Enza malu mimpe bua bakutumbishe!
1 “Mbantu ba ditalala dintu tshiyi muanji kumona mu bantu bakuabu to.” “Bidi bienza disanka bua kuikala ne bantu ba nunku.” Etshi ntshilejilu tshia mêyi malenga adi umvuija mutudi bulongolodi bua tshitembu, avua mamba tshidimu tshishale kudi aba bavua bamone Bantemu ba Yehowa panyima pa mpungilu ya distrike ivua mienzeke. (Nsu. 27:2; 1 Kol. 4:9) Ndekelu wa bionso, butumbi bua nunku budi buya kudi Yehowa. (Mat. 5:16) Tudi ne mushindu mukuabu mulenga wa kutumbisha Nzambi mu Mpungilu wa Distrike wa “Balongeshi ba Dîyi dia Nzambi” wa tshidimu etshi.
2 Tshidimu tshionso batu batuvuluija mu bulenga ngikadilu muimpe utudi ne bua kuikala nende mu mpungilu. Bua tshinganyi? Bualu, bu mudi ngikadilu, mvuadilu ne bibidilu bia bena panu bienda amu binyanguka, katuena basue bua bilue kutunyanga ne tuetu to. Katuena basue bua lumu luimpe lutudi nalu lunyanguke to. (Ef. 2:2; 4:17) Tuvulukayi malu adi alonda aa.
3 Enza malu mimpe—mu bikondo bionso: Mbatumanye pa buloba bujima bua ngikadilu wetu muimpe. (1 Pet. 2:12) Muaba wonso utudi mua kuikala, mu nzubu muetu, ku magazen peshi mu tshisalu, ngikadilu wetu wa tshitembu udi mua kumanyisha bilenga ne: tudi balongeshi bimpe ba Dîyi dia Nzambi. Mutudi tuenda ne dîna dia Yehowa, tudi ne bujitu bunene bua kubenga kupendesha dîna edi ni nku ngikadilu wetu ni nku ngakuilu wetu. Ngikadilu wetu mulenga udi mua kukoka bantu bakuabu bua balue batendeledi ba Yehowa.—Tangila 1 Pet. 3:1, 2.
4 Bantu badi batutangila batu banyisha padibu bamona bana betu batekete bikale ne kanemu ne butumike. (Ef. 6:1, 2) Bua bualu ebu, baledi badi ne bua kuikala batabalela ngikadilu ya bana babu. Badi ne bujitu bua kuikala kutangila bana dîba dionso. Ebu mbujitu bubapesha kudi Nzambi. (Nsu. 1:8) Badi ne bua kubabela bua kabikadi baya dîba dionso tshianana tshianana ku nkumba pakadi mpungilu mumane kutuadija to. Adi ki ndîba dia kunaya to. Badi ne bua kusomba muaba udi baledi babu, bateleja ne balonga pabu mua kutshina Nzambi mulelela.—Dut. 31:12, 13.
5 Enza malu mimpe—pa kutabalela mvuadilu ne ndengejilu webe wa mubidi: Tshidimu tshishale, kunyima kua mpungilu wa distrike mukuabu, mufundi wa tshikandakanda kampanda wa mu tshimenga tshinene wakafunda ne: “Bualu budi butambe kunsankisha kudi Bantemu, nngikadilu wabu. Ndisanka kayipu dia kumona bantu bungi nunku benza malu ne bunême ne kanemu! Nkama ne nkama ya mêku a bantu bavuale bimpe; bantu ba makoba onso ne bisa bionso, babuela mu stade mu bupole. Bishilangane bikole ne bitubu benza kudi bisumbu bia bantu bakuabu batu babuela pa tshibidilu mu stade eu. Bushuwa, Bantemu mbashilangane bikole ne bisumbu bia bantu bakuabu bonso aba. Bia dibungama, bantu batu ne ngikadilu mibi padibu bikale mu bisumbu binene. . . . Bantemu ba Yehowa buobu bavua benza bantu disanka pa kubamona.” Tuenzayi mushindu wa kubenga kupepejija malu a mu nyuma adi enzeka mu mpungilu ni nku mvuadilu peshi ku ngikadilu wetu.—Filip. 1:10; 1 Tim. 2:9, 10.
6 Enza malu mimpe—pa kuambuluisha badi kabayi ne mushindu: Malu atudi tumvua adi aleja ne: bana betu bakuabu kabavua babuele mu mpungilu bidimu bishale ebi bualu kabavua ne bilamba bimpe bia kuvuala to. Kadi tshia kumanya ntshia se: nansha bilamba bietu kabiyi bia mushinga muvule, tshidiku tudi ne bua kudienzeja bua kubuela mu mpungilu. Tshidi ne mushinga nkudia biakudia bia mu nyuma bua kupeta bukole. Padi mu tshisumbu tshietu muikale bantu badi kabayi ne mushindu, bakulu badi mua kukeba tshidibu mua kuenza bua kubambuluisha. Bushuwa, dijinga dietu ndia kumona muntu yonso wa mu tshisumbu tshietu mu mpungilu. Yakobo 2:15-17 udi ufila mubelu pa mushindu utudi ne bua kuambuluisha bena Kristo netu badi ne lutatu. Bituikala katuyi ne mushindu wa kubakebela bilamba bipiabipia, padiku mushindu, tudi mua kubapetela nansha bia nkombo, kubapesha peshi kubasombesha bimue bia ku bitudi nabi.
7 Enza malu mimpe—Dîba dia batismo: Badi batambula badi ne bua kunemeka tshikondo etshi. Kuvuala bilamba biakane bia kubuela nabi mu mâyi kudi kuleja mudi muntu wangata tshikondo etshi bu tshia tshijila. Nebitambe buimpe bu balombodi ba malonga a Bible mua kukonkonona ne balongi babu kumpala kua kubuela mu mpungilu tshiena-bualu tshia “Nkonko ya babadi” mu Tshibumba tshia Nsentedi tshia dia 1 Tshisanga 1995.
8 Enza malu mimpe—Pa kuikala ne ngikadilu mimpe: Ngikadilu mimpe idi ikonga nsombelu mujima wa muntu. Ku dilolo padi mpungilu ujika, dîba ditudi tuangata mashinyi bua kualukila kumbelu, tudi ne bua kuleja ngikadilu mimpe pa kuepuka difuilakana bua kubuela mu mashinyi, kadi pa mutu pa kuenza malu mushindu’eu, mbimpe kuanji kushila bakulakaje, bamamu ne bana batekete muaba bua babuele kumpala kuetu. Tudi kabidi tuleja ngikadilu mimpe patudi tulama muaba utudi tuenzela mpungilu ne mankenda. Tuetu bamatshishe bintu panshi dîba dituvua tudia mu dikisha, peshi tuetu bamone mabeji panshi, lungenyi luetu lua bena Kristo lua kuikala ne mankenda nelutusake bua kubiangula ne kuya kubiela muaba udibu balongolole bua bintu bia bukoya. Baledi badi pabu ne bua kulongesha bana bua bamanye mua kulama muaba utudi tutendelela ne mankenda.
9 Bulongame buetu ne ngikadilu wetu wa ditshina Nzambi bidi bimanyisha malu a buena-Kristo atudi tuitabuja ne biambuluisha bantu ba muoyo muimpe bua kuitababu bulelela. Nunku, ‘tuenzayi malu mimpe’ bua batutumbishe patudi tubuela mu Mpungilu wa Distrike wa “Balongeshi ba Dîyi dia Nzambi” wa musangu eu.—Lomo 13:3.