Tufikishayi lumu luimpe kudi bantu bavule menemene

PANGAKELA meji bua bantu ba mu ditunga dianyi, ngakajingulula ne: bavule mbamanyine Bantemu ba Yehowa anu ku ngumu ya ku tudiomba. Ngakela meji ne: bidi bikengela kumonangana ne bantu aba bua bamanye Bantemu ba Yehowa ne tshidibu bitabuja menemene. Kadi mmunyi mumvua mua kuambuluisha? Bayanyi mmukulu muena nkristo, ne wakampesha buludiki ne ngenyi bia meji.

Tuakapeta lungenyi lua nshindamenu mu tshiena-bualu tshia: “Des périodiques qui apportent un véritable réconfort” (Bibejibeji bidi bifila busambi bulelela), tshipatula mu nimero wa tshibejibeji tshia Réveillez-vous! wa dia 8 Tshiongo 1995. Pa bidi bitangila mudimu wa Ntemu kampanda, tshiena-bualu etshi tshidi tshiamba ne: “Udi muikale wenza madikolela bua kusangisha kopi ya kale ya bibejibeji bia Réveillez-vous! bidi Bantemu bakuabu bunguije mu nzubu. Pashishe udi ukumbula kumpanyi idiye mumone se: idi mua kuleja disankidila dia pa buadi pa bimue bia ku biena-bualu.”

Ne diambuluisha dia bayanyi, diakamue ngakasangisha nkama mivule ya kopi ya bibejibeji. Ku kopi eyi ngakasungulaku biena-bualu bishilashilangane bivua biakanyine bantu bamvua ne bua kupetangana nabu.

Pa kutumika ne mukanda udi ne nimero ya telefone ne mikanda idi ne mêna a bantu, ngakenza liste wa mpitadi, nzubu idi bansonga benyi balala, ne nzubu ya dilamina bakengi. Ngakafunda kabidi balombodi ba malu a dijiikangana, baludiki ba tulasa ne bapeshanganyi ba mibelu, bakonkononyi ba bidi bikebesha lufu, ne banene ba nzubu ya maloko ne ba tubadi. Pa liste wanyi pavua ba-direktere ba malongolodi a malu a bakuatshiki ba maluvu ne banu ba bintu bia lulengu, malongolodi a malu a nyunguluilu, a balema ne a badi bapete ntatu bua mvita, ne a bukebuludi mu malu a biakudia. Tshiakalengulula balombodi ba biro bia malu a nsombelu muimpe, midimu ya diambuluisha bantu ne malu a dîku.

Ntshinyi tshimvua mua kuamba?

Tshintu tshia kumpala tshimvua ngenza mu dikumbula tshivua tshia kudimanyisha patoke. Pashishe mvua ngamba ne: dikumbula dianyi didi mua kuangata anu minute mikese.

Diakamue pamvua mpetangana ne muntu mpala ne mpala, mvua ngamba ne: “Ndi Ntemu wa Yehowa. Kadi, tshiena mulue muaba eu bua kuyukila malu a Nzambi, muanda udi mua kuikala kauyi muakanyine munkatshi mua mêba a mudimu.” Pa tshibidilu nsombelu uvua ulua mupepele bikole. Pashishe, mu diakaja mêyi anyi ne nsombelu uvuaku, mvua ntungunuka ne: “Dikumbula dianyi didi ne tubingila tubidi. Ka kumpala: ndi musue kuleja dianyisha dianyi bua mudimu udi biro bienu bilongolola. Mene, ki mbualu bua kupepeja padi muntu ujimija dîba ne makanda ende bua diakalenga dia bantu. Bushuwa madikolela enu mmakanyine ka-lumbandi.” Mu nsombelu mivule bantu bamvua nyukila nabu mu mushindu’eu bavua bakema.

Mpindieu muntu uvua pamu’apa udikonka tshivua mua kuikala kabingila kibidi ka dikumbula dianyi. Mvua ntungunuka ne: “Kabingila kibidi ka dikumbula dianyi nka se: Mu tshibejibeji tshietu etshi tshia Réveillez-vous!, tshipatula pa buloba bujima, ndi musungule bimue biena-bualu bidi bitangila nangananga mudimu wenu ne ntatu yawu. Ndi mujadike se: newanyishe bua kumanya mudi tshibejibeji etshi tshia buloba bujima tshiakula bua ntatu eyi. Ndi nsanka bua kukushila kopi eyi.” Misangu mivule bavua bangambila ne: madikolela anyi avua manyisha.

