wa kuulu ne kudilaye ne: “Muan’anyi Abashaloma, muan’anyi, muan’anyi Abashaloma! Meme nakadi kukufuila, Abashaloma muan’anyi, muan’anyi!” (2 Samuele 18:33) Tatu eu uvua Mukalenge Davidi. Bu baprofete bakuabu ba Yehowa, uvua “muntu ne nyanji bu yetu.”​—Yakobo 5:17, NW.

Mu bikondo bifundilebu Bible balume ne bakaji bavua bakula bua Yehowa bavua bafume mu nsombelu yonso ne bavua bantu ba tshibidilu. Anu bu tuetu, bavua ne ntatu ne bapange bupuangane. Bamue ba ku baprofete aba mbanganyi, ne mmunyi muvua nyanji yabu mikale bu yetu?

Mozese wakumbuka ku didieyemena mutangile ku didipuekesha

Muprofete muende lumu wa kumpala kua bikondo bia Buena-nkristo uvua Mozese. Kadi nansha pavuaye ne bidimu 40, kavua mudiakaje bua kuambuluisha bu tshikuma-mbila wa Yehowa. Bua tshinyi? Mu tshikondo tshivua Faraone wa mu Ejipitu ukengesha bana babu, Mozese uvua yeye mukolesha mu nzubu mua Faraone ne uvua ‘mukole mu mêyi ende ne mu bienzedi biende.’ Muyuki eu udi utuambila ne: ‘Wakelangana meji ne: bena kuetu nebajingulule ne: Nzambi udi ubasungila ne tshianza tshianyi.’ Muikale ne didieyemena, wakenza malu ne tshikisu tshionso bua kusungila muena Ebelu mupika, pa kushipa muena Ejipitu.​—Bienzedi 7:22-25; Ekesode 2:11-14.

Mozese uvua mpindieu muenzeja bua kunyema, ne wakapitshisha bidimu makumi anayi biakalonda bu mulami wa mikoko kule mu buloba bua Midiyana. (Ekesode 2:15) Ku ndekelu kua tshikondo atshi, Mozese, muikale mpindieu ne bidimu 80, Yehowa wakamupesha mudimu bu muprofete. Kadi Mozese katshivua kabidi mudieyemenyi. Wakadimona kayi mutambe kukumbana mu mushindu wa se: wakelakana dimupesha dia mudimu bu muprofete kudi Yehowa, pa kuamba mêyi bu mudi: “Meme ndi nganyi bua kuya kudi [Faraone]?” ne se: ‘Nengambe tshinyi?’ (Ekesode 3:11, 13) Muikale ne dishindika dia dinanga ne dikuatshisha dia Yehowa, Mozese wakaya bua kukumbaja mudimu wende ne bipeta bivua bimpe menemene.

Bu Mozese, ukadiku mulekele didieyemena dikulombola bua kuenza anyi kuamba malu akamueneka kaayi a meji anyi? Pikalabi nanku, itaba dilongesha dia pa mutu ne budipuekeshi. Peshi ukadiku mudiumvue kuyi mukumbane bua kuambula majitu kampanda a bena nkristo anyi? Pamutu pa kuabenga, itaba diambuluisha difila kudi Yehowa ne bulongolodi buende. Eu wakambuluisha Mozese udi mua kukukuatshisha pebe.

Eliya uvua ne nyanji bu yetu mu tshikondo tshia dinyoka

“Eliya uvua muntu [“ne nyanji bu yetu,” NW]; kusambilaye bikole bua mvula kaloki, mvula nanshaye kuloka pa buloba bidimu bisatu ne ngondo isambombo.” (Yakobe 5:17, MMM) Disambila dia Eliya divua mu diumvuangana ne disua dia Yehowa bua kunyoka tshisamba tshivua tshimuele nyima. Pabi, Eliya uvua mumanye se: munanga uvuaye ulomba uvua mua kukebela bantu dikenga. Izalele uvua mutambe kueyemena malu a madimi; lumuma ne mvula ke bivua muoyo wa bantu. Munanga wa munanunanu uvua mua kukeba dikenga dikole. Bisosa ne mitshi bivua mua kuuma; biakudia bivua mua kunyanguka. Nyama mimuna ya ditumika nayi ne ya didia ivua mua kufua, ne amue mêku avua mua kushala mu nzala. Mbanganyi bavua mua kutamba kukenga? Bapele. Panyima pa matuku mukamba kampanda kuambila Eliya ne: uvua mushale anu ne dianza dia bukula ne tufuta tukese. Uvua mushindike bushuwa ne: yeye ne muanende wa balume bavua mua kufua ne nzala mu katupa kîpi aku. (1 Bakelenge 17:12) Bua Eliya kusambila bu muakenzaye, uvua ne bua kuikala ne ditabuja dikole dia se: Yehowa uvua mua kutabalela basadidi Bende​—bampeta ne balanda—​bavua kabayi balekele ntendelelu mulelela. Anu mudi muyuki uleja, Eliya kakateketa mu mikolo.​—1 Bakelenge 17:13-16; 18:3-5.

