Ikala pabuipi bua kupingana!
1 “Diyuki dimpe be! Tshiakupua muoyo bua kupingana muaba au to.” Ukadiku muambe mêyi a nunku ne mutantshi kaunengi wewe kupua muoyo muaba uvua muntu muin’au anyi? Bikalabi bia bushuwa, umanye se: mushindu muimpe uudi mua kujadika bua kupinganyina muntu au nkufunda malu adi amutangila pa kabeji.
2 Funda bionso pa kabeji: Amu pautshidi muvuluke malu anuvua bayikile ne muntu uvua muitabe bulelela, ke paudi mua kufunda onso adi ne mushinga akuambuluisha bua kumupinganyina. Funda dîna dia muntu pamue ne makuabu malu akuambuluisha bua kumumanya. Pamutu pa kubuka adrese wa muntu au mu mutu, mufunda pa kabeji ne ikala mushindike se: tshiudi mufunde atshi ntshiotshi menemene. Funda tshiena-bualu tshinuvua bayikile, mvese yonso inuvua babale ne mukanda uuvua mumushile.
3 Biwikale mumushile lukonko lua kuandamuna pawalua kumutangila tshiakabidi, ulufunde pa kabeji. Udiku ne bualu kampanda bua muntu au buudi mufike ku dimanya, bu mudi dîku diende peshi tshitendelelu tshiende anyi? Bikalabi nanku, funda bionso ebi. Nenku, wewe mumanye malu aa bimpe ne uatele musangu uwamupinganyina, nebileje mudiye bushuwa ne muaba mu muoyo webe. Bua kujikija, funda dituku ne dîba diuvua muye kumutangila bua musangu wa kumpala ne diuvua mulaye bua kumupinganyina. Wewe ufunda malu majalame, neuavuluke bimpe ne kuakuikala utamba kupua muoyo bua kupinganyina bantu baudi ulaya nansha.—1 Tim. 1:12.
4 Paudi ujikija kufunda bionso ebi, teka kabeji aka pamue ne bikuabu bintu biutu upatuka nabi mu buambi bu mudi: tshibuta tshiebe, Bible, mukanda wa Comment raisonner, ne mikanda mikuabu bua kikale pabuipi dîba dionso. Bantu baudi kuyi mupete kumbelu udi mua kubafunda pa tubeji tuebe (tua note ya ku nzubu ne ku nzubu) tushilangane ne tuudi ufundila mêna a bantu baudi upinganyina. Ee, pa kumbusha difunda malu aa, bualu bua mushinga buudi ne bua kuenza nkuikala pabuipi bua kupinganyina bantu!
5 Ela meji pa malu adi atangila muntu: Paudi udilongolola bua kuya mu buambi, anji tangila note yebe bua kumanya bantu baudi ne bua kupinganyina. Tuma meji ebe kudi muntu ne muntu ne dianjila kumanya tshia wewe kuamba panuapetangana. Ela meji ku mushindu uudi mua kukolesha dijinga diende dia kulonga Bible. Wewe muenze nunku neupatule bipeta bimpe menemene ne newikale kabidi ne disanka dia bungi mu mudimu webe wa kuamba kua lumu luimpe.—Nsu. 21:5a.
6 Nenku musangu mukuabu uwapeta muntu udi wanyisha bua nuenu kuyikila, kudidingi kuambi ne: ndi mukuate mu mutu dituku dia kumupinganyina to. Funda bionso, tangila malu auvua mufunde, ikala uvuluka muntu au mu meji ebe ne dienzeja bua kupingana kumutangila.