Kalasa ka Mudimu wa Teokrasi bua 2002
1 Bantu ba bungi batu bamona dimanya kuakula anu bu bualu butu buenzeka pa tshibidilu budi kabuyi bukengela kuelela nansha tuasakidila to. Pabi, diakula ndipa dia kudi Yehowa. Didi ditupesha mushindu wa kuyukila ne bakuabu ne kuleja ngenyi yetu ne meji etu popamue. Tudi kabidi mua kutumbisha Nzambi wetu ne tshipedi tshietu tshia diakula.—Mus. 22:22; 1 Kol. 1:4-7.
2 Bantu balume, bakaji ne bana mbalongesha mu Kalasa ka Mudimu wa Teokrasi bua kumanya mua kumanyisha dîna dia Yehowa. (Mus. 148:12, 13) Programe wa kalasa bua 2002 udi ne biena-bualu bivule bishilashilangane bia malu a mu Bible bidi mua kutuambuluisha tuetu bine ne bia tuetu kuenza nabi mudimu mu buambi. Tuetu tulongolola kalasa aka ne tuenza midimu idibu batupeshamu, netulue balongeshi ba Dîyi dia Nzambi ba mamanya mavule.—Mus. 45:1.
3 Bala Bible dituku dionso: Tuetu bikale ne Bible pabuipi, netuikale mua kumubala dîba dionso ditudi katuyi ne mudimu. Ba bungi ba kutudi batu ne dîba ndambu munkatshi mua dituku didibu mua kulama bua kubala. Bidi biambuluisha menemene padi muntu ubalaku nansha dibeji dimue ku dituku, ke tshidi tshikumbanyine kuenza bua kulonda programe wa dibala dia Bible udibu bafile mu kalasa aka!—Mus. 1:1-3.
4 Kubala Bible bimpe kudi mua kutuambuluisha bua malu atudi tuamba kulengawu mutshima wa badi batuteleja ne kubasaka bua kutumbishabu Yehowa. Bana betu ba balume badi benza mudimu No. 2 mu kalasa aka badi ne bua kuambulula tshitupa tshibapesha ne dîyi dikole misangu ne misangu. Mutangidi wa kalasa neabele kalumbandi ne kubapesha mibelu bua balengeje mushindu wabu wa dibala.
5 Enza mudimu ne mukanda wa Comment raisonner: Mudimu No. 3 ne No. 4 mmiashila pa mukanda wa Comment raisonner. Ba bungi ba kutudi badi ne bua kudienzeja bikole bua kuikala kuenza mudimu ne tshia mudimu tshidi tshikuatshisha etshi mu buambi. Bana betu ba bakaji badi ne bua kusungula nsombelu anyi kadre ya dienzela mudimu idi miakanyine malu a mu teritware. Mutangidi wa kalasa udi ne bua kuteya ntema mikole ku mushindu udi balongi balongesha ne babadila bantu Bible.
6 Kalasa ka Mudimu wa Teokrasi katuambuluisheku tuetu bonso bua tutungunuke ne kuenza mudimu ne tshipedi tshia diakula tshidi tshikale bushuwa dipa dia kudi Yehowa Nzambi!—Mus. 34:1; Ef. 6:19.