Bidimu bisatu pashishe, pakaleja Yehowa ne: uvua mua kulokesha mvula mu katupa kîpi aku, dijinga dikole dia Eliya dia kumona munanga ujika didi dimuenekela mu masambila ende a munanunanu ne makole pavuaye ‘winama panshi, uteka mpala wende pankatshi pa binu biende.’ (1 Bakelenge 18:42) Misangu ne misangu, wakalomba musadidi wende ne: ‘[Ndaku], utangile ku luseke lua ku mâyi manene’ bua kumona bikala bimue bimanyinu bileja ne: Yehowa uvua mumvue masambila ende. (1 Bakelenge 18:43) Ndisanka kayipu divuaye ne bua kuikala mumvue pavua ndekelu wa bionso ‘diulu ditume mvula ne buloba bumeneshe mamuma abu’ mu diandamuna ku masambila ende!​—Yakobo 5:18.

Biwikala muledi anyi mukulu mu tshisumbu tshia bena nkristo, pamu’apa udi ne bua kuela meji bikole ne nyanji miondoke paudi ufila dinyoka. Kadi, bidi bikengela kutukija mpampakenu ya bumuntu bu nunku ne dituishibua dia se: dinyoka didi ne mushinga wa bungi imue misangu ne padibu badifila ne dinanga, didi “dipetesha bavua badipete tshimuma tshia bupole ne buakane.” (Bena Hebreyi 12:11, MMM) Misangu yonso bipeta bidi bifumina ku ditumikila mikenji ya Yehowa bitu bisankisha. Anu bu Eliya, tudi tusambila ne muoyo mujima bua se: bayitumikile.

Yelemiya wakaleja dikima nansha muvuaku diteketa mu mikolo

Ku bafundi bonso ba Bible, Yelemiya ke uvua pamu’apa mufunde malu a bungi pa bidi bitangila nyanji yende. Mutshikale nsongalume, kavua musue kuitaba mudimu wende. (Yelemiya 1:6) Nansha nanku wakatuadija kuamba dîyi dia Nzambi ne dikima dikole, kubanga kuluangana ne buluishi bukole bua kudi binende bena Izalele​—kumbukila kudi mukalenge too ne kudi muntu udi kayi muanzu. Imue misangu buluishi abu buakamufikisha ku tshiji ne binsonji. (Yelemiya 9:3; 18:20-23; 20:7-18) Mu bikondo bishilangane bavua bamubunde kudi bisumbu bia bantu, bamutute, bamusuikile ku mutshi, bamuele mu buloko, bakebe kumushipa, ne bamushiye mu bitotshi muinshi mua tshina tshia mâyi tshia munda mutupu. Imue misangu nansha mukenji wa Yehowa wakamubungamija, bu mudibi bileja kudi mêyi ende: “Eyi, munda muanyi! Munda muanyi! Dikenga ndinkuate! Difu dianyi! Muoyo wanyi udi unzakala munda!”​—Yirmeya 4:19, MMM.

Nansha nanku, uvua munange dîyi dia Yehowa, wamba ne: ‘Mêyi ebe akadi kundi bu disanka ne akasankisha mutshima wanyi.’ (Yelemiya 15:16) Mu tshikondo atshi, nyanji ya dipangila yakamufikisha ku diela Yehowa lubila lukole ne: ‘Wewe newikale kundi bu kasulu ka mâyi kadi kadinga bantu ne bu mâyi adi akama,’ menze bu a mu kasulu kadi kuuma kakuyi lutatu. (Yelemiya 15:18) Nansha nanku, Yehowa wakumvua nyanji yende ivua ilubakana ne wakatungunuka ne kumukuatshisha bua kumonaye mua kukumbaja mudimu wende.​—Yelemiya 15:20; tangila kabidi 20:7-9.

Anu bu Yelemiya, utuku upetangana ne nyanji ya dipangila anyi buluishi mu dikumbaja mudimu webe anyi? Tangila kudi Yehowa. Tungunuka ne kulonda bulombodi buende, ne Yehowa neafute madikolela ebe.

