“Nzambi udi mumanye mua kuenza malu onso”
1 Mudimu munene wa mu tshisumbu tshia bena Kristo nkuyisha mukenji wa Bukalenge. (Mat. 24:14) Mmudimu munene be! Bantu ba bungi batu bela meji ne: bua kuwenza bidi bikengela makuta a bungi kupita atudi nawu. Bakuabu pabu batu bela meji ne: mbikole bua tuetu kuenza mudimu eu bualu bantu batu batuseka, batuluisha ne batukengesha. (Mat. 24:9; 2 Tim. 3:12) Bua dimona dia bena mpata, bantu kabena mua kukumbaja mudimu eu to. Pabi Yezu wakamba ne: “Nzambi udi mumanye mua kuenza malu onso.”—Mat. 19:26.
2 Bilejilu bimpe bia kulonda: Yezu wakatuadija mudimu wa buambi munkatshi mua bantu bavua kabayi nansha bamusue. Baluishi bende bakamutshimbisha mu mishindu yonso bua kumupangisha bua kenji mudimu wende, kumufikisha too ne ku makenga ne ku lufu. Kadi, Yezu wakamba ne dishindika dionso ku ndekelu ne: “Ndi mumane kutshimuna ba pa buloba.” (Yone 16:33, Muanda Mulenga Lelu) Ki mbualu buvua bantu kabayi belele meji anyi?
3 Bayidi ba Yezu bakaleja pabu dikima ne lukunukunu mu mudimu wa budimi. Ba bungi bakadia mututu, kubuela mu maloko ne kufikabu too ne ku dishipibua. Nansha nanku, bavua ‘basanka bualu bakabadibua ne: mbakane bua kufuishibua bundu bualu bua dîna dia Yezu.’ (Bien. 5:41) Bakayisha lumu luimpe ‘too ne ku mfudilu kua buloba.’—Bien. 1:8; Kolos. 1:23.
4 Mua kuyisha bimpe lelu’eu: Tuetu petu tudi tuyisha ne lukunukunu lumu luimpe nansha mudiku ntatu idi imueneka bu idi kayiyi kutshimuna. Nansha batukandika, batukengesha, batuela mu maloko anyi batuenzela malu kayi onso bua kulekesha mudimu wetu, tuetu tudi amu bateke tuenda tuya. Ntshintu kayi tshidi tshituambuluisha bua kuenza mudimu eu? “Kabiena bua bungi bua masalayi, anyi bua bukole, kadi mbua Nyuma wanyi; Yehowa wa misumba udi wamba nunku.” (Zek. 4:6) Bu mudi Yehowa muikale netu, kakuena bualu budi mua kuimanyika mudimu wetu to!—Lomo 8:31.
5 Patudi tuyisha, katutshinyi muntu, katumvu buôwa anyi katudiangatshi bu bantu badi kabayi bakumbane bua kuwenza to. (2 Kol. 2:16, 17) Kudi malu a bungi adi atusaka bua kuya batangile kumpala, tuyisha anu lumu luimpe lua Bukalenge. Ne diambuluisha dia Yehowa, netuenze tshidi tshimueneka bu ne: ‘ntshikolele bantu’!—Luka 18:27, MML.