‘Tupeshangane bintu ne tuikale badilongolole bua kubiabanyangana’
1 Kukadi bidimu nkama ne nkama, mupostolo Paulo wakambila Timote bua akankamije bena kuitabuja nende bua “kuenzabo malu mimpe, kuikala babanji mu midimu mimpe, kupeshangana bintu ne kuikala badilongolole bua kuabanyangana bintu ne bakuabo.” (1 Tim. 6:18, Muanda Mulenga Lelu) Paulo wakavuluija kabidi bena Kristo bena Ebelu bua kabapu muoyo bua “kuenzelangana bimpe ne bua kukuatshishangana.” (Eb. 13:16) Bua tshinyi wakafunda mêyi aa? Bualu uvua mumanye se: kuvua ne bua kuikala ‘butumbi ne bunême ne ditalala kudi muntu yonso udi wenza malu mimpe.’—Lomo 2:10.
2 Bu mudi Yehowa Nzambi muikale Mufuki, bintu bionso mbiende Yeye. (Buak. 4:11) Tudi tuanyisha bulelela malu adiye utuenzela ne bintu biende. Nansha mudi bantu ba bungi kabayi bamuleja dianyisha, Mutambe Bunene eu udi amu utungunuka ne kubatekeshila tshianza, upesha bantu bonso bintu bua kukuatshisha muoyo wabu. (Mat. 5:45) Wakafika too ne ku difila Muanende udiye munange bikole bu mulambu bua tumone mua kupeta muoyo wa tshiendelele. Dinanga didibu batuleje edi kadienaku mua kutusaka bua kutekeshila bantu netu tshianza ne kuabanyangana nabu bintu bua tuetu kuleja petu dianyisha anyi?—2 Kol. 5:14, 15.
3 Mbintu kayi bitudi mua kuabanyangana ne bakuabu? Bintu bitudi nabi, ni mbikese ni mbivule, tudi mua kuenza nabi mudimu mu mushindu udi usankisha Nzambi. Kakuyi mpata, tudi basue kukuatshisha mudimu wa Bukalenge wa pa buloba bujima mu mishindu yonso. Tudi bamanye ne: lumu luimpe ntshiûma tshia mushinga mukole tshidi muntu yonso mua kuikala natshi, bualu ‘ludi bukole bua Nzambi bua lupandu.’ (Lomo 1:16) Pa kufila kabiyi ku tshimfula muoyo dîba dietu ne bintu bietu ngondo yonso bua mudimu wa buambi ne wa dilongesha, tudi tupeta mushindu wa kuabanyangana ne bakuabu tshiûma etshi tshia mu nyuma, ne nebibafikishe ku dipeta muoyo wa kashidi.
4 Yehowa udi usanka bikole padiye utumona tuambuluisha bantu badi kabayi ne bintu bia bungi. Udi ulaya bua kutuenzela petu bimpe ne udi kabidi utuvuluija ne: ‘Biuma kabiena bikuatshisha muntu mu dituku dia tshiji tshikole, kadi buakane budi bumupandisha ku lufu.’ (Nsu. 11:4; 19:17) Kukuatshisha mudimu wa Bukalenge ne bintu bitudi nabi ne kuenza kuenzelamu mudimu wa buambi bua lumu luimpe ke mishindu milenga ya dikema itudi mua kuleja ne: tudi tupeshangana bulelela bintu bitudi nabi ne kabidi tudi badilongolole bua kubiabanyangana ne bakuabu.