Bipeta bidi bikemesha ne bisankisha

Pangakakuata mudimu ne ngenzelu eu, bantu bavule bakanteleja bimpe; anu muntu umue pa bantu 17 ke wakabenga. Mvua ne malu mamona mavule avua akemesha ne asankisha.

Tshilejilu, mumane kuteta misangu inayi ne muindile ne lutulu luonso, ngakafika ku dipetangana ne mutangidi wa tulasa tua distrike dijima. Uvua ne mudimu wa bungi. Kadi, uvua mutambe kuikala muena bulunda ne wakayukila nanyi mutantshi. Pankavua ngumbuka, wakamba ne: “Ndi nganyisha bushuwa madikolela ebe, ne kakuyi mpata nembale mikanda yebe yonso ne ntema.”

Musangu mukuabu, ngakakumbula kabadi ka distrike, meme kupetangana ne nzuji munene, muntu mushindame. Pangakabuela mu biro biende, wakambulula mêsu pa mikanda yende kuntangila ne tshiji.

Wakamba ne dîyi dia tshikisu ne: “Mêba a mudimu adi anu mu Dibidi mu dinda, ne dîba adi nengikale musulakane bua malu kayi onso.”

“Suaku umfuile luse bua mundi mulue dîba didi kadiyi diakanyine,” ke mungakandamuna ne lukasa luonso ne meme kusakidila ne: “Bushuwa, nengikale ne disanka bua kualukila dîba dikuabu. Kadi dikumbula dianyi kadiena bushuwa ditangila malu a mudimu.”

Nzuji uvua mpindieu ne dijinga dia kumanya. Ne dîyi dilenga, wakebeja tshimvua nkeba. Ke meme kuambulula ne: mvua ne bua kukumbula tshiakabidi mu Dibidi.

Wakankemesha pakasuminyinaye ne: “Bu wewe mua kusua, somba. Udi ukeba tshinyi?”

Tuakayukila ne musangelu, ne wakalomba luse bua muvuaye kayi muleje bulunda ku mbangilu bualu uvua bushuwa ne mudimu muvule.

Panyima pa mutantshi nzuji wakangebeja ne: “Udi mumanye tshintu musuile Bantemu ba Yehowa anyi? Badi ne mêyi-maludiki mashindame bimpe adibu kabayi basesuka. Hitler wakenza muende muonso, kadi Bantemu kabakaya mu mvita nansha.”

Patuakabuela bubidi buetu mu bimue biro, ba-sekretere bakatujingulula. Pashishe sekretere mulombodi wakamba bimpe ne dîyi dikole ne: “Mfumu kêna umonangana ne bantu badi ne bilumbu nansha.”

Ngakandamuna ne lutulu luonso ne: “Kadi neamonangane netu bualu tudi Bantemu ba Yehowa. Katuena balue ne tshilumbu, ne dikumbula dietu kadiakunenga minute mipite pa isatu.” Mu muoyo wanyi ngakasambila bikole ne: “O Yehowa, bu wewe mua kusua muanda eu upiteku bimpe!”

Sekretere wakandamuna ne kalèngù ne: “Bimpe, nanku ndi mpima.” E kuyaye. Panyima pa minute bu ibidi, ingakamona bu muya kashidi, wakapatuka ne mfumu muine wenda umulonda. Kayi muambe bualu nansha bumue, wakatulombola batangile mu biro biende, kupita bibambalu bikuabu bibidi.

Patuakatuadija kuyukila, wakatamba kulua muena bulunda. Wakitaba ne budisuile buonso nimero ya pa buayi ya tshibejibeji tshia Réveillez-vous! patuakayifila. Tuakasakidila Yehowa bua mpunga eu wa kufila bumanyishi buimpe budi butangila tshipatshila tshia mudimu wetu.

Pandi ngela meji ku malu malenga mamona, ndi mufike ku dijingulula tshishiki bualu buakamba mupostolo Petelo ne: ‘Bulelela, ndi njingulula ne: Nzambi kêna ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’ (Bienzedi 10:34, 35) Disua dia Nzambi ndia se: bantu ba nsombelu, miakulu anyi mianzu yonso bapete mushindu wa kumanya dilongolola diende bua bukua-bantu ne bua buloba.​—Bilonda kudi umue wa ku babadi betu.