Yezu uvua ne nyanji bu yetu

Muprofete mutambe bunene wa katshia ne katshia uvua Muana wa Nzambi, Yezu Kristo. Nansha muvuaye muntu mupuangane, kakasokoka mpampakenu yende. Misangu mivule tutu tubala bua nyanji yende ya munda, ivua ne bua kuikala mimuenekele ku tshilunji tshiende ne ku mushindu wende wa diandamuna bakuabu. Misangu mivule ‘luse luakakuata’ Yezu, ne wakatumika ne tshiambilu tshimuetshimue etshi pavuaye wakula bua bantu ba mu mifuanu yende.​—Mâko 1:41; 6:34; Luka 10:33.

Uvua ne bua kuikala mubandishe dîyi diende pakipataye bangenda-mushinga ne nyama mu ntempelo ne mêyi aa: “Umushayi bintu ebi apa.” (Yone 2:14-16, MML) Lungenyi lufila kudi Petelo lua ne: ‘Mukalenge; bualu ebu kabuena bulua kuudi,’ luakajula diandamuna dikole dia se: “Satana, yila ku nyima kuanyi.”​—Matayo 16:22, 23.

Yezu uvua ne dinanga dia pa buadi bua bamue bantu bavua batambe kumulamata. Mupostolo Yone uvua mumvuija bu ‘muyidi uvua Yezu musue.’ (Yone 21:7, 20) Ne tudi tubala ne: “Yezu uvua munange Marta ne muanabo wa bakaji, ne Lazare kabidi.”​—Yowanese 11:5, MMM.

Yezu uvua kabidi mua kumvua bisama. Mubungamija kudi lufu lua Lazare, ‘Yezu wakadila.’ (Yone 11:32-36, MML) Pavuaye usokolola bisama bia mu mutshima bikebesha kudi dimutungila kudi Yudase Iskariote, Yezu wakatela mêyi a mu Misambu adi afila bisama a se: “Udi udia diampa dianyi, mmungambuile tshikankanya.”​—Yowanese 13:18, MM; Musambu 41:9.

Nansha pavuaye ukengakana ne bisama bikole pa mutshi, Yezu wakaleja buondoke bua nyanji yende. Ne dinanga dionso wakafila mamuende kudi “muyidi wakadiye musue.” (Yone 19:26, 27) Pakamonaye tshijadiki tshia dinyingalala munda mua umue wa ku benzavi bakudika ku mutshi ku luseke luende, ne luse luonso Yezu wakamba ne: ‘Newikale nanyi mu mparadizu.’ (Luka 23:43) Tudi mua kumvua bukole bua mpampakenu mu lubila luende elu: “Nzambi wanyi, Nzambi wanyi, wakundekela tshinyi?” (Matayo 27:46) Ne mêyi ende a dipunga ne lufu adi aleja dinanga ne dieyemena bia muoyo mujima: “Tatu, ndi nteka muoyo wanyi mu bianza biebe.”​—Luka 23:46.

Bionso ebi bidi bitupesha dishindika. ‘Bualu bua katuena ne muakuidi munene udi kayi mumanye mua kukenga netu mu matekete etu, kadi tudi ne umue [Yezu] wakateyibua mu malu onso muomumue atudi tuteyibua nawu, kayi ne bubi.’​—Ebelu 4:15.

Dieyemena dia Yehowa

Yehowa katu muanji kunyingalala bua mudiye musungule bikuma-mbila. Uvua mumanye bulamatshi buabu kudiye, kabidi ne luse luonso wakalengulula matekete a aba bavua bapange bupuangane. Kadi uvua mutekemene bua kukumbajabu mudimu wabu. Ne diambuluisha diende bakafika ku dienza nanku.

Tulejayi dieyemena kudi bana betu balume ne bakaji bena bulamatshi. Nebikale anu bapange bupuangane mu ndongoluelu eu wa malu, anu bu tuetu petu. Nansha nanku, katuena ne bua kuangata bana betu bu badi kabayi bakanyine dinanga ne ntema yetu. Paulo wakafunda ne: ‘Butudi nabu, tuetu bantu bakole, mbua kutuala matekete a badi batekete, ki mbua kudisankisha nkayetu.’​—Lomo 15:1; Kolosai 3:13, 14.

Baprofete ba Yehowa bakumvua mpampakenu yonso itudi tumvua. Kadi, bavua ne dieyemena kudi Yehowa, ne Yehowa wakabakuatshisha. Kupita apu, Yehowa wakabapesha tubingila bua kusanka​—kuondo ka muoyo kimpe, dijingulula dia dibanyisha diende, balunda bena bulamatshi bakabakuatshisha, ne dishindika bua matuku atshilualua a disanka. (Ebelu 12:1-3) Tulamatayi petu Yehowa ne dieyemena dia tshishiki eku tuidikija ditabuja dia baprofete ba kale, bantu bavua “ne nyanji bu yetu.”